Utala Wondavululi Wokaiye Wongelesi ya Leluka

TU KUETE esanju lioku vu sapuili okuti vokuenda kuotembo yi soka unyamo, oku upisa ketendelo lilo Liutala Wondavulili welilongiso, osãi losãi ku ka sandekiwa Utala Wondavululi Wongelesi ya leluka. Utala waco Wondavululi, u ka kuata ovipama vielilongiso, kuenda ovipama vikuavo nda kua supa evelo. Tua kolela okuti eliangiliyo liaco li ka kuatisa Olombangi vialua via Yehova konepa yespiritu. Momo lie?

Elimi liongelesi olio lia siata oku vanguiwa la vamanji kolonepa vimue ndeci, ko Fiji, Gana, Kenya, Libéria, Nigéria, Papua Nova Guiné, kuenda ko Ilhas Salomão. Ndaño okuti, vamanji kolofeka viaco va vangula alimi akuavo ofeka, kolohongele kuenda kupange woku kunda va siata oku vangula elimi Liongelesi. Pole, Ongelesi va vangula ya leluka calua okuti yina yi sangiwa valivulu etu, ya tĩla. Handi vali, kuli omanu vakuavo va Yehova va ilukila kolofeka vina va vangula Ongelesi, kuenje va kisikiwa oku vangula elimi liaco poku sapela la vakuavo, ndaño ka va vangula ciwa Ongelesi. Citava okuti, ka va tẽla oku enda kolohongele kuna va vangula elimi liavo.

Ovipama Viutala Wondavululi tu lilongisa osemana losemana, ovio okulia kuespiritu tua siata oku tambula kotembo ya tukuiwa. Oco olonjeveleli viosi vi kuatisiwe lulandu waco, Utala Wondavululi Wongelesi ya leluka u kuete ongalamatika ya teta onimbu lupopi wa leluka. Etendelo eli liokaliye, li ka kuata o kapa ya litepa. Otulosapi tuaco lovinimbu, okakasia kapulilo oku pitulula, kuenda oviluvialuvia viaco, vi ka kala ndevi vi sangiwa vatendelo osi. Ci kale una o kuete etendelo liokaliye liongelesi ya leluka leyi ya tĩla, vosi va pondola oku kuama Elilongiso Liutala Wondavululi. Oco o limbuke etepiso liupopi watendelo avali Utala Wondavululi, kũlĩhĩsa ocindekaise ci sangiwa kocinimbu 2 cocipama catete celilongiso Liutala owu Wondavululi.

Tu lavoka okuti, eliangiliyo eli liokaliye li tambulula olohutililo viomanu valua va sapuila Yehova hati: “Nyihe olondunge hã si lilongisa ovihandeleko viove.” (Osa. 119:73) Tua kolela okuti vana ka va vangula ciwa elimi Liongelesi, lamalẽhe vamue kuenda omãla vatito va vangula elimi liaco, va ka tẽla oku pongiya ciwa ovipama Vielilongiso Liutala Wondavulu osemana losemana. Tu eca olopandu ku Yehova okuti, omo lioku ‘sola ongongela ya vamanji voluali luosi,’ o kasi oku talavaya ‘lukuenje wa kolelua haeye wa lunguka’ oco a tu ĩhe okulia kualua kuespiritu.—1 Pet. 2:17; Mat. 24:45.

Osungu Yakulu Yolombangi Via Yehova