Kuama Kristu Usongui wa Lipua

VANA va kuama olombiali viomanu, olonjanja vimue va siata oku sumuisiwa. Pole, ca litepa la vana va songuiwa la Kristu haivo va pokola kokuaye. Yesu wa popia hati: “Enjui kokuange, vosi wa sovoloki kuenda wa lemiwi kuenje ndu kavuluisi. Likapi okanga yange kuenda lilongisi kokuange, momo ndonjuka, haime nda liketisa vutima, oco vu sanga ekavuluko vovitima viene.” (Mat. 11:28, 29) Oku songola kua Yesu, ku kavuluisa kuenda ku nena esanju. Eye wa kapako olosuke la vana va lemiwa lovitangi, kuenje o va laleka oco va likape okanga yaye ya sunguluka. Oco hẽ, nye ca kongela voku tava oku songuiwa la Yesu?

Upostolo Petulu wa soneha hati, “Kristu wo taleli ohali, kuenje wo sili ongangu yokuti vu kuama volomãi viaye.” (1 Pet. 2:21) Momo lie ci kuetele esilivilo kokuetu oku kuama volomãi via Yesu? Sokolola ndeci okuti, u kasi oku pita vocila cimue muli olomina, pole pokati kene pali lika omunu umosi wa kũlĩha ndomo u puluka. Anga hẽ nda kua kuamele volomãi viaye, loku liata pana a liatela? Cimuamue haico okuti, ekalo lietu liwa lio kovaso, lia tamba koku kuama ongangu ya Yesu komuenyo wetu wosi. Voku ci linga mua kongela oku u yevelela, loku pokola kokuaye kuenda kolonumiwa viaye.

Yevelela Kuenda Pokola

Yesu kesulilo Liohundo yaye a lingila Komunda, wa popia hati: “Wosi o yeva olondaka evi viange kuenje o vi linga wa soka ndomunu wa lunguka wa tungila onjo yaye vohanda. Ombela ya loka, andunde eya, ofela ya sika, kuenje ya veta onjo, onjo yaco puãi ka ya kupukile omo ya tungiwila vohanda.”—Mat. 7:24, 25.

Yesu wa lekisa okuti ulume una o yevelela haeye o pokola kondaka yaye, eye “wa lunguka.” Anga hẽ poku pokola lutima wosi, tua siata oku lekisa okuti tua sumbila kuenda tua velisapo ongangu ya Kristu, ale tu nõla lika oku pokola kovihandeleko via Yesu vina tu sima okuti ovio via leluka kuenda via sunguluka kokuetu? Yesu wa popia hati: “Ndingainga ño-o ovina viu sanjuisa.” (Yoa. 8:29) Tu sukila oku likolisilako oku kuama ongangu yaye.

Kocita catete ovapostolo va lekisa ongangu yiwa yoku ecelela oku songuiwa la Kristu. Onjanja yimue, Petulu wa sapuila Yesu hati: “Tala, tua sia ovina viosi kuenje tua ku kuama.” (Mar. 10:28) Ocili okuti, ovapostolo omo lioku velisapo calua oku songuiwa la Kristu va siapo ovina viosi oco vo kuame.—Mat. 4:18-22.

Kuatisa Olomunga Via Kristu

Osimbu Yesu ka file, wa tukula onjila yikuavo yoku tava oku songuiwa laye. Eye wa popia hati: “U o hindikisa umue nda tuma, ame a hindikisa.” (Yoa. 13:20) Yesu wa tukula olomunga viaye olombuavekua hati, ‘vamanjaye.’ (Mat. 25:40) Eci Yesu a pinduka loku enda kilu, kua nõliwa ‘vamanjaye’ oco va piñainye pomangu yaye, loku linga “olomunga via Kristu” okuti va laleka vakuavo oku linalisa la Yehova Suku. (2 Va Kor. 5:18-20) Voku tava oku songuiwa la Kristu, mua kongela oku pokola ku ‘vamanjaye.’

 Tu sukila oku kũlĩhĩsa ndomo tua siata oku kapako alungulo Ovisonehua a sandekiwa valivulu etu. Poku lilongisa Ovisonehua loku endaenda kolohongele, tu ivaluisiwa ovina Kristu a popia. (2 Pet. 3:1, 2) Poku litekula olonjanja viosi loku lia kuaco, tu lekisa olopandu lutima wetu wosi keliangiliyo liaco. Nye tu sukila oku linga nda tua siata oku tambula onumbi yimue olonjanja vialua? Ondaka ya Suku yi lungula Akristão oku “kueliwa vu Ñala.” (1 Va Kor. 7:39) Vokuenda kuanyamo alua, ondaka eyi ya siata oku sandekiwa olonjanja vialua Vutala Wondavululi. Vamanji a Kristu omo lioku sakalala calua lekalo lietu kespiritu, va siata oku sandeka ovipama vialua kuenda oku eca olonumbi vikuavo via Suku. Oku kapako olonumbi viaco, oyo onjila yoku lekisa okuti tu kasi oku kuama Usongui wetu wa lipua, Yesu Kristu.

Elivulu Liolosapo 4:18, li popia hati: “Onjila yolondingesunga ya soka ndocinyi congula, camamako kokutua toke ca linga utanya.” (Olosap. 4:18) Oku songola kua Yesu, ku nena apongoloko alua. Onjila yikuavo yoku kuatisa ‘vamanji’ ya Kristu, oku kuata ocituwa ca sunguluka catiamẽla kapongoloko alongiso Ovisonehua a siata oku sandekiwa ‘lukuenje wa kolelua haeye wa lunguka.’—Mat. 24:45.

Handi vali, tu lekisavo epokolo lietu ku ‘vamanji’ a Kristu poku kuatisa vana va noliwa oku songuila ekongelo Liakristão. Upostolo Paulu wa popia hati: “Pokoli kasongui vene loku linga eci va tuma, momo va kasi loku lavulula ovimuenyo viene.” (Va Hev. 13:17) Ukulu umue wekongelo, citava okuti o tu ĩha evetiyo liatiamẽla kesilivilo lioku lingainga olonjanja viosi Efendelo Liepata Koñolosi, ale o tu ĩha olonumbi viatiamẽla konepa yimue yupange wetu woku kunda. Mitavaso o nyula akongelo, citava okuti o tu ĩha elungulo Liovisonehua li tu kuatisa konepa yimue yomuenyo wetu Wukristão. Ombili yetu yoku pokola kolonumbi viaco, yeca uvangi wokuti tu kasi oku kuama Usongui wetu Yesu.

Ci sumuisa calua omo okuti oluali lulo, ka lu kuete usongui umue uwa. Pole, ci sanjuisa calua oku songuiwa la Kristu ukuacisola! Omo liaco, kovina viosi tu linga, tua amamiko oku pokola Kusongui wetu kuenda oku kuatisa vana va noliwa laye koloneke vilo.

[Elitalatu kemẽla 27]

Ove hẽ o tava kelungulo Liovisonehua lioku yuvula oku likuela lomunu una okuti Hukristãoko?