Ekanga Limue Lia Pita Otembo Yalua Lia Sulila Veyulo!

EKANGA liaco lia fetika kunyamo wo 1995 kuenda lia pita eci ci soka 15 kanyamo. Vokuenda kuotembo yaco, Akristão vocili kofeka yo Rusia va liyaka lelambalalo liovanyãli vana va suvukile elianjo lietavo. Ovanyãli va nõlelepo oku imula upange Wolombangi via Yehova ko Rusia kuenda kolonepa vikuavo. Pole, Yehova wa sandiliya onjila yoku sumũlũisa epandi lia vamanjetu ko Rusia poku va kuatisa oku yula kekanga. Nye ca koka ovitangi viaco?

NOKE KUEYA ELIANJO!

Oku upisa kunyamo wo 1990, va manjetu ko Rusia va tambula vali elianjo liefendelo lina lia nyõliwa kunyamo wo 1917. Kunyamo wo 1991, ombiali yo União Soviética, ya tava oku limbuka etavo liavo vofeka. Noke yoku nyõliwa kuviali wo União Soviética, Olombangi via Yehova via limbukiwa luviali wo Federação Russa. Handi vali, Olombangi via Yehova vina via lambalaliwile kanyamo a pita, Ombiali ya va limbuka ndomanu va talisiwa ohali la vakuapulitika. Kunyamo wo 1993 o Seketa Yesombiso ya tava oku limbuka Ocisoko Colombangi via Yehova ko Moscovo, ndomo va kũlĩhĩwa cilo. Kunyamo waco, ocihandeleko cokaliye co ko Rusia cina ca lekisa elianjo lietavo, ca fetika oku kapiwako. Eli olio esunga lieci manji umue a popela hati: “Lalimue eteke tua simile okuti tu ka kuata elianjo!” Noke wa amisako hati: “Tua talamẽla elianjo liaco ci soka 50 kanyamo!”

“Kotembo yaco,” vamanji ko Rusia va talavaya calua kupange woku kunda, kuenda valua va tava kesapulo liaco. (2 Tim. 4:2) Ukãi umue wa popia hati: “Omanu valua va fetika oku linga vakuetavo.” Vokuenda kuotembo yitito, etendelo liakundi, lakundi votembo yosi, kuenda akongelo, lia livokiya calua. Oku upisa kunyamo wo 1990 toke 1995, etendelo Liolombangi via Yehova ko Moscovo lina lia kala lika 300, lia pitila 5.000! Osimbu afendeli va Yehova va kala oku livokiya ko Moscovo, ovanyali va fetika oku yokoka. Omo liaco, noke yanyamo amue oku upisa kunyamo wo 1990, va fetika oku lambalala Olombangi via Yehova poku seteka oku va pisa lovihandeleko viofeka. Osimbu uyaki waco ka wa pitilile kesulilo, wa kuata olonepa vikuãla.

EKONOMUISO LIALUNDI LIA SULILA VOMBUANJA

Onepa yatete yuyaki waco, ya fetika kunyamo wo 1995 kosãi Yevambi. Ocisoko cimue catiamẽla Ketavo lio Ortodoxo ko Rusia, ca lundila vamanji hati, vakuakulinga ovina vĩvi. Ocisoko caco ca lombolola okuti, ovo va yongola oku kuatisa apata ana a sumua omo olohueli viavo ale omãla va linga Olombangi via Yehova. Kunyamo wo 1996 kosãi Yevambi, vakuakukũlĩhĩsa alundi, va fetika oku sandiliya uvangi waco, pole, ka va sangele la umue. Noke ocisoko caco ca sapula vali elundi likuavo liokuti, vamanjetu, va kuete ovituwa vĩvi. Vakuakukũlĩhĩsa alundi va sandiliya vali uvangi waco, pole, va limbuka okuti alundi aco uhembi. Ovanyãli va tuala vali elundi liatatu, hailio limuamue. Ndaño okuti Olombangi via Yehova ko Moscovo via konomuisiwa lutate, pole, vakuakũlĩhĩsa alundi ka va sangele uvangi woku fetika esombiso liondaka yaco. Noke ovanyãli va tuala vali elundi liaco onjanja yakuãla kombonge, pole, vakuakukũlĩhĩsa alundi ka va sangele uvangi waco. Ovanyãli vaco va pinga oku kũlĩhĩsa vali lutate ocitangi caco. Oku sulako kunyamo wo 1998, keteke 13 ya Kupupu, onganji yokaliye ya sulisa ondaka yaco.

Onganji yimue ukuakuteyuila kekanga, haeye wa kuama lutate ocitangi caco, ya lombolola hati, “noke kua pita ocina cimue ci komõhisa.” Ndaño okuti onganji yina ya konomuisa elundi liatãlo ya lekisa okuti ka sangele uvangi wocili,  pole, wa lombolola okuti te kua tumbikiwa uvangi umue u pisa Olombangi via Yehova. Eye wa lombolola okuti Ocisoko Colombangi via Yehova vo Moscovo, ca lueya ocihandeleko cofeka kuenda colofeka viosi. Onganji yo Konepa yo Norte yo Moscovo, ya tava kondaka yaco kuenje ya sandeka elundi limue. a Kunyamo wo 1998 keteke 29 Yenyenye Linene Kombonge yo Luvumba luo Golovinski, ko Moscovo oco kua fetika esombiso liaco. Onepa yavali yuyaki wekanga liaco ya kala oku fetika.

EMBIMBILIYA KOMBONGE

Vohondo yimue yesombiso ko norte yo Moscovo, onganji yimue yi tukuiwa hati, Tatyana Kondratyeva wa pisa vamanji poku tukula ocihandeleko cimue cofeka ca sinaliwa kunyamo wo 1997, cina ca lekisa okuti, Akristão vetavo lio Ortodoxo, islamismo, Judaismo, kuenda o Budismo, ovo lika va kũlĩhĩwa vofeka. b Pole, ocihandeleko caco ca tatekele atavo akuavo oku kũlĩhĩwa lombiali. Oco ca kuatisavo olombonge oku imula atavo ana a enda oku vetiya esuvu pokati komanu. Onganji eyi poku tukula ocihandeleko caco, wa lundila Olombangi via Yehova hati, va kasi oku vetiya esuvu pokati komanu kuenje ka va sesamẽla oku kala vofeka.

Onganji yimue poku teyuila Olombangi via Yehova ya pula hati: “Etavo lipi vo Moscovo okuti omanu vaco va siata oku lueya ovihandeleko?” Onganji yesombiso ka ya tukuile onduko yimue. Pole, ya popia hati, alivulu Olombangi via Yehova a vetiya esuvu pokati katavo. Poku lekisa uvangi waco, wa tanga Vutala Wondavululi lo Despertai! kuenda alivulu akuavo (tala konano). Eci vo pulisa ndomo alivulu aco a vetiya esuvu, eye wa popia hati: “Olombangi via Yehova vi longisa okuti, ovo lika vakuetavo liocili.”

Onganji yimue ukuakuteyuila kekanga okuti manjetu, wa eca Embimbiliya limue kusongui wekanga kuenda konganji ya nena elundi, kuenje wa tanga elivulu lia va Efeso 4:5 ku popia hati: “Ñala umuamue, ekolelo limuamue, epapatiso limuamue.” Noke usongui wekanga, longanji ya nena elundi, kuenda onganji ukuakuteyuila kekanga okuti vosi yavo Lambimbiliya povaka, va kala oku sapela catiamẽla kolondaka vi sangiwa kelivulu lia Yoano 17:18 kuenda Tiago 1:27. Usongui wekanga wa pula hati: “Ovisonehua evi vi vetiya esuvu liatavo?” Onganji ya nena elundi ya tambulula hati: Hacangeko oku sapela catiamẽla Kembimbiliya. Onganji ukuakuteyuila kekanga wa lekisa alivulu Etavo lio Ortodoxo ko Rusia ana a popia lãvi Olombangi via Yehova kuenje wa pula hati: “Olondaka evi vi pisa ocihandeleko?” Onganji yina ya nena elundi ya tambulula hati: “Hacikele cangeko oku lombolola ovina vietavo.”

EKANGA KA LIA AMELẼKO

Poku lundila Olombagi via Yehova hati, vakuakutepa apata, onganji yina ya tuala ondaka yaco kombonge, ya lombolola okuti Olombangi via Yehova ka via siatele oku linga ovipito ndeci, Onatale. Pole, noke wa lombolola okuti ocihandeleko cofeka yo Rusia ka ci kisika omanu oku linga ovipito Vionatale. Omanu vo ko Rusia, oku kongelamo Olombangi via Yehova, ovo va kuete oku nõla nda va linga ale sio. Eye wa lombololavo okuti, ocisoko Colombangi via Yehova, ‘ci tateka omãla oku kuata epuyuko  kuenda esanju liavo.’ Pole, eci a pulisiwa wa lombolola okuti lalimue eteke a sapelele lomõla umue wa tekuiwa lolonjali Olombangi via Yehova. Eci onganji yimue ukuakuteyuila kekanga a pulisa onganji yina ya tuala ondaka yaco kombonge nda eteke limue wa endele kohongele Yolombangi via Yehova, wa kumbulula hati: “Ka ci sukiliwa.”

Onganji yina ya nena ondaka yaco, ya lekisa ulongisi umue ukuakusakula ava va vela uyui oco a ece uvangi umue. Ulongisi waco wa popia hati, oku tanga alivulu Olombangi via Yehova, ci nena uyui. Eci onganji yimue ukuakuteyuila kekanga a limbuka okuti olondaka vi sangiwa vukanda una ulongisi a nena kombonge via lisetahãla levi viukanda wa pongiyiwa Lakulu vo Moscovo, ulongisi wa litavela hati, olondaka vimue viopiwa muẽle vukanda waco. Eye wa popia hati: “Asapulo etu a siata oku upiwa vono yimuamue.” Noke yoku pulisiwa ovina vialua, kua limbukiwa okuti lalimue eteke a sakuile Ombangi ya Yehova yi vela uyui. Ndotolo umue ukuakulongisa ovina viatiamẽla komanu va vela uyui, wa lombolola kekanga okuti wa kũlĩhĩsa eci ci pitahãla 100 Kolombangi via Yehova vo Moscovo. Pole, wa limbuka okuti, omanu vaco va kuete uhayele uwa, momo tunde eci va linga Olombangi via Yehova ka va siatele oku litenga vomuenyo watavo akuavo.

EYULO, POLE HESULILOKO

Kunyamo wo 1999, keteke 12 Yelombo, onganji ya nõla alongisi vatãlo oco va lilongise alivulu Olombangi via Yehova, kuenje wa kapela ponele ekanga liaco. Pole, otembo yimue Oseketa Yolonganji yuviali wo Rusia federal, ya nõlele ale alongisi vamue oco va kũlĩhĩse lutate alivulu Olombangi via Yehova. Keteke 15 ya Kupupu wo 1999, alongisi vana va tumiwile Loseketa yaco, va eca ulandu wokuti ka va sangele lacimue cĩvi valivulu Olombangi via Yehova. Keteke 29 ya Kupupu wo 1999, Oseketa Yolonganji ya tava vali okuti Olombangi via Yehova vi kũlĩhĩwa vofeka. Pole, ndaño lulandu waco wo kaliye, ombonge yo ko Moscovo ya tuma oku nõla alongisi vakuavo oco va konomuise ciwa alivulu Olombangi via Yehova. Eci, ceya oku nena  ocitangi cimue ci komõhisa. Ndaño Oseketa Yolonganji vo Rusia ya tava okuti Olombangi via Yehova vi kũlĩhĩwa ndetavo liofeka, pole, Oseketa yaco ya kala oku linga ekonomuiso lielundi liatiamẽla koku tomba ovihandeleko viofeka!

Noke yanyamo avali, kua fetikiwa vali esombiso liaco kombonge vo Moscovo. Keteke 23 ya Kayovo wo 2001, Onganji yimue yi tukuiwa hati, Yelena Prokhorycheva, noke yoku konomuisa alongisi vana va nõliwile oco va kũlĩhĩse alivulu etu, wa popia hati: “Ka kuli uvangi wecelela oku imulako upange wocisoko Colombangi via Yehova vo Moscovo.” Kuenje kua limbukiwa okuti vamanjetu ka va kuete eko lialundi osi a lingiwa kokuavo! Pole, onganji yina ya nena ondaka yaco kombonge, ka ya tavele kondaka yaco kuenda wa pinga Kombonge yo Moscovo oco yi kũlĩhĩse vali lutate ondaka yaco. Noke yolosãi vitatu, keteke 30 ya Kupemba wo 2001, ombonge ya nyõla ondaka ya nõliwilepo Longanji Prokhorycheva. Oyo ya handeleka esombiso likuavo liondaka yimuamue, pole, li ka lingiwa longanji yikuavo. Kua fetika onepa yatatu yekanga.

OKU YULIWA, POLE, HESULILOKO

Keteke 30 ya Mbalavipembe wo 2001, Onganji yimue yi tukuiwa hati, Vera Dubinskaya ya fetika esombiso. c Nganji o tukuiwa hati, Kondratyeva, wa tuala vali kombonge elundi liokuti Olombangi via Yehova vi vetiya esuvu pokati komanu. Pole, wa lekisa okuti, oku imula ocisoko Colombangi via Yehova, oyo onjila yoku teyuila ekalo liwa Liolombangi vo Moscovo! Poku eca etambululo kondaka yaco, Olombangi viosi via Yehova vo Moscovo vi soka 10.000, via sinala ukanda umue woku pinga kombonge oco ka yi ka tave kondaka yonganji yaco yatiamẽla “koku va teyuila.”

Onganji yina ya tuala ondaka kombonge, ya lombolola okuti, ka ci sukila oku eca uvangi wokuti, Olombangi via Yehova olondingaĩvi. Esombiso liaco lia lingiwa omo lialivulu Olombangi via Yehova kuenda alongiso avo, pole, ha momoko liovopange avo. Eye wa lombolola okuti o pondola oku vilikiya onumiwa yimue Yetavo lio Ortodoxo vo Rusia oco yece uvangi waco. Olondaka viaye via eca uvangi wokuti, ovitunda viatavo via likongelelevo vocitangi coku malako Olombangi via Yehova. Keteke 22 ya Kupemba, wo 2003, onganji yombonge ya nõla alongisi vakuavo oco va kũlĩhĩse vali alivulu Olombangi via Yehova.

Keteke 17 ya Kayovo wo 2004, kua fetikiwa vali ekanga lioku konomuisa ovina via sangiwa valivulu etu. Alongisi vana va nõliwile oku konomuisa ovina viaco, va limbuka okuti, alivulu etu a vetiya omanu “oku tata ciwa apata loku teyuila olohuela,” kuenda elundi lioku popia hati, alivulu Olombangi via Yehova a vetiya esuvu pokati komanu, “liuhembi.” Alongisi vakuavo va tava kondaka yaco. Ulongisi umue ukuasapulo atavo wa pulisiwa hati: “Momo lie Olombangi via Yehova vi kundila?” Eye wa tambulula kombonge hati: “Akristão va sukila oku kunda. Eci oco Evanjeliu li popia, kuenda Kristu wa handeleka olondonge viaye oku ‘enda oku ka kundila olofeka viosi.’” Pole, keteke 26 Yelombo wo 2004, onganji ya handeleka oku imula ovopange Olombangi via Yehova vo Moscovo. Keteke 16 Yevambi wo 2004, Ombonge yo ko Moscovo, ya tava kocihandeleko caco. d Poku popia catiamẽla kocihandeleko caco, manji umue o kasi oku vumba Yehova vokuenda kuanyamo alua, wa popia hati: “Kotembo yuviali wo Sovietika, omanu vo vo Rusia va handelekiwile oku tava okuti ka kuli Suku. Cilo va kisikiwa oku tiamẽla ketavo lio Ortodoxo.”

Nye vamanji va linga? Ovo va kuama ongangu ya Nehemiya kosimbu. Koloneke viaye eci ovanyãli vomanu va Suku va kala oku lambalala upange woku tumbulula ovimbaka vio Yerusalãi, Nehemiya kuenda omanu vaye ka va ecelele oku tatekiwa lovanyãli. Ovo va amamako oku “tunga . . . momo omanu va kala lutima woku  talavaya.” (Neh. 4:1-6) Cimuamue haico vamanjetu va linga ko Moscovo, momo ka va ecelele okuti ovanyãli va tateka upange wavo woku kunda olondaka viwa, u kasi oku lingiwa koloneke vilo. (1 Pet. 4:12, 16) Ovo va kolelele okuti Yehova o va kuatisa kuenda va nõlelepo oku kuama onepa yakuãla yekanga liaco.

ELAMBALALO LIA LIVOKIYA

Keteke 25 Yenyenye wo 2004, vamanjetu va tuma ukanda umue wepingilo kelombe li tukuiwa hati, Kremlin, ku Vladimir Putin, ombiali yo Rusia. Epingilo liaco okuti lia lekisa esumuo kelambalalo, lia kuata eci ci soka 76 kovikanda via sinãliwa leci ci pitahãla 315.000 kolonduko. Ovitunda vietavo lio Ortodoxo ko Rusia, via situlula ciwa ovisimĩlo viavo. Onumiwa yetavo liaco Kombiali yo Moscovo ya lombolola hati: “Tua suvuka ovopange Olombangi via Yehova.” Ocitunda cimue cetavo lio Musulumanu ca lombolola okuti, ocihandeleko coku imulako Olombangi via Yehova, “elinga limue lieyulo hailio lia sunguluka.”

Olomindiki viofeka yo Rusia, via vetiyiwa oku kuata utõi woku lambalala Olombangi via Yehova. Olombangi vimue via Yehova via kala kupange woku kunda ko Moscovo, via tipuiwa kuenda oku nanañanyiwa lovanyãli. Ulume umue lonyeño yalua, wa kuama manji umue ukãi wa kala oku kundila konjo yimue, kuenda wo veta voluongo toke eci a kupukila posi kuenje wa livalula vutue. Manji wa sandiliya ekuatiso kosipitali, pole akuenje velombe ka va kapeleko ocitangi caye. Olombangi vikuavo via Yehova, via kuatiwa lakuenje velombe, loku upiwa ondimbukiso yovimuine, oku upiwa olofoto, kuenje va lale vokayike. Omanu vana va lukalisile olonjo viavo vo Moscovo oco vamanji va lingilemo olohongele, va va lipañelele oku tundisiwa vofeka, nda va amamako oku lukalisa olonjo viavo Kolombangi via Yehova. Omo liaco, noke yokatembo kamue, akongelo alua ka a kuatele vali ovitumãlo vioku lingila olohongele. Ci soka akũi akuãla kakongelo, va enda oku liongoluila pocitumãlo cimuamue Colonjango vikuãla Viusoma. Ekongelo limue li liongoluila vonjango yaco, va enda oku linga Ohundo yowiñi  kowola 7h 30 komẽle. Mitavaso umue o nyula akongelo, wa popia hati: “Akundi va enda oku pasuka kowola 5 komẽle, kuenda va ci linga lesanju lialua vokuenda kuotembo yi pitãhala unyamo.”

‘YI LINGA UVANGI’

Oco ku lekisiwe uvangi wokuti elambalalo Liolombangi via Yehova vo Moscovo ka li kuete esunga, kosãi ya Cembanima wo 2004 olonganji vina vi teyuila ekalo lietu, via sandiliya ekuatiso Kombala Yinene yo Europa yi Teyuila Ekalo Liomanu. (Tala vokakasia losapi hati, “Esunga Lieci Ocitangi Cimue Cesombiso ko Rusia ca Kũlĩhĩsiwila Vali ko França,” kemẽla 6.) Noke yoku pita anyamo epandu, keteke 10 Yevambi wo 2010, olonganji Viombala yinene via nõlapo onjila yoku imula elambalalo Kolombangi via Yehova! e Ombala yinene ya kũlĩhĩsa alundi osi a lingiwa Kolombangi via Yehova, pole ka va sangele uvangi wocili. Ombala ya lombololavo okuti, ofeka yo Rusia ya limbukiwa okuti yi kasi oku tomba ovihandeleko. Omo liaco, “yi sukila oku siapo ocituwa caco kuenda oku feta lonjanga ovina viosi vĩvi va linga.”—Tala vokakasia losapi hati, “Esombiso Lia Lingiwa Kombonge” kemẽla 8.

Ovihandeleko Viombala, via lekisa ndomo Ohongele Yombala Yinene yo Europa yi teyuila upange Wolombangi via Yehova. Oyo ka ya kisikile lika ofeka yo Rusia, pole ya kisikavo ci soka 46 kolofeka vikuavo viatiamẽla Kombala Yinene yo Europa. Handi vali, omo okuti va pita otembo yalua loku kũlĩhĩsa ovihandeleko kuenda ovolandu aco, alongisi vovihandeleko, lolonganji, vakuakusokiya ovihandeleko, kuenda olonoño vakuakuteyuila ekalo liomanu koluali luosi, va ka tanga ocihandeleko caco lutate. Momo lie? Momo Ombala yinene poku sandeka ocihandeleko caco, ka ya tukuile lika olonjila ecelãla va nõlelepo vioku teyuila Olombangi via Yehova, pole, va tukulavo ayulo ecea Olombangi via Yehova via kuatele kolombonge vio kolofeka vimue ndeci: Argentina, Canada, Japãu, Rusia, Afrika do Sul, Espanya, Reino Unido, kuenda ko Estados Unidos. Episo lia lingiwa Lombonge yinene kolonganji vio Moscovo, lia eca Kolombangi via Yehova koluali luosi utõi woku teyuila ekolelo liavo kuenda upange wavo.

Yesu wa sapuilile olondonge viaye hati: “Vu nanañainyailua kovaso olombiali lolosoma oku njimbila uvangi kokuavo kuenda ku va kualofeka.” (Mat. 10:18) Ekanga lina lia pita ci pitahãla akũi kanyamo, lia eca ku va manjetu epuluvi lioku sandeka onduko ya Yehova vo Moscovo kuenda kolonepa vikuavo okuti kosimbu ci sule. Ekonomuiso lia lingiwa Kolombangi via Yehova lolonganji, lalundi a tualiwa kolombonge, kuenda ocihandeleko ca eciwa lombala yi tetulula ovitangi violofeka vialua, via eca “uvangi” kuenda via kuatisa koku ‘amisako ocili condaka yiwa.’ (Va Fil. 1:12) Koloneke vilo eci Olombangi via Yehova ko Moscovo vi kunda olondaka viwa, omanu valua va popia hati: “Siti kua eciwa ocihandeleko coku imula upange wene?” Epulilo eli lia siata oku eca ku vamanji epuluvi lioku lomboluila omanu ovina vikuavo viatiamẽla kalongiso etu. Ocili okuti, ka kuli unene umue u tẽla oku imula upange wetu woku kunda Usoma. Omo liaco, tu likutilila ku Yehova oco amameko oku sumũlũisa vamanjetu ko Rusia kuenda oku va kolisa.

[Atosi pombuelo yamẽla]

[Okakasia Lelitalatu kemẽla 6]

Esunga Lieci Ocitangi Cimue Cesombiso ko Rusia ca Kũlĩhĩsiwila Vali ko França

Kunyamo wo 1996, keteke 28 ya Kayovo, ofeka yo Rusia ya sinala ukanda wohuminyo Lombala Yinene yo Europa yi Teyuila Ekalo Liomanu. (Kunyamo wo 1998, keteke 5 ya Kupemba ukanda waco wa sandekiwa vofeka yo Rusia.) Poku sinala ukanda waco, ombiali yo Rusia ya popia hati, ukanda owu u lekisa okuti:

‘etavo li kuete elianjo lomoko yoku lingila efendelo liavo volonjo, kovitumãlo viowiñi, kuenda oku pongolola onduko yetavo liavo nda va yongola.’—Artigo 9.

‘li kuete elianjo lioku vangula kuenda oku soneha ovina viosi va sima loku sapuilako vakuavo.’—Artigo 10.

‘li kuete omoko yoku linga olohongele viavo lelianjo.’—Artigo 11.

Omanu vosi ale ovisoko via talisiwa ohali lomanu vana va tomba ovihandeleko evi, kuenda vana okuti ovitangi viavo ka vi kasi oku tetuluiwa ciwa vofeka, citava oku tuala ondaka yavo Kombala Yinene yo Europa yi Teyuila Ekalo Liomanu ko Estrasburgo, kofeka yo França (ya lekisiwa konano). Ombala yaco yi kuete 47 kolonganji, okuti etendelo liaco lia li soka leli liolofeka via sinala ukanda wohuminyo Lombala Yinene yo Europa yi Teyuila Ekalo Liomanu. Onjila yosi yi nõliwa lolonganji viombala eyi, ka yi patãliwa. Olofeka vina via sinala ukanda waco, vi sukila oku pokola kesombiso lia lingiwa.

[Okakasia kemẽla 8]

Esombiso Lia Lingiwa Kombala Yinene

Palo pali olonumbi vitatu via tunda Kombala yesombiso.

Olombangi via Yehova via lundiliwa hati, via siata oku tepa apata. Ombala yesombiso ya tetulula ocitangi caco lonjila yimue ya litepa poku popia hati:

“Epata lina ka li yongola okuti ukuepata liavo o lianja letavo liaye loku litumbika kovopange etavo liaco, ovo va nena ovitangi vepata.”—Ocin. 111.

Ombala ka ya sangelevo uvangi welundi liokuti, Olombangi via Yehova “vi yapula ovisimĩlo” viomanu. Oyo ya popia hati:

“Ombala yinene ya limbuka okuti, olombala viesombiso ko Rusia ka via tukuile olonduko viomanu vamue okuti ovisimĩlo viavo via yapuisiwa luloño Wolombangi via Yehova woku longisa.”—Ocin. 129.

Elundi likuavo lia lekisa okuti, Olombangi via Yehova omo lioku likala oku kapiwa osonde vi nyõla uhayele wa vamanjavo. Ombonge poku tetulula ocitangi caco ya popia hati:

“Elianjo lioku tava kuenda oku likala olonjila vimue vioku sakuiwa, ale oku linõlela ndomo omunu a sakuiwa, ci lomboloka oku kapako ocihandeleko ci popia hati, omunu o kuete elianjo lomoko yoku linõlela olonjila viaye. Ombeyi yina okuti ukulu, yi kuete omoko yoku linõlela nda o tava okuti poku pelaliwa ale poku sakuiwa o kapiwa osonde.”—Ocin. 136.