Sola Esunga Lutima Wove Wosi

“[Ove] o sole esunga.”—OSA. 45:7.

1. Nye ci ka tu kuatisa oku endela “volonjila viesunga”?

 YEHOVA o songuila omanu vaye “volonjila viesunga” Londaka yaye kuenda espiritu sandu. (Osa. 23:3) Omo okuti ka tua lipuile, ca leluka oku yapuka vonjila yesunga. Oco tu linge vali eci ca sunguluka, tu sukila oku likolisilako calua. Nye ci tu kuatisa oku ci linga? Tu sukila oku sola eci ciwa ndeci Yesu a linga.—Tanga Osamo 45:7.

2. Nye ci lomboloka ondaka “olonjila viesunga”?

² Nye ci lomboloka “olonjila viesunga”? Ondaka onjila, yi lomboloka elila ale ociposa. “Olonjila” viesunga via tukuiwa ndeti, vi lomboloka olonumbi via Yehova. Kelimi lio Heveru kuenda lio Helasi, ondaka “esunga” yi tiamisiwila kocina cimue ca “suñama,” ci lomboloka oku kakatela kolonumbi viovituwa viwa. Omo okuti ‘Yehova [eye] ocitumãlo ca vakuesunga,’ afendeli vaye va kevelela okuti eye o va lekisa olonumbi viesunga vina va sukila oku kuama.—Yer. 50:7.

3. Ndamupi tu pondola oku lilongisa ovina vialua viatiamẽla kesunga lia Suku?

³ Tu pondola lika oku sanjuisa Suku nda tu likolisilako lutima wosi oku kapako olonumbi viaye viesunga. (Esin. 32:4) Tu pondolavo oku ci linga poku lilongisa ovina viatiamẽla ku Yehova Suku vi tunda Vondaka yaye Embimbiliya. Osimbu tu lilongisa ovina vialua viatiamẽla kokuaye loku pamisa ukamba wetu laye, tu ka sola esunga liaye. (Tia. 4:8) Poku nõla onjila tu yongola oku kuama, tu sukilavo oku songuiwa Londaka ya Suku.

Sandiliya Esunga Lia Suku

4. Nye ca kongela voku sandiliya esunga lia Suku?

⁴ Tanga Mateo 6:33. Voku sandiliya esunga lia Suku, ka mua kongelele lika oku pesila otembo koku kunda olondaka viwa Viusoma. Oco upange wetu u taviwe la Yehova, tu sukila oku kuata ovituwa vi litava lolonumbi viaye. Vana va kasi oku sandiliya esunga lia Yehova va sukila oku linga nye? Va sukila oku ‘wala omunu wokaliye una wa tungiwa lesetahãlo lia Suku lesunga kuenda oku kola.’—Va Efe. 4:24.

5. Nye ci tu kuatisa oku yula esumuo?

⁵ Osimbu tu likolisilako oku kapako olonumbi via Suku komuenyo wetu, pamue tu yeva esumuo omo liakulueya etu. Nye ci tu kuatisa oku yula esumuo liaco loku sola kuenda oku lekisa esunga? (Olosap. 24:10) Tu sukila oku likutilila olonjanja viosi ku Yehova “lovitima viocili haivio via kolisua lekolelo.” (Va Hev. 10:19-22) Ci kale Akristão olombuavekua ale vana va kuete elavoko lioku kala palo posi, vosi tu sukila oku lekisa ekolelo kocilumba cocisembi ca Yesu Kristu kuenda kupange waye woku kala Ocitunda Cinene. (Va Rom. 5:8; Va Hev. 4:14-16) Esilivilo liosonde ya Yesu yina ya peseka, lia lekisiwa vetendelo liatete Liutala ulo Wondavululi. (1 Yoa. 1:6, 7) Ocipama caco, ci popia hati: “Ocikuata cimue ci kusuka oku ci vanjela vocinyi lovitulu yi kusuka, ci moleha ndu okuti ci yela. Cimuamue haico catiamẽla kakandu etu, okuti, ndaño a kusuka ndonanga yohusu, vonduko yosonde ya Kristu,  Suku o a tenda okuti a yela.” (Evambi Linene wo 1879, kem. 6) Ocili okuti, vonduko yocilumba cocisembi Comõlaye o soliwe, Yehova wa tu lingila eliangiliyo limue li komõhisa!—Isa. 1:18.

Kũlĩhĩsa Ovimalẽho Viove Viespiritu

6. Momo lie ci kuetele esilivilo oku kũlĩhĩsa ocimalẽho cetu cespiritu?

⁶ Olonjanja viosi, tu sukila oku kuata ‘esunga ndociyepelo covonete’ momo olio ocimalẽho cavelapo cespiritu ci tunda ku Suku. (Va Efe. 6:11, 14) Ci kale okuti ndopo tua litumbika ku Yehova ale tu kasi oku u vumba vokuenda kuanyamo alua, tu sukila oku kũlĩhĩsa ovimalẽho vietu viespiritu eteke leteke. Momo lie? Momo Eliapu kuenda olondele viaye va takumuiwa ocipepi la palo posi. (Esit. 12:7-12) Satana o kasi lonyeño yalua kuenda wa kũlĩha okuti otembo yaye yitito. Omo liaco, wa siata oku vokiya elambalalo liaye komanu va Suku. Anga hẽ tua kũlĩha esilivilo lioku kuata ‘esunga ndociteyuilo co vonete’?

7. Oku limbuka esilivilo lioku wala ‘esunga ndociteyuilo co vonete,’ ci tu kuatisa ndati?

⁷ Ociyepelo co vonete, ci teyuila utima. Omo okuti ka tua lipuile, ovisimĩlo viutima wetu via piãla kelimbi haivio via hongua. (Yer. 17:9) Omo liaco, tu sukila oku u pindisa loku u pokuisa, momo wa tekela lika koku linga eci cĩvi. (Efet. 8:21) Nda tua limbuka esilivilo lioku wala ‘esunga ndociteyuilo co vonete,’ ka tu ka lula ocimãleho caco poku linga ovina Suku a nyãle. Handi vali, tu ka yuvula oku kuata ovisimĩlo vioku linga ovina vĩvi. Ka tu ka pesila otembo yetu koku tala lika otelevisãu. Pole tu ka likolisilako oku linga ovina vi sanjuisa Yehova. Ndaño okuti pamue tua lueya volonumbi viesunga omo liovisimĩlo vĩvi, lekuatiso lia Yehova, tu ka katuka vali.—Tanga Olosapo 24:16.

8. Momo lie tu sukilila oku kuata “ociyepelo cekolelo”?

⁸ Pokati kovimãleho vietu viespiritu, pa sangiwa “ociyepelo cekolelo.” Oco ci tu kuatisa oku “ima isongo viosi viondalu viukuevĩho.” (Va Efe. 6:16) Oku kuata ekolelo loku sola Yehova lutima wosi, ci tu kuatisa oku lekisa esunga kuenda oku amamako oku endela vonjila yomuenyo ko pui. Osimbu tu lilongisa oku sola Yehova, tu ka limbuka esilivilo liesunga liaye. Pole, nye ci popiwa catiamẽla kutima wetu? Utima u tu kuatisa ndati kelikolisilo lietu lioku sola esunga?

Kuata Utima wa Yela

9. Utima wa yela u tu kuatisa ndati?

⁹ Eci tua papatisiwa, tua pinga ku Yehova oco tu kuate “utima we lipua.” (1 Pet. 3:21) Omo lioku kolela kocisembi, osonde ya Yesu yi tuvika akandu etu kuenda tu kuete ekalo liwa kovaso a Suku. Oco tu amameko oku sanjuisa Suku, tu sukila oku kuata utima wa yela. Nda utima wetu u tu vetela evelo kuenda u tu lungula, tu sukila oku eca  olopandu, momo wa pindisiwa ciwa. Eci ci lekisa okuti utima wetu ka wa sinilile olonumbi via Yehova viesunga. (1 Tim. 4:2) Pole, komanu vana va yongola oku sola esunga, utima u pondolavo oku va kuatisa kolonepa vikuavo.

10, 11. (a) Tukula ulandu umue u lekisa ndomo oku kuata utima wa pindisiwa Lembimbiliya ci kuete esilivilo. (b) Momo lie oku sola esunga ku ponduila oku tu nenela esanju lialua?

¹⁰ Eci tu linga ocina cimue ka ca sungulukile, utima u tu pisa ale u tu vetela evelo. Umãlehe umue weya oku yapuka vonjila yesunga. Eye wa fetika oku kuata ocituwa coku tala umbondo wukahonga kuenda oku sipa eliamba. Poku endaenda kolohongele kuenda kupange woku kunda, utima waye wa enda oku u vetela evelo, momo wa kala ndomunu ukuambambe, kuenje wa liwekapo oku linga upange wa Suku. Eye wa popia hati, “sia simĩle okuti utima wange u ka amamako oku ndi vetela evelo omo liovilinga viange.” Noke wa amisako hati: “Nda amamako luveke waco vokuenda kuanyamo akuãla.” Noke wa fetika oku sokolola ndomo a pondola oku tiuka vali vocisoko ca Yehova. Ndaño wa simĩle okuti Yehova ka tambulula vali olohutililo viaye, wa likutilila kokuaye loku pinga ongecelo. Eci pa pita akukutu ekũi, inaye weya oku u nyula kuenje wo vetiya oku endaenda kolohongele. Eye wa enda Vonjango Yusoma kuenda wa pinga elilongiso Liembimbiliya kakulu vekongelo. Vokuenda kuotembo, wa papatisiwa kuenda o pandula Yehova, momo lioku popela omuenyo waye.

¹¹ Anga hẽ ka tu tava okuti esanju lia velapo li tunda lika koku linga eci ca sunguluka? Osimbu tu amamako oku lilongisa oku sola esunga loku lekisa ocituwa caco komuenyo wetu, tu ka linga lika ovina vi sanjuisa Isietu wo kilu. Ivaluka okuti, ndopo ku iya otembo eci omanu vosi va ka yeva esanju lioku kuata utima wa yela. Ovo va ka situlula lonjila ya li pua esetahãlo lia Suku. Omo liaco, cilo tu soli esunga lutima wetu wosi, kuenda tu amamiko oku sanjuisa Yehova.—Olosap. 23:15, 16.

12, 13. Tu pondola oku pindisa ndati utima wetu?

¹² Nye tu sukila oku linga oco tu pindise utima wetu? Eci tu lilongisa Ovisonehua kuenda alivulu a sandekiwa lukuenje wa lunguka, tu sukila oku ivaluka okuti, “ondingesunga yi sokolola eci a tambulula.” (Olosap. 15:28) Kũlĩhĩsa ndomo ci kuete esilivilo poku nõla upange woku sanda eteku. Nda upange umue ka u likuata Lovisonehua, valua pokati ketu, tu kũlĩhĩsa lonjanga olonumbi viukuenje wa kolelua haeye wa lunguka. Pole, nda ka tu lete etambululo lia suapo liatiamẽla kupange waco, tu sukila oku kũlĩhĩsa olonumbi Viembimbiliya kuenda oku likutilila. a Nda tua ci linga, tu ka yuvula oku  kapela vakuetu ocilondokua. (1 Va Kor. 10:31-33) Ca piãla enene, tu sukila oku sakalala lolonumbi vi pamisa ukamba wetu la Suku. Nda tua kolela Yehova tu ka lipula ndoco, ‘Anga hẽ upange owu u ka sanjuisa Yehova, ale u ko sumuisa?’—Osa. 78:40, 41.

¹³ Poku pongiya elilongiso Liutala Wondavululi, ale Elilongiso Liembimbiliya Vekongelo, tu sukila oku sokolola ciwa olonumbi via lekisiwa vocipama caco. Anga hẽ tua siata ño oku taya lonjanga etambululo liepulilo, kuenje tu tehẽla kocinimbu cikuavo? Ocituwa caco, ka ci pamisa onjongole yetu yoku sola esunga, kuenda ka ci tu kuatisa oku pindisa utima wetu. Nda tu yongola oku sola esunga, tu sukila oku kuata ombili yoku lilongisa kuenda oku sokolola ovina tu tanga Vondaka ya Suku. Oco tu sole esunga lutima wosi, tu sukila oku likolisilako calua!

Onjala Kuenda Enyona Liesunga

14. Yehova kuenda Yesu Kristu va yongola okuti tu tenda ndati upange wetu u kola?

¹⁴ Yehova Suku kuenda Yesu Kristu va yongola okuti tu kuata esanju poku linga upange wetu u kola. Nye ci tu kuatisa oku kuata esanju? Oku sola esunga! Yesu Vohundo a lingila Komunda, wa popia hati: “Ava va kuete onjala lenyona liesunga va sumũlũha, momo ve kuta.” (Mat. 5:6) Olondaka evi vi lomboloka nye komanu vana va yongola oku sola esunga?

15, 16. Volonepa vipi tu pondola oku tekuiwa konjala kuenda kenyona liespiritu?

¹⁵ Oluali lulo lu kasi povaka Eliapu. (1 Yoa. 5:19) Eci tu tanga ukanda umue wasapulo ofeka yimue, tu sanga ovolandu atiamẽla kungangala lumondi walua u kasi oku lingiwa kolonepa viosi. Ungangala omanu va siata oku lingila vakuavo, u sumuisa olondingesunga. (Uku. 8:9) Omo okuti tu sole Yehova tua kũlĩha okuti, eye lika o pondola oku malako enyona kuenda onjala yespiritu yomanu vana va yongola oku lilongisa esunga. Olondingaĩvi ndopo vi ka nyõliwa, kuenje vana va sole esunga ka va ka liyaka vali lovitangi vi tunda kovilinga vĩvi viomanu vaco. (2 Pet. 2:7, 8) Eci ci ka nena ekavuluko liocili!

¹⁶ Omo okuti tuafendeli va Yehova kuenda tuloñame via Yesu Kristu, tua kũlĩha okuti vana va kasi lonjala kuenda enyona liesunga, va ka “kuta.” Ovo va ka tekuiwa leliangiliyo lia Suku lioku nena ilu liokaliye kuenda oluali luokaliye muna mu ka “kala esunga.” (2 Pet. 3:13) Omo liaco, ka tu ka kuati usumba ale oku yokoka omo liohali kuenda ungangala u kasi voluali lulo lua Satana. (Uku. 5:8) Yehova, Tõlo, o lete ekalo liaco kuenda ndopo o ka popela vana va sole esunga.

Onima yi Tunda Koku Sola Esunga

17. Api amue pokati kasumũlũho eyilila koku sola esunga?

¹⁷ Osamo 146:8, yi lombolola esilivilo lioku endela vonjila yesunga. Ukualosamo wa imba ocisungo hati: “Yehova o sole olondingesunga.” Sokolola ndoco! Ombiali yoluali luosi yi lekisa ocisola kokuetu omo lioku sola esunga! Omo liocisola ca Yehova, tua kolela okuti nda tua pitisa kovaso Usoma waye, o ka tu ĩha ovina viosi tu sukila. (Tanga Osamo 37:25; Olosapo 10:3.) Noke, voluali mu ka kala lika omanu vana va sole esunga. (Olosap. 13:22) Afendeli valua va  Suku omo lioku sola esunga, va lavoka onima yoku kuata esanju kuenda omuenyo ko pui voluali luokaliye. Ndaño muẽle, omanu vana va sole esunga lia Suku, va kuete onima yombembua yo vutima yi va ĩha elitokeko vepata kuenda vakongelo avo.—Va Fil. 4:6, 7.

18. Ovina vipi viwa tu pondola oku linga osimbu tu lavoka eteke lia Yehova?

¹⁸ Osimbu tu lavoka oku iya kueteke linene lia Yehova, tu sukila oku amamako oku sandiliya esunga liaye. (Sof. 2:2, 3) Tu lekisi ocisola cocili kolonjila viesunga via Yehova Suku. Vovina evi, mua kongela oku wala ‘esunga ndociteyuilo co vonete’ oco tu teyuile utima wetu. Tu sukilavo oku kuata utima wa yela una u tu sanjuisa, haiwo u sanjuisa Suku yetu.—Olosap. 27:11.

19. Nye tu sukila oku nõlapo oku linga, kuenda nye tu ka lilongisa vocipama ci kuãimo?

¹⁹ “Ovaso a Yehova a vanja vanja kuosi kilu lieve ha lekisa unene waye kuvakuavitima vio sungulukila.” (2 Asa. 16:9) Olondaka evi, vi lembeleka calua osimbu tu amamako oku linga eci ciwa, ndaño okuti ovitangi, lungangala, kuenda evĩho vi kasi oku livokiya calua voluali! Onjila yetu yesunga citava okuti yi vĩhisiwa lomanu vana va litepa la Suku. Pole, poku endela volonjila via Yehova viesunga tu kuatisiwa calua. (Isa. 48:17; 1 Pet. 4:4) Omo liaco, tu nõlipo oku sola esunga lutima wosi kuenda oku lekisa ocituwa caco komuenyo wetu. Pole, voku kuata utima wa pua evelo, mua kongela oku suvuka evĩho. Ocipama ci kuãimo ci ka lekisa elomboloko liaco.

[Atosi pombuelo yamẽla]

O Tambulula Ndati?

• Oco tu sole esunga, momo lie tu sukilila oku kũlĩha esilivilo liocisembi?

• Momo lie ci kuetele esilivilo oku wala ‘esunga ndociteyuilo co vonete’?

• Ndamupi tu pindisa utima wetu?

[Apulilo Elilongiso]

[Elitalatu kemẽla 26]

Utima wa pindisiwa ciwa u tu kuatisa oku nõla upange wa sunguluka