“Ndaño Nda Lemãla, Si Ka Amamako Lulema Wange!”

Ulandu wa Lomboluiwa la Manji Sara van der Monde

Olonjanja vimue, omanu va enda oku ndi sapuila ndoco: “A Sara, oku yola kuove, kua posoka calua. Momo lie wa sanjukila otembo yosi?” Ndaenda oku va tambulula okuti, ndi kuete elavoko lia velapo. Etambululo liange lilomboloka ndoco: “Ndaño okuti cilo nda lemãla, pole, si ka amamako lulema waco.”

N DA citiwa kunyamo wo 1974, volupale luo Paris, kofeka yo França. Eci nda citiwa nda kuata ovitangi vialua, kuenje, olondotolo via sapuila olonjali viange hati, ndi kuete uvei vowoño. Uvei waco, wa ndi kokela ociteyateya, kuenda wa ndi tateka oku vangula ciwa. Noke nda kuatiwavo luvei wocinonya, kuenda wapuvi.

Eci nda kuata anyamo avali, olonjali viange via ilukila kolupale luo Melbourne, kofeka yo Australia. Noke yanyamo avali, olonjali viange, via enda oku linga lame ovongende alua. Ovongende aco, a ndi kuatisa oku sokolola ukamba wange la Suku. Omo okuti ina yange wa kala Ombangi ya Yehova, wa endaenda lame kolohongele kuenje, nda lilongisa okuti, Suku o ndi sole kuenda o ndi tata. Ocikembe Suku a lekisa ku ina yange locisola caye, ca ndi kuatisa oku tula utima ndaño okuti tua pita lapongoloko amue komuenyo.

Ina yange wa ndi longisavo oku likutilila ku Yehova. Cilo, ca ndi leluka vali oku likutilila okuti, oku vangula ci sule. Eci ndi likutilila, si sakalala lolondaka, pole, ndi kapa ovisimĩlo vutima wange. Ndaño omanu ka va pondola oku kuata elomboloko liolondaka viange, oku lilongisa okuti Yehova wa kũlĩha ekalo liange, ci ndi lembeleka calua.​—Osa. 65:2.

Nda Liyaka Lovitangi Vialua

Eci nda tẽlisa anyamo atãlo, nda fetika oku enda lolotamango, pole, ka ca lelukile oku ci linga. Nda enda oku yengenga calua! Kuenje, eci nda tẽlisa 11 kanyamo, sia ponduile vali oku enda. Noke, sia tẽlele vali oku votoka komangu yalola, kuenda nda kapiwile okamakina kamue vovoko ka talavaya lolusu oco ka ndi kuatisa oku endisa omangu loku linga ovina vikuavo.

Olonjanja vimue, ulema wange wa siata oku ndi sumuisa calua. Pole, vepuluvi liaco, ndi ivaluka eci olonjali viange via enda oku ndi sapuila hati: “Ku ka sakalale lovina ku tẽla oku linga. Pole, tiamisila lika utima wove kovina o tẽla oku linga.” Olondaka viaco, via ndi kuatisa oku linga ovongende lokavalu, lowato, kuenda oku endisa ekãlu vetapalo limue li kuete ovikulungu. Ndi sole calua uloño wange woku soneha oviluvialuvia, oku tonga uwalo, oku tuta, kuenda oku panga ovikuata viotuma.

Omo liulema wange, omanu vamue va simĩle okuti, si kuete olondunge vi ndi kuatisa  oku vumba Suku, ndaño ceci ndi linga ukulu. Eci nda tẽlisa anyamo 18, ukãi umue ulongisi kosikola nda kala oku tangela, wa ndi vetiya oku “tunda” konjo yolonjali viange oco si ka tiamẽle ketavo lia ina yange. Noke wa likuminya oku ndi kuatisa oco ndi sange onjo yimue. Pole, ndo sapuila lutõi siti, lalimue eteke ndi ka liwekapo oku vumba Suku, kuenda ndi tunda lika konjo yolonjali viange eci ndi linga ukulu.

Noke yocitangi caco, nda papatisiwa. Eci pa pita anyamo avali, nda ilukila vohondo yimue yitito ya kala vosapalalo. Nda sanjukile calua omo sia sukilile vali ekuatiso liolonjali viange.

Epingilo Limue Sia Lavokaile

Vokuenda kuotembo, nda pita lovina vialua via seteka ekolelo liange. Eteke limue, ukuenje umue ocilema tua kala oku tangela kosikola yimuamue, wa ndi sapuila hati, o yongola oku ndi kuela. Tete, olondaka viaco via ndi sanjuisa. Momo nda yonguilevo oku kuela ndafeko vakuavo. Ocili okuti, oku kuela lulema ka ci nena esanju. Handi vali, ukuenje waco Hambangiko ya Yehova. Ovimãho vietu viosi, ndeci: Ekolelo, kuenda ovopange akuavo via litepele. Nda nda tavele oku kuela ukuenje waco, nda tua kala ndati? Nda nõlelepo oku pokola konumbi ya Suku yoku kueliwa lika lomunu umue okuti Ombangi ya Yehova. (1 Va Kor. 7:39) Omo liaco, sia tavele kepingilo liukuenje waco.

Kaliye, nda limbuka okuti, onjila nda nõla ya sunguluka. Omo liaco, nda kolela kolohuminyo via Suku, vioku nena esanju voluali luokaliye palo posi. (Osa. 145:16; 2 Pet. 3:13) Osimbu handi olohuminyo viaco ka via tẽlisiwile, ndi pandikisa loku kolela ku Yehova, kuenda ndi sanjukila ekalo liange liulema.

Ndi lavoka lesanju lialua eteke ndi ka votoka lolupesi komangu yalola. Kuenje, ndi ka popia ndoco: “Nda lemalele, pole cilo, nda kaya!”