‘Oku Lembeleka Vana Va Sumua’

‘Yehova wa mbuavekela oku lembeleka vosi va sumua.’​—ISA. 61:1, 2.

1. Ocina cipi Yesu a lingila omanu vana va sumua, kuenda momo lie?

 YESU KRISTU wa popia hati: “Okulia kuange oku linga ocipango cu wa numa kuenda oku suisapo upange waye.” (Yoa. 4:34) Yesu poku tẽlisa upange a tambuile, wa lekisa ovituwa via velapo via Isiaye, Yehova Suku. Cimue pokati kovituwa viaco, ocisola cina Yehova a kuetele omanu. (1 Yoa. 4:7-10) Upostolo Paulu, wa limbuka ocisola caco poku tukula Yehova Suku hati, “ukuakulembeleka.” (2 Va Kor. 1:3) Yesu wa lekisa ocisola komanu, eci a linga ovina uprofeto Isaya a tukuile. (Tanga Isaya 61:1, 2.) Yesu wa tangela ocitumasuku eci vosunangonga yo ko Nasara kuenda wa tiamisila olondaka viaco kokuaye. (Luka 4:16-21) Vokuenda kupange waye woku kunda, wa lembeleka omanu va sumua, kuenda wa va ĩha ombembua yo vutima.

2, 3. Momo lie Akristão vosi va sukilila oku kuama ongangu ya Kristu yoku lembeleka omanu?

² Akristão vosi, va sukila oku kuama ongangu ya Yesu poku lembeleka vana va sumua. (1 Va Kor. 11:1) Paulu wa popia hati: “Likolisi pokati loku likuatisa.” Omo okuti ‘koloneke vilo via sulako’ omanu va siata oku liyaka lovitangi vialua, tu sukila oku likolisa pokati. (1 Va Tes. 5:11) Oloneke viosi mulo voluali, vakuotima wa sunguluka, va siata oku yeva olondaka vi va nenela esumuo, kuenda oku mola ovilinga vi koka ohali.

³ Embimbiliya li popia hati, koloneke vilo via sulako “omanu va linga vakuakulisola, vakuakusola olombongo, [vakuakulipanda], vakueyengu, vakuakatombangunja, haivo va siñala olonjali viavo, vakualutukãi, ka va kuete efendelo, ka va kuete ocikembe la vangadiavo. Va linga vakuamanya, vakualundi, haivo ka va tẽla oku likandangiya, va linga olongangala, ka va sole eci ciwa, haivo olomakuli, vakuacipango, vakuepela, vakuakusola ca lua esanju, Suku ci sule.” Ovituwa viaco, via livokiya calua koloneke vilo, momo ‘omanu vãvi lolohembi va kasi oku amamako oku linga eci cĩvi.’​—2 Tim. 3:2-4, 13.

4. Ovina vipi tua siata oku mola voluali koloneke vilo?

⁴ Ovina via tukuiwa ndeti ka vi tu komõhisa, momo Ondaka ya Suku yi lekisa okuti, ‘oluali luosi lu kasi peka liukuevĩho.’ (1 Yoa. 5:19) Ondaka ‘oluali luosi’ ya tukuiwa vocinimbu eci, yi lomboloka ovisoko viopulitika, viatavo, violomĩlu, kuenda ovingungu viosi via siata oku sandeka asapulo uhembi. Eli olio esunga lieci Satana Eliapu a tukuiwila hati, ‘ombiali yoluali lulo, haeye osuku yaluo.’ (Yoa. 14:30; 2 Va Kor. 4:4) Evĩho voluali lia li vokiya, momo Satana o kuete onyeño yalua. Eye wa kũlĩha okuti, kuo kambela lika otembo yitito, ndopo o nyõliwa la Yehova. (Esit. 12:12) Tu lembelekiwa calua momo, Yehova Suku, ka ka ecelela okuti Satana kumue loluali luaye va amamako oku linga evĩho. Omo liaco, usuanji wa lingiwa la Satana watiamẽla komoko yoku viala, ka u ka kalako vali!​—Efet. ocip. 3; Yovi ocip. 2.

Olondaka Viwa vi Kasi Oku Kundiwila Voluali Luosi

5. Koloneke vilo via sulako, ocitumasuku catiamẽla kupange woku kunda ci kasi oku tẽlisiwa ndati?

⁵ Olondaka via Yesu vi kasi oku tẽlisiwa koloneke vilo viovitangi. Eye wa popele hati: “Ondaka eyi yiwa yusoma yi kundilua kuoha koluali, ha yi lingi uvangi kolofeka viosi, oco esulilo liya noke.” (Mat. 24:14) Upange woku kunda olondaka viwa Viusoma wa Suku wa livokiya calua voluali okuti, kosimbu ci sule. Koloneke vilo, ci pitãhala 7.500.000, Kolombangi Via Yehova vi sangiwa kueci ci pitãhala 107.000 kakongelo, vi kasi oku kunda Usoma wa Suku una Yesu a enda oku tukula kupange woku kunda loku longisa omanu. (Mat. 4:17) Upange waco, wa siata oku lembeleka omanu vana va sumua. Omo liaco, vokuenda kuanyamo avali a sulako, ci soka 570.601 komanu, va papatisiwa, kuenje va linga Olombangi Via Yehova!

6. O tenda ndati upange woku kunda u kasi oku lingiwa kolonepa viosi violuali?

⁶ Upange woku kunda u kasi oku lingiwa Lolombangi Via Yehova kolonepa viosi  violuali, wa siata oku limbukiwa calua poku sandekiwa kualivulu a pongoluiwa kueci ci pitahãla 500 kalimi. Lomue kosimbu wa lingile upange ndowu u kasi oku lingiwa koloneke vilo Lolombangi Via Yehova! Evokiyo lia siata oku muiwa vocisoko ca Yehova palo posi, li komõhisa calua. Nda ka tua songuiwile lunene wespiritu sandu lia Suku, nda ka tu tẽla oku linga upange waco momo oluali lulo, lu kasi povaka a Satana. Ocili okuti, olondaka viwa Viusoma vi kasi oku kundiwila kolonepa viosi violuali, ka vi lembeleka lika afendeli va Yehova, pole, vi lembelekavo omanu vana va sumua okuti, va tava kesapulo liaco.

Tu Lembeleki Vamanji

7. (a) Momo lie ka tu sukilila oku lavoka okuti Yehova o mãlako ovina vi tu kokela esumuo? (b) Tua kũlĩha ndati okuti tu pondola oku pandikisa kelambalalo kuenda kovitangi vikuavo?

⁷ Omo okuti tu kasi voluali lulo lue yuka evĩho lohali, citava okuti tu pitavo lovina vi tu nenela esumuo. Pole, ka tu ka lavoki okuti Suku o mãlako ovina viosi via siata oku tu kokela esumuo lohali, osimbu handi ka nyõlele oluali lulo. Osimbu handi eteke liaco ka lieyile, elambalalo li pondola oku seteka ekolelo lietu, pole, tu sukila oku pandikisa loku amamako oku teyuila uviali wa Yehova. (2 Tim. 3:12) Ocili okuti, Yehova wa siata oku tu lembeleka ndeci a linga Lakristão olombuavekua vo ko Tesalonike, poku va kuatisa oku pandikisa kelambalalo lo kovitangi vina via seteka ekolelo liavo.​—Tanga 2 Va Tesalonike 1:3-5.

8. Ovisonehua vi lekisa ndati okuti Yehova wa siata oku lembeleka afendeli vaye?

⁸ Yehova wa siata oku lembeleka afendeli vaye tunde kosimbu. Umue pokati kafendeli vaco, uprofeto Eliya. Eliya wa kuata usumba walua, eci a lambalaliwa la Nasoma Isievele una wa kala ongangala, kuenje, osimbu Eliya a kala oku tila wa popia hati, nda nda file nda hĩse. Yehova ko vetelele evelo, pole, wo lembeleka, loku u kolisa oco amameko lupange waye. (1 Olos. 19:1-21) Ovolandu a pita Lakristão kocita catete, a tu kuatisa oku limbuka okuti, Yehova wa siata oku lembeleka afendeli vaye. Tu tanga olondaka viaco ndoco: ‘Ekongelo lio ko Yudea yosi, ko Galilea, lo ko Samaria, lia kuata ombembua kuenda lia amamako oku pamisiwa.’ Omo okuti ekongelo ‘lia endela vonjila yoku sumbila Yehova, loku lembelekiwa lekuatiso liespiritu sandu, lia li vokiya calua.’ (Ovil. 9:31) Tu eca olopandu omo ‘lioku kolisiwa lespiritu sandu’!

9. Momo lie tu sukilila oku kuama ongangu ya Yesu yoku lembeleka omanu?

⁹ Etu Tuakristão, tu lembelekiwa lovina tua siata oku lilongisa viatiamẽla ku Yesu Kristu, kuenda poku kuama ongangu yaye. Yesu wa popia hati: “Enjui kokuange, vosi wa sovoloki kuenda wa lemiwi kuenje ndu kavuluisi. Likapi okanga yange kuenda lilongisi kokuange, momo ndonjuka, haime nda liketisa vutima, oco vu sanga ekavuluko vovitima viene, momo okanga yange ya sunguluka, locitele cange ca leluka.” (Mat. 11:28-30) Tu pamisiwa calua poku lilongisa ndomo Yesu a enda oku tata omanu, kuenje, oku kuama ongangu yaye ci tu kuatisa oku tepulula esumuo tua siata oku liyaka lalio.

10, 11. Velie va siata oku eca elembeleko ku vamanji?

¹⁰ Tua siata oku lembelekiwavo la vamanji. Tu konomuisi ndomo akulu vekongelo va siata oku kuatisa vana va liyaka lovitangi vi nena esumuo. Ndonge Tiago wa soneha ndoco: ‘Pokati kene, pali hẽ umue o vela kespiritu? A kovonge akulu vekongelo kuenje vo likutilile.’ Onima yipi yi tunda kekuatiso lia siata oku eciwa lakulu vekongelo? ‘Ohutililo yekolelo yi popela u o vela, kuenje nda wa linga ekandu, Yehova u pindula, kuenda u wecela.’ (Tia. 5:14, 15) Vamanji vakuavo va pondolavo oku tu lembeleka.

 ¹¹ Olonjanja vimue, eci vamanji akãi va liyaka lovitangi, ci leluka vali kokuavo oku vangula la manji ukuavo ukãi. Omo liaco, vamanji akãi okuti akulu, haivo va loñoloha kespiritu, va sukila oku eca alungulo awa ku vamanji akãi amalẽhe. Pamue vamanji yaco kosimbu, va liyakele lovitangi ndevi vi kasi oku pita la vamanji akãi amalẽhe. Ocikembe lovituwa viavo viwa, vi pondola oku kuatisa calua. (Tanga Tito 2:3-5.) Akulu vekongelo la vamanji vakuavo, va sukilavo oku ‘kolisa vana va leñela’ va kasi pokati ketu. (1 Va Tes. 5:14, 15) Tu ivaluki okuti, Suku ‘o tu lembeleka kohali yetu yosi, okuti tu tẽlavo oku lembeleka vana va tala ohali.’​—2 Va Kor. 1:4.

12. Momo lie oku endaenda kolohongele ku kuetele esilivilo?

¹² Onjila yimue ya velapo yoku tambula elembeleko, oku endaenda kolohongele kuna ku eciwa olonumbi Viembimbiliya. Kũlĩhĩsa ndomo Yuda la Siluano, ‘va lungula vamanji lolondaka vialua, loku va kolisa.’ (Ovil. 15:32) Tu sukila oku kolisa vamanji, poku sapela lavo ovina viwa eci handi ohongele ka ya fetikile kuenda kesulilo. Olonjanja vimue, eci tu liyaka locitangi ci nena esumuo, ka tu ka yuvuli oku kala la vamanji, momo ocituwa caco, ka ci tu kuatisa. (Olosap. 18:1) Omo liaco, tu pokoli kelungulo liupostolo Paulu wa popia hati: “Tu sokololi ndomo tu tẽla oku livetiya pokati oku kala locisola lovilinga viwa. Ka tu ka liweki oku ongoloka ndomo vamue va lingainga, puãi tu likuatisi pokati lalungulo, ca piãla vali omo vu lete okuti eteke liaco li kasi ocipepi.”​—Va Hev. 10:24, 25.

Tu Lembelekiwa Londaka ya Suku

13, 14. Lombolola ndomo Ovisonehua vi tu lembeleka.

¹³ Ci kale okuti tua papatisiwa osimbu, ale ndopo tua fetika oku lilongisa ovina viatiamẽla ku Suku kuenda kocipango caye, tua siata oku lembelekiwa lovina via sonehiwa Vembimbiliya. Paulu wa soneha ndoco: “Cosi ca sonehiwa kosiahũlu ca sonehiwila oku tu longisa okuti, epandi kuenda oku kolisiwa lovisonehua ku tu kokela elavoko.” (Va Rom. 15:4) Ovisonehua vi Kola, vi pondola oku tu lembeleka okuti, ‘tu limalehẽla oku linga ovopange osi awa.’ (2 Tim. 3:16, 17) Oku kũlĩha ocili catiamẽla kocipango ca Suku, loku kuata elavoko liovina vi keya kovaso yoloneke, ci tu lembeleka calua. Omo liaco, tu kuati ocituwa coku lilongisa Ondaka ya Suku, kuenda alivulu a sandekiwa lukuenje wa lunguka, okuti, mu sangiwa ovina vi tu lembeleka, haivio vi tu kuatisa calua.

¹⁴ Yesu wa tu sila ongangu yiwa yoku tanga Ovisonehua, poku longisa omanu loku  va lembeleka. Yesu noke yepinduko liaye, wa moleha kolondonge viaye vivali kuenje, wa vi ‘situluila Ovisonehua.’ Ovina a va sapuila, via va lembeleka calua. (Luka 24:32) Upostolo Paulu, wa kuama ongangu yiwa ya Yesu, poku ‘sapela lomanu catiamẽla Kovisonehua.’ Eci a endele ko Berea, omanu va ‘yeva ondaka lombili kuenje, va enda oku tanga Ovisonehua oloneke viosi, loku kũlĩhĩsa nda ovina viaco viocili, nda ndati.’ (Ovil. 17:2, 10, 11) Oku tanga Embimbiliya eteke leteke kumue lalivulu a sandekiwa lukuenje wa lunguka, ci tu lembeleka, kuenda ci tu nenela elavoko kotembo yilo yovitangi!

Ovina Vikuavo vi tu Kuatisa Oku Lembeleka Vakuetu

15, 16. Ovina vipi tu pondola oku linga oco tu kuatise vamanji loku va lembeleka?

¹⁵ Tu pondola oku lembeleka vamanji, poku va lingila ovina vialua. Citava okuti, tu kuatisa vamanji va kuka ale vava va vela, poku va landela ovina va sukila. Tu pondola oku lingila vakuetu ovopange alua o vonjo a lekisa okuti, tua va kapako. (Va Fil. 2:4) Citava okuti tu pandiya vamanjetu omo liovituwa viavo viwa ndeci: Ocisola va siata oku lekisa, ocituwa cavo coku eca olombanjaile, epandi kuenda ekolelo liavo.

¹⁶ Valikolisilo etu oku lembeleka vana va kuka, mua kongela oku va pasuisa kolonjo viavo, oku va yevelela lutate eci va tu sapuila ovolandu a pita komuenyo wavo, kuenda asumũlũho va tambula kupange wa Yehova. Oku linga ovina viaco, ci tu lembeleka calua! Eci tu pasuisa vamanji, citava okuti tu va tangela Embimbiliya, kuenda alivulu a sandekiwa lukuenje wa lunguka. Pamue tu va tangela ocipama tu ka lilongisa Vutala Wondavululi vosemana yaco, ale ovinimbu via sokiyiwila Kelilongiso Liembimbiliya vekongelo. Tu pondolavo oku tala kumue lavo Olovideo via sandekiwa lukuenje wa lunguka. Tu sukila oku va tangela ovolandu amue a vetiya a sangiwa valivulu a sandekiwa lukuenje wa lunguka.

17, 18. Omo okuti tuafendeli va Yehova, momo lie tu tavela okuti eye o ka amamako oku tu kuatisa loku tu lembeleka?

¹⁷ Nda tua limbuka okuti manji umue o sukila elembeleko, tu pondola oku tukula ovina viaco volohutililo vietu pokolika. (Va Rom. 15:30; Va Kol. 4:12) Osimbu tu amamako oku liyaka lovitangi, tu vetiyiwa oku kolisa vakuetu, kuenje, tu kuata ovisimĩlo ndevi viukualosamo wa imba ocisungo hati: ‘Tuika ku Yehova ocitele cove kuenje eye o ku kuatisa. Lalimue eteke a tava okuti ukuesunga o sengiwa.’ (Osa. 55:22) Yehova wa siata oku lembeleka afendeli vaye vakuekolelo loku va kuatisa.

¹⁸ Kosimbu Suku wa sapuila afendeli vaye hati: ‘Ame,​—ame nda siata oku lembeleka omanu vange.’ (Isa. 51:12) Yehova o ka tu kuatisavo kuenda o ka sumũlũisa ovilinga lolondaka viwa tua siata oku lembeleka lavio vakuetu. Ci kale okuti tu kuete elavoko lioku enda kilu, ale lioku kala palo posi, omunu lomunu pokati ketu, o lembelekiwa lolondaka Paulu a sapuila Akristão olombuavekua hati: “Ñala yetu Yesu Kristu eye muẽle, kuenda Suku Isietu, u wa tu sola, haeye, mekonda liocali caye, wa tu ĩha elembeleko ka li pui lelavoko liwa, va [lembeleke] ovitima viene, loku vi ikisa upange wosi uwa londaka yosi yiwa.”​—2 Va Tes. 2:16, 17.

O ci Ivaluka?

• Upange woku kunda u lembeleka ndati vana va sumua?

• Ovina vipi tu sukila oku linga oco tu lembeleke vakuetu?

• Ovisonehua vi lekisa ndati okuti Yehova wa siata oku lembeleka afendeli vaye?

[Apulilo Elilongiso]

 [Elitalatu kemẽla 28]

Ove hẽ wa siata oku lembeleka vana va sumua?

[Elitalatu kemẽla 30]

Ci kale amalẽhe ale akulu, vosi yetu tu pondola oku livetiya pokati