O ci Ivaluka?

Ove hẽ wa sola oku tanga ovipama Viutala Wondavululi via sandekiwa volosãi via pita? Nda wa vi sola, tambulula apulilo a kuãimo:

• Helie o sukila oku longisa omãla catiamẽla ku Suku?

Ndaño okuti omanu vakuavo va pondola oku kuatisa isia la ina, pole, olonjali ovio vi kuete ocikele coku longisa omãla vavo ovina viatimẽla ku Suku, kuenda ocipango caye lepata, ndomo li songuiwa.—Mbalavipembe-Cembanima wo 2011, kemẽla 7.

• Ondaka Suku a sapuila va Lewi yokuti: ‘Ame ndinepa yene,’ yi lomboloka nye?

Apata osi a va Isareli a kuatele ocipiñalo vofeka, pole, va Lewi ka va kuatele ocipiñalo, momo Yehova eye wa kala “onepa” yavo. (Ate. 18:20) Va Lewi ka va kuatele ocipiñalo vofeka, pole, va tambuile ocikele cupange ulikasi. Omo liaco, Yehova wa va ĩhile ovina viosi va sukilile. Koloneke vilo, vana va kuete esumũlũho lioku talavaya calua kupange Wusoma, va kolela okuti, va pondola oku kuata ovina viosi va sukila.​—15/9, kamẽla 7-8, 13.

• Momo lie oku lekisa esumbilo kohueli yove ci kuetele esilivilo?

Esumbilo olio li kuatisa oku kuata esanju volohuela, loku kala otembo ka yi pui. Ocituwa caco, ci kuete esilivilo lia velapo.— Mbalavipembe-Cembanima wo 2011, kemẽla 12.

• Nye ci kuatisa Ukristão oku limbuka nda omapalo yimue ya sunguluka ale ka ya sungulukile?

Oco tu kũlĩhe nda omapalo yimue ya sunguluka, kuenda yi sanjuisa Suku, tu sukila oku lipula ndoco: Nye ca kongela vomapalo yaco? Vepuluvi lipi yi lingiwa? Velie va ka kala pomapalo yaco?—15/10, kamẽla 9-12.

• Anga hẽ o sukila oku feta elisimo?

Eci Yesu vo pula nda ciwa kovaso a Suku oku feta elisimu kombiali yo ko Roma, eye wa tambulula hati: “Evi via Kaisare vi eci ku Kaisare levi via Suku vi eci ku Suku. Kuenje vo komoha ca lua.” (Mark. 12:13-17) Olombiali okuti vi lomboloka “Kaisare,” ovio vi panga olombongo, kuenda vi tumbika ovihandeleko vioku lekisa esilivilo kolombongo viaco. Omo liaco, kovaso a Suku, olombiali viaco, vi kuete omoko yoku pinga olombongo viaco poku kisika omanu oku feta elisimu.— Mbalavipembe-Cembanima wo 2011, kemẽla 14, 15.

• Ulandu u sangiwa kelivulu Liolosapo 7:6-23 u tu kuatisa ndati oku yuvula oku tala valivulu, vo televisãu, ale vo internet, omanu va kasi epolõla haivo va linga ukahonga?

Ulandu owu u tukula ukuenje umue wa pita vokololo ocipepi lonjo yukãi umue ocipuepue. Ukãi waco wo yonja. Koloneke vilo, tu sukila oku yuvula oku tala vo internet alitalatu omanu okuti, a vetiya oloñeyi viukahonga. Omo liaco, osimbu ka tua fetikile oku tala ovina viaco, tu sukila oku sandiliya ekuatiso lia Suku vohutililo.—15/11, kamẽla 9-10.

• O pondola ndati oku limbuka efendelo liocili?

Afendeli vocili, va sumbila Embimbiliya okuti Ondaka ya Suku. Ovo, va likolisilako oku pokola kolonumbi viaco. Etavo liocili, lia litepa letavo li songuiwa lovisimĩlo viomanu. Afendeli vocili, ka va kundi ocina cimue, kuenje va linga cikuavo.—Mbalavipembe-Cembanima wo 2011, kemẽla 16, 17.

• Anga hẽ Suku wa velisapo epata limue liomanu okuti likuavo ci sule?

Sio, hacoko a siata oku linga. Momo, Embimbiliya li popia hati: “Suku ka kuete ocame, puãi, volofeka viosi, wosi u sumbila loku linga esunga, u sungulukila.”—Ovil. 10:34, 35. Mbalavipembe-Cembanima wo 2011, kemẽla 26.