Yehova Oku Tata
Yehova Oku Tata
‘Ovitangi viene viosi vi yeki ku Yehova, momo eye ovu lava.’—1 PETULU 5:7.
1. Ovovangi api a lekisa okuti Yehova la Satana omanu vamue va litepa?
YEHOVA la Satana, omanu vamue va litepa. Omunu wosi o yongola oku kuata ukamba wocili la Yehova, o suvukiwa Leliapu. Oku litepa ku sangiwa pokati ka Yehova la Satana, kua lomboluiwa velivulu limue. Kueci catiamẽla kolonjanjo via Satana ndomo Embimbiliya li lombolola kelivulu lia Yovi, elivulu limue lia sonehiwa kunyamo wo 1970 li popia okuti: ‘Upange wa Satana, woku ñuala ñuala voluali luosi oku sandiliya omanu oco a va yapuise. Upange waye, wa litepa lowu wa ‘Yehova,’ okuti ovaso aye a ñuala ñuala kilu lieve oco a pamise omanu vosi va kasi oku linga eci ciwa. (2 Asapulo 16:9) Satana wa tomba ohenda yomanu vakuesunga, kuenje eye o kasi loku amamako oku seteka esunguluko liavo, vongave yina ya tumbikiwa la Yehova. Pole, Satana ka pondola oku pitahãla ongave yaco. Ocili okuti, ovina evi via litepa calua!—Yovi 1:6-12; 2:1-7.
2, 3. (a) Ndamupi ondaka “Eliapu,” velimi lia Va Heveru ya lekisia ciwa eci yi lomboloka omo liocitangi ca pita la Yovi? (b) Ndamupi Embimbiliya li lekisa okuti Satana o kasi oku amamako oku lundila omanu va Yehova palo posi?
2 Ondaka “Eliapu,” velimi lia Va Heveru yi lomboloka “ukuakulundila,” “ukualombonde.” Elivulu lia Yovi, li lombolola okuti, Satana wa lundila Yovi, omunu wa Yehova haeye ukuekolelo okuti, o kasi oku vumba Yehova omo liolonjongole viaye muẽle. Eye wa lundila Yovi poku popia hati: “Yovi hẽ, wa ku sumbila ño ocali, ove u Suku?” (Yovi 1:9) Ulandu velivulu lia Yovi, u lekisa okuti, ndaño Yovi wa pita voloseteko lohali yalua, pole eye wa lekisa ukamba wocili ku Yehova. (Yovi 10:9, 12; 12:9, 10; 19:25; 27:5; 28:23-28) Noke yolohali viaco, eye wa popia ku Suku hati: “Oku ku yeva letuĩ nda ku yeva yeva, cilo puãi iso liange lia ku mõla.”—Yovi 42:5.
3 Anga hẽ Satana wa liwekapo oku lundila omanu va Suku tunde koloneke via Yovi? Sio, ka liwekelepo. Elivulu Liesituluilo li lombolola okuti, koloneke vilo via sulako, Satana o kasi oku amamako loku lambalala olombuavekua via Kristu kuenda oku lambalala akamba vavo vakuekolelo vana va kuete elavoko lioku kala palo posi. (2 Timoteo 3:12; Esituluilo 12:10, 17) Omo liaco, etu Tuakristão vocili, tu sukilavo oku pokola ku Yehova Suku yetu, poku u vumba locisola cocili oco alundi a Satana a limbukiwe. Nda tua kuama onjila eyi, tuka sanjuisa utima wa Yehova.—Olosapo 27:11.
Yehova o Sanda Olonjila Vioku tu Kuatisa
4, 5. (a) Ca litepa la Satana, ndamupi Yehova a tenda omanu vaye palo posi? (b) Nye tu sukila oku linga nda tu yongola oku taviwa la Yehova?
4 Eliapu li kasi oku ñuala ñuala voluali, loku sandiliya umue oco o yapuise okuti o nyõla ekolelo liaye. (Yovi 1:7, 9; 1 Petulu 5:8) Pole, Yehova o kuatisa vana va sukila ongusu yoku tamalãla. Uprofeto Hanani wa sapuila Soma Asa hati: “Ovaso a Yehova a vanja vanja kuosi kilu lieve ha lekisa unene waye kuvakuavitima vio sungulukila.” (2 Asapulo 16:9) Hakulitepakuoko ku kasi pokati ka Satana una o sandiliya omunu a yongola oku yapuisa kuenda ekuatiso liocisola Yehova a siata oku eca!
5 Yehova ka tu lavulula oco a kũlĩhe akandu etu kuenda ovisimĩlo vietu. Ukualosamo wa soneha ndoco: ‘A Yehova, nda ove wa patekelele olongole vietu, helie nda o tẽla oku talama?’ (Osamo 130:3) Etambululo lieli liokuti: Lomue nda wa tẽla oku talama. (Ukundi 7:20) Nda tua lekisa ukamba wocili ku Yehova lutima wetu wosi, eye oka tu kuatisa oku kuata elomboloko okuti ka tu pisa, pole oka limbuka elikolisilo lietu kuenda oka tambulula olohutililo vietu vioku pinga ekuatiso longecelo kokuaye. Omo liaco, upostolo Petulu wa soneha ndoco: “Ovaso a Ñala [Yehova] a lete vakuesunga, lovatui aye a yevelela olohutililo viavo. Puãi ocipala ca Ñala [Yehova] ci nyumalela olondingaĩvi.”—1 Petulu 3:12.
6. Ndamupi akandu a Daviti a tu lembeleke loku tu lungula?
6 Soma Daviti wa kala omunu umue ka lipuile, okuti wa lingile ekandu limue linene. (2 Samuele 12:7-9) Pole, eye watiamisilile utima waye ku Yehova poku amẽla kokuaye vohutililo. (Osamo 51:1-12) Ndaño okuti Daviti weya oku pita lovitangi vialua omo liekandu a lingile, Yehova wa yeva ohutililo yaye, kuenje wo wecela. (2 Samuele 12:10-14) Ulandu owu u tu ĩha elembeleko liocili kuenda wa linga elungulo kokuetu. Ci sanjuisa calua oku kũlĩha okuti, Yehova o kuete onjongole yoku ecela akandu etu nda tua likekembela lutima wetu wosi. Pole, tu sukila oku kũlĩha okuti, kakandu kua siata oku iyilila ovitangi vialua. (Va Galatia 6:7-9) Nda tu yongola oku kuata ukamba wocili la Yehova, tu sukila oku yuvula ovina viosi vi pondola oku u sumuisa.—Osamo 97:10.
Yehova o KokelaOmanu Vaye Kokuaye
7. Omanu vapi Yehova a lete, kuenda ndamupi Eye a va kokela kokuaye?
7 Daviti wa soneha velivulu liaye Liolosamo ndoco: “Yehova, ndaño unene ca piãla, haimo ivaluka [omanu vomboka]. Vakuepela puãi o va vanjela ocipala.” (Osamo 138:6) Handi vali, umue ukuavo ukualosamo wa popiavo hati: “Wa li soka la Yehova Suku yetu helie? Wa tumbika ocalo caye Kilu, kuenje o petamela oku vanja evi vi kasi kilu, levi vi kasi posi. O pindula omumbe yi kasi voneketela, loku votola osuke yi kasi keyala.” (Osamo 113:5-7) Ocili okuti, Ululiki wetu Wavelapo, o petamẽla palo posi, kuenda ovaso aye a lete “ambombe” okuti ‘omanu vana vomboka’ va kasi oku ‘kapiwa ondimbukiso kolopolo viavo omo lioku lisiõsuĩla loku leñaila ovina vĩvi vi kasi oku lingiwa.’ (Esekiele 9:4) Yehova o kokela kokuaye omanu vaco lekuatiso Liomõlaye. Eci Yesu a kala palo posi, wa popia hati: “Lomue o tẽla oku iya kokuange, te Isia wa numa u koka. . . . Lomue o tẽla oku iya kokuange te nda co wihiwa la Isia.”—Yoano 6:44, 65.
8, 9. (a) Momo lie vosi yetu tu sukilila oku tiamẽla ku Yesu? (b) Ocina cipi ca velapo catiamẽla keliangiliyo liocisembi?
8 Omanu vosi ci tava okuti va kokiwila ku Yesu oco va lekise ekolelo kocilumba cocisembi ci yovola, momo ovo va citiwa okuti vakuakandu haivo va litepa ku Suku. (Yoano 3:36) Ovo va sukila oku lisunguluisa la Suku. (2 Va Korindo 5:20) Suku ka kevelela okuti vakuakandu va pinga kokuaye oco eye a linge eliangiliyo limue liecelela oku lisanga laye oco ovo va kuate ombembua laye. Upostolo Paulu wa soneha ndoco: ‘Suku wa tu muisa ocisola caye okuti, osimbu tua kala vakuakandu oco Kristu a tu fila. Momo, nda osimbu tua kaile ovanyali va Suku, tua inalisua kokuaye lokufa Kuomõlaye siti, cilo, omo tua inalisua ale, ci piãla vali oku popelua lomuenyo womõlaco.’—Va Roma 5:8, 10.
9 Upostolo Yoano wa kũlĩhĩsa ciwa uvangi waco wocili okuti, Suku o yongola oku lisunguluisa lomanu poku soneha ndoco: “Ocisola ca Suku ca moleha ocili kokuetu omo a tuma Omolaye wongunga voluali ha tu muila omuenyo kokuaye. Omo hetuko tua sola Suku, puãi Suku wa tu sola etu, kuenje wa tuma Omõlaye ha lingi ocitundasonde cakandu etu, oco ca lomboloka ocisola.” (1 Yoano 4:9, 10) Ocili okuti, Suku eye tete wa kuata onjongole yoku lekisa ocisola, omanu havoko. Ove hẽ, ku yongola oku kuata ukamba wocili la Suku una wa lekisa ocisola calua komanu ‘vakuakandu haivo ovanyãli vaye’?—Yoano 3:16.
Tu Sukila Oku Sandiliya Yehova
10, 11. (a) Nye tu sukila oku linga oco tu sandiliye Yehova? (b) Ndamupi tu pondola oku tenda oluali lulo lua Satana?
10 Ocili okuti, Yehova ka tu kisika oco tu amẽle kokuaye. Etu tu sukila oku u sandiliya ‘lelavoko liokuti, nda tua ci linga lonjongole yocili, tu u sanga. Kuenje, eye ka kala vali ocipãla letu.’ (Ovilinga 17:27) Tu sukila oku limbuka esunga lia Yehova okuti vosi yetu tu pokola kokuaye. Ondonge Tiago wa soneha ndoco: “Pokoli ku Suku. Tamalali leliapu kuenje liu tili. Ameli ku Suku kuenje eye amela kokuene. A vakuakandu, yelisi ovaka ene. A vakuavitima vivali, puisi ovitima viene evĩho.” (Tiago 4:7, 8) Ka tuka kuati atatahãi koku tamalãla Leliapu oco tu pokole lika ku Yehova.
11 Eci ci lomboloka okuti, tu sukila oku kala ocipãla lovina viosi vĩvi violuali lulo lua Satana. Tiago wa sonehavo ndoco: “Ka wa kũlĩhili okuti ukamba wa livali loluali owo ukuse la Suku? Oco, wosi o yongola oku linga ekamba lioluali [lulo] o lilingisa unyali wa Suku.” (Tiago 4:4) Omo liaco, nda tu yongola oku kala ekamba lia Yehova, ci tava okuti tu lavoka oku suvukiwa loluali lulo lua Satana.—Yoano 15:19; 1 Yoano 3:13.
12. (a) Olondaka vipi vi sanjuisa Daviti a soneha? (b) Elungulo lipi Yehova a tu ĩha lekuatiso liuprofeto waye Asariya?
12 Eci tu lambalaliwa loluali lulo lua Satana, tu sukila oku amẽla ku Yehova lohutililo oco a tu kuatise. Daviti, una wa tililile ku Yehova, wa soneha olondaka vielembeleko ndoco: “Yehova o kasi ocipepi la vosi vo vilikiya, okuti vo vilikiya ocili. O muisa vosi vo sumbila evi va yongola. O yeva uteto wavo, o va popela. Yehova o silamela vosi vo sole, olondigaĩvi puãi o vi nyõla.” (Osamo 145:18-20) Osamo eyi, yi lekisa okuti, Yehova o pondola oku tu yovola eci omunu lomunu pokati ketu a pita lovitangi, kuenda, eye oka popelavo omanu vaye vosi kotembo ‘yohali ya piãla.’ (Esituluilo 7:14) Yehova oka linga ekamba lietu liocili nda etu tu amẽla kokuaye. Lekuatiso ‘liespiritu lia Suku,’ uprofeto Asariya wa soneha olondaka vina tu tenda okuti viocili muẽle, poku popia hati: “Yehova o kala lene osimbu ene vu kalavo laye, kuenje nda vu u sandiliyi eye o tava oku sangiwa lene, puãi nda ene vu u yanduluki eye u yandulukivo.”—2 Asapulo 15:1, 2.
Tu Sukila Oku Tava Okuti Yehova o Kasiko Muẽle Ocili
13. Ndamupi tu pondola oku lekisa uvangi wokuti Yehova o kasiko muẽle ocili?
13 Upostolo Paulu wa soneha eci catiamẽla ku Mose hati, “wa pandikisa ndu o lete una ka muiwa lovaso ositu.” (Va Heveru 11:27) Ocili okuti, Mose lalimue eteke a muĩle Yehova. (Etundilo 33:20) Pole, ekolelo eye a kuatela Yehova, lia kala soketi u lete muẽle lovaso aye. Cimuamue haico ca pita la Yovi okuti, noke yolohali a liyaka lavio, ekolelo liaye ku Yehova lieya oku livokiya calua. Kuenje, Yehova ku Yovi wa kala nda Suku una ecelela omanu vaye vo kolela oku pandikisa kolohali momo eye lalimue eteke a va yanduluka. (Yovi 42:5) Kua lekisiwa uvangi wokuti, Enoke la Noha ‘va endaenda la Suku.’ Ovo va ci linga poku tava kovina viosi vi sanjuisa Suku kuenda oku pokola kokuaye. (Efetikilo 5:22-24; 6:9, 22; Va Heveru 11:5, 7) Nda tu tava okuti Yehova o kasiko muẽle, ndeci Enoke, Yovi la Mose va linga, tuka ‘kapa kokuaye’ cosi tu linga komuenyo wetu, kuenje eye ‘oka pengulula ciwa olonjila vietu.’—Olosapo 3:5, 6.
14. Ondaka ‘oku kakatela’ ku Yehova yi lomboloka nye?
14 Osimbu handi va Isareli ka va iñilile Vofeka Yohuminyo, Mose wa va lunguile hati: ‘Kuami Yehova, Suku yene, loku u sumbila. Pokoli kovihandeleko viaye, loku sumbila ondaka yaye, Eye muẽle ene u sukila oku vumba loku kakatela kokuaye.’ (Esinumuĩlo 13:4) Ovo va sukilile oku kuama Yehova, poku u sumbila, loku pokola, kuenda oku kakatela lika kokuaye. Ndomo ondaka ya pongoluiwa palo hati ‘oku kakatela,’ umue wa siata oku konomuisa Embimbiliya wa lombolola okuti, “ondaka eyi velimi lia Va Heveru yi lomboloka ukamba umue wocili.” Ukualosamo wa soneha ndoco: “Ukamba wa Yehova u kasi lava vo sumbila.” (Osamo 25:14) Etu tu pondolavo oku lekisa ukamba waco ku Yehova, nda tuo tenda okuti o kasiko muẽle poku lekisa ocisola cocili kokuaye loku likandangiya oco ka tuka linge ocina cimue cu sumuisa.—Osamo 19:9-14.
Ove hẽ o Tava Okuti o Kasi Oku Tatiwa la Yehova?
15, 16. (a) Ndamupi Osamo 34 yi lekisa ndomo tua siata oku tatiwa la Yehova? (b) Nye tu sukila oku linga, nda ka tu pondola oku ivaluka ovina viwa Yehova a tu lingila?
15 Onjanjo yimue Satana a siata oku kuama, oku tu vetiya okuti tu kuata ovisimĩlo viñi viñi oco ka tuka ivaluke okuti Suku yetu Yehova o kasi oku tata ciwa omanu vaye vo kolela. Soma Daviti, una wa vialele kofeka yo Isareli eci eye a kala locitangi cimue ci koka ohele yalua, wa limbukile ndomo Yehova a lekisa epondolo lioku popela omanu vaye . Eci eye a likembisile uveyi wuyui kovaso ya Akisi o soma yo kofeka yo Gati, eye, noke weya oku imba ocisungo cimue ca fina ci sangiwa kelivulu Liolosamo, muna eye a kongela olondaka viekolelo liaye hati: “Va kemainye Yehova kumuamue lame. Tu pandiyili pamosi onduko yaye. Nda sanda Yehova kuenje wa nambulula, wa mopela kovinjoko viange viosi. Ungelo wa Yehova o ñuala ava vo sumbila ha vo popela. Seteki oco vu limbuke okuti Yehova ukuahenda. Omunu wosi o wunda kokuaye o sumũlũha. Yehova yu ocipepi la vakuavitima via teka. Ohali yukuesunga ya lua, puãi Yehova u popela kohali yosi.”—Osamo 34:3, 4, 7, 8, 18, 19; 1 Samuele 21:10-15.
16 Ove hẽ, o tava okuti Yehova o kuete unene woku popela? Ove hẽ, wa kũlĩha ekuatiso li tunda kovangelo vaye? Anga hẽ, ove wa setekele ale Yehova kuenda wa limbuka okuti Uwa? Onjanja yipi ya sulako ove wa limbukile okuti Yehova wa lekisa ohenda kokuove? Seteka oku ivaluka otembo yaco. Epasu lia sulako ove wa linga kupange woku kunda, anga hẽ wa kuata ocisimĩlo cokuti ku pondola vali oku vokiyako upange wove? Ci tava okuti pamue ove o kuete ombangulo yimue yiwa o yongola oku sapuila komunu wa sanga konjo. Anga hẽ ivaluka eci wa eca olopandu ku Yehova omo a ku ĩha ongusu ya piãla ove o sukila kuenda asumũlũho akuavela? (2 Va Korindo 4:7) Handi vali, ci tava okuti ka cu ku lelukila oku ivaluka ovina vimue viwa Yehova a ku lingilile oco a ku kuatise. Ove o sukila oku ivaluka cimue ca lingiwa vokuenda kuosemana ya pita, vokuenda kuosãi ya pita, vokuenda kunyamo, ale cimue ca pita vokuenda kuotembo yimue konyima. Nda o kasi oku liyaka locitangi caco, momo lie ku likolisililako oku sandiliya ukamba wocili la Yehova oco o tale ndomo a ku songuila? Upostolo Petulu wa lungula Akristão hati: ‘Lisepuisi vemẽhi lieka lia pama lia Suku, asakalalo ene osi a eci ku Yehova momo eye o vu lava.’ (1 Petulu 5:6, 7) Omo liaco, ove oka komõha calua eci oka limbuka ndomo Yehova a kasi oku ku tata!—Osamo 73:28.
Amamako Loku Sandiliya Yehova
17. Nye ci sukiliwa nda tu yongola oku sandiliya Yehova?
17 Ci tava okuti ka ci tu lelukila oku amamako lukamba wetu la Yehova. Yesu wa sapuila Isiaye vohutililo hati: “Omuenyo ko pui wowu, oku ku kũlĩha, ove lika vu Suku yocili, loku kũlĩhavo Yesu Kristu u wa tuma.” (Yoano 17:3) Nda tu yongola oku kuata ukũlĩhĩso watiamẽla ku Yehova kuenda Komõlaye, tu sukila oku likolisilako calua. Tu sukila ekuatiso poku linga olohutililo kuenda espiritu sandu oco tu kuate elomboloko ‘liovina via longa via Suku.’ (1 Va Korindo 2:10; Luka 11:13) Tu sukilavo oku tambula ekuatiso lieciwa ‘lukuenje wa kolelua haeye wa lunguka,’ oco tu tekule ovisimĩlo vietu lokulia kuespiritu kuna tua siata oku tambula “kotembo ya tukuiwa.” (Mateo 24:45) Lekuatiso liukuenje wa kolelua, Yehova wa siata oku tu lungula oco tu tange Ondaka yaye oloneke viosi, loku endaenda kolohongele viekongelo olonjanja viosi kuenda oku sokiya otembo yoku kuata onepa kupange woku kunda ‘olondaka viwa viusoma.’ (Mateo 24:14) Nda tua kuama onjila eyi, tuka tatiwa ciwa la Yehova Suku yetu.
18, 19. (a) Nye tu sukila oku kuama okuti oco tu linga? (b) Asumũlũho api tu pondola oku tambula nda tua tamalãla Leliapu okuti tu sandiliya ekuatiso lia Yehova?
18 Satana o kasi oku sandiliya olonjila viñi viñi vioku suvuka kuenda oku lambalala omanu va Yehova. Eye o seteka oku nyõla ombembua yetu kuenda ukamba wetu uwa tu kuetele Suku yetu. Eye ka yongola okuti tua amamako kupange wetu woku sandiliya omanu vana vakuotima wa sunguluka okuti tu va kuatisa oku iya ku Yehova oco va kongeliwe koku teyuila ocitangi catiamẽla kusoma wa velapo voluali luosi. Pole, tu sukila oku lekisa ekolelo lietu ku Yehova oco eye a tu popele kevĩho. Nda tua ecelela okuti Ondaka ya Suku yi tu songuila, okuti tu amamako loku endela vocisoko caye ca palo posi, ci tava okuti eye oka tu ĩha ekuatiso liosi tu sukila.—Isaya 41:8-13.
19 Omo liaco, vosi yetu tu amamiko loku tamalãla Leliapu okuti tu lunguka lolonjanjo viaye kuenda tu sandiliyi Yehova Suku ekamba lietu lisoliwe calua, una oka ‘tu ĩha ongusu yoku pamisa ekolelo lietu.’ (1 Petulu 5:8-11) Nda tua kuama onjila eyi, tuka ‘kuata ocisola ca Suku, osimbu tu kevelela oku tambula ohenda ya Ñala yetu Yesu Kristu lelavoko lioku kuata omuenyo ko pui.’—Yuda 21.
Ndamupi o Tambulula?
• Ondaka “Eliapu,” velimi lia Va Helasi yi lomboloka nye? Kuenda ndamupi ondaka yaco ya sunguluka oku yi tiamisila kokuaye?
• Ndamupi Yehova a litepa Leliapu koku tenda omanu va tunga palo posi?
• Momo lie omunu a tavela okuti ocisembi oco ci kuatisa oku amẽla ku Yehova?
• Ondaka ‘oku kakatela’ ku Yehova yi lomboloka nye, kuenda ndamupi tu pondola oku u sandiliya?
[Apulilo Elilongiso]
[Elitalatu kemẽla 15]
Ndaño okuti Yovi wa tala ohali yalua, eye wa kũlĩhĩle ciwa ekuatiso li tunda ku Yehova
[Elitalatu kemẽla 16]
Oku tanga Embimbiliya oloneke viosi loku endaenda kolohongele viekongelo olonjanja viosi kuenda oku lekisa onjongole kupange wetu woku kunda, ci tu ivaluisa okuti tu kasi oku tatiwa la Yehova