Momo Lie Oku ‘Lavulula’​—ku Kuetele Esilivilo?

“ONDIMBUKISO yoku tukuluka kuove ye? Londimbukiso yesulilo lioluali ye?” (Mat. 24:3) Yesu poku tambulula epulilo liolondonge viaye, wa tukula ovina vialua okuti, vosi yavo va ponduile oku vi limbuka lonjanga. Ondimbukiso yaco, yi sangiwa kelivulu lia Mateo kocipama 24, kuenda kelivulu lia Marko kocipama 13, leli lia Luka kocipama 21. Noke wa lungula hati: “Lavululi.”​—Mat. 24:42.

Omo okuti ca lelukile oku limbuka ondimbukiso yaco, momo lie Yesu a ecela vali elungulo hati: “Lavululi”? Kũlĩhĩsa ovina vivali. Catete, citava okuti ovitalukilo vi tateka vamue okuti, ka va lavulula. Cavali, Ukristão pamue o limbuka ondimbukiso yimue, pole, ka yi kapiko, momo omanu vana a lisungue lavo vo vetiya oku liwekapo oku lavulula. Pamue eye o sima okuti, “ohali ya piãla” Yesu a tukula vocitumasuku caye, yi kasi handi ocipãla, kuenje o liwekapo oku ‘lavulula.’​—Mat. 24:21.

“Ka va Limbukile Cimue”

Yesu wa ivaluisa olondonge viaye ovina via pita lomanu va kala koloneke via Noha. Omanu vaco va mola upange woku kunda Noha a enda oku linga, osimbu a kala oku tunga ocimbaluku cimue cinene. Pole, “ka va limbukile cimue.” (Mat. 24:37-39) Omanu vo koloneke vilo, va siatavo oku lekisa ocituwa ndeci comanu va kala koloneke via Noha. Sokolola omanu vana va siata oku endisa akãlu okuti olonjanja vimue, ndaño kovaso yavo kuli ondimbukiso yi va lungula oco va tepulule olupesi, pole, ka va pokola kelungulo liaco. Omo liocituwa caco, olombiali via siata oku kapa ovipanga vatapalo o volupale, oco vakuakuendisa akãlu va tepulule olupesi. Cimuamue haico ci pondola oku pita Lukristão okuti, ndaño o lete ondimbukiso yoloneke via sulako, pole, o sakalala lovina violuali lulo. Ocitangi eci, oco ca pita la manji umue umalẽhe o tukuiwa hati, Arielle wo kofeka yimue yi sangiwa Kutakelo wo Afrika.

Manji Arielle wa solele calua oku tala vo televisãu ndomo akãi va enda oku imba ombunje. Eci va sokiya ocimunga cimue combunje kosikola a kala oku tangela, ka kapeleko ovina vi nyola ekalo liaye kespiritu. Kuenje, wa nõliwa oku kala ukuakuyakela ombunje. Nye ceya oku pita laye noke? Eye wa lombolola hati: “Vamue pokati ka vana va pangele onepa kocimunga caco combunje, va kala laponji vana va kuata ocituwa coku sipa eliamba. Kefetikilo, va enda oku ndi yola epembe, omo liovituwa viange via litepa. Pole, nda simĩle okuti lalimue eteke ndi ka kuama ovituwa viavo vĩvi. Vokuenda kuotembo, ocituwa coku imba ombunje ca nyõla ekalo liange kespiritu. Vutima wange mue yukile lika ovisimĩlo vioku linga olomapalo viaco. Kuenje, eci ndi kala kolohongele Vonjango Yusoma, ndaenda oku sokolola lika oku imba ombunje. Ovituwa viange viwa viosi via nyõlehele. Ombili nda kuatele yoku tasula ombunje, ya ndi vetiya oku kuata ocipululu coku nganyala olombongo vialua. Kuenje, nda fetika oku lipindisa calua oco ndi kuate ekemãlo koku imba ombunje. Pole, ocituwa caco, ceya oku ndi sumuisa calua. Momo  ukamba wange la vamanji wa tepulukile omo lioku imba ombunje.

Manji Arielle wa amisako hati: “Eteke limue eci tua kala oku tasula ombunje kua pita ocitangi cimue. Ocimunga cetu ca imba lãvi kuenje, va eca epuluvi kocimunga cikuavo oco va yule, pole, nda yakela ombunje yaco. Osimbu sia yakelele ombunje, nda likutilila ku Yehova, oco a ndi kuatise! Kuenje, ca ndi vetiya oku limbuka ndomo nda honguele kespiritu. Nye ca ndi kuatisa oku pamisa vali ekolelo liange?

“Nda tala ovideo losapi hati, Os Jovens Perguntam—O Que Fazer da Minha Vida? a Kuenje, nda nõlapo oku yi tala lutate onjanja yavali. Noke nda fetika oku kuata ovisimĩlo ndevi via André wa lekisiwa vovideo. Nda kapako elungulo ukulu wekongelo a ecele ku André liokuti: Tanga onumbi yi sangiwa kelivulu lia Va Filipoi 3:8, kuenda yi sokolola lutate. Kuenje, nda ci linga. Omo liaco, nda liwekapo oku tasula ombunje.

Manji Arielle wa amisako lulandu waye hati: “Nda linga apongoloko alua! Ocituwa cange coku lipanda loku sakalala lika lovina ka vi kuete esilivilo ca imũha. Nda sanjuka calua omo liukamba ndi kuete la vamanji. Nda fetika vali oku velisapo ovina viespiritu, ndeci, oku endaenda kolohongele, kuenda nda sanjuka calua. Ndi kuetevo ombili kupange woku kunda. Nda siata oku litumbika kupange wakundi vasokamo.”

Nda ovitalukilo vi ku tateka oku limbuka ondimbukiso Yesu a tu ĩha, o sukila oku ivaluka ulandu wa pita la manji Arielle. Citava okuti o kapako onumbi yi kuãimo. Konomuisa olonumbi vielivulu Índice das Publicações Torre de Vigia. O Índice yi sokisiwa “lomapa yi ku songuila pocitumãlo pa kasi ukuasi.” Yi ku lekisavo ndomo o pondola oku sanga alungulo kuenda ovolandu omanu vana va pandikisa kayonjo. O pondola oku kuatisiwa lolohongele poku lipongiya ciwa loku soneha atosi a velapo. Vamanji vamue va siata oku limbuka okuti, oku tumãla komangu yo kovaso Vonjango Yusoma, ci va kuatisa calua. Eci ku lingiwa onepa yimue yapulilo latambululo, seteka oku eca etambululo liatete. Oco o lavulule kespiritu, sokisa ovina vi kasi oku pita voluali londimbukiso Yesu a eca yatiamẽla “koloneke via sulako.”—2 Tim. 3:1-5; 2 Pet. 3:3, 4; Esit. 6:1-8.

“Liangiliyi”

Ondimbukiso yoloneke via sulako yi kasi oku tẽlisiwa ‘kolonepa viosi violuali.’ (Mat. 24:7, 14) Omanu valua va kasi kolofeka vimue kuli ovovei alua, onjala, ovilemawe, kuenda ovitangi vikuavo via tukuiwa vocitumasuku. Pole, omanu vakuavo va kuete ombembua lutima wa tula. Nda kua la pita lovitangi via tukuiwa vocitumasuku ca Yesu, anga hẽ o sima okuti ohali ya piãla yi kasi ocipãla? Ka ca sungulukile oku kuata ocisimĩlo caco.

Sokolola olondaka Yesu a popia viatiamẽla ‘konjala lefengi.’ (Luka 21:11) Catete, eye ka popele hati ovitangi viaco vi ka pita onjanja yimosi kolonepa viosi violuali. Pole, ovitangi viaco vi pondola oku pita ‘kolonepa via litepa’ violuali. Omo liaco, ka tu ka lavoki okuti, ovitangi viaco vi ka pita kolonepa viosi violuali vonjanja yimosi. Cavali, Yesu noke yoku tukula onjala, wa lungula olondonge viaye oco vi yuvule oku sakalala calua loku lia, kuenje wa popia hati: ‘Lilavi ene muẽle sanga ovitima viene vi tekela koku lia calua.’ (Luka 21:34) Omo liaco, Akristão ka va kevelela oku mola ovina viosi via kongela vondimbukiso yoloneke via sulako. Yesu wa popia hati: “Eci vu  mola ovina evi okuti vi kasi loku [tẽlisiwa,] limbuki okuti Usoma wa Suku u kasi ocipepi.” (Luka 21:31) Koloneke vilo, ovingungu viasapulo, vi tu kuatisa oku limbuka ovina via kongela vondimbukiso yoloneke via sulako. Ndaño okuti pamue ovina viaco ka vi piti pocitumãlo tu sangiwa, tu sukila oku lavulula.

Ivalukavo okuti, Yehova wa sokiya ale ‘eteke lowola’ ohali ya piãla yi ka fetika. (Mat. 24:36) Omo liaco, ka kuli cimue ci ka tateka eteke liesulilo lioluali lulo.

Yesu wa lungula Akristão vosi hati: “Liangiliyi.” (Mat. 24:44) Tu sukila oku liangiliya otembo yosi. Ocili okuti, oloneke viosi ka tua siatele oku linga ovopange atiamẽla kefendelo lietu. Handi vali, lomue pokati ketu, wa kũlĩha eci a ka linga eteke ohali ya piãla yi ka fetika. Citava okuti, vepuluvi liaco, vamue va ka kala kovapia, ale va ka sangiwa okuti va kasi oku linga upange wo vonjo. (Mat. 24:40, 41) Nye tu pondola oku linga ci lekisa okuti tua liangiliya?

Kũlĩhĩsa ulandu wa manji Emmanuel lukãi waye Victorine va sangiwa vo Afrika, okuti va kuete omãla epandu vakãi. Kimbo va kasi, ka va la mola ovina viosi via kongela vondimbukiso yoloneke via sulako. Omo liaco, va nõlapo oku sapela ovina viespiritu oloneke viosi oco vi va kuatise oku liangiliya. Manji Emmunuel wa lombolola hati: “Ka ca lelukile oku sanga otembo ya sunguluka oco tu linge ovina viosi. Kuenje, tua nõlapo oku linga efendelo lietu liepata vokuenda kuakukutu akũi atatu oku upisa kowola yepandu komẽle. Noke yoku konomuisa ocisonehua ceteke, tu pongiya ovinimbu vimue valivulu tu ka lilongisa kohongele vokuenda kuosemana.” Anga hẽ esokiyo liaco lia va kuatisa oku lavulula? Ocili okuti, lia va kuatisa calua! Momo, manji Emmanuel o kuete esumũlũho lioku kala usongui wocisoko cakulu vekongelo. Ukãi waye Victorine, wa siata oku litumbika kupange wakundi va sokamo. Eye wa kuatisa omanu valua oku kũlĩha ocipango ca Yehova. Handi vali, omãla vavo va kasi oku kula ciwa kespiritu.

Yesu wa tu lungula hati: “Lunguki, lavululi.” (Mar. 13:33) Omo liaco, ku ka ecelele okuti, ovitalukilo vi tepulula ombili yove yoku lavulula kespiritu. Kapako olonumbi vi sangiwa valivulu a sandekiwa lukuenje wa lunguka, kuenda alungulo tua siata oku yeva kolohongele ndeci manji Arielle a linga. Oloneke viosi, linga ovina vimue vi eca uvangi wokuti, o kasi oku ‘lavulula,’ ndeci epata lia manji Emmanuel lia linga.

[Etosi pombuelo yamẽla]

[Elitalatu kemẽla 4]

Oku sapela ovina viespiritu ca kuatisa manji Emmanuel kumue lepata liaye ‘oku liangiliya’