Apulilo a Lingiwa Lavakuakutanga

Tu kuata ndati elomboloko liupange woku kunda u lingiwa vokuenda kunyamo?

Unyamo lunyamo, vo Anuário mua siata oku sandekiwa asapulo upange woku kunda. Tu sanjuka calua poku tanga ovolandu a lekisa ndomo omanu va Yehova va siata oku linga upange woku kunda Usoma wa Suku, loku longisa omanu voluali luosi. Oco tu kũlĩhe ciwa ovolandu aco, tu sukila oku kuata elomboloko liovina vimue via tukuiwa kuenda atendelo aco. Tu konomuisi ovina vimue.

Unyamo wupange. Unyamo upange, u fetika kosãi Yenyene Linene toke kosãi Yenyene yunyamo ukuavo. Ndeci, vo Anuário yo 2011, mu sangiwa ovolandu upange wa lingiwa oku upisa kosãi Yenyenye Linene wo 2009, toke kosãi Yenyenye wo 2010.

Evokiyo liakundi. “Akundi,” ci lomboloka omanu vana va papatisiwa, kuenda ava ka va papatisiwile okuti, va siata oku kunda olondaka viwa Viusomva. “Evokiyo liakundi,” li lomboloka etendelo liomanu vana va eca o relatoriu yupange woku kunda vosãi, pole citava oku kongela vetendelo liaco o relatoriu yomanu vana ka va ecele o relatoriu yavo osãi ya pita. Olonjanja vimue ci koka okuti, akundi vamue va tendiwa olonjanja vivali. Akundi vana vatalavaya vokuenda kuosãi pole, va ivalako oku eca o relatoriu yavo, ka va tendiwa. Omo liaco, ukundi lukundi o sukila oku eca o relatoriu yaye kesulilo liosãi. Ondaka “vo cosi,” yi lomboloka etendelo lio relatoriu yupange woku kunda yeciwa osãi losãi.

Etendelo liolowola. Ndomo ca lekisiwa vo Anuário yo 2011, Olombangi Via Yehova via pesela eci ci pitahãla 1.6 kolohuluwa violohuluwa, kupange woku kunda. Vulandu waco, ka mua kongelele otembo yina tu pesila kovopange amue atiamẽla kefendelo lietu, ndeci, oku pasuisa vamanji, oku enda kolohongele, oku linga elilongiso Liembimbiliya pokolika loku sokolola ovina tua lilongisa.

Olombongo vi pesiwa. Vokuenda kunyamo wo 2010, Olombangi Via Yehova, via pesela eci ci pitahãla 155.000.000 yolondolale, koku kuatisa akundi valikasi, olomisionariu, kuenda olomitavaso vi nyula akongelo. Volombongo via tukuiwa ndeti, ka mua kongelele olombongo vi pesiwa koku panga alivulu, levi vioku kuatisa eci ci pitahãla 20.000, vamanji va kasi ko lo Betele vi sangiwa koluali luosi.

Vava va lia kombolo lo kovinyu Konjivaluko. Vetendelo liaco, mua kongela akundi vamue va papatisiwa va sangiwa koluali luosi okuti, Konjivaluko va siata oku lia kombolo loku nyua kovinyu. Eci ci lekisa hẽ, okuti vosi yavo olombuavekua via siala palo posi? Sio. Momo vamue va siata oku ci linga omo liovisimĩlo ka via sungulukile va kuatele kosimbu viokuti, va lavoka oku enda kilu, ale va ci linga omo liovitangi vimue va kuete. Ka tua kũlĩhĩle etendelo lia suapo liolombuavekua vi sangiwa handi palo posi, kuenda ka tu sukila oku ci konomuisa. Osungu Yakulu Volombangi Via Yehova, ka yeci etendelo lia vamanji va siata oku lia kombolo loku nyua kovinyu, momo ka va kuete olonduko violombuavekua viosi vi sangiwa voluali. a

Tua kũlĩha lika okuti, eci ohali ya piãla yi ka fetika, palo posi pa ka kala handi olombuavekua vimue ‘via Suku yetu.’ (Esit. 7:1-3) Toke kotembo yaco, olombuavekua vi ka amamako oku songuila ciwa upange woku kunda loku longisa omanu toke kesulilo lioluali lulo. Omo liaco, ovolandu upange woku kunda u lingiwa lafendeli va Yehova koluali luosi, a kuete esilivilo komanu vosi.

[Atosi pombuelo yamẽla]