Apulilo a Lingiwa la Vakuakutanga

Nye ndi pondola oku linga nda poku tanga Vembimbiliya nda sanga ondaka yimue ka ya ndi lombolokele, ale ceci ndi sukila elungulo liocitangi cimue ndi kuete?

Elivulu Liolosapo 2:1-5, li tu vetiya oku “sanda” elomboloko kuenda ukũlĩhĩso ndeci omanu va siata oku linga poku sandiliya “ukuasi wa selekiwa.” Tu sukila oku sandiliya lutate Vembimbiliya atambululo atiamẽla kocitangi cetu loku sanda onjila yoku ci tetulula. Tu ci linga ndati?

Elivulu Kuatisiwa Losikola Yupange Wakristão, kemẽla 33 toke 38, losapi hati, “Ndomo o Konomuisa,” li tu kuatisa oku talavaya lovimãleho via sandekiwa ‘lukuenje wa kolelua haeye wa lunguka.’ (Mat. 24:45) Kemẽla 36 ku sangiwa olonumbi vioku talavaya lo Índice das Publicações da Torre de Vigia. O Índice yaco, ya tepiwa volonepa vi lombolola olosapi viovipama kuenda ovinimbu Viovisonehua. Nda o kuete epulilo liatiamẽla kondaka yimue ale kocinimbu cimue Cembimbiliya, o ka sanga ulala wovipama vialua vioku konomuisa. Pole, kuata epandi poku konomuisa etambululo ale etosi limue o yongola oku kũlĩha. Omo okuti o yongola oku sandiliya “ukuasi wa selekiwa,” o sukila oku likolisilako oku sokiya otembo yoku ci linga.

Ocili okuti, valivulu a sandekiwa lukuenje wa lunguka, mu sangiwa olosapi lovisonehua vimue okuti, ka via lomboluiwile handi. Ndaño okuti pamue tua tukula ocinimbu cimue Cembimbiliya, citava okuti ka tua tambuluile handi epulilo liove. Ovolandu amue a tukuiwa Vembimbiliya a votola apulilo, momo ka a lombolola ovina viosi vi sangiwa Vovisonehua. Olonjanja vimue, ka tu sangi lonjanga atambululo kapulilo osi a lingiwa. Omo liaco, tu yuvuli ocituwa coku lombolola ovina ka via situluiwile handi. Momo ‘oku konomuisa ovina ka via situluiwile la Suku, ka ci pamisa ekolelo.’ (1 Tim. 1:4; 2 Tim. 2:23; Tito 3:9) Ci kale vamanji va kasi kolofiliale ale kombala Yolombangi Via Yehova, lomue o kuete omoko yoku tambulula epulilo liatiamẽla kocitangi cimue ka ca situluiwile handi valivulu a sandekiwa lukuenje wa lunguka. Omo liaco, tu koleli okuti, Embimbiliya li tu ĩha olonumbi viosi vi tu kuatisa oku songuila omuenyo wetu. Pole, ovina vimue okuti ka via tu lombolokele ciwa, vi tu ĩha epuluvi lioku lekisa ekolelo lietu ku Suku kuenda Kondaka Yaye.​—Tanga elivulu Kuata Ukamba Wocili la Yehova kemẽla 185 toke 187.

Nda wa konomuisa ale ovina viatiamẽla kocitangi cove, pole, kua sangele onjila yoku ci tetulula, nye o sukila oku linga? Ku ka kuate ohele yoku sapela la manji umue wa loñoloha kespiritu, ale akulu vekongelo liene. Momo va kuete ukũlĩhĩso walua watiamẽla Kembimbiliya, kuenda va kasi oku fendela Yehova vokuenda kuanyamo alua. Nda o sukila elungulo liatiamẽla kocitangi cimue ale o yongola oku kuama onjila yimue, vamanji yaco va pondola oku ku kuatisa, momo va kũlĩha ciwa ekalo liove kuenda ocitangi o liyaka laco. Ku ka liwekepo oku likutilila ku Yehova catiamẽla kocitangi cove. Nda wa pinga ekuatiso ku Yehova, eye oku ĩha espiritu sandu liaye oco li songuile ovisimĩlo viove, momo wa siata oku ‘eca olondunge luloño’ kafendeli vaye.​—Olosap. 2:6; Luka 11:13.