Kũlĩhĩsa Onduko Vondamba Eyi

ST. MORITZ. Anga hẽ eteke limue wa yevele ale onduko eyi? Citava okuti wa yi yevele, momo onduko yocitumãlo cimue ca kemãla voluali ci sangiwa Vondamba yo Engadine kofeka yo Suíça. Ocili okuti, o St. Moritz ocitumãlo cimue ca posoka ca siata oku nyuliwa lomanu valua, momo ci sangiwa pokati Kolomunda vieyuka ocikokoto kombuelo yo Suiça ocipepi longave yofeka yo Italia. Kimbo liaco oko ku sangiwa Usenge wa Velapo Wofeka yo Suiça, (Parque Nacional), u kuete oviti via posoka lovinyama viñi viñi, vi eca esivayo ku Yehova, Ululiki wetu wa Velapo. (Osa. 148:7-10) Pole, ulandu wovituwa vimbo liaco, wopisa kocita 17.

Olonjo vio vimbo liaco, vi kuete ocina cimue ca siata oku komõhisa omanu valua. Vovimano violonjo viaco kuenda kovikuli viapito, va  sonehako onduko ya Suku. Kosimbu omanu vaco, va enda oku posuisa olonjo viavo lololetala, ale oku soneha vovawe. Kũlĩhĩsa ocisonehua co vonjo yimue yi kasi vimbo lio Bever. Ocisonehua caco ca popia hati: “Kunyamo wo 1715. Yehova eye efetikilo, kuenda Yehova eye esulilo. Ovina viosi vi lingiwa lika lekuatiso lia Suku, lacimue tu pondola oku linga lika lietu.” Ocili okuti, ocisonehua eci co kosimbu ci tukula olonjanja vivali onduko ya Suku.

Ove o pondola oku sangavo ocisonehua cimue cosimbu volupale luo Madulain. Ocisonehua caco, ci popia ndoco: “Osamo 127. Nda Yehova ka tungisa onjo olomesele vi likavisa ño. Lucius Rumedius. Kunyamo wo 1654.”

Momo lie onduko ya Suku ya sonehiwila povitumãlo viowiñi vondamba yaco? Kotembo Yapongoloko atavo, Embimbiliya lieya oku sonehiwa kelimi lio Romanche, lina liopiwa kelimi lio Latin lia enda oku vanguiwa lomanu vimbo lio Engadine. Embimbiliya olio lia kala elivulu liatete lia pongoluiwa kelimi liaco. Omanu vaco omo lioku vetiyiwa lovina va tanga Vondaka ya Suku, ka va sonehele lika olonduko viavo vovimano violonjo, pole, va sonehavo onduko ya Suku va sanga Vembimbiliya.

Tunde eci va kapa ovisonehua viaco vovimano violonjo viavo toke cilo, vi kasi oku sapula onduko ya Yehova kuenda oku eca esivayo Kokuaye. Akombe kuenda olonungi vio vimbo liaco, va sole calua oku lilongisa catiamẽla ku Yehova Suku, poku nyula olonjo vikuavo mua sonehiwa onduko yaye, ndeci Vonjango Yusoma Yolombangi Via Yehova vimbo lio Bever.

[Ono Yelitalatu kemẽla 7]

© Stähli Rolf A/age fotostock