O ci Ivaluka?

Ove hẽ wa sola oku tanga ovipama Viutala Wondavululi via sandekiwa volosãi via pita? Nda wa vi sola, tambulula apulilo a kuãimo:

• Ovina vipi vitatu vi tu kuatisa oku yuvula uhembi?

Ovina viaco vievi: (1) Oku sumbila Suku, (2) oku kuata utima wa yela, kuenda (3) oku linga ovina vi nena esanju.—15/4, kamẽla 6-7.

• Tu limbuka ndati okuti oku vumba Suku lutima wosi, ka ci lomboloka oku sakalala lika leposo lioketimba, kuenda ka ci lekisa okuti, ka tu sokiya vali otembo yoku puyuka?

Tu ci linga poku kuama ongangu ya Yesu. Eye wa enda oku sanda otembo yoku lia la vakuavo. Yesu wa endavo oku linga ovitalukilo lomanu kuenda ka lekisile okuti, ka yongola oku kuata ukamba lavo. Akulu lomãla, va kuatele ukamba laye.—15/4, kemẽla 10.

• Ondaka “oku yovola” ya tukuiwa kelivulu lia Yovi 33:24, yi lomboloka nye, kuenda Yovi wa kuatisiwa ndati londaka yaco?

Ondaka oku yovola ya tukuiwa ndeti, yi lomboloka oku “tuvika.” Yovi wa sukilile oku lumba ocinyama cimue ci taviwa la Suku oco ci tuvike akandu aye. Ocili okuti, Yehova wa tava kocilumba ca Yovi kuenda wa ecelela okuti, ci tuvika akandu aye, oco Suku o yuluile onjila yoku tumbulula ukamba laye.(Yovi 1:5; 42:12-17)—Evambi Linene-Enyenye Linene, kemẽla 11.

• Uti woliveira wa tukuiwa kelivulu lia Va Roma kocipama 11, u lomboloka nye?

Uti woliveira, u lomboloka onepa yavali yombuto ya Avirahama okuti, va Isareli yespiritu. Vocindekaise caco, Yehova eye olombombo viuti waco, kuenda Yesu o sokisiwa luti woliveira. Eci va Yudea valua va likala Yesu, Vakualofeka vana va tava lutima wosi, va kongeliwa vonepa yavali yombuto ya Avirahama.—15/5, kamẽla 22-25.

• Tua kũlĩha ndati okuti Ongehena hacitumãloko ceyambulo?

Ocisimĩlo coku kangisa omanu vondalu ka yimi, ci sumuisa Yehova. (Yer. 7:31) Handi vali, ocisimĩlo coku kangisa omanu va fa, ka ci likuata locituwa ca Suku ukuacisola, kuenda elongiso Liembimbiliya liokuti, “ava va fa, lacimue va kũlĩha.”(Uku. 9:5, 10)—Evambi Linene-Enyenye Linene, kemẽla 15.

• Yehova o tenda ndati “vakuavitima via teka,” haivo ‘va sumua’? (Osa. 34:18)

Ndeci isia umue ukuacisola a lembeleka omõlaye wa sumua poku u kuata peka, Yehova o kasi ocipepi lafendeli vaye va sandiliya ekuatiso kokuaye. Eye o lembeleka vana va teka utima haivo va sumua. Eca kokuavo olondunge vi va kuatisa oku liyaka lovitangi. (2 Va Kor. 4:7;Tia. 1:5)—Evambi Linene-Enyenye Linene, kemẽla 23.

• Anga hẽ ocitumbulukila ca li pua ca Yesu ca ponduile oku panga onepa kocisembi?

Sio. Yesu eye o ka linga ono yomanu vosi va li pua okuti, ka va pangi onepa kocisembi. Omuenyo wa Yesu wa li pua, owo lika u sokisiwa lomuenyo wa li pua Adama a pumba. (1 Tim. 2:6)—15/6, kemẽla 13.

• Akristão va lekisa ndati okuti va kapako elungulo lioku yuvula alongisi vesanda li sangiwa kelivulu Liovilinga 20:29, 30?

Va ci linga poku yuvula oku tambula alongisi vaco volonjo viavo. (Va Rom. 16:17; 2 Yoa. 9-11) Akristão va yuvula oku tanga alivulu omanu vana va lingila usuanji efendelo liocili, oku tala ovipama viavo vo Televisãu, kuenda asapulo avo a sangiwa vo Internet.—15/7, kamẽla 15-16.

• Ndomo ca lekisiwa vulandu u sangiwa kelivulu lia Luka 10:40-42, momo lie tu sukilila oku kuata ukamba la vamanji?

Eci tu kala kumosi la vamanji, ka tu sakalala loku va pongiyila okulia kua tĩla calua, pole ocimãho cetu, oku likolisa pokati lovina viespiritu. (Va Rom. 1:11, 12) Oku kala la vamanji, ci va pamisa ndaño okuti ka tua pongiyile okulia kualua.—Evambi Linene-Enyenye Linene, kamẽla 29, 30.