Va Pamisiwa Oco Va Yule Ovitangi
Va Pamisiwa Oco Va Yule Ovitangi
“Nẽla ovina viosi vu [Suku] u o ñolaisa.”—VA FIL. 4:13.
1. Momo lie afendeli va Yehova va siatela oku liyaka lovitangi?
AFENDELI va Yehova va siata oku liyaka lovitangi vialua. Vimue pokati kovitangi viaco, vi tunda kekambo lietu lioku lipua, ale koluali lulo lua vĩha. Vikuavo vi tunda kesuvu li kasi pokati komanu va vumba Suku, lava ka vo vumbi. (Efet. 3:15) Tunde kosimbu, Suku wa siata oku kuatisa afendeli vaye oku pandikisa kelambalalo liatavo, oku tamãlala kayonjo akamba, kuenda kovitangi vikuavo. Espiritu sandu liaye li pondola oku tu ĩha ongusu yoku pandikisa.
Va Kuatisiwa Oku Tamãlala Kelambalalo Liatavo
2. Alambalalo etavo a kuete ocimãho ce, kuenda eyilila volonepa vipi?
2 Elambalalo liatavo li lomboloka esuvu li lingiwa komanu omo liekolelo liavo, ale ovina va lilongisa. Ocimãho celambalalo liaco, oku tateka omanu oco ka va ka sandeke alongiso avo, ale oku nyõla ekolelo liavo. Elambalalo, li pondola oku iyilila volonepa via litepa. Citava okuti li limbukiwa, ale ka ci leluka oku li limbuka. Embimbiliya li sokisa atutu a Satana ndeyove liohosi kuenda ndonyõha yi yomba cimue.—Tanga Osamo 91:13.
3. Alambalalo api a sokisiwa locituwa cohosi kuenda onyoha?
3 Ndeci ohosi yi kuata ovinyama, haico Satana a siata oku linga poku vetiya omanu oku linga ungangala, oku va kapa vokayike, ale oku va talisa ohali. (Osa. 94:20) Vo Anuáriu, mua siata oku sandekiwa ovolandu alua a lekisa ndomo Olombangi Via Yehova koloneke vilo via siata oku talisiwa ohali omo liatutu aco. Kolonepa vialua violuali asongui vatavo kuenda vakuapulitika va siata oku vetiya ovisoko violongangala oco vi lambalale afendeli va Suku. Alambalalo aco a siata oku vetiya vamue oku siapo oku vumba Yehova. Ndeci onyõha yi kuata ocina cimue, haico Eliapu lia siata oku linga poku yapula ovisimĩlo viomanu, kuenda oku va vetiya oku linga ocipango caye. Atutu aco a kuete ocimãho coku tu honguisa ale oku tu nyõla kespiritu. Pole, lekuatiso liespiritu sandu lia Suku, tu pondola oku pandikisa kalambalalo aco.
4, 5. Yipi onjila ya sunguluka yoku lipongiyila elambalalo, kuenda momo lie? Lombolola ulandu umue.
4 Oku sokolola alambalalo a litepa tu pondola oku liyaka lavo, ci tu kuatisa oku lipongiya ciwa. Omo okuti ka tua kũlĩhĩle ovitangi viya kovaso yoloneke, ka tu sukila oku yokokela ovina viaco, momo pamue ka vi piti letu. Pole, kuli ocina cimue tu pondola oku linga. Onepa yalua ya vana va pandikisa kalambalalo, va siata oku ivaluka ovolandu a sonehiwa Vovisonehua atiamẽla komanu vana va pandikisa kovitangi. Ovo va ivaluka ovina Yesu a longisa, kuenda va kuãi ongangu yaye. Ovina evi via siata oku va kuatisa oku pamisa ocisola cavo ku Yehova. Ocisola caco ci va kuatisa oku pandikisa kovitangi va liyaka lavio.
5 Kũlĩhĩsa ulandu wa pita la vamanji vamue vavali akãi kofeka yo Malawi. Vakuapulitika poku va kisika oku tambula okokanda kocitundo, va vetiya ocisoko cimue colongangala oku va tipula, loku va punda ovikuata viavo, kuenda oku lipañela oku vakuata loku lipekela lavo. Ocisoko caco colongangala, ca va sapuila okuti, epata lio Betele lia tambula ale otuikanda tuavo. Vamanji yaco va tambulula ndati? Ovo va popia hati: “Etu tu kasi oku vumba lika Suku yocili. Nda vamanji kofiliale va tambula otuikanda tuaco, ka tu kuama ongangu yavo. Ka tu konyoha, ndaño vu yongola oku tu ponda!” Noke yoku tamãlala lutõi, vamanji yaco va eciwa.
6, 7. Yehova wa siata oku eca ndati unene kafendeli vaye poku liyaka lelambalalo?
6 Upostolo Paulu wa limbukile okuti Akristão vo ko Tesalonike va tambula esapulo liondaka ya Suku “lohali ya lua,” pole, lekuatiso liespiritu sandu’ va kuata ‘esanju. (1 Va Tes. 1:6) Akristão valua vo kosimbu lava vo koloneke vilo okuti va liyaka lovitangi kuenda va yula elambalalo, va popia hati, vepuluvi liohali ya piãla, va kuata ombembua yovutima yi panga onepa kepako liespiritu sandu lia Suku. (Va Gal. 5:22) Ombembua yaco, ya va kuatisa oku lava ovitima kuenda ovisimilo viavo. Ocili okuti Yehova eca espiritu sandu kafendeli vaye oco li va kuatise oku pandikisa kelambalalo kuenda oku kuata olondunge poku liyaka lovitangi. a
7 Valua va siata oku komõha poku mola ndomo afendeli va Suku va kasi oku amamako lekolelo ndaño lelambalalo. Tunde kosimbu, Olombangi Via Yehova via siata oku kuata ongusu yoku pandikisa. Upostolo Petulu o tu sapuila hati: “Nda vo wimbuili onduko ya Kristu . . . wa sumũlũhi, momo nda oco, espiritu liulamba, okuti espiritu lia Suku, li kasi lene.” (1 Pet. 4:14) Oku lambalaliwa omo lioku pokola kolonumbi via sunguluka, ku eca uvangi wokuti, tu kasi oku linga ocipango ca Suku. (Mat. 5:10-12; Yoa. 15:20) Tu kuete esanju omo liuvangi waco wesumũlũho li tunda ku Yehova!
Va Kuatisiwa Oco va Tamãlale Kayonjo Akamba
8. (a) Nye ca kuatisa Yehosua la Kalembe oku tamãlala layonjo akamba? (b) Ongangu ya Yehosua la Kalembe yi tu longisa nye?
8 Elambalalo likuavo Akristão va sukila oku pandikisa lalio, ayonjo akamba vãvi. Pole, omo okuti espiritu lia Yehova lia velapo espiritu lioluali, tu pondola oku pandikisa kovitangi vioku yoliwa epembe, alundi, ale oku tamãlala lomanu vana va tu vetiya oku kuama ovilinga viavo vĩvi. Nye ca kuatisa Yehosua la Kalembe oku tamãlala kovisimĩlo vĩvi violondavululi vikuavo ekũi via tumiwile kofeka yo Kanana? Espiritu sandu lia va ĩha ovisimĩlo via li tepa.—Tanga Atendelo 13:30; 14:6-10, 24.
9. Momo lie Akristão va sukilila oku litepa lomanu vakuavo?
9 Espiritu sandu lia kuatisavo ovapostolo va Yesu oku pokola ku Suku kuenda oku yuvula olonumbi viomanu vana va li tendele okuti alongisi vetavo liocili. (Ovil. 4:21, 31; 5:29, 32) Omanu valua koloneke vilo, va nõlapo oku kuama owiñi oco ka va ka lambalaliwe. Pole Akristão vocili, va nõlapo oku linga ovina va kũlĩha okuti via sunguluka. Omo liaco, va eca olopandu ku Suku omo lioku va ĩha ongusu yoku yuvula oku kuatela usumba omanu. (2 Tim. 1:7) Kũlĩhĩsa onepa yimue tu sukila oku yuvula oku yapuisiwa lakamba.
10. Ocitangi cipi Akristão vamue va siata oku liyaka laco?
10 Amalẽhe vamue va siata oku liyaka locitangi coku nõla onjila va yongola oku kuama, nda ekamba liavo lia linga ekandu. Ovo pamue va sima okuti, nda va sapuilako akulu vekongelo oco ekamba liavo li kuatisiwe, ci nyõla ukamba wavo. Omo liaco, va nõlapo oku yuvula oku situlula ocitangi caco. Una wa linga ekandu o pondola oku kisika akamba vaye oco ka va ka sapule ondaka yaco. Ocitangi eci ka ca siatele oku pita lika lamalẽhe. Akulu vamue va kuetevo ocitangi coku yuvula oku sapuilako akulu vekongelo nda ekamba liavo ale umue ukuepata wa linga ekandu. Pole, Akristão vocili nye va sukila oku linga poku liyaka lovitangi viaco?
11, 12. Nda manji umue oku vetiya oco ku ka situlule ekandu liaye, nye o sukila oku linga kuenda momo lie?
11 Sokolola ulandu owu. Umalẽhe umue o tukuiwa hati, Alex wa kũlĩha okuti ekamba liaye Steve o kuete ocituwa coku tala omanu va kasi epolõla loku linga ukahonga. Kuenje, Alex o sapuila Steve hati, u kuetele ohele omo lieci a kasi oku linga. Pole, Steve ka tava kondaka yaye. Eci Alex o vetiya oco a sapele lakulu vekongelo catiamẽla kocitangi caye, Steve wa tambulula hati, nda o yongola okuti ukamba wetu wamamako, ku ka situlule ondaka yaco. Anga hẽ, Alex o sukila oku kuata ohele yoku tepa ukamba wavo? Eye o kuetevo ohele yokuti, nda Steve wa likala, akulu vekongelo ka va ka tẽla oku kũlĩha u wa vangula ocili pokati kavo. Handi vali, nda Alex ka situluile ondaka yaco, ocitangi caco ka ci tetuluiwa. Kuenje Steve o nyõla ukamba waye la Yehova. Alex o sukila oku ivaluka okuti, “usumba omunu a kuetele ukuavo onjanjo, puãi u wa kolela Yehova wa koka.” (Olosap. 29:25) Nye Alex a sukila oku linga? Eye o sukila vali oku enda ku Steve loku sapela laye catiamẽla kocitangi caco lutõi. Citava okuti, vepuluvi eli Steve o tava oku sapela catiamẽla kocitangi caye. Alex te o vetiya Steve oco a sapele lakulu vekongelo, kuenda oku u lomboluila okuti nda ka ci lingile, eye o ka sapula ondaka yaco.—Ovis. 5:1.
12 Nda eteke limue wa liyaka locitangi caco, citava okuti ekamba liove konjanja yatete ka li sanjukila ekuatiso liove. Pole, kovaso yoloneke o ka limbuka okuti, wo lingila eci ca sunguluka. Nda eye wa tava kekuatiso liaco, o ka pandula utõi wove lesunguluko wa lekisa kokuaye. Nda wa ku temẽla omo lioku pinga kakulu vekongelo oco a kuatisiwe, ca sunguluka hẽ okuti amamako oku kuata ukamba laye? Oku sanjuisa Yehova Ekamba lietu lia velapo, oco lika ca sunguluka. Nda tua pitisa kovaso Yehova, omanu vana vo sole, va vetiyiwa oku lekisa esumbilo omo liekolelo lietu, kuenje, va ka linga akamba vetu vocili. Ka tu ka eceleli okuti Eliapu li sanga evelo lioku tu yapuisa vekongelo Liakristão. Nda ka tua ci lingile, tu sumuisa espiritu sandu lia Yehova. Pole, nda tua likolisilako oku yelisa ekongelo, ci lekisa okuti, tu kasi oku pokola kolonumbi via Yehova.—Va Efe. 4:27, 30.
Va Pamisiwa Oco va Pandikise Kovitangi Viosi
13. Ovitangi vipi afendeli va Yehova va siata oku pita lavio, kuenda momo lie ovitangi viaco via siatela?
13 Ovitangi vi pondola oku iyilila volonepa vialua ndeci: Uhukũi, oku tundisiwa kupange, ovilemawe, olofa via umue ngandietu, oku vela, kuenda ovina vikuavo. Omo okuti, tu kasi ‘kotembo yohali,’ vosi yetu tu lavoka oku liyaka lovitangi. (2 Tim. 3:1) Eci tu liyaka lovitangi viaco, ka tu ka kuati usumba. Momo espiritu sandu li tu ĩha ongusu yoku pandikisa kovitangi viosi tu liyaka lavio.
14. Nye ca pamisa Yovi oku pandikisa kovitangi?
14 Yovi wa pita lovitangi vialua. Eye wa pesela ukuasi, omãla, akamba, uhayele, kuenda ukãi waye wa puile elavoko ku Yehova. (Yovi 1:13-19; 2:7-9) Pole, wa sanga lika elembeleko ku Elihu. Ondaka yaye kuenda esapulo lia Yehova kokuaye yeyi: “A Yovi, yevelela eci mopia. Talama, sokolola ovikomo via Suku.” (Yovi 37:14) Nye ca kuatisa Yovi oku pandikisa kovitangi? Nye ci pondolavo oku tu kuatisa? Tu sukila oku sokolola ovilinga kuenda unene wespiritu sandu lia Yehova. (Yovi 38:1-41; 42:1, 2) Citava okuti tu sokolola ulandu umue tua pita lawo, u lekisa uvangi wocisola Suku a tu kuetele. Yehova toke cilo, o tu kuetele ocisola.
15. Nye ca pamisa upostolo Paulu oku pandikisa kovitangi?
15 Upostolo Paulu wa pandikisavo kovitangi vialua omo liekolelo liaye. (2 Va Kor. 11:23-28) Nye co kuatisa oku kuata utima wa sunguluka kuenda uloño woku pandikisa? Eye wa ci linga poku likutilila ku Yehova. Osimbu a kala oku tala ohali yina yeya oku sulila kolofa viaye, wa soneha hati: “Ñala, eye wa ñaila onyima, haeye wa nyiha ongusu yoku kunda ondaka okuti vakualofeka vosi va yi yeva. Oco nda popelua vomela wohosi.” (2 Tim. 4:17) Paulu omo liovitangi a liyaka lavio komuenyo, wa vetiya vamanjaye Akristão hati: “Lacimue ko ka ci kuateli ohele.”—Tanga Va Filipoi 4:6, 7, 13.
16, 17. Lombolola ulandu umue u lekisa ndomo Yehova a siata oku pamisa afendeli vaye koloneke vilo poku liyaka lovitangi.
16 Manji umue ukundi wotembo yosi o tukuiwa hati, Roxana, wa limbuka ndomo Yehova a siata oku tata omanu vaye. Eteke limue, eci a pinga kucime caye kupange epuluvi lioku enda kohongele yofeka, cime caye wo tambulula lonyeño hati, nda wa enda kohongele yaco o tundisiwa kupange. Manji Roxana ka pokuile kondaka yaye, pole, wa nõlapo oku enda kohongele yofeka loku likutilila oco ka ka tundisiwe kupange waye. Noke yoku likutilila wa tula utima. Keteke lia Sengunda noke liohongele yofeka, cime caye wo tundisa kupange. Eye wa yokokele calua. Ndaño okuti wa enda oku fetiwa olombongo vitito, wa sukilile upange waco oco a tekule epata liaye. Noke wa likutilila vali, kuenda wa sokolola okuti, omo Suku wo lingila eliangiliyo liokulia kuespiritu kohongele yofeka, o pondolavo oku u wĩha ovina vikuavo a sukila. Osimbu a kala oku enda konjo, wa mola esapulo limue li popia hati, “Ku Sukiliwa” omanu va tẽla oku talavaya lolomakina vioku tonga, kuenje eye wa lisonehisa kupange waco. Ndaño cime caco wa limbuka okuti ka tẽla oku linga upange waco, pole, wo kapa kupange ukuavo a fetiwa olombongo vi pitahãla vina a enda oku tambula kupange a tundisiwa. Manji Roxana wa limbuka okuti, olohutililo viaye via tambuluiwa. Handi vali, wa kuata esumũlũho lioku kundila omanu valua a talavaya lavo kupange waco. Ci soka olonalavayi vitãlo oku kongelamo cime caye, va tava oku lilongisa Embimbiliya, kuenje va papatisiwa.
17 Olonjanja vimue, tu sima okuti olohutililo vietu ka vi tambuluiwa ndomo tu yongola. Nda ka vi kasi oku tambuluiwa, kuli esunga liaco. Yehova wa ci kũlĩha, pole, tu ka kuata lika elomboloko liaco kovaso yoloneke. Tu sukila oku ivaluka okuti, Suku ka yanduluka afendeli vaye vakuekolelo.—Va Hev. 6:10.
Va Kuatisiwa Oku Yula Ovitangi Kuenda Ayonjo
18, 19. (a) Momo lie tu lavokaila oku lambalaliwa loku yonjiwa? (b) O pondola ndati oku yula elambalalo?
18 Afendeli va Yehova ka va komõha poku liyaka lovitangi ndeci: Oku setekiwa, oku sumuisiwa, oku lambalaliwa, kuenda oku sepuiwa lakamba. Ocili okuti, tua siata oku sepuiwa loluali. (Yoa. 15:17-19) Pole, espiritu sandu li pondola oku tu kuatisa oku yula ovitangi tu liyaka lavio kupange tu lingila Yehova Suku. Momo eye ka ecelela okuti, tu yonjiwa lovina ka tu tẽla. (1 Va Kor. 10:13) Eye ka tu yanduluka. (Va Hev. 13:5) Oku pokola Kondaka yaye, ci tu kuatisa, kuenda ci tu pamisa. Omo liaco, espiritu lia Suku li pondola oku vetiya vamanji oco va ece ekuatiso tu sukila.
19 Tu amamiko oku pinga espiritu sandu volohutililo, kuenda velilongiso Liovisonehua. Omo liaco, ‘tu livela okuti okupama kuetu kuamamako lunene wosi ndeci ca soka lunene wulamba [wa Suku], okuti tu likolisila ño loku enda lepandi lonjolela.’—Va Kol. 1:11.
[Atosi pombuelo yamẽla]
a Oco o sange ovolandu akuavo, tala Vutala Wondavululi 1 ya Kupemba wo 2001, kemẽla 24, kuenda o Despertai! 8 ya Kayovo yunyamo wo 1993, kemẽla 21 kuenda 22.
O Tambulula Ndati?
• O pondola oku lipogiya ndati oco o yule ovitangi?
• Nye o sukila oku linga nda ekamba liove lia ku vetiya oco ku ka situlule ekandu limue?
• Ekolelo lipi o pondola oku kuata poku liyaka lovitangi?
[Apulilo Elilongiso]
[Elitalatu kemẽla 28]
Ulandu wa Yehosua la Kalembe u tu longisa nye?
[Elitalatu kemẽla 29]
O kuatisa ndati ekamba liove lia lueya?