Apulilo a Lingiwa la Vakuakutanga

Nda Yehova o nyale efendelo lioviteka, momo lie ka yambuilile Arone omo lioku tunga ociñumañuma congombe?

Arone eci a tunga ociñumañuma congombe, ndomo ca sonehiwa kelivulu Lietundilo ocipama 32, ka pokuile kocihandeleko ca Suku coku yuvula oviteka. (Etu. 20:​3-5) Mekonda liaco, ‘Yehova wa temela calua Arone, kuenda wa sokele oku u nyõla. Otembo yaco Mose wa likutililako Arone.’ (Esin. 9:​19, 20) Anga ohutililo ya Mose ulume umue ukuesunga ya kuata “unene” woku kuatisa Arone? (Tia. 5:​16) Ya kuata. Momo omo liepingilo liaco, Yehova wa tambulula ohutililo ya Mose kuenda ka yambuile vali Arone.

Ocina catete, ekolelo Arone a lekisa vomuenyo waye. Eci Mose a tambula ocikundi coku ka vangula la Fareo ha ecelela va Isareli oku tunda Kegito, Yehova wa nõlele Arone oco a kale onumiwa ya Mose. (Etu. 4:​10-​16) Alume ava vavali, va vangula lutõi la soma Yegito olonjanja vialua, oco va pongolole ocisimĩlo ca Fareo ukuotima wa siva. Arone eci a kala Kegito, wa kala ulume ukuekolelo, haeye wa amamako oku linga upange wa Yehova.​—⁠Etu. 4:⁠21.

Konomuisa eci ca kokela Arone oku tunga ociñumañuma congombe. Mose wa kala Komunda Sinai oloneke 40. Eci ‘omanu va limbuka okuti Mose wa kala oku cilua oku tunda komunda,’ va peya Arone oku va tungila ociñumañuma cimue. Arone wa tava oku tunga ociñumañuma congombe lulu. (Etu. 32:​1-6) Pole, ovina Arone a linga noke yocitangi caco, vi lekisa okuti eye ka sanjukilile efendelo lioviteka. Arone wa ci lingila omo lioku kuatela omanu usumba. Eci Mose a sapuila omanu okuti vosi va fendela ociñumañuma va laikele oku yambuiwa, omãla vosi va Lewi oku kongelamo Arone, va nõlapo oku tiamẽla ku Yehova. Olohulukãi vitatu viomanu va fendela ociñumañuma caco, va pondiwa.​—⁠Etu. 32:​25-29.

Mose wa sapuila omanu hati: “Wa lingi ekandu linene.” (Etu. 32:​30) Arone haeyeko lika wa kuatele eko kekandu liaco. Ci kale Arone ci kale omanu vakuavo, va kuatisiwa lohenda ya Yehova.

Noke liocitangi caco, Yehova wa handeleka okuti Arone o wavekiwa ndocitunda cinene. Suku wa sapuila Mose hati: “Walisa Arone uwalo u kola; o u waveka hu kolisa; eye ha mbumbila komangu yutunda.” (Etu. 40:​12, 13) Eci ci lekisa okuti Yehova wa ecela ekandu lia Arone. Arone ka kaile ufendeli woviteka, pole wa teyuila efendelo liocili lutima waye wosi.