Amamako Oku Pindisa Olondunge Viove

POKU tala ndomo omunu umue a linga luloño olomapalo vioku pokuisa etimba, hesanjukuolio tu yeva! Embimbiliya li vetiya Akristão oku pindisa olondunge viavo, ndomunu o linga olomapalo vioku pokuisa etimba liaye.

Paulu, vukanda a sonehela va Heveru wa popia hati: “Okulia kua kola kuakulu, okuti kuava va tẽla oku tepisa pokati keci ciwa leci cĩvi, [ndeci vakualomapalo vioku pokuisa etimba va lingainga,] omo olondunge viavo via pindisua.” (Va Hev. 5:​14) Momo lie Paulu a vetiyila Akristão va Heveru oku pindisa olondunge viavo ndomunu o pokuisa etimba liaye? Tu pindisa hẽ ndati olondunge vietu?

‘U Sesameli Oku Linga Alongisi’

Paulu eci a lombolola ocikele ca Yesu coku kala ‘ocitunda cinene nda Melikicedeke,’ wa soneha hati: “Kondaka eyi tu kuete ca lua coku popia, puãi ca tĩla oku ci lombolola, momo ene wa lingi ovisitatui. Momo, ndaño otembo yilo nda wa sesameleli oku linga alongisi, haimo vu sukila umue o vu longisa ovina viefetikilo liolondaka via Suku. Vu sukila asenjele, hakulia kua kolako.”​—⁠Va Hev. 5:​10-12.

Kocita catete, Akristão vamue va Yudea ka va kulile kespiritu omo liekambo lielomboloko liovina vimue. Ka ca lelukile kokuavo oku kuata elomboloko Liocihandeleko coku seviwa evamba. (Ovil. 15:​1, 2, 27-29; Va Gal. 2:​11-14; 6:​12, 13) Vamue pokati kavo, va kuatele ocitangi coku siapo oku usalela eteke Liesambata kuenda Eteke Lioku Tuvika Akandu unyamo lunyamo. (Va Kol. 2:​16, 17; Va Hev. 9:​1-​14) Paulu wa va vetiya oku pindisa olondunge viavo, oco va tẽle oku tepisa pokati keci ciwa leci cĩvi, loku ‘kuamelela oku kula kespiritu.’ (Va Hev. 6:​1, 2) Elungulo liaye, lia vetiya vamue oku limbuka ndomo uloño wavo woku sokolola wa va kuatisa oku kula kespiritu. Nye ci popiwa hẽ kokuetu?

Pindisa Olondunge Viove

Tu pondola oku pindisa ndati olondunge vietu, oco tu kule kespiritu? Paulu wa popia hati, tu ci linga poku “tepisa pokati keci ciwa leci cĩvi.” Ndeci omunu a pokuisa etimba liaye poku linga omapalo yimue ya posoka haiyo ya tatama, etu tu sukilavo oku kuata uloño woku sokolola oco tu tẽle oku tepisa pokati keci ciwa leci cĩvi.

John Ratey, ulongisi wolondotolo viomanu va vela uwi kosikola yo Harvard, wa popia hati: “Oku pindisa olondunge, ci kuete esilivilo lialua, momo ci kuatisa owoño womunu.” Gene Cohen, usongui Wonjo Yoku Tata Vana va Kuka, kosikola ya Velapo yi tukuiwa hati, George Washington, wa popia ndoco: “Eci tu pita locitangi cimue ca tĩla, volosinga viowoño wetu mu tundila otulosinga tuokaliye, kuenje tu li sanduila kolonepa viosi viowoño.”

Oku kuata uloño woku sokolola loku vokiya ukũlĩhĩso wetu Wondaka ya Suku, ci kuete esilivilo. Nda tua ci linga, ci tu kuatisa oku tẽlisa “ocipango ca Suku.”​—⁠Va Rom. 12:​1, 2.

Likisa Oku Litekula ‘Lokulia Kua Kola’

Nda tu yongola ‘oku kula kespiritu,’ tu sukila oku li pula ndoco: ‘Ñasi hẽ oku kuamelela  oku kuata elomboloko Liembimbiliya? Vakuetu va nenda hẽ ndomunu wa kula kespiritu?’ Ina o sanjuka calua poku nyamisa oñaña yaye, kuenda oku yi lisa ekela. Pole, nda vokuenda kuotembo oñaña yaco ka yili okulia kua kola, inaye o sakalala. Eci tu mola vana va lilongisa letu Embimbiliya ndomo va kasi oku kula kespiritu, poku litumbika loku papatisiwa, tu sanjuka calua. Pole, nye ci pondola oku pita lavo, nda noke yoku papatisiwa va liwekapo oku kula kespiritu? Anga hẽ ka ci nena esumuo? (1 Va Kor. 3:​1-4) Ulongisi o lavoka okuti, vokuenda kuotembo, ondonge yaye yi lingavo ulongisi.

Oco tu tetulule ovitangi vimue lolondunge, tu sukila oku likolisilako oku sokolola lutate. (Osa. 1:​1-3) Ka tu ka eceleli okuti ovina vi nyana otembo ndeci, oku tala o televisãu, ale ovitalukilo vikuavo, vi tu tateka oku sokolola ovina vi kuete esilivilo lia velapo. Oco tu vokiye uloño wetu woku sokolola, tu sukila oku kuata onjongole yoku tanga Embimbiliya, kuenda alivulu akuavo a sandekiwa ‘lukuenje wa kolelua haeye wa lunguka.’ (Mat. 24:​45-​47) Ndaño tua siata ale oku tanga Embimbiliya pokolika, oku sokiya otembo yelilongiso Liembimbiliya Vepata, kuenda oku lilongisa ovina via longa Viondaka ya Suku, ci kuete esilivilo.

Manji Jerónimo ukuakunyula akongelo kofeka yo Mexiku, wa popia hati, noke yoku tambula Utala Wondavululi, o lilongisa ovipama viaco. Eye wa sokiyavo otembo yoku lilongisa ovipama viaco lukãi waye. Manji Jerónimo wamisako hati: “Ame lukãi wange, tu kuete ocituwa coku tangela kumosi Embimbiliya eteke leteke, kuenda tua siatavo oku kuama ombrochura ‘Boa Terra.’ ” Manji umue o tukuiwa hati, Ronald, wa popia hati, wa siata oku kuama ovipama Viembimbiliya vi tangiwa vekongelo osemana losemana. Eye, wa lingavo esokiyo liovina a sukila oku kongela velilongiso liaye. Omo liaco, wa popia hati: “Esokiyo liaco, li ndi kuatisa oku kũlĩha ovina ndi ka kongela velilongiso likuavo.”

Nye ci popiwa kokuetu? Anga tua siata oku pesila otembo yalua koku lilongisa Embimbiliya, loku sokolola ovina tua tanga? Tua siata hẽ oku pindisa uloño wetu woku sokolola, oco u tu kuatise oku nõla ovina tu linga okuti, ka vi pisiwa lolonumbi Viovisonehua? (Olosap. 2:​1-7) Omo liaco, tu kuati ocimãho coku kula kespiritu, oco tu sumũlũisiwe lukũlĩhĩso, kuenda uloño wa vana va kuete olondunge via pindisiwa okuti, va tẽla oku tepisa pokati keci ciwa leci cĩvi!

[Elitalatu kemẽla 23]

Tu pindisa olondunge vietu, poku “tepisa pokati keci ciwa leci cĩvi”