Vumba Yehova Lesumbilo Liocili

“Cosi ca sumbiwa, . . . sokololi ovina evi.”—VA FIL. 4:8.

1, 2. Nye ca siata oku vetiya omanu valua voluali oku kuata ovisimĩlo ka via sungulukile viatiamẽla komuenyo, kuenda apulilo api a votuiwa?

 TU KASI voluali lumue okuti omanu va liyaka lovitangi vimue ka va la mola. Omanu vana ka va kuete ukamba la Yehova, ca tĩla calua oku pandikisa ‘lovitangi vio koloneke vilo viohali.’ (2 Tim. 3:1-5) Ovo ka va kuete u o vakuatisa kovitangi viaco. Omo liaco, va litumbika koku linga ovitalukilo locisimĩlo cokuti, vi va kuatisa oku ivala ovitangi viavo.

² Omanu valua poku sanda onjila yoku tulumũla ovitangi viomuenyo, va siata oku pitisa kovaso ayele. Nda Akristão ka va lungukile, va pondolavo oku yapuisiwa lovisimĩlo viaco. Tu pondola ndati oku yuvula ovina viaco? Anga hẽ ci lomboloka okuti ka tu lingi vali ovina viosi vi nena esanju? Tu kuata ndati ovisimĩlo via sunguluka viatiamẽla kayele kuenda kovikele vietu? Olonumbi vipi Viovisonehua vi pondola oku tu songuila okuti ndaño tua sakalala lovitangi viomuenyo, ka tu ivalako ovina vi kuete esilivilo lia velapo?

Kala Ukualondunge Voluali Lulo lu Sole Ovitalukilo

3, 4. Ovisonehua vi tu kuatisa ndati oku pitisa kovaso ovina vi kuete esilivilo lia velapo?

³ Ocili okuti, voluali lulo omanu va velisapo calua ‘ovitalukilo.’ (2 Tim. 3:4) Ovisimĩlo violuali viatiamẽla koku kuata otembo yiwa, vi pondola oku kapa kohele ukamba wetu la Yehova. (Olosap. 21:17) Eli olio esunga lieci vovikanda upostolo Paulu a sonehela Timoteo kuenda Tito mua kongelela elungulo liatiamẽla koku kapako ovina vi kuete esilivilo. Oku kapako elungulo liaco, ci tu kuatisavo oku yuvula ovisimĩlo vĩvi violuali viatiamẽla komuenyo.—Tanga 1 Timoteo 2:1, 2; Tito 2:2-8.

⁴ Kosimbu, Salomone wa sonehele eci catiamẽla kesilivilo lioku yuvula ayele olonjanja vimue, oco tu tiamisile utima kovina vi kuete esilivilo lia velapo. (Uku. 3:4; 7:2-4) Omo okuti tu kuete otembo yitito komuenyo, tu sukila oku ‘likolisilako’ oku sanda epopelo. (Luka 13:24) Tu sukila oku sokolola ovina viosi “via sumbiwa.” (Va Fil. 4:8, 9) Eci ci lomboloka okuti, tu sukila oku kapako ovina viosi viatiamẽla komuenyo woku kala Ukristão.

5. Vipi pokati kovina vimue viomuenyo tu sukila oku kapako?

⁵ Akristão poku setukula ongangu ya Yehova kuenda ya Yesu, va likolisilako oku tẽlisa ovikele viavo. (Yoa. 5:17) Omo liaco, va siata oku pandiyiwa lomanu omo lioku kala olonalavayi viwa haivo va koleliwa. Ca piãla enene asongui vepata, va likolisilako oku talavaya oco va tekule epata liavo. Momo omunu wosi ka tekula vakuanjo yaye, o sokisiwa lomunu ‘wa likala Yehova.’—1 Tim. 5:8.

Oku Kapako Efendelo Lietu Lesanju

6. Tu pondola ndati oku kũlĩha okuti tua kapako efendelo lietu ku Yehova?

⁶ Yehova lalimue eteke a sepuile efendelo liaye. Ocihandeleko a ecele ku Mose ca lekisile okuti, nda va Isareli va yanduluka efendelo liocili va liyaka lovitangi vialua. (Yeh. 23:12, 13) Kocita catete, N.Y.Y., olondonge via Kristu  via sukilile oku likolisilako oku kuama efendelo liocili kuenda oku yuvula alongiso esanda kumue lovituwa viaco. (2 Yoa. 7-11; Esit. 2:14-16) Koloneke vilo, Akristão vocili va kasi oku amamako oku kapako efendelo liocili.—1 Tim. 6:20.

7. Paulu wa enda oku lipongiyila ndati upange woku kunda?

⁷ Upange wetu woku kunda u nena esanju. Pole, oco tu amameko lesanju liaco, tu sukila oku sokolola lutate upange waco kuenda oku lipongiya ciwa. Paulu wa lombolola ndomo a kapeleko omanu vana a kundila. Eye wa soneha ndoco: “Nda linga lomanu vosi ndukuavina viosi okuti mopela vamue. Cosi ndi ci lingila ondaka yiwa, okuti lamevo ndi yi sumũlũhila.” (1 Va Kor. 9:22, 23) Paulu wa yeva esanju poku kuatisa omanu konepa yespiritu kuenda wa sokolola lutate ndomo a pondola oku va kuatisa kovina vikuavo. Omo liaco, wa tẽla oku va kolisa kuenda oku va vetiya oco va fendele Yehova.

8. (a) Ovisimĩlo vipi tu sukila oku kuata lomanu tu longisa kupange woku kunda? (b) Oku longisa Embimbiliya kupange woku kunda ci vokiya ndati esanju lietu?

⁸ Upange woku kunda wa kuata esilivilo lipi ku Paulu? Eye wa nõlelepo oku linga “upika” wa Yehova, kuenda wa vana va yevelela kesapulo liocili a kala oku kunda. (Va Rom. 12:11; 1 Va Kor. 9:19) Eci tu longisa Ondaka ya Suku poku songola elilongiso Liembimbiliya konjo yomunu, kolohongele, ale Kefendelo Liepata, tua siata hẽ oku kapako omanu tu longisa? Ocili okuti, ka ca lelukile oku longisa Embimbiliya komunu umue olonjanja viosi. Oku upa otembo kovopange etu loku yi pesila koku kuatisa vakuetu, ka ca lelukile. Anga hẽ, eli halioko esunga lieci Yesu a popela hati: “[Esanju] li tunda koku eca olio lia lua, eli li tunda koku tambula li sule”? (Ovil. 20:35) Oku longisa omanu onjila yi tuala kepopelo, ci nena esanju lialua okuti ka li sokisiwa lupange ukuavo.

9, 10. (a) Anga hẽ, oku kapako ovikele vietu ci lomboloka okuti ka tu sukila vali oku linga ovitalukilo la vakuetu? Ci lombolola. (b) Nye ci kuatisa ukulu wekongelo oku lianja lomanu vosi?

⁹ Oku sumbila ovikele vietu, ka ci lomboloka okuti ka tu sukila vali oku linga ovitalukilo la vakuetu. Yesu ka sile lika ongangu yiwa yoku sanda otembo yoku longisa omanu, pole, wa endavo oku linga ovitalukilo, kuenda oku kuata ukamba la vakuavo. (Luka 5:27-29; Yoa. 12:1, 2) Oku kapako ovikele vietu, ka ci lomboloka okuti, olonjanja viosi tu kala locipala ca tema. Nda Yesu wa lekisile ocipala coku tema, nda lomue wa kuata ukamba laye. Ndaño muẽle omãla, va lianjelevo laye. (Mar. 10:13-16) Oco hẽ, tu pondola ndati oku kuama ongangu ya Yesu yoku lekisa esunguluko?

¹⁰ Manji umue poku lombolola catiamẽla kukulu umue wekongelo, wa popia hati: “Eye o likolisilako oku linga ovina vialua, pole, ka kisika vakuavo oku linga ovina via lipua.” Anga hẽ, cimuamue haico ci popiwa kokuove? Tu sukila oku kuata ovisimĩlo via sunguluka la vakuetu. Ocili okuti, omãla va sanjuka calua eci olonjali vi tumbika ovimaho via sunguluka loku va kuatisa oku vi tẽlisa. Cimuamue haico catiamẽla kakulu vekongelo okuti va pondola oku vetiya vamanji oku kula kespiritu kuenda oku va ĩha olonumbi vi vakuatisa oku ci linga. Eci ukulu wekongelo a kuata ovisimĩlo via sunguluka viatiamẽla kokuaye muẽle, o lekisa ovituwa viwa kuenda o kolisa vakuavo. (Va Rom. 12:3) Manji umue ukãi wa popia hati: “Si sole okuti ukulu wekongelo o linga ovina viosi lovinjembe. Pole, nda ka lianjelevo lomanu, ci tĩla calua oku kuata ukamba laye.” Manji ukuavo ukãi wa popia hati: “Ka ca lelukile oku kuata ukamba lakulu vamue vekongelo, momo ka va lianjele lomanu.” Akulu vosi vekongelo va sukila oku yuvula oku tepulula esanju liavo la vamanji va fendelela kumosi Yehova, ‘Suku yesanju.’—1 Tim. 1:11.

 Oku Kuata Ovikele Vekongelo

11. Oku “livela” omangu vekongelo ci lomboloka nye?

¹¹ Eci Paulu a vetiya alume oku likolisilako oku kuata ovituwa viwa oco va tambule ovikele vekongelo, ocisimĩlo caye ka ca kaile coku va vetiya oku tẽlisa olonjongole viavo. Eye wa soneha hati: “Nda umue o livela omangu yosungu yekongelo o yongola upange uwa.” (1 Tim. 3:1, 4) Oku “livela” omangu yaco, ci lomboloka oku likolisilako oku kuata ovituwa viespiritu vi kuatisa omunu oku vumba vamanjaye lutima wosi. Poku ci linga, ci lekisa okuti, va pondola oku tambula ovikele viaco oco va kuatise vamanji. Nda manji umue ulume wa tẽlisa unyamo tunde eci a papatisiwa, kuenda wa kapako olonumbi Viovisonehua vioku kala oñuatisi yekongelo ndomo ca lekisiwa kelivulu lia 1 Timoteo 3:8-13, ci tava okuti o nõliwa. Ocinimbu 8 ci popia hati: “Oloñuatisi viekongelo laviovo vi kale omanu vakuotate.”

12, 13. Lombolola ndomo amalẽhe va pondola oku livela omangu yovikele vekongelo.

¹² Anga hẽ, ove u manji umue wa papatisiwa vutila? Kuli olonjila vialua vi ku kuatisa oku tambula ovikele vekongelo. Yimue pokati kolonjila viaco, oku mioñolola ocituwa cove catiamẽla kupange woku kunda. Anga hẽ, o sanjukila oku talavaya la vamanji vosi kupange woku kunda? O kasi hẽ oku likolisilako oku sanda omunu umue o yongola oku lilongisa laye Embimbiliya? Eci o songola elilongiso Liembimbiliya loku kuama olonumbi tua siata oku tambula kolohongele, o ka mioñolola uloño wove woku longisa. Handi vali, o ka lekisa ohenda komunu o kasi oku lilongisa laye olonjila via Yehova. Osimbu ondonge yove yi fetika oku limbuka esilivilo lioku linga apongoloko, o ko kuatisa, kuenda o ko sapuila lutate ndomo a kapako olonumbi Viembimbiliya.

¹³ Ene wamalẽhe, u pondola oku lieca olumue koku kuatisa vamanji va kuka va kasi vekongelo liene. Ove o pondolavo oku sumbila Onjango Yusoma poku kuatisa koku yi yelisa kuenda oku yi posuisa. Eci o lieca olumue koku kuatisa kovopange vekongelo, weca uvangi wokuti, wa kapako upange wove woku kunda. Ndeci Timoteo a linga, o pondola oku lilongisa oku eca ekuatiso vekongelo.—Tanga Va Filipoi 2:19-22.

14. Vamanji amalẽhe va pondola oku ‘setekiwa’ ndati, oco va kuatise vekongelo?

¹⁴ Ene wakulu vekongelo, u sukila oku kũlĩha amalẽhe va kasi oku likolisilako oku “yuvula oloñeyi viamalẽhe,” kuenda vana va kasi oku sanda ‘esunga, ekolelo, ocisola, ombembua,’ kuenda ovituwa vikuavo viwa. (2 Tim. 2:22) Poku va ĩha ovopange vekongelo, va pondola ‘oku setekiwa’ ndomo va tambula ovikele vikuavo oco ‘vosi va mole okuamako kuavo’ kespiritu.—1 Tim. 3:10; 4:15.

Lekisa Olondunge Vekongelo Kuenda Vepata

15. Ndomo ca lekisiwa kelivulu lia 1 Timoteo 5:1, 2, tu lekisa ndati okuti tuakualondunge poku kala lavakuetu?

¹⁵ Voku kapako ovikele vietu, mua kongela oku sumbila vamanji alume kuenda akãi. Paulu velungulo a eca ku Timoteo, wa lekisa esilivilo lioku sumbila vakuavo. (Tanga  1 Timoteo 5:1, 2.) Elungulo liaco li kuete esilivilo, ca piãla enene poku kala la vamanji alume kuenda akãi. Ongangu ya Yovi yoku sumbila akãi, ca piãla enene ukãi waye, yi kuete esilivilo lialua kokuetu. Eye wa linga ocisila lovaso aye coku yuvula oku vanja ukãi ukuavo lovisimĩlo ka via sungulukile. (Yovi 31:1) Oku lekisa esumbilo ku vamanji alume kuenda akãi, ci tu vetiya oku yuvula oku va lingila ocitiokoso, ale oku linga cimue ci va tateka oku lianja pokati ketu. Oku sumbila vakuetu ci kuete esilivilo, ca piãla enene ku vamanji vana va kasi oku namũlala locimãho coku likuela. Ukristão wosi ukuacili, ka papala lolonjongole viukuavo.—Olosap. 12:22.

16. Lombolola ndomo vamue voluali va tenda ocikele culume haeye onjali vepata kuenda eci Embimbiliya li popia catiamẽla kocikele caye.

¹⁶ Tu sukilavo oku kapako ovikele vietu Suku a tu ĩha vepata. Oluali lua Satana lu sepula ocikele culume haeye onjali vepata. Ovitalukilo violuali, vi vetiya omanu oku sepula asongui vepata kuenda oku tepulula esumbilo kokuavo. Pole, Ovisonehua vi lekisa okuti ulume wa tambula ocikele coku kala “utue wukãi” waye.—Va Efe. 5:23; 1 Va Kor. 11:3.

17. Lombolola ndomo oku panga onepa kefendelo liepata ci lekisa okuti, tua kapako ovikele vietu.

¹⁷ Ulume o sukila oku talavaya oco a tekule epata liaye. Pole, nda ka eci ekuatiso konepa yespiritu, ci lekisa ekambo liolondunge kuenda ukũlĩhĩso. (Esin. 6:6, 7) Elivulu lia 1 Timoteo 3:4, li popia hati, nda ove usongui wepata kuenda o kasi oku sanda oku tambula ovikele vekongelo, o sukila oku ‘songuila ciwa onjo yove, loku pokuisa omãla vove, kuenda oku va longisa esumbilo.’ Omo liaco, lipula ndoco: ‘Anga hẽ, nda siata oku sokiya otembo yoku linga efendelo liepata vonjo yange?’ Akãi vamue Akristão va siata oku kuatisa alume vavo oku tẽlisa ovikele viavo konepa yespiritu. Pole, ulume o sukila oku kũlĩha esilivilo lioku tẽlisa ocikele caye. Ukãi Ukristão, o pondola oku kuatisa keliangiliyo Liefendelo Vepata, kuenda oku kuatisa ulume oco a tẽlise ocikele caco.

18. Omãla va pondola oku lilongisa ndati oku kapako ovikele?

¹⁸ Omãla va vetiyiwavo oku kapako ovikele viavo. (Uku. 12:1) Ka kuli ohele layimue omãla oku lilongisa ovopange amue konjo, kuenda oku tẽlisa ovikele vimue vi likuata lanyamo avo kuenda uloño wavo. (Asiõ. 3:27) Eci Soma Daviti a kala umalẽhe, wa lilongisa oku kala ungombo uwa. Eye wa kalavo onjimbi kuenda wa loñolohele koku sovola ovisungo, kuenje co kuatisa oku talavaya kovaso yosoma yo ko Isareli. (1 Sam. 16:11, 12, 18-21) Daviti wa kũlĩhĩle ndomo a sika ovisikilo, kuenda wa lilongisa ovoloño akuavo o kuatisa oku sivaya Yehova. Ovoloño a lilongisa eci a kala ungombo, vo kuatisa oku songuila epata lia va Isareli lepandi. Ene wamalẽhe ovoloño  wa lilongisi, a pondola oku vu kuatisi ndati oku vumba Ululiki wene loku liangiliyila ovikele vikuavo kovaso yoloneke?

Kuata Ovisimĩlo Via Sunguluka

19, 20. Ocituwa cipi wa nõlapo oku kuata catiamẽla kokuove muẽle kuenda kefendelo liove?

¹⁹ Tu pondola oku likolisilako oku kuata ovisimĩlo via sunguluka viatiamẽla kokuetu muẽle, okuti tu lianja la vakuetu. Ka tu yongola oku ‘kala vakuesunga lialua enene.’ (Uku. 7:16) Olonjanja vimue, pamue ka tu kuata esanju eci tu kasi konjo, kupange, ale poku sapela la vamanji. Vakuepata va sukila oku lavulula oco va yuvule oku pisa vakuavo, momo ci pondola oku nyõla ombembua yi kasi vonjo yavo. Vosi yetu vekongelo tu pondola oku lilongisa ndomo tu lekisa esanju ku vakuetu poku sapela lavo ciwa, loku va longisa ovina vi kolisa levi vi vetiya.—2 Va Kor. 13:10; Va Efe. 4:29.

²⁰ Tu kasi voluali lumue okuti, omanu ka va kapeleko olonumbi via Yehova. Pole, Akristão vocili va velisapo epokolo kuenda esunguluko liavo ku Yehova Suku. Hesanjukuolio tu kuete omo lioku tiamẽla kocisoko comanu va kasi oku fendela Yehova ‘lesumbilo liocili’! Omo liaco, tu amamiko oku kapako ovikele vietu komuenyo kuenda efendelo lietu.

O Tambulula Ndati?

• Momo lie tu sukilila oku yuvula ovisimĩlo violuali ndomo va tenda omuenyo?

• Tu lekisa ndati esanju kuenda olondunge kupange wetu woku kunda?

• Ovisimĩlo vietu viatiamẽla koku tambula ovikele vi lekisa ndati okuti tu kuete olondunge ale ka tu kuete?

• Lombolola esunga lieci oku sumbila vamanji, kuenda vakuepata lietu ci kuetele esilivilo.

[Apulilo Elilongiso]

[Elitalatu kemẽla 12]

Ulume o sukila oku tekula epata liaye ketimba kuenda konepa yespiritu