Apulilo a Lingiwa Lavakuakutanga

Ca leluka hẽ oku tukula etendelo liovitumasuku viosi via tẽlisiwa vu Mesiya, vi sangiwa Vovisonehua vio Heveru?

Oku lilongisa lutate Ovisonehua vio Heveru, ci tu kuatisa oku limbuka ovitumasuku vina via tẽlisiwa vu Yesu Kristu. Ovitumasuku viaco, via lombolola ovina vialua viatiamẽla kocikoti ca Mesiya, otembo a moleha, ovilinga viaye, ndomo a tatiwa lomanu, kuenda ocikele caye veliangiliyo lia Yehova Suku. Eci tu sokisa ovitumasuku viaco, tu limbuka okuti Yesu, eye Mesiya. Pole, tu sukila oku lavulula lutate, oco tu kũlĩhe ciwa etendelo liovitumasuku viatiamẽla ku Mesiya, vi sangiwa Vovisonehua vio Heveru.

Havosiko va tava kovitumasuku viatiamẽla ku Mesiya levi ka viatiamẽlele kokuaye. Onoño yimue londuko, Alfred Edersheim, poku soneha velivulu losapi hati, The Life and Times of Jesus the Messiah [Omuenyo Kuenda Otembo ya Yesu Mesiya,] wa lombolola okuti, vakuavisonehua, va enda oku tukula ci soka 456 Kovisonehua vio Heveru okuti, viatiamẽla ku Mesiya. Pole, ka va tẽlele oku lombolola ciwa ovina viatiamẽla ku Mesiya. Oku konomuisa lutate ci soka 456 kovisonehua viaco, ci votola atatahãi nda ovinimbu viaco via kongeliwa vovitumasuku viatiamẽla ku Yesu Kristu. Edersheim, wa amisako hati, va Yudea va tendele olondaka vi sangiwa kelivulu Liefetikilo 8:11, ndocitumasuku catiamẽla ku Mesiya. Momo va enda oku popia okuti, “emẽla liolivera lina lia ambatiwile lopomba kuliungu, liopiwa Komunda ya Mesiya.” Usonehi waco, wa tukulavo olondaka vielivulu Lietundilo 12:42. Poku lombolola ndomo va Yudea ka va kuatele elomboloko liocinimbu eci, wa soneha ndoco: “Ndeci Mose a tunda vekalasoko, Mesiya wa laikele oku tunda ko Roma.” Olonoño vialua lomanu vakuavo, ka va kuatele elomboloko liovinimbu evi vivali Viembimbiliya, kuenda ka va tẽlele oku lombolola ovitumasuku viatiamẽla ku Yesu Kristu.

Pamue poku konomuisa lutate ovitumasuku viosi via tẽlisiwa vu Yesu Kristu, ka tu tẽla oku limbuka etendelo lia suapo. Tu konomuisi velivulu lia Isaya mu sangiwa ovitumasuku vialua viatiamẽla ku Mesiya. Kocipama 53:2-7, tu tangako ndoco: “[Yesu] ka kaile lemolẽhelo . . . wa pembuiwa, [kuenda] wa nyehuiwa lomanu . . . wa tu velela epuila lietu, . . . wa totiwila olombole okulueya kuetu, . . . [kuenda] ka asamẽle, ndomõla omeme wa tualiwa kepondelo.” Ovinimbu tua tanga ndeti kocipama 53, citava hẽ oku vi tenda ndocitumasuku cimosi ca tẽlisiwa vu Mesiya? Ale onepa lonepa yatiamẽla ku Mesiya citava oku yi tenda ndocitumasuku ca litepa?

Konomuisavo elivulu lia Isaya 11:1, oku tu tanga ndoco: “Ocinjovelela ci tunda kocisingi ca Jese, kuenje ocanja ci tunda kolombombo viaco.” Kocinimbu 10, ku sangiwavo olondaka vimuamue, viocitumasuku caco. Anga hẽ tu pondola oku tenda ovinimbu evi vivali ndovitumasuku via litepa, ale tu vi tenda ndocitumasuku cimosi? Poku konomuisa ovitumasuku viaco, tua limbuka okuti, kelivulu lia Isaya ocipama 53, kuenda kocipama 11, ku sangiwa ovitumasuku vialua viatiamẽla ku Mesiya.

Omo liaco, tu yuvuli oku kũlĩhĩsa etendelo liovitumasuku viosi vi tiamisiwila ku Mesiya, vi sangiwa Vovisonehua vio Heveru. Ocisoko ca Yehova ca sandeka ulala u lekisa ovitumasuku vialua viatiamẽla ku Yesu okuti via tẽlisiwa ale. a Ulala waco, u pondola oku tu kuatisa loku pamisa ekolelo lietu kelilongiso lio pokolika leli liepata, kuenda kupange woku kunda. Ocili okuti, ovitumasuku via tẽlisiwa vu Mesiya, vi tu ĩha uvangi wokuti, Yesu, eye Kristu ale Mesiya.

[Atosi pombuelo yamẽla]