Momo Lie tu Sumbilila Vana va Kuka?

KOHULO yo kalunga ko Kalifornia kofeka yo Estados Unidos, kuli oviti via siata oku upiwa calua alitalatu voluali. Oviti viaco va vi tukula hati, oviti vio ko Kupro. Ovio vi kuete eci ci pitahãla 250 kanyamo. Oviti viaco via pama calua haivio via posoka, kuenda vi tatiwa ciwa. Handi vali, via siata oku teyuiwa lovikolo kuenda ovawe.

Oviti vio Kupro, vi tu ivaluisa Akristão va kuka va sangiwa pokati ketu, haivo va amamako oku lekisa epandi poku kunda olondaka viwa. Uprofeto Yoeli wa popele hati, “olosekulu” vi ka sandeka esapulo Liembimbiliya. (Yoe. 2:​28-32; Ovil. 2:​16-​21) Sokolola ño handi olowola vialua ovo va pesela koku kuatisa omanu oku lilongisa ‘olondaka viwa viusoma’! (Mat. 24:​14) Vamue pokati kakundi vaco Vusoma, va pandakaisa kalambalalo, ale kovitangi vikuavo vokuenda kuanyamo alua. Nda okuti uti wo Kupro va u teyuila lovikolo kuenda ovawe, vamanji vana va kuka va sangiwa pokati ketu, ka va sesamẽla hẽ oku tatiwa lesumbilo lia piãla?

Kosimbu Yehova Suku wa sapuila omanu vaye hati: “Votokela kovaso u o kuete owele, sumbila ocipala cekongo.” (Ovis. 19:​32) Koloneke vilo, pokati kafendeli va Yehova pa sangiwa akulu vendamba valua va lekisa ekolelo, poku “endaenda la  Suku” vokuenda kuanyamo alua. (Mika 6:⁠8) Osimbu va amamako oku kapako olonumbi Viovisonehua, owele wavo u linga “ocifuto culamba.”​—⁠Olosap. 16:⁠31.

Upostolo Paulu, wa vetiya Timoteo hati: “Ukulu wendamba ku ko vete evelo lukãlu.” Timoteo wa ‘sumbilile akulu vendamba nda va isiaye,’ kuenda wa kapeleko ‘akãi va kuka nda va inaye.’ (1 Tim. 5:​1, 2) Timoteo wa handelekiwile oku “votokela” omanu vakuawele. Omo liaco, Yehova o yongola okuti upopi wetu u lekisa esumbilo.

Elivulu lia va Roma 12:​10, li tu sapuila hati: “Koku sumbila, velisipo vakuẽle.” Akulu vekongelo, va lekisa esumbilo Kakristão vana va kuka. Havoko lika va sukila oku ci linga, vosi yetu tu vetiyiwa oku lisumbila pokati.

Vepata, omãla va kuete ocikundi coku sumbila olonjali viavo, kuenda va inakulu yavo. Omanu va siata oku tata ciwa loku teyuila oviti vio Kupro. Omo liaco, tu kuetevo ocikele coku tata ciwa kuenda oku sumbila olonjali vietu via kuka, kuenda va inakulu yetu. Nda tua kuata ocituwa coku va yevelela, tu kuatisiwa oku kapako ovisimĩlo viavo kovina viosi tu linga.​—⁠Olosap. 23:22; 1 Tim. 5:⁠4.

Vamanji va kuka va kasi pokati ketu va soliwe calua la Yehova. Eye ka va yanduluka. (Osa. 71:​18) Suku yocili o va pamisa oco va amameko oku u vumba lekolelo. Omo liaco, tu amamiko oku kuatisa vana va kuka loku lekisa esumbilo kokuavo.

[Elitalatu kemẽla 7]

Ndeci oviti vio ko Kupro vi tatiwa ciwa, akulu vendamba va sesemẽlavo oku tatiwa ciwa kuenda oku va sumbila

[Ono Yelitalatu]

American Spirit Images/age fotostock