Ka Sumuise Espiritu Sandu Lia Yehova
Ku Ka Sumuise Espiritu Sandu Lia Yehova
“Ko ka sumuisi espiritu sandu lia Suku . . . ondimbukiso yo kapelui.”—VA EFE. 4:30.
1. Eliangiliyo lipi Yehova a lingila olohuluwa viomanu, kuenda ocikele cipi ovo va kuete?
ECI Yehova a kasi oku lingila olohuluwa viomanu voluali lulo lua vĩha, ci komõhisa calua! Eye wa linga eliangiliyo limue oco omanu va amẽle kokuaye vonduko Yomõlaye wongunga, Yesu Kristu. (Yoa. 6:44) Ove o kongeliwa lika vetendelo liomanu vaco, nda wa litumbika ku Suku loku tẽlisa elitumbiko liaco. Omo wa papatisiwa vonduko yespiritu sandu, o kuete ocikele coku ambata omuenyo umue u litava lespiritu liaco.—Mat. 28:19.
2. Apulilo api tu ka konomuisa?
2 Omo okuti etu tu kasi ‘oku kũlila espiritu,’ tua wala omunu wokaliye. (Va Gal. 6:8; Va Efe. 4:17-24) Upostolo Paulu wa tu lungula oku yuvula oku sumuisa espiritu sandu lia Suku. (Tanga Va Efeso 4:25-32.) Kaliye, tu konomuisi elungulo liupostolo Paulu. Olondaka via Paulu viokuti ko ka sumuisi espiritu sandu, vi lomboloka nye? Omunu wa litumbika ku Yehova o sumuisa ndati espiritu sandu? Kuenda tu yuvula ndati oku sumuisa espiritu sandu lia Yehova?
Elomboloko Liolondaka Via Paulu
3. Ndamupi o lombolola olondaka tua tanga kelivulu lia Va Efeso 4:30?
3 Catete, konomuisa olondaka via Paulu kelivulu lia va Efeso 4:30. Eye wa soneha hati: “Ko ka sumuisi espiritu sandu lia Suku. . . . Ondimbukiso yo kapelui eteke lieyovo liene.” Paulu ka yonguile okuti vamanjaye va nyõla ukamba wavo la Suku. Lekuatiso liespiritu lia Yehova, va tambula ‘eyovo liavo omo liocisembi.’ Espiritu sandu lia Suku lia kala, hailio li kasi ndondimbukiso kuava va amamako lekolelo. (2 Va Kor. 1:22) Ondimbukiso yaco, yi lomboloka okuti ovo va panga onepa kocipiñalo ca Suku kuenda va ka tambula omuenyo kilu. Etendelo liavo 144.000 komanu.—Esit. 7:2-4.
4. Momo lie tu yuvuila oku sumuisa espiritu lia Suku?
4 Oku sumuisa espiritu oyo onjila yatete yi tuala Ukristão oku pumba ekuatiso liongusu ya pama ya Suku. Olondaka Daviti a tukula noke lioku lueya la Batisieva, vi lekisa ocili caco. Daviti wa pinga ku Yehova hati: “Ku ka nundise kovaso ove. Ku ka njupe espiritu liove li kola.” (Osa. 51:11) Olombuavekua vi “pandikisa ño toke kokufa,” ovio lika vi ka tambula “ekolowa” liomuenyo ko pui kilu. (Esit. 2:10; 1 Va Kor. 15:53) Akristão vana va kuete elavoko lioku kala palo posi, va sukilavo espiritu lia Suku oco va amameko lepandi, hã ha va tambula ombanjaile yomuenyo omo lioku kolela ocilumba ca Kristu. (Yoa. 3:36; Va Rom. 5:8; 6:23) Omo liaco, vosi yetu tu yuvuli oku sumuisa espiritu sandu lia Yehova.
Ukristão o Sumuisa Ndati Espiritu?
5, 6. Ukristão o sumuisa ndati espiritu lia Yehova?
5 Etu Tuakristão, te tua yuvula oku sumuisa espiritu. Eci ci tẽliwa lika nda ‘tu amamako oku endela vespiritu’ loku yuvula olonjongole vietimba kuenda ovituwa vĩvi. (Va Gal. 5:16, 25, 26) Pole, citava okuti ovina vi pongoloka. Nda vokuenda kuotembo ka tu limbuka okuti tu kasi oku konyoha kuenje, tu fetika oku linga ovina vi pisiwa Vondaka ya Suku, tu sumuisa espiritu sandu.
6 Eci tu liwekapo oku songuilua lespiritu sandu, tu sumuisa Yehova Ono yalio. Omo liaco, tu konomuisi elivulu lia va Efeso 4:25-32, oco tu tale ndomo tu songuila omuenyo wetu, ha tu yuvula oku sumuisa espiritu sandu lia Suku.
Ndomo tu Yuvula Oku Sumuisa Espiritu
7, 8. Lombolola esunga lieci tu sukilila oku kala vakuacili.
7 Tu kali vakuacili. Kelivulu lia va Efeso 4:25, Paulu wa soneha ndoco: “Oku popia uhembi ku imuhe. Omunu omunu a popie ocili lukuavo, momo tuvimatamata vietimba limuamue.” Omo “tuvimatamata vietimba limuamue,” ka tu yongola oku kala vakuelimbi pamue oku liaña vamanjetu, momo eci ci sokisiwa loku va kemba. Wosi amamako locituwa caco, o pumba ukamba waye la Suku.—Tanga Olosapo 3:32.
8 Olondaka lovilinga vielimbi, vi nyõla omunga vekongelo. Omo liaco vosi yetu tu yongola oku kala nduprofeto Daniele, una okuti kokuaye ka kua sangiwile cimue cĩvi. (Dan. 6:4) Handi vali, tua vetiyiwa oku ivaluka elungulo upostolo Paulu a eca Kakristão va kuete elavoko lioku enda kilu, okuti vosi va tiama ‘ketimba lia Kristu,’ va sukila oku likuata omunga momo va panga onepa ketimba limuamue. (Va Efe. 4:11, 12) Nda tu kuete elavoko lioku kala Voluali Luokaliye palo posi, ca tu sesamẽla oku vangula ocili, oco tu likuate omunga la vamanji voluali luosi.
9. Oku kapako olondaka vielivulu lia va Efeso 4:26, 27 ci kuete esilivilo lie?
9 Tu sukila oku tamalãla Leliapu, oco ka li ka nyõle uhayele wetu kespiritu. (Tia. 4:7) Espiritu sandu li tu kuatisa oku tamalãla la Satana. Tu pondola oku ci linga poku likandangiya konyeño. Paulu wa soneha hati: “Temi, puãi ko ka lingi ekandu. Ekumbi ka li ka iñile lokutema kuene. Ko ka eci evelo keliapu.” (Va Efe. 4:26, 27) Nda tukuacinyeñowusa, ohutililo yi tu kuatisa oku “tula utima,” kuenda oku likandangiya oco ka tu ka sumuise espiritu lia Suku. (Olosap. 17:27) Omo liaco, tu yuvuli ocinyeñowusa oco ka tu ka eci ku Satana evelo lioku tu yonja. (Osa. 37:8, 9) Onjila yikuavo yoku tamalãla laye oku tetulula ovitangi lonjanga ndomo Yesu a lungula.—Mat. 5:23, 24; 18:15-17.
10, 11. Momo lie tu yuvuila oku nyana loku linga ocina cimue hacesungako?
10 Ka tu yongola oku kupuka veyonjo lioku nyana pamue oku kala ukueliaño. Kondaka yoku nyana Paulu wa soneha hati: “U wa ivaile ka ka ive vali, puãi a linge upange wocili lovaka aye okuti o sanga coku kuatisa laco olosuke.” (Va Efe. 4:28) Nda Ukristão wa papatisiwa o nyana, o ‘pembuisa onduko ya Suku.’ (Olosap. 30:7-9) Uhukũi ka u tu ĩha esunga lioku nyana. Vana va kuetele Suku ocisola lomanu va lisungue lavo, va kũlĩha okuti ka ci tava oku tatelẽla oku nyana.—Mar. 12:28-31.
11 Paulu ka tukuile lika ovina tu yuvula, wa lombolola eci tu sukila oku linga. Nda tu kasi oku endela vespiritu, tu ka likolisilako oku tekula epata lietu kuenda oku kuata cimue “coku kuatisa laco olosuke.” (1 Tim. 5:8) Yesu lovapostolo vaye, va kuatele ombango yoku kuatisa olohukũi, pole, omakuli Yuda Isikariote, wopopamo olombongo. (Yoa. 12:4-6) Eye ka kaile oku endela vespiritu. Etu tu kasi oku songuilua lespiritu lia Suku te tua kala “vakuacili kovina viosi” ndeci Paulu a linga. (Va Hev. 13:18) Omo liaco, tu yuvuli oku sumuisa espiritu sandu lia Yehova.
Olonjila Vikuavo Vioku Yuvula Oku Sumuisa Espiritu Sandu
12, 13. (a) Ndomo ca lekisiwa kelivulu lia va Efeso 4:29, upopi upi tu vetiyiwa oku yuvula? (b) Upopi wetu u sukila oku kala ndati?
12 Tu sukila oku lava upopi wetu. Paulu wa popia hati: “Vovimela viene ka mu ka tunde ombangulo yĩvi, mu tunde puãi olondaka vi kuatisa, haivio via soka lotembo yaco, kuenje vi sumũluisa ava va vi yeva.” (Va Efe. 4:29) Ndomo tua ci mola ale konyima, upostolo ka popele eci tu yuvula, pole, wa lekisa eci tu sukila oku linga. Nda tua endela vespiritu lia Suku, tu ka vetiyiwa oku popia ovina “vi sumũluisa ava va vi yeva.” Kuenje, ka tu ka ecelela okuti vovimeha vietu mu tunda “ombangulo yĩvi.” Kelimi lio Helasi ondaka “yĩvi,” yi tiamisiwila kovina via vola ndeci epako, ombisi, kuenda ositu. Omo liaco, tu yuvuli ombangulo Yehova a tenda okuti yĩvi, ndeci tu nyehũla ovina via vola.
13 Upopi wetu te wa posoka, haiwo wa fina kuenda wa “singiwa lomongua.” (Va Kol. 3:8-10; 4:6) Eci omanu va yeva upopi wetu te va limbuka okuti tua litepa lomanu vakuavo. Omo liaco, tu kuatisi vakuetu lolombangulo vi “sumũluisa ava va vi yeva.” Kuenda tu kuati ocisimĩlo ndeci cukualosamo wa imba hati: “Olondaka viomela wange lovisimilo viutima wange vi sunguluke kokuove, a Yehova, wucikolo cange, haive wunjovoli yange.”—Osa. 19:14.
14. Ndomo ca lekisiwa kelivulu lia va Efeso 4:30, 31, ovina vipi tu sukila oku yuvula?
14 Tu yuvuli ocikumbiti, onyeño, usokui kuenda ocipombo. Paulu, noke lioku lungula omanu oco va yuvule oku sumuisa espiritu lia Suku, wa soneha hati: “Ocikumbiti lonyeño lekaka kuenda onjuela lusokui locipombo, viosi vimbipo.” (Va Efe. 4:30, 31) Omo ka tua lipuile, tu sukila oku lava ovisimilo lovilinga vietu. Nda tu lekisa “ocikumbiti lonyeño lekaka kuenda onjuela,” tu sumuisa espiritu lia Suku. Cimuamue haico ci popiwa eci tu kuatela ocikumbiti vakuetu va tu lueyela, kuenda tu likala oku li sunguluisa lavo. Oku sinila olonumbi Viembimbiliya, ci koka oku sumuisa espiritu kuenda ci nena ovitangi.
15. Nda umue wa tu lueyela, nye tu sukila oku linga?
15 Tu sukila oku liombokela, oku li lekisa ohenda kuenda oku ecela vakuetu. Paulu wa soneha hati: “Liombokeli pokati loku lilinga ohenda loku liecela pokati, ndomo Suku a weceli vu Kristu.” (Va Efe. 4:32) Nda tua tema calua omo liocina cĩvi va tu lingila, te tua liecela, ndeci Suku a lingainga. (Luka 11:4) Sokolola okuti manji umue wa tu sokola. Kuenje tu amẽla kokuaye oco tu tetulule ocitangi caco. Eye o lekisa esumuo liaye kuenda o tu pinga ongecelo. Ndaño tuo wecela, kuli ocina cikuavo tu sukila oku linga. Elivulu Liovisila 19:18, liti: “Ku ka fetuluinye, ku ka kale locikumbiti cokomãla vofeka yove; sola puãi u o lisungue love ndeci o lisole ove muẽle. Ame ndi Yehova.”
Lavulula
16. Tukula ocindekaise ci lekisa apongoloko tu sukila oku linga oco ka tu ka sumuise espiritu lia Yehova.
16 Olonjanja vimue, citava okuti tu linga ovina vi sumuisa Suku eci tu kasi pokolika. Manji umue, pamue o yevelela ovisikilo ka via sungulukile. Kuenje, utima waye wu lema calua omo lioku pembula olonumbi Viembimbiliya levi vi sangiwa valivulu a sandekiwa ‘lukuenje wa kolelua haeye wa lunguka.’ (Mat. 24:45) Citava okuti eye o likutililila ocitangi caco kuenda ivaluka olondaka via Paulu kelivulu lia va Efeso 4:30. Omo okuti ka yongola vali oku sumuisa espiritu lia Suku, o yuvula oku yevelela ovisikilo ka via sungulukile. Kuenje, Yehova o ka sumũlũisa calua manji yaco. Omo liaco, tu yuvuli oku sumuisa espiritu lia Suku.
17. Nye ci pondola oku pita letu nda ka tua lavuluile loku linga olohutililo?
17 Nda ka tua lavuluile loku likutilila, tu kupukila vakandu a sumuisa espiritu. Omo espiritu sandu li linga ovina vi litava lovituwa kuenda ovisimĩlo via Isietu wo kilu, ka tu yongola oku linga ocina ci sumuisa espiritu sandu liaye. (Va Efe. 4:30) Kocita catete, vakuavisonehua va lundila Yesu okuti wa kala oku linga ovikomo lunene wa Satana. (Tanga Marko 3:22-30.) Ovanyali vaco, ‘va vangula etonãi espiritu sandu,’ kuenje va linga ekandu ka li kuete ongecelo. Ka tu ka lingi ekandu liaco!
18. Tu limbuka ndati okuti ka tua lingile ekandu ka li kuete ongecelo?
18 Oco ka tu ka linge ekandu ka li kuete ongecelo, tu sukila oku ivaluka eci Paulu a popia koku sumuisa espiritu. Oco hẽ, nye ci popiwa nda tua linga ekandu limue linene? Nda tua likekembela, loku kuatisiwa lakulu vekongelo, tu pondola oku popia tuti, Suku o tu ecela kuenda eci ci lekisa okuti ka tua lueyelele espiritu sandu. Tu yuvuli oku sumuisa espiritu sandu lekuatiso lia Suku.
19, 20. (a) Ovina vipi tu sukila oku yuvula? (b) Tua likapela oku linga nye?
19 Afendeli va Suku va kuete ocisola, lesanju kuenda va likuetele omunga omo lioku kuatisiwa lespiritu sandu. (Osa. 133:1-3) Omo liaco, oco ka tu ka sumuise espiritu, tu yuvuli oku linga ovina vĩvi, kuenda oku sokola angombo va nõliwa lespiritu sandu. (Ovil. 20:28; Yuda 8) Handi vali, tu sukila oku likuata omunga vekongelo loku lisumbila pokati. Tu yuvulivo oku linga otuvimunga pokati komanu va Suku. Paulu wa soneha hati: “A vamanji, ndu peyi londuko ya Ñala Yetu Yesu Kristu okuti, vosi wu popia popia cimuamue. Pokati kene ka pa ka kale olonepele, puãi likuati omunga lutima umuamue lolondunge vimuamue.”—1 Va Kor. 1:10.
20 Yehova o kuete onjongole yoku tu kuatisa oco ka tu ka sumuise espiritu liaye. Omo liaco, tu amamiko oku pinga volohutililo espiritu sandu loku yuvula oku li sumuisa. Tu likapeli oku “kũlĩla espiritu” loku songuilua lalio cilo kuenda otembo yenda ño hũ.
O Tambulula Ndati?
• Nye ci lomboloka oku sumuisa espiritu lia Suku?
• Omunu wa papatisiwa o sumuisa ndati espiritu lia Yehova?
• Ovina vipi vi tu kuatisa oku yuvula oku sumuisa espiritu sandu?
[Apulilo Elilongiso]
[Elitalatu kemẽla 30]
Tetulula ovitangi lonjanga
[Elitalatu kemẽla 31]
Upopi wove u sokisiwa lapako api?