A Vamanji—Kũlĩli Espiritu Poku Sanda Ovikele Vekongelo!
A Vamanji—Kũlĩli Espiritu Poku Sanda Ovikele Vekongelo!
“U o kũlĩla espiritu o lombola omuenyo ko pui we espiritu.”—VA GAL. 6:8.
1, 2. Olondaka vi sangiwa kelivulu lia Mateo 9:37, 38 vi kasi oku tẽlisiwa ndati, kuenda nye ci sukila oku lingiwa vakongelo?
KOLONEKE vilo, ove o lete ovolandu alua a komõhisa! Upange Yesu Kristu a handeleka, u kasi oku lingiwa lonjanga yalua. Eye wa popia hati: “Okungula kua lua puãi olondingupange viñamiñami. Pingi ku Cime cokungula oco a tume olondingupange koku ungula kuaye.” (Mat. 9:37, 38) Yehova Suku o kasi oku tambulula olohutililo viaco lonjila yimue yi komõhisa. Vokuenda kunyamo wo 2009, ketendelo liakongelo Olombangi via Yehova kua vokiya 2.031 kakongelo, vocosi voluali luosi, muli eci ci soka 105.298 kakongelo. Eteke leteke kua papatisiwa eci ci soka 757 komanu!
2 Evokiyo liaco lieca uvangi wokuti kuli esukila lia vamanji va loñoloha koku longisa loku tata akongelo. (Va Efe. 4:11) Vokuenda kuanyamo, Yehova wa siata oku nõla alume va loñoloha oco va tate olomeme viaye, kuenje, tua kolela okuti eye o ka amamako oku ci linga. Ocitumasuku ca Mika 5:5, ca lekisile okuti vokuenda kuoloneke vilo via sulako ku kala “ovangombo epanduvali lolosoma ecelãlã,” okuti, etendelo lialume va loñoloha haivo va nõliwila oku songola omanu va Yehova.
3. Lombolola eci lomboloka oku “kũlĩla espiritu.”
3 Nda ove wulume haive wa papatisiwa Ndombangi ya Yehova, nye ci ku kuatisa oku kuata ovikele vekongelo? Ocina cimue ci ku kuatisa, oku “kũlĩla espiritu.” (Va Gal. 6:8) Voku ci linga mua kongela oku ecelela okuti espiritu sandu lia Suku li talavaya vomuenyo wove. Yuvula oku “kũlĩla etimba.” Ku ka ecelele okuti omuenyo welau, owesi lovitalukilo vi tepulula ombili yove kupange wa Suku. Akristão vosi va sukila oku “kũlĩla espiritu,” momo vokuenda kuotembo, citava okuti alume vakatambula ovikele vekongelo. Omo koloneke vilo kuli ekambo lialua liakulu vekongelo lioloñuatisi viavo, ocipama cilo ci tiamisiwila enene kalume Akristão. A vamanji, tu vu vetiyi oku sokolola ondaka yaco lolohutililo.
Likolisilako Oku Linga Upange Uwa
4, 5. (a) Alume va papatisiwa va vetiyiwa oku kuata ovikele vipi vekongelo? (b) Nye omunu a sukila oku linga oco a kuate ovikele viaco?
4 Ulume Ukristão ka lingi omitavaso vocipikipiki. Eye te wa likolisilako oku sanda “upange uwa.” (1 Tim. 3:1) Vupange waco mua kongela oku vumba vamanjaye poku va lingila ovina va sukila. (Tanga Isaya 32:1, 2.) Ulume o sanda upange waco, hokuacipululuko. Puãi, o yongola oku talavayela vakuavo.
5 Omunu o yongola oku kala oñuatisi pamue ukulu wekongelo, o likolisilako oku kapako olonumbi Viovisonehua vomuenyo waye. (1 Tim. 3:1-10, 12, 13; Tito 1:5-9) Nda wa papatisiwa ale, lipula ndoco: ‘Anga ngendaenda kupange woku kunda, loku kuatisa vakuetu oku ci linga? Ñuete hẽ ocituwa coku kolisa vamanji poku va lekisa ocisola? Vakuetu va ñũlĩha hẽ ndomunu ukuakulilongisa lutate Ondaka ya Suku? Ñasi hẽ oku likolisilako oku ecaeca atambululo awa kolohongele? Eci akulu vekongelo va nyĩha ocikele cimue, ndi ci lingainga hẽ lombili?’ (2 Tim. 4:5) Tu sokololi lutate apulilo aco.
6. Ocina cipi ci ku kuatisa oku kuata ovikele vekongelo?
6 Ocina cikuavo omunu a sukila oku linga oco a kuate ovikele vekongelo, oku ‘kolisua longusu yespiritu lia Suku vutima.’ (Va Efe. 3:16) Oku kala oñuatisi pamue ukulu wekongelo, ka ci kasi ndoku kapa omunu komangu yimue. Ocikele caco ci tẽliwa lika nda omunu o kasi oku kula kespiritu. Omunu o kula ndati kespiritu? Eye o ci linga poku ‘endaenda lespiritu’ loku lekisa epako lialio. (Va Gal. 5:16, 22, 23) Osimbu o lekisa ovituwa viespiritu vi sukiliwa koku kuata ovikele, loku kapako alungulo a ku kuatisa oku kula, ‘omanu vosi va ka limbuka okuamako kuove.’—1 Tim. 4:15.
Lieca Olumue
7. Nye ca kongela voku vumba vakuetu?
7 Voku vumba vakuetu mua kongela oku kuata ocituwa coku lieca olumue. Omo akulu vekongelo angombo konepa yespiritu, va sakalala calua lolomeme. Kũlĩhisa ndomo upostolo Paulu a sakalalele lupange waye wungombo. Eye wa sapuila vamanji vo ko Korindo hati: “Ndo soneheli lohali yalua, locinguva vutima, lesuelela a haku vu valulako, te okuti, oco vu limbuke ocisola ca piãla ndu kueteli.” (2 Va Kor. 2:4) Ocili okuti Paulu wa linga upange waye lutima wosi.
8, 9. Tukula ovolandu Embimbiliya a lekisa ndomo alume va vumba vakuavo.
8 Ocituwa coku lieca olumue oyo ondimbukiso yomunu o yongola oku linga upange wa Yehova. Ka tua la yeva okuti Noha wa sapuila vakuavo hati: ‘Eci vu mãla oku tunga ocimbaluku, mbilikiyi oco tu londele kumosi.’ Mose ka sapuilile va Isareli va kala Kegito hati: ‘Ndi vu sangi Kokalunga Kakusuka. Kuendi, lingi cosi vu tẽla, vu ka pitĩla.’ Yehosua ka popele hati: ‘Eci ovimbaka vio Yeriko vi kupuka, sapuiliko.’ Isaya ka ilikile omunu ukuavo loku popia hati: ‘Hayu! U tuma ño.’—Isa. 6:8.
9 Yesu Kristu, eye ongangu ya velapo yomunu wa nõlapo oku vetiyiwa lespiritu lia Suku, eci a tava lutima waye wosi oku linga Pakisi yomanu. (Yoa. 3:16) Ocituwa ca Yesu coku lieca olumue ka ci tu vetiya hẽ oku kuama ongangu yaye? Manji umue o kasi ale osimbu ndukulu wekongelo poku lombolola ocisola a kuetele ocunda, wa popia ndoco: “Olondaka Yesu a sapuila Petulu okuti lava olomeme viange—via mbetiya cimue. Vokuenda kuanyamo, nda limbuka ndomo olondaka viocisola, lovilinga viohenda vi pondola oku pamisa omunu kespiritu. Nda sanjukila upange woku lava olomeme.”—Yoa. 21:16.
10. Nye ci vetiya ulume Ukristão oku kuama ongangu ya Yesu yoku vumba vakuavo?
10 Alume va litumbika koku tata ocunda ca Suku, va sukila oku kapako ocituwa ca Yesu, eci a popia hati: “Ndu kavuluisi.” (Mat. 11:28) Oku kolela Suku loku kuatela ekongelo ocisola, ci vetiya ulume Ukristão oku linga upange uwa, loku yuvula ovisimĩlo viokuti upange waco wa tĩla calua haiwo u kavisa. Oco hẽ, nye ci popiwa komunu ka kuete onjongole yoku kuata ovikele? Citava okuti omunu waco o kuatisiwa hẽ oku kala lonjongole yoku vumba ekongelo?
Kuata Onjongole Yoku Vumba
11. Omunu o kuata ndati onjongole yoku vumba vakuavo?
11 Nda o sima okuti kua loñolohelele oku tambula ovikele, pinga ekuatiso liespiritu sandu vohutililo, oco ku ka tatekiwe locisimĩlo caco. (Luka 11:13) Espiritu lia Yehova li ka ku kuatisa oku yuvula ovisimĩlo viaco. Omo onjongole yoku vumba vamanji ombanjaile ya Suku, pinga espiritu lia Yehova oco li ku ĩhe ongusu yoku linga upange u kola. (Va Fil. 2:13; 4:13) Kuenje, pinga ku Yehova oco a ku kuatise oku kuata onjongole yoku tambula ovikele.—Tanga Osamo 25:4, 5.
12. Omunu o kuata ndati uloño a sukila koku tata ovikele viekongelo?
12 Akristão vamue va likala oku tambula ovikele vekongelo omo lioku sima okuti oku tata olomeme ca tatama kuenda ci nyana otembo yavo. Handi vakuavo va sima okuti ka va kuete uloño woku tẽlisa ovikele viaco. Nda oco ci kasi oku pita love, o pondola oku kuata uloño waco poku lilongisa lutate Ondaka ya Suku kuenda alivulu a sandekiwa lukuenje wa kolelua. Lipula ndoco: ‘Nda siata hẽ oku sanda otembo yoku lilongisa Ondaka ya Suku, loku pinga olondunge volohutililo?’ Ndonge Tiago wa soneha hati: “Nda umue pokati kene wa kamba olondunge a pinge ku Suku, u ecaeca komanu vosi ocali, halocikundoko, kuenje vi eciwa kokuaye.” (Tia. 1:5) Ove o tava hẽ kolondaka evi? Suku wa tambulula ohutililo ya Salomone poku wĩha “utima wa lunguka haiwo wa loñoloha” okuti poku sombisa, o tẽla oku limbuka pokati keci ciwa leci cĩvi. (1 Olos. 3:7-14) Ndaño okuti ulandu wa Salomone ulikasi, tua kolela okuti Suku o ka eca olondunge kalume va kuete ovikele vekongelo oco va tate ciwa olomeme viaye.—Olosap. 2:6.
13, 14. (a) Lombolola ndomo “ocisola ca Kristu” ca kuatisa Paulu. (b) “Ocisola ca Kristu” ci tu vetiya oku linga nye?
13 Ocina cikuavo ci tu kuatisa oku kuata onjongole yoku vumba vakuetu, oku sokolola lutate eci Yehova Lomõlaye va tu lingila. Sokolola olondaka vi sangiwa kelivulu lia 2 va Korindo 5:14, 15. (Tanga.) Oco hẽ, ‘ocisola ca Kristu ci tu vetiya’ ndati? Ocisola Kristu a lekisa poku tu fila oco a tẽlise ocipango ca Suku, ci tu sanjuisa kuenda ci tu vetiya oku eca olopandu. Paulu wa vetiyiwa locisola ca Kristu. Ocisola caco co kuatisa oku yuvula ocipululu okuti o velisapo oku vumba Suku kuenda vamanji vekongelo lomanu vakuavo.
14 Oku sokolola lutate ocisola ca Kristu, ci tu vetiya oku eca olopandu. Omo liocisola caco, tua limbuka okuti oku ‘kũlĩla etimba’ poku tẽlisa lika olonjongole vietu, ka ci tu ĩha omuenyo umue wesanju. Kuenje, tua linga apongoloko vomuenyo wetu oco tu pitise kovaso upange wa Suku. Handi vali, tu vetiyiwa oku ‘vumba’ vamanjetu locisola. (Tanga Va Galatia 5:13.) Eci tu litenda ndapika poku talavayela omanu va litumbika ku Yehova, tu tata vakuetu lesumbilo kuenda ocisola. Ocili okuti, etu ka tu yongola oku setukula ocituwa ca Satana coku lundila loku pisa vakuetu.—Esit. 12:10.
Ekuatiso Liepata
15, 16. Nye epata li sukila oku linga oco ulume a kale oñuatisi, ale ukulu wekongelo?
15 Nda manji umue wulume o kuele haeye o kuete omãla, oco a kale oñuatisi pamue ukulu wekongelo, te oku kũlĩhisa tete ndomo eye a tata epata liaye. Uhayele wepata liaye kespiritu, owo weca uvangi wokuti o sesamẽla ovikele. Omo liaco, epata li sukila oku likolisilako oku kuatisa ulume oco a kale oñuatisi pamue ukulu wekongelo.—Tanga 1 Timoteo 3:4, 5, 12.
16 Yehova o sanjuka calua eci vepata Liakristão omanu va li kuatisa pokati. (Va Efe. 3:14, 15) Utue wepata o sukila oku kuata olondunge vioku tata ovikele viepata levi viekongelo kuenda oku “songuila ciwa” onjo yaye. Omo liaco, ciwa okuti ukulu wekongelo ale oñuatisi, o lilongisa Embimbiliya lukãi waye kuenda omãla oco vosi vope esilivilo Kefendelo Liepata osema losemana. Handi vali, o sukila oku endaenda lepata kupange woku kunda. Kuenje, omanu vosi vepata va sukila oku kuama olonumbi viutue wepata.
Ove o ka Linga Vali Upange Waco?
17, 18. (a) Nda ka citava okuti manji umue amamako lovikele, nye a sukila oku linga? (b) Manji wa talavayele ale ndoñuatisi pamue ukulu wekongelo, ocisimĩlo cipi a sukila oku kuata?
17 Citava okuti ove wa kaile ale oñuatisi pamue ukulu wekongelo, pole cilo ku kuete vali epondolo liaco. Ove o sole Yehova kuenda wa kolela okuti eye o ku kuatisa. (1 Pet. 5:6, 7) Kolonepa vipi o sukila oku linga apongoloko? Limbuka akulueya kuove kuenda tava oku kuatisiwa la Suku. Yuvula ocikumbiti. Kala ukualondunge kuenda kuata ovisimĩlo via sunguluka. Manji umue wa kala ukulu wekongelo vokuenda kuanyamo alua, yu wa pumba ovikele a kuata, wa popia ndoco: “Nda likapela oku kuata ombili yoku endaenda kolohongele, kupange woku kunda, kuenda oku tanga Embimbiliya, ndomo nda lingaile eci nda kala ukulu wekongelo. Nda lilongisa oku kala ukuepandi, momo nda kuata ocisimĩlo cokuti, noke yanyamo avali ale umosi, ndi ka tambula vali ovikele nda kuatele, pole, pa pita epanduvali kanyamo, oco ndeya oku kuata vali ocikele caco. Epandi lia ñuatisa oku tambula vali ovikele nda kuatele vokuenda kuotembo.”
18 Nda o kasi liyakavo locitangi caco, ku ka sumue. Sokolola ndomo Yehova a siata oku sumũlũisa upange wove lepata liove konepa yespiritu. Omo liaco, kolisa epata liove konepa yespiritu, nyula nyula ava va vela, kuenda pamisa ava va hongua. Sanjukila esumũlũho o kuete lioku kala Ombangi ya Yehova poku sivaya Suku loku sapula olondaka viwa Viusoma. *—Osa. 145:1, 2; Isa. 43:10-12.
Kũlĩhisa Ekalo Liove
19, 20. (a) Alume vosi va papatisiwa va vetiyiwa oku linga nye? (b) Nye tu ka lilongisa vocipama ci kuaĩmo?
19 Koloneke vilo, kuli esukila lialua liolomitavaso kuenda oloñuatisi viakulu vekongelo. Omo liaco, tu vetiya alume vosi va papatisiwa oku kũlĩhisa ekalo liavo loku lipulisa ndoco: ‘Nda handi si kasi oku talavaya ndoñuatisi, ale ukulu wekongelo, momo lie si kũlĩhisila esunga lieci sia tambuile ocikele caco?’ Ecelela oku kuatisiwa lespiritu lia Suku loku kuata ocisimĩlo ca sunguluka kondaka eyi.
20 Vamanji vosi va pondola oku kuatisiwa lupange tu linga vekongelo. Nda tua lekisa ohenda loku yuvula ovilinga vietimba, tu kuata esanju li tunda koku vumba vakuetu kuenda oku kũlĩla espiritu. Poku ci linga tu ka yuvula oku sumuisa espiritu sandu lia Suku ndomo ci ka lekisiwa vocipama ci kuaĩmo. Tu ci yuvula ndati?
[Atosi pombuelo yamẽla]
^ Ovinimbu 18 Tanga Utala Wondavululi, 15 Yenyenye wo 2009, kemẽla 30-32.
O Tambulula Ndati?
• Ohuminyo yipi yi sangiwa kelivulu lia Mika 5:5?
• Lombolola eci ca kongela koku lieca olumue.
• Omunu o kuata ndati onjongole yoku vumba vakuavo?
• Epata li kuatisa ndati ulume oku kala oñuatisi, ale ukulu wekongelo?
[Apulilo Elilongiso]
[Elitalatu kemẽla 25]
Nye o sukila oku linga oco o tambule ovikele?