“Mitavaso Umue wa Sunguluka Haeye Ekamba Lia Soliwa”

JOHN (JACK) BARR, una wa tiamẽlele kocisoko Cosungu Yakulu Yolombangi Via Yehova, wa malusula upange waye palo posi Vocasapalo komẽle, keteke 4 ya Cembanima wo 2010. Eye wa kuata eci ci soka 97 kanyamo. Wa tukuiwa hati, “mitavaso umue wa sunguluka haeye etamba lia soliwa.”

Manji Jack Barr wa citiwila ko Aberdeen, kofeka yo Escócia. Pokati ka vamanjaye vatatu, eye wa kala umalẽhe. Olonjali viaye via kala olombuavekua. Manji Jack Barr, olonjanja vialua wa enda oku vangula ciwa catiamẽla komuenyo wepata liaye palo posi. Eye wa eca olopandu kolonjali viaye omo liongangu yiwa vo sila.

Osimbu a kala oku panda vanyamo aye o vomalẽhe, manji Jack wa kuata ocitangi coku sapela lomanu vakualofeka vikuavo. Pole, wa likolisilako oku yula ocitangi caco, kuenje eteke limue Vocalumingu kekumbi kunyamo wo 1927, eci a kuata 14 kanyamo, wa sapuila isiaye okuti, o yongolavo oku u kuama kuama kupange woku kunda konjo lanjo. Ca kala efetikilo. Tunde keteke liaco toke kolofa viaye, Manji Barr wa kala ukuambili koku kunda olondaka viwa.

Ocilunga cimue ca ponda inaye, ca vetiya umalẽhe Jack oku sokolola lutate ocimãho comuenyo, kuenje kunyamo wo 1929 wa litumbika ku Yehova. Kunyamo wo 1934, wa lekisa elitumbiko liaye poku papatisiwa. Kunyamo wo 1949, wa iñila kupange wo Betele, ko Londres, kofeka yo Inglaterra. Kuenje wa fetika upange wotembo yosi una wamamako vokuenda kueci ci soka 71 kanyamo.

Kunyamo wo 1960, keteke 29 ya Mbalavipembe, Manji Barr wa iñila velitokeko a tukula hati, “ukamba umue u likasi” eci a likuela la manji Mildred Willett, una wa kala ukundi wotembo yosi vokuenda kuanyamo alua, haeye wa pita kupange womisionaliu. Manji Barr lukãi waye, va kũlĩhĩwile okuti vakuangangu yiwa, haivo olohueli vimue vakuambili, kuenda vamamako locituwa caco toke eci manji Mildred a malusula upange waye wa palo posi kunyamo wo 2004 kosãi ya Mbalavipembe. Vokuenda kuanyamo olohuela viavo, va enda oku tangela kumosi Embimbiliya eteke leteke.

Vana vo kũlĩhĩle, eci va tukula onduko Jack Barr, va ivaluka ulume umue wa enda oku eca alungulo awa, a sunguluka, vocisola, hao a tunda Vovisonehua. Eye wa kala ukuambili yupange kuenda wa kapeleko vakuavo, haeye mitavaso umue ukuacisola, kuenda wa kala ekamba liwa. Atambululo aye kolohongele, lolohundo viaye, kuenda olohutililo, via lekisa ndomo a kapeleko ovina viespiritu, kuenda ukamba waye la Yehova.

Ndaño okuti tua sumua omo lioku pesela Manjetu Barr kolofa, pole, tua sanjuka momo wa tambula onima yaye yetimba ka li fi, lina a lavokaile halio a enda oku vangula calua. Eci, oco ocina ca velapo a yonguile oku kuata.—1 Va Kor. 15:53,54. a

[Atosi pombuelo yamẽla]