Oku Kolela Yehova Ci Kuatisa Oku Tula Utima

“Yehova o njeva eci ndu vilikiya.”—OSA. 4:3.

1, 2. (a) Daviti wa liyaka lovitangi vipi? (b) Olosamo vipi tu konomuisa?

 SOMA DAVITI wa viala va isareli vokuenda kuotembo yimue, pole, noke wa kala oku liyaka lovitangi vialua. Omõlaye Avisalome wa li lingisa osoma, kuenje Daviti wa kisikiwa oku tunda vo Yerusalãi. Eye wa pakuiwavo lekamba liaye a kolelele, kuenje wa sialele lika lomanu vamue vatito vakuacili. Wa fetika oku nũala nũala Komunda yo Oliveira loku lila, haeye ka walele olohaku. Handi vali Simei ukuepata lia Soma Saulu, wo wasasa ovawe loku u wimbaimba oneketela kuenda oku u siñala.—2 Sam. 15:30, 31; 16:5-14.

² Anga hẽ, Daviti nda wa lokila Vonjembo lovitangi viaco, lesumuo, kuenda lesepu? Sio, momo wa kolelele Yehova. Uvangi waco wa lekisiwa Kosamo 3, ya sonehiwa la Daviti yina yi lombolola oku tila kuaye. Eye wa sonehavo Osamo 4. Olosamo viaco vi lekisa okuti, Suku o yevelela, haeye o tambulula olohutililo. (Osa. 3:4; 4:3) Handi vali, Olosamo evi vi tũ iha ekolelo liokuti Yehova o kasi lafendeli vaye utanya luteke loku va kuatisa kuenda oku va ĩha ombembua loku kolapo. (Osa. 3:5; 4:8) Omo liaco, tu konomuisi olosamo viaco loku kũlĩhĩsa ndomo vi tu vetiya oku tula utima kuenda oku kolela ku Suku.

Ceci ‘Valua va tu Katukila’

3. Ndomo ca lekisiwa Kosamo 3:1, 2, ocitangi cipi Daviti a liyaka laco?

³ Omunga yimue ya popia hati: “Ovitima via va Isareli vosi via tekela ku Avisalome.” (2 Sam. 15:13) Daviti poku komõha ndomo Avisalome a tẽla oku yapuisa omanu valua, wa popia hati: “A Yehova, ovanyali vange va lua cimue! Ava va ñatukila va lua. Va lua va fuanguila omuenyo wange, vati, Suku yaye ko kuatisa.” (Osa. 3:1, 2) Valua va Isareli va simĩle okuti, Yehova lalimue eteke a ka yovola Daviti kohali Avisalome kumue lomanu vaye vo kokela.

4, 5. (a) Ekolelo lie Daviti a kuata? (b) Nye ci lomboloka ondaka yokuti, “haive wukuakumetula kutue”?

⁴ Daviti omo lioku kolela ku Suku wa tulile utima. Eye wa imba ocisungo hati: “A Yehova, wuciyepelo ci mbindikiya; wulamba wange, haive wukuakumetula kutue.” (Osa. 3:3) Daviti wa kolelele okuti Yehova o ko teyuila ndeci ociyepelo ci teyuila esualali. Eci soma a kala oku tila, wa likapa ocifuto kutue kuenda wa petamela posi omo lioku sepuiwa. Pole, Ukuonenewosi o ka pongolola ekalo lia Daviti oco a kuate vali ulamba. Yehova o ko kuatisa oco a talame, loku petula utue waye kuenda oku kuata vali ekemãlo. Daviti wa likutilila lekolelo ku Suku omo lioku kũlĩha okuti Eye u tambulula. Ove hẽ, wa siatavo oku lekisa ekolelo liaco ku Yehova?

⁵ Daviti poku popia hati, “haive wukuakumetula kutue,” wa lekisa okuti ekuatiso liaye li tunda lika ku Yehova. Embimbiliya limue li tukuiwa hati Bíblia na Linguagem de Hoje, li popia hati: “Ove puãi, A ÑALA, ove ukuakunditeyuila kohele. Wa siata oku ndi muisa eyulo kuenda oku tumbulula utõi wange.” Catiamẽla kondaka yokuti, “wukuakumetula kutue,” elivulu limue li popia hati: “Eci Suku a petula . . . ‘utue’ womunu, eca kokuaye elavoko kuenda ekolelo.” Daviti omo lioku kisikiwa oku tunda kocalo cusoma wa va Isareli, wa kuatele esunga lioku sumua. Pole, wa kala lelavoko  liokuti ‘utue waye u ka petuiwa,’ loku kuata vali utõi, loku tula utima, kuenda oku kolela ku Suku.

‘Yehova o Tambulula!’

6. Momo lie Daviti a popela hati, ohutililo yaye yi ka tambuluiwa komunda yi kola ya Yehova?

⁶ Daviti omo lioku kolela ku Yehova loku tula utima, wamisako hati: “Mbilikiya Yehova lolukandi, kuenje eye o nambuluila komunda yaye yi kola.” (Osa. 3:4) Ocikasia covisila cina ca kala ocindekaise ca Suku, ca tualiwile Komunda Siono omo liocihandeleko ca Daviti. (Tanga 2 Samuele 15:23-25.) Eli olio esunga lieci Daviti a popela hati, ohutililo yaye yi ka tambuluiwa komunda yi kola ya Yehova.

7. Momo lie Daviti ka kuatelele usumba?

⁷ Daviti omo lioku kũlĩha okuti Suku o tambulula olohutililo, ka kuatele usumba. Eye wa imba ocisungo hati: “Ndi liyala posi, ndi pekela otulo, ndi pasuka, momo Yehova ukuakuñuatisa.” (Osa. 3:5) Ndaño muẽle kuteke okuti oco kuli ohele yalua yoku sangiwa lovanyali, Daviti ka kuatele usumba woku pekela. Eye wa kuatele ekolelo liokuti o ka pasuka, momo ovitangi a liyaka lavio kosimbu vio wĩha ekolelo liokuti ekuatiso lia Suku ka li tatekiwa. Etu tu pondolavo oku kuata ekolelo liaco, nda tua endela “volonjila via Yehova” loku yuvula oku u yanduluka.—Tanga 2 Samuele 22:21, 22.

8. Elivulu Liosamo 27:1-4 li lekisa ndati okuti Daviti wa kolelele ku Suku?

⁸ Daviti oku tula kuaye utima kuenda ekolelo a kuatela Yehova, via lekisiwa volosamo viaye vikuavo mu sangiwa olondaka vi popia hati: “Yehova eye ocinyi cange haeye epopelo liange. U njokokela helie? Yehova eye ongusu yomuenyo wange. Elie o ndingisa usumba? . . . Ndaño olohoka vi nungila ocilombo cocingonja haimo utima wange ko kuata usumba. . . . Cimosi nda lomba ku Yehova, oco sandiliya, ceci, cokuti ñala vonjo ya Yehova oloneke viosi viomuenyo wange, si tala tala unumbu wa Yehova, loku likutilila vonembele yaye.” (Osa. 27:1-4) Nda ove o kuetevo ovisimĩlo viaco kuenda ekalo liove liecelela, lalimue eteke o ka  liwekapo oku likongela la vamanji kefendelo lia Yehova.—Va Hev. 10:23-25.

9, 10. Ndaño lolondaka vi sangiwa Kosamo 3:6, 7, momo lie o popela hati Daviti ka kuatele ovisimĩlo vioku fetuluinya?

⁹ Daviti ndaño wa liyaka lusuanji wa Avisalome, kuenda wovanyali vakuavo, wa imba ocisungo hati: “Si yokokela ekui liolohulukãi viomanu va ñatukila loku ñuala ocingonja. Votoka, a Yehova. Mopele, a Suku yange. Momo o veta ovanyali vange vosi katama, o teya ovayo olondingaĩvi.”—Osa. 3:6, 7.

¹⁰ Daviti ka kuatele ovisimĩlo vioku fetuluinya. Nda ‘ovanyali vaye va ka vetiwa katama,’ Suku eye o cilinga. Soma Daviti wa sonehele elivulu limue Liocihandeleko kuenda wa kũlĩhĩle ondaka Yehova a popia hati: “Cange oku fetuluinya ndaño oku eca onima.” (Esin. 17:14, 15, 18; 32:35) Suku eye wa kuatele omoko yoku “teya ovayo olondingaĩvi.” Oku teya ovayo avo, ci lomboloka oku upiwa unene woku linga eci cĩvi. Yehova eye wa kũlĩha olondingaĩvi viaco, momo “o vanja vutima.” (1 Sam. 16:7) Ci sanjuisa calua oku kũlĩha okuti Suku o tu ĩha ekolelo kuenda ongusu yoku tamãlala lusongui wolondingaĩvi, Satana, una okuti ndopo imbiwa vowelema ndohosi yi koma ka yi kuete ovayo yi sesamẽla lika enyõleho.—1 Pet. 5:8, 9; Esit. 20:1, 2, 7-10.

“Okupopela ku Tunda ku Yehova”

11. Momo lie tu sukilila oku likutililako va manjetu?

¹¹ Daviti wa kũlĩhĩle okuti Yehova eye lika o pondola oku u yovola. Pole, ukualosamo ka li sokoluile lika eye muẽle. Nye ci popiwa komanu vosi va Yehova? Daviti wa malusula osamo yaye loku popia hati: “Okupopela ku tunda ku Yehova. Esumũlũho liove li kale lomanu vove.” (Osa. 3:8) Daviti ndaño wa kala lovitangi vialua, wa kapeleko calua omanu vosi va Yehova kuenda wa kolelele okuti Suku o ka va sumũlũisa. Anga hẽ, ka tu sukilavo oku kapako calua vamanjetu? Tu sukila oku va ivaluka volohutililo vietu, loku pinga ku Yehova oco a va ĩhe espiritu sandu liaye li va kuatisa oku kuata utõi loku tula utima poku kunda olondaka viwa.—Va Efe. 6:17-20.

12, 13. Nye ca pita la Avisalome kuenda ndamupi Daviti a liyeva?

¹² Omuenyo wa Avisalome wa sulila lesepu, kuenje ca linga ndelungulo komanu vosi va lavisa vakuavo, capiãla enene olombuavekua via Suku, ndeci va lavisile Daviti. (Tanga Olosapo 3:31-35.) Noke kueya uyaki kuenje asualali va Avisalome va yuliwa. Poku tila ovanyali, Avisalome wa londa komula kuenje omula ya pita vemehi liovianja viuti umue unene. Ceya okuti utue waye wa saka vovianja kuenje wa nyoñamela posi. Ndaño okuti vepuluvi liaco wa kala lomuenyo, pole, ka kuatele ekuatiso toke eci Yoava o ponda poku u toma otunjelia tutatu vutima waye.—2 Sam. 18:6-17.

¹³ Anga hẽ, Daviti wa sanjukile eci a yeva ovitangi via pita lomõlaye? Sio, ka sanjukile. Eye wa tumboka, loku lila, kuenda oku kaluka hati: “Amõlange Avisalome! Amõlange we! Amõlange Avisalome! Nda nda file ame ove hu siala! A Avisalome! Amolange we! Amõlange!” (2 Sam. 18:24-33) Ocili okuti, olondaka via Yoava via nenele esumuo lialua ku Daviti. Avisalome omo lioku vetiyiwa locipululu oco a yake la isiaye, ombuavekua ya Yehova, wa likokela eye muẽle ovitangi kuenje wa kuata esulilo lĩvi!—2 Sam. 19:1-8; Olosap. 12:21; 24:21, 22.

Daviti wa Lekisa Vali Ekolelo ku Suku

14. Nye ci popiwa catiamẽla koku sonehiwa Kuosamo 4?

¹⁴ Ndeci ci kasi Osamo 3, haico Osamo 4, momo yi lomboloka ohutililo ya Daviti yi situlula ekolelo a kuatela Yehova. (Osa. 3:4; 4:3) Citava okuti Daviti wa soneha ocisungo caco poku lekisa ekolelo liaye kuenda olopandu ku Suku noke yoku limbuka okuti usuanji wa Avisalome ka wa tẽlisiwile. Ale wa yi soneha loku ivaluka olonjimbi va Lewi. Ci kale okuti wa yi  soneha lovisimĩlo evi, ale sio, oku sokolola kolondaka viaco ci pamisa ekolelo lietu ku Yehova.

15. Momo lie tu sukilila oku likutilila ku Yehova lekolelo vonduko Yomõlaye?

¹⁵ Daviti wa lekisa vali ekolelo liaye ku Suku kuenda okuti Eye o yevelela loku tambulula olohutililo. Eye wa imba hati: “A Suku yesunga liange, nambulule eci mbilikiya. Wa mandulula eci nda kala lohali. Ndinge ohenda, yeva okulikutilila kuange.” (Osa. 4:1) Nda tua lekisa esunga, tu pondolavo oku kuata ekolelo liaco. Poku ivaluka okuti Yehova eye “Suku yesunga,” haeye o sumũlũisa omanu vaye vakuesunga, tu pondola oku likutilila kokuaye vonduko Yomõlaye loku tula utima, kuenda oku kolela kocilumba cocisembi ca Yesu. (Yoa. 3:16, 36) Oku ci linga ci tu ĩha ombembua yocili!

16. Momo lie Daviti a sumuilile?

¹⁶ Olonjanja vimue tu liyaka lovitangi vi tu sakalaisa calua. Daviti olonjanja vimue wa pitilevo lovitangi viaco, momo wa imba ocisungo hati: “Ene amãla vomanu, toke pi ulamba wange u sepuiwa? Toke pi vu sola olondaka viesanda, loku sandiliya uhembi?” (Osa. 4:2) Ondaka ‘omãla vomanu,’ yi lomboloka omanu valua vonepa ka ya sungulukile. Ovanyali va Daviti, ‘va solele olondaka viesanda’ ale ovina viesanda. Vembimbiliya limue li tukuiwa hati, Nova Versão Internacional, ocinimbu eci ci popia ndoco: “Toke pi vu sola ovina viesanda, loku sandiliya olosuku viuhembi?” Ndaño pamue tu sumua omo liovina vĩvi vakuetu va tu lingila, tu amamiko oku likutilila lutima wosi, kuenda oku lekisa ekolelo lietu ku Suku yocili.

17. Lombolola ndomo tu pondola oku kapako olondaka Viosamo 4:3.

¹⁷ Ekolelo Daviti a kuatela Suku, lia lekisiwa ciwa volondaka evi: “Limbuki okuti Yehova wa lisolekela ukuesunga. Yehova o njeva eci ndu vilikiya.” (Osa. 4:3) Oco tu amameko oku pokola ku Yehova, tu sukila oku lekisa utõi kuenda ekolelo. Ovituwa viaco vi kuete esilivilo, capiãla enene vepata Liakristão eci umue ngandiavo a tundisiwa vekongelo. Suku o sumulũisa vakuacili haivo va endela volonjila viaye. Handi vali, epokolo kuenda oku kolela Yehova, ku nena ombembua pokati komanu vaye.—Osa. 84:11, 12.

18. Ndomo ca lekisiwa Kosamo 4:4, nye tu sukila oku linga nda va tu popia ale va tu linga ovina vi sumuisa?

¹⁸ Nye tu pondola oku linga nda umue wa tu popia ale wa tu linga cimue ci sumuisa? Tu pondola lika oku sanjuka nda tua kapako olondaka via Daviti wa popia hati: “Kali lonyeño, puãi ko ka lingi ekandu. Sokololi lovitima viene eci vu kasi povola. Tũlũmuhi.” (Osa. 4:4) Nda tu kasi oku popiwa ovina vĩvi ale oku lingiwa ovina ka via sungulukile, ka tu ka lingi ekandu omo lioku fetuluinya. (Va Rom. 12:17-19) Tu pondola oku situlula ovisimĩlo vietu viatiamẽla kocitangi caco vohutililo eci tu kasi pula wetu. Nda tua likutilila catiamẽla kondaka yaco, tu ka pongolola ovisimĩlo vietu kuenda tu ka kuata utima woku ecela locisola. (1 Pet. 4:8) Elungulo liupostolo Paulu, citava okuti liopiwa Kosamo 4:4, eci a popia hati: “Temi, puãi ko ka lingi ekandu. Ekumbi ka li ka iñile lokutema kuene. Ko ka eci evelo keliapu.”—Va Efe. 4:26, 27.

19. Osamo 4:5 yi tu kuatisa ndati catiamẽla kovilumba vietu viespiritu?

¹⁹ Daviti poku lekisa okuti tu sukila oku kolela ku Suku, wa imba ocisungo hati: “Lumbi ovilumba viesunga. Koleli Yehova.” (Osa. 4:5)  Ovilumba via enda oku eciwa la va Isareli, via kuatele lika esilivilo nda vieciwa lutima wa sunguluka. (Isa. 1:11-17) Oco ovilumba vietu viespiritu vi taviwe la Suku, tu sukila oku vieca lutima wa sunguluka kuenda oku lekisa ekolelo kokuaye.—Tanga Olosapo 3:5, 6; Va Heveru 13:15, 16.

20. Nye ci lomboloka ‘ocinyi cocipala ca Yehova’?

²⁰ Daviti wamisiko hati: “Ku kasi va lua va livela vati, Nda ca tavele oku mola cimue ciwa! A Yehova, tu tuisile ocinyi cocipala cove.” (Osa. 4:6) ‘Ocinyi cocipala ca Yehova,’ ci lomboloka ohenda yaye. (Osa. 89:15) Omo liaco, eci Daviti a likutilila ku Yehova hati: “Tu tuisile ocinyi cocipala cove,” wa yonguile oku popia hati, ‘lekisa ohenda kokuetu.’ Omo okuti, tua kolela Yehova, tu kuatisiwa lohenda yaye, kuenda tu likolisilako oku linga ocipango caye lesanju.

21. Nye tu pondola oku kuata nda tua litumbika kupange wespiritu woku ungula koloneke vilo?

²¹ Daviti poku luluvalela kesanju li eciwa la Suku lina ka li sokisiwa lotembo yoku ungula, wa imbila ocisungo Yehova hati: “Wa ñapa onjolela ya piãla vutima, onjolela yavo, eteke olomema lovinyu viavo vi lua, yi sule.” (Osa. 4:7) Tu pondola lika oku kuata esanju liaco nda tua litumbika kupange woku ungula u kasi oku lingiwa koloneke vilo. (Luka 10:2) Omo ‘liomanu valua’ va lomboloka olombuavekua vana va kasi oku songuila upange waco, cilo tua sanjuka, momo etendelo ‘liolondingupange’ li kasi oku livokiya calua. (Isa. 9:3) Ove hẽ, o kuetevo esanju lioku kuatisa kupange waco woku ungula?

Amamako Oku Tula Utima Poku Kolela ku Suku

22. Ndomo ca lekisiwa Kosamo 4:8, nye ca pita la va Isareli eci va pokuile Kocihandeleko ca Suku?

²² Daviti wa malusula osamo eyi loku popia hati: “Mekela pula lombembua, mola otulo, momo ove, lika wove, a Yehova, o numalisa oko kua koka.” (Osa. 4:8) Eci va Isareli va enda oku pokola Kocihandeleko ca Yehova, va kuatele ombembua laye kuenda oku kolapo. ‘Yuda la Isareli, va kolelepo’ vokuenda kuviali wa Salomone. (1 Olos. 4:25) Vana va lekisile ekolelo ku Suku, va kuatele ombembua ndaño muẽle ceci va lisunguile lolofeka viovanyali. Ndeci ca pita la Daviti, tu pondolavo oku pekela lombembua, momo Suku o tu tulisa utima.

23. Nye ci pondola oku pita letu nda tua kolela ku Suku?

²³ Poku linga upange wa Yehova, tu amamako oku tula utima. Tu li kutilili lekolelo loku kuata “ombembua ya Suku, yina ya piãla olondunge viosi.” (Va Fil. 4:6, 7) Oku ci linga ci tu nenela esanju! Nda tua kolela Yehova, lalimue eteke tu yokokela ovina viya kovaso.

O Tambulula Ndati?

• Ovitangi vipi Daviti a liyaka lavio omo lia Avisalome?

• Osamo 3 yeca ndati ekolelo?

• Volonepa vipi osamo 4 yi pamisa ekolelo lietu ku Yehova?

• Ndamupi tu kuatisiwa poku kolela ku Suku?

[Apulilo Elilongiso]

[Elitalatu kemẽla 29]

Daviti ndaño muẽle ceci a tila omo lia Avisalome, wa kolelele ku Yehova

[Elitalatu kemẽla 32]

Ove hẽ wa kolela muẽle ku Yehova?