Ene Apata Akristão—“liangiliyi”
Ene Apata Akristão—“liangiliyi”
“Liangiliyi, Momo Mõlomanu iya kola ka wa simili.”—LUKA 12:40.
1, 2. Momo lie tu sukilila oku kapako lutima wosi onumbi ya Yesu yatiamẽla koku ‘liangiliya’?
“ECI Mõlomanu eya lulamba waye” loku tepa ‘omanu pokati okuti va likaila,’ nye ci ka pita love kuenda epata liove? (Mat. 25:31, 32) Omo okuti ocina caco ci keya kowola ka tua kũlĩhĩle, tu sukila oku kapako lutima wosi elungulo lia Yesu liatiamẽla koku ‘liangiliya’!—Luka 12:40.
2 Ocipama ca pita, ca lombolola ndomo omunu lomunu vepata a pondola oku kuatisa epata liosi oku lavulula konepa yespiritu poku tẽlisa ciwa ocikele caye. Tu kũlĩhĩsi ovina vikuavo vi kuatisa kekalo liwa liepata lietu konepa yespiritu.
Kuata Iso “li Yela”
3, 4. (a) Apata Akristão va sukila oku lunguka lovina vipi? (b) Nye ci lomboloka oku kuata iso “li yela”?
3 Oco apata a liangiliyile oku iya kua Kristu, va sukila oku lunguka lovina viosi vi va yapuisa kefendelo liocili. Va sukilavo oku lavulula okuti ka va yapuisiwa lovina viaco. Omo okuti, ocipululu covokuasi oco onjanjo yimue ya siata oku yapula apata valua, kũlĩhĩsa eci Yesu a popia catiamẽla koku kuata iso “li yela.” (Tanga Mateo 6:22, 23.) Ndeci ocinyi ci mihila onjila yetu okuti ka tu lilondoka, ovina tu vanja ‘lovaso etu utima,’ vi pondola oku tu kuatisa oku enda ciwa okuti ka tu yapuisiwa.—Va Efe. 1:18.
4 Oco iso li vanje ciwa, li sukila oku kuata uhayele kuenda oku tulukila kovaso. Cimuamue haico catiamẽla kovaso utima. Oku kuata iso li yela, ci lomboloka oku tiamisila utima kocimãho cimosi. Omuenyo wetu ka citava okuti tu u tiamisila lika koku sanda ovokuasi loku sakalala lovina vi sukiliwa vepata. Pole, tu sukila oku tiamisila utima kovina viespiritu. (Mat. 6:33) Eci ci lomboloka oku sanjukila ovina Suku a tu ĩha kuenda oku pitisa kovaso upange waye komuenyo wetu.—Va Hev. 1:5.
5. Umalẽhe umue ufeko wa lekisa ndati okuti “iso” liaye lia tiamisiwilile koku vumba Suku?
5 Oku pindisa omãla oco va kuate iso li yela ci nena onima yiwa! Kũlĩhĩsa ulandu wumalẽhe umue ufeko kofeka yo Etiopia. Omo okuti wa loñolohele calua kosikola, eci a mãla elilongiso lia pita pokati, wa tambula onima yoku tangela kosikola ya velapo kofeka yikuavo. Pole, ka tavele ombanjaile yaco momo wa tiamisilile utima koku vumba Yehova. Noke, wa lalekiwa oku talavaya kupange umue a fetiwa ci soka 4.200 kolondolale vosãi, okuti vi pitahãla olombongo via siata oku fetiwa kolonalavayi vofeka yaye. Pole, “iso” liaye, lia tiamisiwilile kocimãho coku kala ukundi wotembo yosi. Omo liaco, ka sukilile oku pinga onumbi kolonjali viaye oco a likale upange waco. Eci olonjali viaye via yeva ovina omõlavo a linga, nye va yeva vutima? Ovo va yeva esanju kuenda vo sapuila okuti vo kuetele ocisola calua.
6, 7. Kohele yipi ‘ovaso etu va sukila oku lavulula’?
6 Olondaka via Yesu vi sangiwa kelivulu lia Mateo 6:22, 23, vi lomboloka elungulo lioku yuvula ocipululu. Ondaka iso “lia vuvala” ndomo ya lekisiwa vocinimbu eci, yi lomboloka ocipululu ale ovilivelo vĩvi. (Mat. 6:23) Yehova o tenda ndati ocipululu ale ovilivelo vĩvi? Embimbiliya li popia hati: “Puãi, ene, ndaño oku vangula evi vi tiama kukahonga levĩho lovilivelo vĩvi, ko ka vi vanguli, momo havioko olosandu vi vangola.”—Va Efe. 5:3.
7 Ndaño okuti ocituwa caco ca leluka oku ci limbukila ku vakuetu, pole kokuetu muẽle ka ca lelukile. Omo liaco, tu sukila oku kapako elungulo lia Yesu li popia hati: “Lunguki kuenda liuviki kocipululu cosi.” (Luka 12:15) Oco tu pokole kelungulo liaco, tu sukila oku kũlĩhĩsa ovimãho tua tumbika vutima wetu. Apata Akristão va sukila oku kũlĩhĩsa otembo kuenda olombongo va siata oku pesila kovitalukilo, kolomapalo, lovina vikuavo va siata oku landa.
8. Catiamẽla koku landa ovina vimue, tu tẽla ndati oku ‘lunguka loku lavulula’?
8 Osimbu kua landele ocikuata cimue, sokolola olombongo o kuete nda vi tẽla ale sio. Kũlĩhĩsa ovina vimue ndeci: ‘Anga hẽ ndi ka kuata muẽle otembo yoku talavaya laco kuenda epondolo lioku semũlula ocikuata caco? Ndi ka pita otembo yiñami yoku lilongisa oku kũlĩha ndomo ci talavaya?’ Ene amalẽhe, ka vu ka tavi kasapulo osi atiamẽla koku landa ovina violuali, loku sandiliya oku landa lika uwalo wa tĩla haiwo wa kemẽla, ale ovikuata vikuavo. Kuati ocituwa coku likandangiya. Sokololivo nda oku landa ovikuata viaco ci kuatisa epata oku lipongiyila oku iya kua Mõlomanu ale sio. Koleli kohuminyo ya Yehova yi popia hati: “Lalimue eteke hu yanduluka ndaño oku ku sia.”—Va Hev. 13:5.
Kuata Ovimãho Viespiritu
9. Oku tumbika ovimãho viespiritu ci kuatisa ndati epata?
9 Onjila yikuavo yi kuatisa epata oku pamisa ekolelo liavo loku kuata ekalo liwa konepa yespiritu, oku tumbika ovimãho kuenda oku likolisilako oku vi tẽlisa. Oku ci linga ci vakuatisa oku limbuka nda va kasi oku amamako oku sanjuisa Yehova kuenda upange va velisapo komuenyo wavo.—Tanga Va Filipoi 1:10.
10, 11. Ovimãho vipi o kasi oku tẽlisa vepata liove, kuenda ovimãho vipi o yongola oku tẽlisa kovaso yoloneke?
10 Ndaño muẽle oku tumbika ovimãho vitito vina okuti omunu lomunu vepata o tẽla oku vi tẽlisa, ci kuete esilivilo. Kũlĩhĩsa ocimãho coku tanga oloneke viosi ocisonehua ceteke. Etambululo omunu lomunu a eca, li kuatisa utue wepata oku kũlĩha ekalo liavo kespiritu. Ocimãho coku tangela kumosi Embimbiliya eteke leteke, ceca komãla epuluvi lioku mioñolola uloño wavo woku tanga kuenda oku kuata elomboloko liasapulo Embimbiliya. (Osa. 1:1, 2) Anga hẽ ka tu sukila oku kuata ocimãho coku mioñolola olohutililo vietu? Oku kuata ocimãho coku lekisa apako espiritu, ci pondolavo oku tu kuatisa. (Va Gal. 5:22, 23) Nye ci popiwa catiamẽla koku sanda olonjila vioku lekisa ocikembe komanu tu sanga kupange woku kunda? Oku likolisilako oku ci linga kumosi lepata, ci kuatisa omãla oku lilongisa oku kala vakuahenda, kuenje ci va vetiya oku kala akundi vavelapo ale olomisionaliu.
11 Momo lie ku sapelela lepata liove catiamẽla kovimãho u pondola oku tumbika? Anga hẽ epata liove citava okuti li tumbika ocimãho coku pesela otembo yalua kupange woku kunda? O pondola hẽ oku likolisilako oco o yule ocitangi catiamẽla kosõi yoku ecela uvangi votelefone, vokololo, ale kovitumãlo violomĩlu? Nye ci popiwa catiamẽla koku kundila kocitumãlo cina kuli esukila liakundi Vusoma? Anga hẽ, omunu umue vepata citava okuti o lilongisa elimi likuavo oco a kundile olondaka viwa komanu vakualofeka vikuavo?
12. Nye asongui vepata va sukila oku linga oco va kuatise vakuanjo yavo oku kula kespiritu?
12 Ene wasongui vepata, u sukila oku kũlĩhĩsa kolonepa epata liene li sukila oku kula kespiritu. Noke tumbiki ovimãho vi va kuatisa oku mioñoloha. Tumbiki ovimãho via sunguluka haivio vi likuata lekalo liene kuenda oku loñoloha kuene. (Olosap. 13:12) Ocili okuti, oku tẽlisa ocimãho cimue, cambata otembo. Omo liaco, tepulula otembo wa siata oku pesila koku tala o televisãu oco o yi pesile kovina viespiritu. (Va Efe. 5:15, 16) Likolisilako oku tẽlisa ovimãho wa sokiyila epata liove. (Va Gal. 6:9) Epata lina li likolisilako oku tẽlisa ovimãho viespiritu, omanu ‘va mola okuamako kuavo.’—1 Tim. 4:15.
Amamako Oku Linga Efendelo Liepata Koñolosi
13. Apongoloko api a lingiwa kesokiyo liolohongele viekongelo vosemana, kuenda apulilo api tu sukila oku lipula?
13 Ocina cikuavo ci kuatisa apata oku ‘liangiliyila’ oku iya kua Mõlomanu, epongoloko liesokiyo liolohongele lia lingiwa oku upisa keteke 1 ya Susu yunyamo wo 2009. Ohongele yina ya enda oku lingiwa kovimunga Vielilongiso Lielivulu Vekongelo, cilo ka yi lingiwa vali, pole, yi lingiwila kumosi Losikola Yupange Wakristão kuenda Ohongele Yupange. Epongoloko eli lia eca kapata epuluvi lioku pamisa ekalo liavo kespiritu poku linga esokiyo liefendelo liepata olosemana viosi koñolosi. Cilo omo okuti tu kuete otembo yalua, tu sukila oku lipula ndoco: ‘Anga hẽ ndi kasi oku talavaya ciwa lotembo ya sokiyiwila Efendelo Liepata ale kelilongiso lio pokolika? Nda siata hẽ oku tẽlisa ocimãho celiangiliyo liaco?’
14. (a) Cipi ocimãho catete coku linga Efendelo Liepata ale elilongiso lio pokolika? (b) Momo lie oku sanda otembo yoku lilongisa ci kuetele esilivilo?
14 Ocimãho catete coku amamako oku linga elilongiso liepata ale elilongiso lio pokolika, oku kuata ukamba la Suku. (Tia. 4:8) Nda tua sanda otembo yoku tanga Embimbiliya eteke leteke, loku kũlĩha ciwa Ululiki, ukamba wetu laye u ka pamisiwa. Ukamba wetu la Yehova owo u tu vetiya oku u sola ‘lutima wetu wosi, lomuenyo wetu wosi, lolondunge vietu viosi, kuenda longusu yetu yosi.’ (Mar. 12:30) Omo liaco, tua nõlapo oku pokola ku Suku kuenda oku linga asetukuli vaye. (Va Efe. 5:1) Oku linga olonjanja viosi Efendelo Liepata, ci kuatisa omunu lomunu vepata oku ‘liangiliya’ konepa yespiritu osimbu tu lavoka ‘ohali ya piãla.’ (Mat. 24:21) Eci oco ci tu kuatisa o ku puluka.
15. Efendelo Liepata li pondola oku kuatisa ndati omunu lomunu vepata oku likuatela ocisola?
15 Eliangiliyo Liefendelo Liepata, li kuetevo ocimãho coku kuatisa epata oku likuatela ukamba pokati. Oku kala pamosi osemana losemana loku sapela ovina viespiritu, ci kuatisa epata oku likuatela ocisola. Olohueli poku liyevelela pokati eci va sapela ovina viespiritu, va pamisa ukamba wavo. (Tanga Ukundi 4:12.) Eci olonjali kuenda omãla va lilongisila kumosi ondaka ya Suku, va kala velitokeko ‘liocisola ci kutila cosi pamosi vomunga ya kanguka.’—Va Kol. 3:14.
16. Lombolola ndomo vamanji vamue vatatu va kasi oku kuatisiwa lesokiyo lioku linga elilongiso Liembimbiliya koñolosi.
16 Konomuisa ndomo vamanji vamue vatatu va kuatisiwa leliangiliyo lioku sanda otembo yoku linga elilongiso Liembimbiliya. Ndaño okuti ka va situe, vamanji ava ovimbumba haivo akulu vendamba va kala volupale lumuamue kuenda va kala akamba vokuenda kuanyamo alua. Omo okuti va yonguile oku pamisa ciwa ukamba wavo poku kala kumuamue, loku sapela ovina viespiritu, va sokiya otembo yoku lisanga sanga koñolosi kuenda oku lilongisa Embimbiliya. Ovo va fetika oku lilongisa elivulu ‘Dê Testemunho Cabal’ sobre o Reino de Deus. Umue pokati kavo wa popia hati: “Tua sanjukila otembo yetu yoku kala pamosi kuenda elilongiso lietu ka li lingiwa lika vokuenda kuowola yimosi. Tua siata oku sokolola ovitangi vamanjetu kocita catete va liyaka lavio kuenje tu sapela eci tu pondola oku linga poku liyaka lovitangi ndevi viavo. Noke kupange woku kunda tu seteka oku kuama ovina tua lilongisa. Ovina evi via siata oku vokiya esanju lietu kupange woku kunda Usoma loku longisa omanu oco va linge olondonge.” Eliangiliyo eli ka li kasi lika oku pamisa ekalo liavo kespiritu, pole, lia siatavo oku pamisa ukamba wavo. Ovo va popia hati: “Tua sanjukila calua esokiyo liaco.”
17. Ovina vipi vi kuatisa oco Efendelo Liepata koñolosi li lingiwe ciwa?
17 Nye ci popiwa kokuove? Ndamupi wa siata oku kuatisiwa lefendelo liepata koñolosi ale lelilongiso lio pokolika? Nda wa cilinga ño olonjanja vimue ku kuatisiwa. Omunu lomunu vepata o sukila oku lipongiyila elilongiso kowola ya sokiyiwa. Ovitangi vimue vitito ka citava okuti vi tateka esokiyo liaco. Handi vali, ku nõliwe ovipama vi likuata lovina vi sukiliwa vepata liove. Nye ove o sukila oku linga oco vakuanjo yove va sanjukile epuluvi lielilongiso liaco? Kuata uloño woku longisa lesumbilo kuenda ecelela okuti vosi va lianja.—Tia. 3:18. a
“Lavululi” Kuenda “Liangiliyi”
18, 19. Oku kũlĩha okuti Mõlomanu o kasi ocipepi, ci ku vetiya ndati lepata liove?
18 Ovitangi vi kasi oku pita koloneke vilo, vi eca uvangi wokuti tunde kunyamo wo 1914, oluali lũvi lua Satana lua iñila koloneke via sulako. Ocilunga co Harmagedo lomue o pondola oku ci tateka. Ndopo Mõlomanu iya oku nena eyambulo lia Yehova kolondingaĩvi. (Osa. 37:10; Olosap. 2:21, 22) Anga hẽ ukũlĩhĩso waco ka u kuvetiya kumue lepata liove?
19 Ove hẽ wa kapako elungulo lia Yesu liatiamẽla koku kuata iso “li yela”? Osimbu omanu voluali va sandiliya ovokuasi, lekemãlo, ale unene, anga hẽ epata liove li kasi oku sandiliya oku kuata ovimãho viespiritu? Wa siata hẽ oku linga Efendelo Liepata Koñolosi ale elilongiso lio pokolika? O kasi oku tẽlisa ocimãho caco? Ndeci tua lilongisa vocipama ca pita, nda ove ulume, ale ukãi, pamue umõla, o kasi hẽ oku tẽlisa ocikele cove wa tambula ku Suku, oco o kuatise epata liosi oku ‘lavulula’? (1 Va Tes. 5:6) Nda wa cilinga o ka ‘liangiliyila’ oku iya kua Mõlomanu.
[Atosi pombuelo yamẽla]
a Oco o kũlĩhe ovina o sukila oku lilongisa kuenda ndomo Efendelo Liepata koñolosi li lingiwa lesanju, tala Vutala Wondavululi 15 ya Mbalavipembe wo 2009 kemẽla 29-31.
Nye wa Lilongisa?
• Lombolola ndomo apata Akristão va pondola oku ‘liangiliya’. . .
poku kuata iso “li yela.”
poku kuata ovimãho viespiritu.
poku kuata Efendelo Liepata Koñolosi.
[Apulilo Elilongiso]
[Elitalatu kemẽla 13]
Oku kuata iso “li yela” ci kuatisa oku tamãlala lasakalalo oluali