Elie Omunu Wa Velisapo Komuenyo Wove?
Elie Omunu Wa Velisapo Komuenyo Wove?
“Ove, lika wove, Tõlo koluali luosi.”—OSA. 83:18.
1, 2. Catiamẽla kepopelo lietu, momo lie ka tu sukilila oku kũlĩha lika onduko ya Yehova?
CITAVA okuti onjanja yatete eci wa mola onduko ya Yehova, ceci va ku lekisa elivulu Liosamo 83:18. Wa komõha calua eci wa tanga olondaka vi popia hati: “Oco va limbuka okuti ove, onduko yove Yehova, ove, lika wove, Tõlo koluali luosi.” Tunde opo wa siata oku tanga ocisonehua caco poku kuatisa vakuene oku kũlĩha Yehova Suku yetu ukuacisola.—Va Rom. 10:12, 13.
2 Ndaño ci kuete esilivilo omanu oku kũlĩha onduko ya Yehova, pole, ukũlĩhĩso waco ka u tẽla. Kũlĩhĩsa ndomo ukualosamo a lombolola ocina cikuavo ci kuete esilivilo kepopelo lietu. Eye wa popia hati: “Ove, lika wove, Tõlo koluali luosi.” Yehova eye Omunu wa velapo koluali luosi. Omo okuti eye Ululiki wovina viosi, o kuete omoko yoku popia hati, oviluvo viaye viosi vi sukila oku pokola kokuaye. (Esit. 4:11) Omo liaco tu sukila oku lipula ndoco, ‘Elie omunu wa velapo komuenyo wange’? Ciwa okuti omunu lomunu o kũlĩhĩsa lutate etambululo liepulilo liaco!
Ocitangi ca Pita Vocumbo Cedene
3, 4. Satana wa tẽla oku yapuisa ndati Heva, kuenda nye ceyililako?
3 Esilivilo liepulilo eli, lia lekisiwa ciwa kovina via pita vocumbo Cedene. Ungelo ocisuanji, una weya oku kũlĩhĩwa okuti Satana Eliapu, wa vetiya ukãi watete, Heva oku pitisa kovaso olonjongole viaye poku sinila ocihandeleko ca Suku coku yuvula oku lia kuti umue wa kala vocumbo. (Efet. 2:17; 2 Va Kor. 11:3) Eye wa tava keyonjo liaco kuenje wa lekisa etombo kuviali wa Yehova. Heva ka lekisile okuti Yehova eye Omunu wa velelepo komuenyo waye. Oco hẽ, Satana wa tẽla ndati oku kemba Heva?
4 Satana poku sapela la Heva wa kuama olonjila via lua. (Tanga Efetikilo 3:1-5.) Catete, ka tukuile onduko ya Yehova. Eye wa popia ño hati, “Suku.” Pole, usonehi welivulu Liefetikilo, wa tukula onduko ya Yehova kocinimbu catete cocipama caco. Cavali, Satana ka tukuile eci Suku a “handelekele,” pole, wa va pulisa ño ovina Suku a popia. (Efet. 2:16) Poku ci linga, wa seteka oku sepula esilivilo liocihandeleko caco. Catatu, ndaño okuti wa vangula lika la Heva, pole, wa tukula ondaka yokuti, “ene.” Poku ci linga, wa vetiya Heva oku kuata epela, oco a litende ndomunu wa velapo okuti o kala kapitiya kaye muẽle kuenda kulume waye. Nye ceyililako? Heva omo liepela, wa nõlapo oku sapela eye muẽle lonyõha catiamẽla kekalo liavo poku yi sapuila hati: “Tuakuakulia kapako oviti viovocumbo.”
5. (a) Pi Satana a tiamisilile utima wa Heva? (b) Heva wa lekisa nye poku lia kuti va va handelekele okuti, ka citava oku liako?
5 Satana wa pengisavo ulandu waco. Eye wa lekisa okuti Suku ka kuete esunga, momo wa eca ku Adama la Heva ocihandeleko cokuti, ‘ka ci tava oku lia koviti viosi viovocumbo.’ Noke Satana wa vetiya Heva oku sokolola ekalo liaye kuenda ndomo a pondola oku mioñolola omuenyo waye poku ‘lisoka la Suku.’ Oku sulako wo vetiya oku tiamisila utima kuti kuenda kepako liaco, loku sepula ukamba waye la Yehova Una wo wĩhile ovina viosi. (Tanga Efetikilo 3:6.) Ci sumuisa calua omo okuti, Heva poku lia kuti waco, wa lekisa okuti Yehova hayeko wa kala Omunu wa velapo komuenyo waye.
Ocitangi ca Pita Koloneke Via Yovi
6. Satana wa kapa ndati voseteko esunguluko lia Yovi, kuenda ca eca epuluvi lipi ku Yovi?
6 Noke lianyamo alua, ulume umue ukuekolelo o tukuiwa hati Yovi, wa kuatele epuluvi lioku lekisa Omunu wa velelepo komuenyo waye. Eci Yehova a sapuila Satana catiamẽla kesunguluko lia Yovi, Satana wa kumbulula hati: “Yovi hẽ, wa ku sumbila ño ocali, ove u Suku?” (Tanga Yovi 1:7-10.) Satana ka patãlele okuti Yovi ukuakupokola ku Suku. Pole, wa sepula esunga liovilinga via Yovi. Eye wa lundila Yovi okuti, ka kaile oku vumba Yehova omo liocisola, pole, momo liocipululu covokuasi. Yovi eye lika wa sukilile oku eca etambululo kelundi liaco kuenda wa kuatele epuluvi liaco.
7, 8. Ovitangi vipi Yovi a liyaka lavio, kuenda poku pandikisa lekolelo wa lekisa nye?
7 Yehova wa ecelela okuti, Satana o nenela Yovi ovitangi vialua. (Yovi 1:12-19) Nye Yovi a linga poku liyaka lovitangi viaco? Ovisonehua vi tu sapuila hati, eye “ka lingile ekandu ndaño oku vela Suku.” (Yovi 1:22) Pole Satana ka liwekelepo. Eye wa lipanda hati: “Ekova lekova! Cosi omunu a kasi laco o ci ecela omuenyo waye.” a (Yovi 2:4) Satana wa lekisa okuti nda Yovi wa talisiwa ohali, ka tendi vali Yehova ndomunu wa Velapo komuenyo waye.
8 Etimba lia Yovi lia vĩhile calua omo liuveyi, kuenda ukãi waye wo vetiya oku siñala Suku oco a fe. Noke akamba vamue vatatu vesanda, vo lundila ovina vĩvi. (Yovi 2:11-13; 8:2-6; 22:2, 3) Pole, ndaño lohali yalua, Yovi ka tavele oku nyõla esunguluko liaye. (Tanga Yovi 2:9, 10.) Omo liekolelo liaye, wa lekisa okuti Yehova eye Omunu wa velelepo komuenyo waye. Yovi wa lekisavo okuti, omanu ndaño ka va lipuile, va pondola oku eca etambululo kalundi Eliapu.—Ci sokisa Lolosapo 27:11.
Etambululo Lia Suapo Lia Yesu
9. (a) Satana wa yonja ndati Yesu lonjongole yetimba? (b) Nye Yesu a linga leyonjo liaco?
9 Noke yepapatiso lia Yesu, Satana wo vetiya oku tẽlisa olonjongole viaye okuti ka tendi Yehova Ndomunu wa velapo komuenyo waye. Eliapu lia seteka Yesu layonjo atatu. Catete, wo yonjela kolonjongole vietimba, poku u vetiya oku pongolola ovawe oco va linge olombolo. (Mat. 4:2, 3) Yesu wa pitile eci ci soka akũi akuãla koloneke loku likandangiya okulia kuenje wa lambuka lonjala. Omo liaco, Eliapu lio vetiya oku talavaya lunene waye woku linga ovikomo oco a litekule. Nye Yesu a linga? Ca litepa la Heva, ceci okuti Yesu wa tukula Ondaka ya Yehova kuenje vonjanja yaco wa liteyuila keyonjo liaco.—Tanga Mateo. 4:4.
10. Momo lie Satana a setekela Yesu oco a likupuile posi oku tunda kolusoka luonembele?
10 Satana wa setekavo oku vetiyila Yesu kovilinga viepela. Eye wa sapuila Yesu oco a likupuile posi oku tunda kolusoka luonembele. (Mat. 4:5, 6) Ocimãho cipi Satana a yonguile oku tẽlisa? Satana wa lekisa okuti, nda Yesu ka livaluile poku kupukila posi, eca uvangi wokuti ‘omõla a Suku.’ Eliapu lia yonguile okuti Yesu o sakalala calua lekemãlo liaye toke petosi lioku lekisa uvangi waco. Satana wa kũlĩhĩle okuti omunu o pondola oku likapa kohele omo liepela kuenda onjongole yoku teyuila esumbilo omanu vo kuetele. Satana wa pengisa ovisonehua, pole, Yesu wa lekisa okuti Wa kũlĩhĩle ciwa Ondaka ya Yehova. (Tanga Mateo 4:7.) Yesu poku yuvula eyonjo liaco, wa lekisa vali okuti Yehova eye Omunu wa velapo komuenyo waye.
11. Momo lie Yesu a likalela ombanjaile Yeliapu yoku wĩha ovosoma osi oluali?
11 Keyonjo liaye liatatu lioku pua elavoko, Satana wa eca ku Yesu ovosoma osi okilu lieve. (Mat. 4:8, 9) Yesu lonjanga yalua, wa yuvula eyonjo liaco. Eye wa kũlĩhĩle okuti oku tava ombanjaile yaco, ci lomboloka oku likala uviali wa Yehova ale omoko ya Suku yoku kala Tõlo. (Tanga Mateo 4:10.) Yesu, kayonjo osi a liyaka lavo, wa tambulula Satana lovisonehua vi tukula onduko ya Yehova.
12. Yesu, koloneke via sulako viomuenyo waye palo posi, ocitangi cipi a liyaka laco, kuenda nye tu lilongisa kocituwa caye?
12 Yesu, koloneke via sulako viomuenyo waye palo posi, wa liyaka locitangi cikuavo cinene. Vokuenda kupange waye woku kunda, wa lekisa okuti wa nõlelepo oku eca omuenyo waye ndocilumba. (Mat. 20:17-19, 28; Luka 12:50; Yoa. 16:28) Pole, wa kũlĩhĩle okuti o ka lundiliwa ovina vialua, loku pakuiwa kolombiali via va Yudea kuenda o ka pondiwa ndondingaĩvi. Ulandu wolofa viaye, wo nenelele esumuo lialua. Eye wa likutilila hati: “A Tate, nda ci tava, okopo eyi yi ndomboke.” Noke wamisiko hati: “Puãi ndeci nda panga hacoko, te eci ove o panga.” (Mat. 26:39) Epokolo lia Yesu toke kolofa, lia situlula Omunu a velisilepo komuenyo waye!
Etambululo Lietu Kocitangi Caco
13. Nye tu lilongisa kovolandu a pita kosimbu ndeci kulandu wa Heva, Yovi, kuenda wa Yesu Kristu?
13 Nye tu lilongisa kovolandu apita kosimbu? Kulandu wa Heva tu lilongisilako okuti, vana va pitisa lika kovaso olonjongole viavo ale ovisimĩlo viavo, va eca uvangi wokuti Yehova hayeko Omunu wa velapo komuenyo wavo. Pole, kesunguluko lia Yovi, tu lilongisako okuti omanu ndaño ka va lipuile va pondola oku lekisa okuti va kapako Yehova poku pandikisa kovitangi ndaño muẽle ka va kũlĩhĩle esunga liovitangi viaco. (Tia. 5:11) Ulandu wa Yesu u tu longisa okuti tu sukila oku nõlapo oku sepuiwa kuenda oku yuvula oku pitisa kovaso ekemãlo lietu muẽle. (Va Hev. 12:2) Oco hẽ, tu kapako ndati ovina evi?
14, 15. Ocituwa Yesu a lekisa poku liyaka leyonjo, ca litepa ndati leci ca Heva, kuenda tu kuama ndati ongangu ya Yesu? (Lombolola elitalatu li sangiwa kemẽla 18.)
14 Ku ka ecelele okuti ayonjo a ku vetiya oku ivala Yehova. Heva wa ecelela oku tiamisila utima waye keyonjo vo kapela. Eye wa mola ‘uti okuti wa posokela oku liako, haiwo wa posokela oku u tala, haiwo uti wa soliwa.’ (Efet. 3:6) Elinga liaco lia litepa locituwa Yesu a lekisa eci a setekiwa layonjo atatu! Yesu ka tiamisilile lika utima kayonjo aco pole, wa sokololavo onima iyilila kovilinga viaye. Eye wa kolelele Kondaka ya Suku kuenda konduko ya Yehova.
15 Eci tu liyaka layonjo oku linga ovina vi sumuisa Yehova, pi tu sukila oku tiamisila utima wetu? Nda tua tiamisila lika utima keyonjo, onjongole yoku linga eci cĩvi, yi livokiya. (Tia. 1:14, 15) Tu sukila oku yuvula lonjanga onjongole yaco, ndaño okuti oku ci linga pamue ka ca lelukile kuenda ci sokisiwa ndoku teta ocimamata cimue cetimba lietu. (Mat. 5:29, 30) Ndeci Yesu a linga, tu sukila oku sokolola ovitangi vi yilila kelinga lietu, kuenda ndomo vi tiamisiwila kukamba wetu la Yehova. Tu sukilavo oku ivaluka eci Ondaka yaye, Embimbiliya li popia. Nda tua cilinga tu lekisa okuti Yehova eye Omunu wa velapo komuenyo wetu.
16-18. (a) Nye ci pondola oku tu nenela esumuo? (b) Nye ci tu kuatisa oku pandikisa lovitangi?
16 Ku ka ecelele okuti ovitangi vi ku vetiya oku funguila Yehova. (Olosap. 19:3) Osimbu esulilo lioluali lulo lũvi li kasi ocipepi, omanu valua va Yehova va liyaka lovitangi vinene kuenda ovilemawe. Kotembo yilo, ka tu ka lavoki oku teyuiwa locikomo. Pole, ndeci ca pita la Yovi citava okuti tu sumua eci tu fisa umue ngandietu ale ceci tu liyaka lovitangi.
17 Yovi ka kuatele elomboloko lieci Yehova a ecelela ovitangi viaco, kuenda olonjanja vimue ka tu kũlĩhavo esunga lieci tu liyakela lovina viaco vĩvi. Pamue tua yeva ulandu wa vamanjetu vakuekolelo va fa lovilemawe, ndeci ca pita kofeka yo Haiti, ale lovilunga vikuavo. Citava okuti, tua kũlĩha manji umue wa pandikisa lekolelo kungangala wa lingiwa kokuaye ale wa fa locilunga cimue. Handi vali, citava okuti pamue tu liyaka lefengi li tunda kovitangi ale kevĩho limue lia kũlĩhĩwa ciwa. Esumuo lietu, pamue li tu vetiya oku popia ndoco: ‘A Yehova, momo lie ocitangi eci ci pitila lame? Ocina cipi cĩvi nda linga?’ (Hav. 1:2, 3) Kapuluvi aco, nye ci pondola oku tu kuatisa?
18 Tu sukila oku lunguka oco ka tu ka simi okuti, ovitangi viaco vi lekisa onyeño ya Yehova. Yesu wa lombolola uvangi waco eci a tukula ovilunga vimue vivali via pitile kotembo yaye. (Tanga Luka 13:1-5.) Kuli ovitangi vialua vi tunda kovilunga ‘viya ño ocipikipiki havio vi veta ño.’ (Uku. 9:11) Ovitangi viosi viya komuenyo wetu, tu pondola lika oku pandikisa lavio nda tua kolela ku “Suku ukuakulembeleka pokati kovina viosi.” Eye o tu ĩha unene woku amamako lekolelo.—2 Va Kor. 1:3-6.
19, 20. Nye ca kuatisa Yesu oku pandikisa kohali, kuenda nye ci tu kuatisavo oku ci linga?
19 Ku ka yapuisiwe lepela ale ohele yoku kutisiwa osõi. Yesu omo lieliketiso, ‘wa lipesela eye muele, kuenje wa linga ndupika.’ (Va Fil. 2:5-8) Wa pandikisa kohali yosi omo lioku kolela ku Yehova. (1 Pet. 2:23, 24) Poku ci linga, wa lekisa okuti wa pitisile kovaso Yehova, kuenje wa kemainyiwa. (Va Fil. 2:9) Omo liaco, wa vetiya olondonge viaye oku kuama ongangu yaco.—Mat. 23:11, 12; Luka 9:26.
20 Olonjanja vimue, oloseteko viekolelo lietu vi pondola oku tu sumuisa. Pole, tu sukila oku kuata ekolelo ndeli liupostolo Paulu wa popia hati: “Oco ñasilili lohali eyi. Haimo si kasi losõi, momo u nda kolela ndu wi, kuenje ñolela okuti o tẽla oku lava ocikundi cange toke keteke liaco.”—2 Tim. 1:12.
21. Ndaño oluali lu lekisa ovituwa ka via sungulukile, nye tu sukila oku nolapo?
21 Embimbiliya lia popele okuti koloneke vietu omanu va ka linga “vakuakulisola.” (2 Tim. 3:2) Omo liaco, ka ci komohĩsa, oku limbuka ndomo tua ñualiwa lomanu vana ka va velisilepo Yehova komuenyo wavo. Lalimue eteke ka tu ka yapuisiwi lovituwa viaco vĩvi! Pole, ci kale okuti tu kasi oku liyaka layonjo, locitangi ci tunda kocilunga cimue, ale locitangi coku tu kutisa osõi, tu sukila oku nolapo oku lekisa okuti Yehova eye Omunu wa velapo komuenyo wetu!
[Atosi pombuelo yamẽla]
a Olonoño vimue vakuakukonomuisa Embimbiliya, va lombolola okuti, ondaka “ekova lekova,” yi lekisa okuti Yovi nda wa ecelela oku pesela ekova liomãla vaye leli liovinyama ale omuenyo wavo, oco a popele ekova liaye ale omuenyo waye. Vakuavo va lombolola okuti, ondaka eyi yi lekisa okuti omunu o pondola oku pesela ekova liaye nda epese liaco li yovola omuenyo waye. Omunu citava okuti o teyuila utue waye lokuokuo, ale o pesela ekova limue oco a teyuile ekova liaye likuavo. Eci ci lomboloka okuti Yovi nda wa ecelela oku pesela ovina viosi oco a popele omuenyo waye.
Nye tu li Longisila Kulandu wa . . .
• Heva ndomo a kembiwa la Satana?
• Yovi ndomo a liyaka lovitangi?
• Yesu catiamẽla kueci a velisilepo?
[Apulilo Elilongiso]
[Elitalatu kemẽla 17]
Heva ka kapeleko ukamba waye la Yehova
[Elitalatu kemẽla 18]
Yesu wa likala ayonjo a Satana, kuenda wa pitisile kovaso oku linga ocipango ca Yehova
[Elitalatu kemẽla 20]
Oku kundila katenda noke yocilemawe ca pita kofeka yo Haiti
Eci tu liyaka lovitangi tu sukila oku tiamisila utima ku “Suku ukuakulembeleka pokati kovina viosi”