Ca Velapo Oku Likolisilako!

EFENDELO LIEPATA kuenda elilongiso Liembimbiliya, vi kuete esilivilo koku ‘longisa omãla, loku va pindisa lovilongua via Yehova.’ (Va Efe. 6:4) Nda ove wunjali, wa kũlĩha ciwa okuti omãla va kava lonjanga. O pondola ndati oku va vetiya? Kũlĩhĩsa eci olonjali vimue via siata oku linga.

George, o kasi ko California kofeka yo Estados Unidos, wa popia hati: “Eci omãla vetu va kala vatito, ame lukãi wange, tua enda oku linga elilongiso Liembimbiliya vepata. Olonjanja vimue, tu wala ndeci omanu vo kosimbu va walaile, kuenda tu linga ocindekaise culandu umue tua tanga Velivulu Liasapulo Embimbiliya. Tua endavo oku panga olosipata, akolowa, uhamba, kuenda ovina vikuavo. Tua lingailevo olomapalo vimue viatiamẽla Kembimbiliya vioku lipula okuti, ‘ame helie?,’ kuenda oku soneha apulilo amue Embimbiliya. Noke tu setukula oku tunga ocimbaluku ca Noha, ale tu luvikiya olotembo kua pita ovolandu amue a sangiwa Vembimbiliya. Olonjanja vimue tua enda oku soneha oviluvialuvia viomanu va tukuiwa Vembimbiliya. Tua enda oku soneha ociluvialuvia covimaleho viespiritu via tukuiwa kelivulu lia Va Efeso 6:11-17. Noke omunu lomunu pokati ketu, o tukula eci ocimalẽho locimalẽho ci lomboloka. Ovina evi via siata oku tu kuatisa oku kuata esanju kelilongiso lietu liepata.”

Ina umue o tukuiwa hati, Debi, o kasi ko Michingan, kofeka yo Estados Unidos, wa popia hati: “Eci omõletu ukãi a kala lanyamo atatu, ame lulume wange, ca tĩlile calua oku u longisa. Eteke limue eci nda kala oku tanga lolukandi ulandu wa Isake la Rebeka Velivulu Liasapulo Embimbiliya, nda tikula otuviñumañuma tuvali, yu nda fetika oku linga ocindekaise ndu okuti otuviñumañuma tuaco tua kala oku vangula. Noke eye wa fetika oku yevelela lutate! Volosãi via kuamamo, tua enda oku nyañula otuviñumañuma tuaco poku linga ovindekaise viomanu vakuavo va sangiwa Vembimbiliya. Noke yoku tanga ulandu umue Wembimbiliya, omõletu wa enda oku sandiliya oviñumañuma vimue vonjo ale ovikuata vikuavo oco vi kale ndocindekaise culandu tua tanga. Eci ca kala ndukuasi umue u kuete esilivilo lialua! Tua panga okasia yimue kuenda tua kapako ukolo u vumbula ndocindekaise conjo ya Rahava yina ya kapiwile ukolo ukusuka. Tua tikula ukolo umue u kuete ometulu yimosi lomeyu, kuenje tua u ñualisa kuti wolueyo oco u linge ocindekaise conyõha yina ya tukuiwa kelivulu Liatendelo 21:4-9. Ovina viaco tua vi kapa vekolombele lietu. Tua komõha calua eci tua limbuka okuti omõla wetu ukãi poku iya vohondo yoku lia, o sandiliya ‘ekolombele liaye mu sangiwa oviñumañuma viasapulo Embimbiliya.’ Ca tu sanjuisa calua eci tua mola ndomo omõletu a linga ovindekaise viaco lelomboloko liaye!”

Oku tekula omãla, kuenda oku va vetiya olosemana viosi oco va kuate onjongole yoku vumba Yehova, ka ca lelukile. Pole, efendelo liepata kuenda elilongiso Liembimbiliya, vi kuatisa oku va longisa ovina vikuavo viespiritu. Ocili okuti, ca velapo oku likolisilako!