Olonumbi Vioku Linga Efendelo Liepata Kuenda Elilongiso Lio Pokolika

TUNDE kunyamo wo 2009, kakongelo Olombangi Via Yehova voluali luosi, kua lingiwa epongoloko liolohongele vokuenda kuosemana. Kua sokiyiwa okuti, ku kala lika oloneke vivali vioku linga olohongele vosemana. Kuenje, vosi va vetiyiwa oku linga efendelo liepata, ale elilongiso lio pokolika vateke akuavo. Ove hẽ o kasi oku kuama esokiyo liaco? Wa siata hẽ oku kuatisiwa leliangiliyo eli?

Vamue ka va kũlĩhĩle ndomo va nõla ovipama va kuama kefendelo liepata. Pole, Osungu Yolombangi Via Yehova, hayoko yi nõla ovipama viosi epata lepata va sukila oku kuama. Omo okuti epata lepata li kuete ekalo lia litepa, ciwa okuti, omunu lomunu o sokiya ovipama va sukila oku konomuisa lepata liaye, kuenda epuluvi li ecelela oku ci linga vosemana.

Vamue va siata oku pongiya ovipama violohongele. Pole, eci hacoko lika ci sukiliwa kefendelo liepata. Vakuavo, va siata oku tanga, loku sapela, kuenda oku linga olomapalo viatiamẽla kulandu umue va tanga Vovisonehua oco va kuatise omãla. Olonjanja vimue ka ci sukila oku linga apulilo latambululo ndomo ca siata oku lingiwa kolohongele. Pole, ocina ca velapo, ceci okuti, omunu lomunu vepuluvi liaco, o lianja kuenda o vetiyiwa oku vangula. Nda vosi va vetiyiwa oku eca atambululo avo, epuluvi liaco li kala liesanju.

Isia umue o kuete omãla vatatu, wa soneha ndoco: “Ovina tu lilongisa, tua siata oku vi tiamisila kulandu Wembimbiliya. Tete, tu tanga ovipama vimue Viembimbiliya pokolika, noke omãla va linga akonomuiso avo, kuenje va lombolola ovina va konomuisa. Omõla umue o tukuiwa hati, Michael, [o kuete anyamo epanduvali], wa siata oku lombolola oviluvialuvia ale o soneha ocinimbu cimue. David omõla umue o kuete 13 kanyamo, la Kaitlyn o kuete 15 kanyamo, va siata oku soneha ovisimĩlo viavo viatiamẽla kulandu va tanga Vembimbiliya. Onjanja yimue eci tua tanga ulandu wa Yosefe, otembo a kala vokayike kuenda ndomo a situlula elomboloko liolonjoi via vakalei ka Fareo, Kaitlyin wa soneha ulandu waco lovisimĩlo viaye.”—Efet. ocip. 40.

Ocili okuti, epata lepata li kuete ovitangi via litepa. Ovipama vi kuatisa epata limue, pamue havioko epata likuavo li sukila oku kuama. Omo liaco, vokakasia ka kuãimo, mu sangiwa olonumbi vimue omunu lomunu a pondola oku kuama kefendelo liepata ale kelilongiso lio pokolika. Pole, citava okuti ku kuamiwa olonjila vikuavo.

[Okakasia Lelitalatu kemẽla 6,7]

 Kapata a kuete omãla vatito:

• Tanga kuenda konomuisa velivulu Os Jovens Perguntam—Respostas Práticas.

• Ombangulo: “Sokolola eci nda wa linga nda wa kalele kosimbu.” (Tanga Utala Wondavululi 15 ya Kupemba wo 1996, kemẽla 14, kovinimbu 17-18.)

• Sapeli ovimãho vu pondola oku tẽlisa vokuenda kuotembo yitito, levi vu ka tẽlisa noke.

• Olonjanja vimue, sapeli ovolandu Embimbiliya wa tali vo video.

• Konomuisi Vutala Wondavululi ocipama losapi hati: “Kamalẽhe Vetu.”

Kolohueli kuenda omãla:

• Sapeli atosi a sangiwa kovipama 1, 3, 11-16 velivulu Uloño Wepata Liasanjuka.

• Sapeli eci ca kuatisa omunu lomunu poku konomuisa atosi wa tangi Vembimbiliya.

• Pongiyi Elilongiso Liembimbiliya Liekongelo ale Liutala Wondavululi.

• Sapeli ndomo vu pondola oku vokiya upange wene woku kunda.

Ku vamanji ka va kuelele ale ku vana okuti umue pokati kohueli Hukristãoko:

• Lilongisi alivulu okaliye wa tambuli kohongele yofeka.

• Tangi ovolandu a sangiwa volo Anuário viosimbu, levi viokaliye.

• Konomuisi ovitangi via siata oku pita vocikanjo cene.

• Pongiyi ovindekaise viupange woku kunda.

Kapata kuenda omãla:

• Lingi ovindekaise vimue Viembimbiliya.

• Lingi olomapalo vi sangiwa vo Despertai! kemẽla 30 kuenda 31, okuti vi vetiya oku patekela ovina wa tangi.

• Olonjanja vimue, lingi ovina vioku sokolola. (Tala ocipama losapi hati: “Estudamos a Bíblia no zoológico!” vo Despertai! 8 Yelombo yo 1996, kemẽla 16-18.)

• Kũlĩhĩsi Vutala Wondavululi ocipama losapi hati: “Longisa Omãla Vove.”