Ohongele Yimue yi Kuete Esilivilo

“KESULILO liohongele yilo yunyamo, o ka vetiyiwa oku popia hati: ‘Ohongele eyi, ya siata oku lingiwa unyamo lunyamo, yi kuete esilivilo lia velapo Kakristão!’” Lolondaka evi, manji Stephen Lett watiamẽla Kosungu Yakulu Volombangi Via Yehova, wa vetiya omanu oku yevelela lutate ovipama via lingiwa. Keteke 2 ya Mbalavipembe kunyamo wo 2010, kua lingiwa ohongele Volonjango Vinene kolupale luo Jersey City, kuenda ko Nova Jersey. Ohongele yaco, ya siata oku lingiwa unyamo lunyamo, lo Sociedade Torre de Vigia de Bíblias e Tratados da Pensilvânia okuti, tunde eci ya fetikiwa ya tẽlisa 126 kolonjanja. Ovina vipi via velapo via lingiwa kohongele yaco?

Manji Lett, wa linga ohundo yimue yi vetiya calua, poku lombolola ovina viatiamẽla kekãlu lia Yehova lia tukuiwa Vembimbiliya kelivulu lia Esekiele. Ekãlu liaco, lilomboloka ocisoko ca Yehova Suku, cina eye a kasi oku songuila. Manji Lett, wa lombolola okuti, onepa yatete ovangelo va kasi kilu haivo va endisiwa lovisimĩlo via Yehova ndocinyi. Onepa yavali yocisoko ca Yehova Suku palo posi, yendisiwavo lovisimĩlo viaye. Manji Lett, wa tukula apongoloko a kasi oku lingiwa vocisoko ca Yehova palo posi, vokuenda kuanyamo alua.

Kua lingiwa esokiyo liokuti ka ku tungiwa vali Olofiliale vialua. Kuenje esokiyo liaco, li ka ecelela vamanji valua va talavaya ko Betele kolofeka viaco, oco va tiamisile utima wavo kupange woku kunda. Manji Lett wa vetiya olonjeveleli, oku amamako loku likutilila oco Osungu Yakulu Volombangi Via Yehova, vonduko yukuenje wa lunguka ya amameko oku koleliwa kuenda oku kala vakuacili.—Mat. 24:45-47.

Ovolandu a Vamanji va Pulisiwa

Manji Tab Honsberger, usongui Wofiliale yo ko Haiti, wa lombolola ulandu wocilemawe ca pita keteke 12 kosãi ya Susu, yo 2010, okuti kua fa 300.000 komanu. Eye wa lekisa okuti, asongui vatavo va sapuila omanu okuti, Suku eye wa kangisa omanu vana ka va lekisile ekolelo kokuaye, kuenda wa teyuila omanu vawa. Pole, ovingumba vina via kala vokayike, eci ovimano via kupuka locilemawe, via tilamo. Omanu valua vo ko Haiti, eci va lilongisa okuti tu kasi kotembo yovitangi, va lembelekiwa calua. Manji Honsberger wa tukula olondaka via manji umue wo ko Haiti wa fisa ukãi waye, una wa popia hati: “Keteke liaco, nda lila calua. Sia kũlĩhĩle otembo ndi ka liwekapo oku lila, pole, nda sanjuka omo liocisola ci kasi vocisoko ca Yehova. Ndi kuete elavoko liepinduko, kuenda ndi yongola oku kuatisa vakuetu.”

Manji Mark Sanderson, okuti cilo o kasi ko Betele yo ko Brooklyn, wa lombolola ulandu wo kofeka yo Filipina. Poku tukula ndomo akundi va livokiya ci pitahãla 32 kolonjanja, kuenda etendelo liomanu va kasi oku lilongisa  Embimbiliya, wa lombolola olondaka via manji umue wa kala Kocisoko Cofiliale vofeka yaco. Eye wa lekisa okuti, manji umue o tukuiwa hati, Miguel, onekulu yaye ya pondiwa. Manji Miguel, wa sandiliyile onjila yoku kapa vokayike omunu wa ponda onekulu yaye oco a sombisiwe. Noke, manji Miguel weya oku lisanga longangala yaco. Ndaño wa yeva onyeño yalua, wa likolisilako oku lekisa esanju kuenda ocikembe kokuaye. Eci a laleka omunu waco oku lilongisa laye Embimbiliya, eye wa tava, kuenje wa fetika oku sola Yehova. Noke omunu waco, wa papatisiwa. Cilo, manji Miguel wa linga ekamba liomunu waco, kuenda o kasi oku likolisilako oco ekamba liaco liokaliye li tunde vokayike. a

Poku amisako lohongele yaco, manji Mark Noumair, ulongisi Woseketa Yolosikola Viupange Wakristão wa linga ohundo ya kuata onepa yapulilo. Eye wa pulisa va manji vamue ndeci: Alex kuenda Sarah Reinmueller, David la Krista Schafer, la Robert kuenda Ketra Ciranko. Alex Reinmueller, oñuatisi Yocisoko Coku Sandeka, wa lombolola ndomo a iñila kupange wakundi votembo yosi ko Kanada, eci a kuata 15 kanyamo, okuti olonjanja vimue wa enda oku talavaya lika liaye. Manji Reinmueller poku pulisiwa esunga lieci a iñilila ko Betele, wa popia okuti eci co kuatisa oku kula kespiritu, ongangu yalume vatatu vakuekolelo. Ukãi waye Sarah, wa tukula ulandu wekamba liaye, una wa kapiwile vokayike ko China, anyamo alua omo liekolelo liaye. Sarah wa popia hati, olohutililo vio kuatisa oku kolela Yehova.

Manji David Schafer, oñuatisi Yocisoko Celongiso, wa eca olopandu omo liekolelo lia inaye, kuenda wa lombolola okuti, ongangu ya vamanji vana a talavayele lavo kupange woku songa avaya, yo kuatisa oku iñila kupange wakundi vasokamo osimbu a kala umalẽhe. Ukãi waye Krista, wa lombolola okuti wa vetiyiwa lamanji umue o kasi otembo yalua ko Betele, una wa enda oku “linga esunga leci citito,” ndomo Yesu a ci popia.—Luka 16:10.

Manji Robert Ciranko, oñuatisi Yocisoko Casonehi, wa lombolola okuti va sekulu yaye koluse lo koluina vana va tundile ko Hungria, va kala olombuavekua. Eci a fetika oku endaenda kolohongele viofeka oku upisa kunyamo wo 1950, otembo a kala umalẽhe, wa komõha calua poku limbuka okuti, ocisoko ca Yehova cinene calua, kuenda ka ci sokisiwa lekongelo lina a kala. Ukãi waye Ketra, wa lombolola ndomo a lilongisa oku vumba lekolelo eci a kala ukundi wotembo yosi vekongelo limue mua kala usuanji kuenda ovitangi vikuavo. Omo liepandi liaye wa nõliwa oku iñila kupange wakundi valikasi vekongelo likuavo mua kala  omanu va likuete omunga kuenje co nenela esanju lialua.

Manji Manfred Tonak, wa lombololavo ulandu wo ko Etiopia. Tunde kosimbu ko Etiopia, kua siata oku kala omanu va tava Kembimbiliya, kuenje koloneke vilo, vofeka yaco muli eci ci pitahãla 9.000 kakundi volondaka viwa. Valua pokati ka vamanji yaco, va kasi ocipepi lolupale luo Adis-Abeba okuti, oyo ombala yofeka yaco. Pole, kovikanjo vi kasi ocipãla, ku sukila ekuatiso liakundi Vusoma. Oco ku tẽlisiwe esukila liaco, Vamanji vo ko Etiopia, vana va kasi kolofeka vikuavo, va lalekiwa oku tiuka oco va kundile kovikanjo viaco. Valua va tava kelaleko liaco, va pamisa vamanji va kasi kovikanjo viaco, kuenje omanu valua va lekisa onjongole kolondaka viwa.

Kohongele yaco kua lingiwa osimbosiu ya lekisa alikolisilo Olombangi Via Yehova ko Rusia oco va kuate elianjo lioku kunda. Manji Aulis Bergdahl usongui Wocisoko Cofiliale ko Rusia, wa lombolola ndomo olombiali via siata oku lambalala Olombangi Via Yehova ko Rusia, ca piãla enene ko Moskovu. Manji Philip Brumley, Wocisoko ci Tetulula Ovitangi Lombiali, Kofiliale yo Estados Unidos, wa lombolola esombiso lia pita Vekanga Linene, li Teyuila Omanu ko Europa. Eye wa yeva okuti Olombangi Via Yehova, via lundiliwa olonjanja ecea. Vana va kala vekanga, va limbuka okuti alundi aco ecea ka a kuatele esilivilo, momo pokati kavo, pa kala vamue va kũlĩhĩsa lutate ocitangi caco kuenje va lekisa esunga lieci alundi aco ka a kuatelele esilivilo. Omo liaco, Manji Brumley wa popia hati, o lavoka okuti, Ekanga li ka tetululavo ovitangi via vamanji va kasi kolofeka vikuavo.

Noke yovolandu aco, Manji Lett, wa linga esapulo liokuti, Ekanga Linene li Teyuila Omanu ko Europa, lia kũlĩhĩsa esunga lieci Ombiali yo ko França ya kisikila Olombangi Via Yehova oku feta elisimu vokuenda kuotembo yalua. Ekanga liaco, ka lia tavele kovovangi osi a tukuiwa vocitangi caco. Noke Ekanga liaco, lia yevelela eci ci soka 39 kalundi a kapiwile Kolombangi Via Yehova, kuenje va tu tetuluila 37 kalundi. Omo liaco, Manji Lett wa vetiya vamanji vosi oku tukula ocitangi caco poku likutilila ku Yehova Suku.

Ulandu wa sulako, wa lomboluiwa la Manji Richard Morlan, ulongisi Wosikola Yakulu Vekongelo. Eye wa lombolola ovina viatiamẽla kosikola kuenda esanju akulu vekongelo va yeva, omo lioku pita kosikola yaco.

Olohundo Vikuavo Via Lingiwa Losungu Yakulu Volombangi Via Yehova

Manji Guy Pierce, watiamẽla Kosungu Yakulu Volombangi Via Yehova, vohundo a  linga, wa tukula ocisonehua Cembimbiliya cunyamo wo 2011, losapi hati: ‘Sanda ocivundilo konduko ya Yehova.’ (Sof. 3:12) Eye wa popia hati, yilo otembo yimue yesanju kafendeli va Yehova, pole, tu sukila oku lavulula. Ndaño eteke lia Yehova li kasi ocipepi, omanu va kasi handi oku sandiliya ocivundilo ketavo liesanda, vovisoko viopulitika, oku sanda ovokuasi, oku tava kovilongua viesanda, kuenda ovina vikuavo. Oco tu sange ocivundilo ca koka, tu sukila oku tukula onduko ya Yehova okuti, mua kongela oku kuata ukũlĩhĩso, oku lekisa esumbilo kokuaye, oku kolela Konduko yaco, kuenda oku u sola lovina viosi tu kuete.

Manji David Splane watiamẽla Kosungu Yakulu Volombangi Via Yehova, wa linga ohundo yimue yi vetiya losapi hati: “Ove hẽ wa Iñila Ale Vepuyuko Lia Suku?” Eye wa lombolola okuti, epuyuko lia Suku ka li lomboloka oku kuata owesi, momo toke cilo, Yehova kumue Lomõlaye, va kasi oku “linga upange” oco va tẽlise ocipango caye catiamẽla komanu. (Yoa. 5:17) Oco hẽ, tu iñila ndati vepuyuko lia Suku? Tu ci linga poku yuvula ekandu, kuenda ovilinga vioku lisandela esunga. Tu sukilavo oku lekisa ekolelo loku ambata omuenyo u litava lolonumbi via Suku, poku linga upange woku kuatisa koku tẽlisa ocipango caye. Olonjanja vimue oku ci linga ka ca lelukile, pole tu sukila oku tava kalungulo loku pokola kolonumbi via siata oku eciwa locisoko ca Yehova. Manji Splane, wa vetiya olonjeveleli oku likolisilako loku pokola kovina viosi oco va iñile vepuyuko lia Suku.

Manji Anthony Morris, watiamẽla Kosungu Yakulu Volombangi Via Yehova, wa linga ohundo ya sulako losapi hati: “Ovina Vipi tu Kasi Oku Lavoka?” Eye, wa vetiya locisola olonjeveleli oku lavulula ovitumasuku ka via tẽlisiwile handi, vina omanu vosi vakuekolelo va kasi oku lavoka. Ovo va sukila oku lavulula ocitumasuku ci popia hati: “Tua kolapo, tu kasi lombembua!” kuenda ocitumausuku catiamẽla koku nyõliwa kuatavo esanda. (1 Va Tes. 5:2, 3; Esit. 17:15-17) Manji Morris, wa lungulavo olonjeveleli hati, eci ocitumasuku ca tukuiwa ndeti ci tẽlisiwa, va sukila oku yuvula oku sima okuti, “O Harmagedo yeya.” Eye wa vetiya olonjeveleli oku kuata epandi ndomo ca lekisiwa kelivulu lia Mika 7:7. Wa vetiyavo vamanji ‘oku likuata omunga’ Losungu Yakulu Volombangi Via Yehova, ndeci asualali va likuata omunga kuyaki. Kuenje wa tukula olondaka via popia hati: “Kolisiko ene vosi vakuakuimba ovaso ku Yehova. Ovitima viene vi kuate utõi.”—Osa. 31:24.

Poku malusula, kua lingiwa asapulo amue awa. Manji Geoffrey Jackson, watiamẽla Kosungu Yakulu Volombangi Via Yehova, wa linga esapulo liatiamẽla Kutala Wondavululi Wongelesi ya leluka oco u kuatise vana ka va tẽla oku vangula ciwa elimi liaco. Manji Stephen Lett, wa sapula hati, Osungu Yakulu Volombangi Via Yehova, yi ka linga esokiyo lioku kuatisa olomitavaso vi nyula akongelo vofeka ko Estados Unidos kumue lakãi vavo. Wa sapulavo okuti onduko Yosikola Yoku Angiliya Olondingupange ya pongoluiwa. Kaliye yi tukuiwa hati, Osikola Yembimbiliya ya Vamanji Alume ka va Kuelele. Kua lingiwavo esokiyo liokuti ndopo ku fetikiwa Osikola Yembimbiliya ya Vamanji Alume va Kuele. Osikola yaco yi ka pindisa vamanji vana va kuele oco va kuate ovikele vocisoko ca Yehova. Noke manji Lett wa sapulavo okuti, ko Patterson ku ka lingiwa Olosikola viaco olonjanja vivali vunyamo ndeci: Osikola Yolomitavaso vi Nyula Akongelo kumue lakãi vavo, kuenda Osikola Yocisoko Cakulu vo Filiale kumue lakãi vavo. Esokiyo liaco li ka kuatisavo vamanji vana va kala ale kosikola yaco onjanja yatete.

Manji John E. Barr o kuete 97 kanyamo haeye watiamẽla Kosungu Yakulu Volombangi Via Yehova, wa linga ohutililo yoku malusula. b Omanu vosi va kala kohongele va komõha calua omo liovolandu a lomboluiwa keteke liaco.

[Atosi pombuelo yamẽla]

[Elitalatu kemẽla 19]

Atambululo a Vamanji va pulisiwa a sanjuisa vosi va kala kohongele

[Elitalatu kemẽla 20]

Yehova wa sumũlũisa upange woku kunda ko Etiopia