Ove hẽ wa Sanjukila Asumũlũho o Kuete?

ECI omãla va Isareli va yovuiwa locikomo kupika wo Kegito, va sanjukile omo lielianjo va kuata lioku fendela Yehova. (Etu. 14:29–15:1, 20, 21) Pole, noke utima wavo wa pongoloka. Va fetika oku lisiõsiõla omo liekalo liomuenyo wavo. Momo lie? Momo va ivaleleko ovina Yehova a va lingila kuenje va tiamisila lika ovitima viavo kovitangi va kala oku liyaka lavio vekalasoko. Va sapuila Mose hati: “Nye wa tu upila Vegito okuti tu fila vekalasoko? Momo ka muli okulia ndaño ovava. Tu nyãle okulia kuaco kũvi.”—Ate. 21:5.

Noke yovita vianyamo, Soma Daviti wo ko Isareli, wa imba ocisungo hati: “Ame puãi nda kolela ocisola cove ka ci pui. Utima wange u yolela eyovo liove. Njimbila Yehova ovisungo omo wa nyiha calua.” (Osa 13:5, 6) Daviti lalimue eteke a ivaleleko ovilinga viocisola, Yehova a lekisa kokuaye. Otembo yosi, wa enda oku sokolola ovina viaco. (Osa. 103:2) Yehova wa siatavo oku tu ĩha ovina vialua, kuenda lalimue eteke ka tu ka sepuli ovina viwa a siata oku tu lingila. Tu kũlĩhĩsi amue pokati kasumũlũho tu kuete.

‘Ukamba la Yehova’

Ukualosamo wa imba ocisungo hati: ‘Ukamba la Yehova u kasi lava vo sumba.’ (Osa. 25:14) Ocili okuti, omanu ka va li puile oku kuata ukamba la Yehova, esumũlũho linene! Nye ci pondola oku pita letu nda tua pitisa lika kovaso asakalalo omuenyo okuti ka tu kuata vali otembo yoku likutilila? Sokolola eci ci pita lukamba wetu la Suku. Omo okuti Yehova eye Ekamba lietu, o lavoka okuti tu kolela kokuaye, kuenda tu u situluila utima wetu vohutililo, loku u sapuilako asakalalo etu kuenda olonjongole vietu. (Olosap. 3:5, 6; Va Fil. 4:6, 7) Ka ca sungulukile  hẽ oku sokolola ciwa ndomo tu linga olohutililo vietu?

Umalẽhe umue Ombangi ya Yehova o tukuiwa hati, Paul eci a kũlĩhĩsa ciwa olohutililo viaye, wa limbuka okuti wa sukilile oku vi mioñolola. a Eye wa popia hati: “Nda kuatele ocituwa coku pitolola olondaka vimuamue poku likutilila ku Yehova.” Eci Paul a konomuisa vo Índice de Publicações da Torre de Vigia, wa limbuka okuti Vembimbiliya mu sangiwa eci ci soka 180 kolohutililo. Olohutililo viaco, vi lekisa ndomo afendeli va Yehova kosimbu va situlula utima wavo. Paul wa popia hati: “Poku sokolola kovolandu aco a sangiwa Vovisonehua, nda lilongisa okuti poku likutilila ndi sukila oku teta onimbu. Eci ca ndi kuatisa oku situlula utima wange ku Yehova. Cilo nda siata oku yeva esanju lialua poku likutilila.”

‘Okulia Kotembo ya Tukuiwa’

Esumũlũho likuavo tua siata oku tambula ku Yehova, ukũlĩhĩso wovina vialua viatiamẽla Kovisonehua. Osimbu tu litekula lokulia kualua kuespiritu, ‘ovitima vietu vi sanjuka, kuenje tu imba ovisungo.’ (Isa. 65:13, 14) Omo liaco, tu sukila oku yuvula ovina viosi vi nyõla utima wetu koku sanjukila ocili Cembimbiliya. Oku yevelela ovohembi a vana va siapo efendelo liocili, ci nyõla ovisimĩlo vietu kuenda ci tu vetiya oku sepula okulia kuespiritu Yehova a siata oku tu ĩha “kotembo ya tukuiwa” vonduko ‘yukuenje wa kolelua haeye wa lunguka.’—Mat. 24:45-47.

André, okuti o kasi ale oku vumba Yehova anyamo alua, wa puluka oku yapuisiwa lovisimĩlo via vana va siapo etavo liocili. Eye wa simĩle okuti oku tanga vo Internet asapulo omanu vaco, ka ci lingi cimue. Noke wa popia hati: “Kefetikilo, nda enda oku vetiyiwa lolondaka viavo. Osimbu nda amamako oku tanga asapulo avo, nda fetika oku lisandela esunga lioku tunda vocisoko ca Yehova. Pole, noke yoku kũlĩhĩsa ciwa ovina omanu vaco va lundila Olombangi via Yehova, nda limbuka uhembi walongisi vaco. ‘Esunga’ ovo va lekisa lioku tu pisa, liopiwa kulandu wavo muẽle. Omo liaco, nda fetika vali oku tanga alivulu etu, loku enda enda kolohongele. Nda limbuka ndomo nda kala oku yapuisiwa.” Ci sanjuisa calua omo okuti, André wa tiuka vali vekongelo.

‘Ongongela ya Vamanji’

Ocisola, longongela yetu la vamanji, esumũlũho limue li tunda ku Yehova. (Osa. 133:1) Eli olio esunga lieci upostolo Petulu a sonehela hati: ‘Soli ongongela ya vamanji vosi.’ (1 Pet. 2:17) Omo okuti tua tiamẽla kongongela Yakristão va sangiwa koluali luosi, tu kuatisiwa la va isietu kespiritu, va ina yetu, vamanji alume kuenda akãi vakuekolelo.—Mar. 10:29, 30.

Ocili okuti, olonjanja vimue omo liovitangi, tu pondola oku nyõla ukamba wetu la  vamanji. Ca leluka oku sumuisiwa lovilinga via umue ale oku lisiõsiõla omo liocituwa caye cĩvi. Nda tu kasi oku liyaka locitangi caco, anga hẽ ka ca sungulukile oku ivaluka okuti Yehova o sole afendeli vaye vosi ndaño ka va lipuile? Handi vali, “nda tu popia tuti, Ka tu kuete akandu, tu lilimbika, kuenda Ocili vitima vietu ka cimo.” (1 Yoa. 1:8) Anga hẽ ka tu sukila oku likolisilako oku ‘kuamelela oku lisola pokati kuenda, oku liecela pokati?’—Va Kol. 3:13.

Ufeko umue o tukuiwa hati, Ann, wa lilongisa lonjila yimue ya tĩla yoku kapako esilivilo lioku kala vongongela ya vamanji. Eye wa silepo ekongelo Liakristão ndeci ca linga omõla ocisandui wa tukuiwa volusapo lua Yesu. Noke wa likekembela kuenje wa tiuka vali vocisoko ca Yehova. (Luka 15:11-24) Nye Ann a lilongisa kovitangi a pita lavio? Eye wa popia hati: “Cilo omo nda tiuka vocisoko ca Yehova, nda limbuka okuti vamanji vosi va kuete esilivilo ndaño ka va lipuile. Kosimbu nda enda oku lisiõsiõla calua omo liovituwa viavo. Pole cilo, si ecelela vali okuti cimue ci nyõla esumũlũho liange lesanju lioku kala pokati ka vamanji. Voluali lulo, ka muli lacimue ci tu ĩha esunga lioku nyõla ekalo lietu kespiritu.

Amamako Oku Sanjukila Asumũlũho Ove

Elavoko lietu Kusoma wa Suku una u ka potolola ovitangi viomanu, ukuasi umue wa velapo. Konjanja yatete eci tua yeva elavoko liaco, tua kuata esanju lialua! Tua linga ndufũli wa tukuiwa volusapo lua Yesu, una ‘wa landisa cosi a kaile laco’ oco a lande “olomota viwa viondongo.” (Mat. 13:45, 46) Yesu ka popele okuti ulume waco noke wa fetika oku suvuka omota yondongo. Cimuamue haico kokuetu okuti, ka tu ka nyõli esanju lietu liatiamẽla kelavoko li komõhisa.—1 Va Tes. 5:8; Va Hev. 6:19.

Kũlĩhĩsa ulandu wa manji umue ukãi o tukuiwa hati, Jean, o kasi ale oku vumba Yehova ci pitãhala 60 kanyamo. Eye wa popia hati: “Eci ca siata oku ndi kuatisa oku tiamisila utima Kusoma wa Suku, oku sapela lomanu catiamẽla Kusoma waco. Eci ndi mola ndomo omanu va sanjuka omo lioku kuata elomboloko Liusoma waco, ci ndi kolisa. Poku limbuka ndomo omanu va lilongisa Embimbiliya va linga apongoloko komuenyo wavo omo liocili Cusoma waco, ndi popia lutima wange siti: ‘Eli olio esapulo liocili ndi sukila oku sapuilako vakuetu!’”

Tu kuete esunga lioku eca olopandu omo liasumũlũho alua tu kuete konepa yespiritu. Ndaño okuti olonjanja vimue tu sumua omo liovitangi vimue ndeci: alambalalo, oku vela, oku kuka, oku fisa vangandietu, kuenda usuke, tua kũlĩha okuti ovina evi, vi pita ombamba. Vemehi Liusoma wa Suku, kasumũlũho etu espiritu ku ka vokiyiwa asumũlũho o ketimba. Voluali luokaliye ovitangi viosi tu liyaka lavio cilo, ka vi ka kalamo vali.—Esit. 21:4.

Osimbu otembo yaco ka ya pitilile, tu amamiko oku sanjukila asumũlũho etu espiritu kuenda oku eca olopandu ndeci ukualosamo a imba ocisungo hati: “A Yehova Suku yange, ovikomo wa linga, lovisimilo wa tu simila, via lua cimue. Lomue wa lisoka love. Nda nda sokele oku vi sapula loku vi vangula, nda ka ca tavele oku vi tenda omo via lua enene.”—Osa. 40:5.

[Atosi pombuelo yamẽla]

[Elitalatu kemẽla 18]

Eci tu liyaka lovitangi, tu kuatisiwa konepa yespiritu