Oku Songuiwa Lespiritu Lia Suku Kocita Catete Kuenda Koloneke Vilo
Oku Songuiwa Lespiritu Lia Suku Kocita Catete Kuenda Koloneke Vilo
“Olongavelo viaco viosi via eciwa lespiritu limuamue.”—1 VA KOR. 12:11.
1. Ovina vipi tu konomuisa vocipama cilo?
OKU ivaluka ovina via pita keteke lio Pendekoste kunyamo wa 33, ci nena esanju lialua! (Ovil. 2:1-4) Keteke liaco, kua pita epongoloko limue linene, momo Suku wa fetika oku songuila afendeli vaye lekuatiso liespiritu sandu. Vocipama ca pita, tua konomuisa ndomo espiritu sandu lia kuatisa omanu vakuekolelo kosimbu, oco va yule ovitangi poku tẽlisa upange wavo. Ekuatiso lia eciwa lespiritu sandu kafendeli va Suku kosimbu, lia litepa ndati leli Akristão vo kocita catete va tambula? Akristão vo koloneke vilo, va siata oku kuatisiwa ndati lespiritu lia Suku? Tu konomuisi ulandu waco.
“Tala, Ndupika wa Yehova”!
2. Maria wa mola ndati unene wespiritu sandu?
2 Eci espiritu sandu lia wila vohondo yosapalalo ko Yerusalãi, Maria opo a kala. (Ovil. 1:13, 14) Vokuenda kuakũi atatu kanyamo, Maria wa mola ndomo Yehova a linga ovina vi komõhisa lekuatiso liespiritu sandu volonjila via litepa. Yehova wa sondoluila omuenyo Womõlaye vimo lia Maria osimbu a kala ufeko wosombo. Omõlaco, wa citiwa lekuatiso ‘liespiritu sandu.’—Mat. 1:20.
3, 4. Ocituwa cipi Maria a lekisa, kuenda tu pondola oku kuama ndati ongangu yaye?
3 Momo lie Maria a kuatela esumũlũho limue lia velapo? Maria noke yoku lamiwa lungelo wa Yehova, wa popia hati: “Tala, ndupika wa Yehova. Ci ndingiwe ndondaka yove. Ungelo yu wo sia.” (Luka 1: 38) Maria poku popia olondaka evi, wa lekisa ocituwa ciwa cina Suku a limbukile kokuaye. Etambululo liaye li lekisa okuti, wa tavele oku linga ocipango ca Suku. Maria ka pulile ungelo ndomo a ka tendiwa lomanu eci va ka limbuka okuti wa mina, ale ndomo ukuenje waye a ka tenda ocitangi caco. Poku popia hati, ndupika wa Yehova, wa lekisa okuti, wa kolelele Ululiki waye.
4 Anga hẽ olonjanja vimue wa siata oku sima okuti, ku pondola oku tẽlisa ocikele wa tambula ku Suku? Vosi yetu tu sukila oku lipulisa ndoco: ‘Nda kolela hẽ Yehova poku tẽlisa ocipango caye? Ndi kuete hẽ ocituwa coku lieca olumue?’ Ivaluka okuti, Suku eca espiritu liaye komanu vana vo kolela lutima wosi, kuenda va limbuka okuti, eye o kuete omoko yoku viala.—Ovil. 5:32.
Petulu wa Kuatisiwa Lespiritu Sandu
5. Petulu wa mola ndati unene wespiritu sandu osimbu eteke lio Pendekoste yunyamo wa 33 N.Y.Y. ka lia pitĩlile?
5 Ko Pendekoste yunyamo wa 33, N.Y.Y., upostolo Petulu wa kuatisiwavo lespiritu lia Suku, ndeci lia kuatisa Maria. Yesu wa ecele ku Petulu, kuenda kovapostolo vakuavo, unene woku tundisa olondele. (Mar. 3:14-16) Ovisonehua ka vi lombolola ovina vialua via kongela vulandu waco, pole, Petulu wa kuatisiwa lespiritu liaco poku tẽlisa ocikundi caye. Unene wa Suku wa lekisiwavo eci Yesu a tuma Petulu oku endela kilu liovava o Kalunga ko Galilea. Kuenje, Petulu wa ci linga. (Tanga Mateo 14:25-29.) Petulu wa kolelele okuti, espiritu sandu liu kuatisa oku ci linga. Noke yotembo yimue, espiritu liaco, lia kuatisa Petulu kumue la vamanji vakuavo oku linga ovina viokaliye.
6. Nye Petulu a linga ko Pendekoste yunyamo wa 33 N.Y.Y., lekuatiso liespiritu sandu, kuenda koloneke vikuavo?
6 Kocipito co Pendekoste yunyamo wa 33 N.Y.Y., Petulu lovapostolo vakuavo va kuatisiwa lespiritu sandu oku vangula alimi a litepa a vanguiwa lomanu vana veyile ko Yerusalãi. Kuenje, Petulu wa vanguila kovaso yowiñi. (Ovil. 2:14-36) Olonjanja vimue Petulu wa kala ukuosumba, kuenda wa enda oku linga ovina vimue okuti, ka sokolola vali. Pole, wa eca uvangi lutõi ndaño lelambalalo. (Ovil. 4:18-20, 31) Espiritu lia Suku, lio kuatisa oku kuata ukũlĩhĩso wa velapo. (Ovil. 5:8, 9) Petulu wa tambuile unene woku pindula omanu.—Ovil. 9:40.
7. Alongiso api a Yesu, Petulu eya lika oku kuata elomboloko liaco noke yoku wavekiwa lespiritu sandu?
7 Osimbu ka va lingile o Pendekoste yunyamo wa 33 N.Y.Y., Petulu wa kũlĩhĩle ale ovina vialua Yesu a longisa. (Mat. 16:16, 17; Yoa. 6:68) Pole, osimbu ka va lingile o Pendekoste, ovina vimue Yesu a longisa, ka vio lombolokele ciwa. Eye ka kuatele elomboloko liokuti, Kristu wa laikele oku pinduiwa keteke liatatu kuenda, Usoma Waye u ka kala kilu. (Yoa. 20:6-10; Ovil. 1:6) Ka kuatelevo elomboloko liokuti, omanu vamue va pondola oku kala oviluvo viespiritu, oco va viale Vusoma wokilu. Kuenje, noke yoku wavekiwa lespiritu sandu loku tambula elavoko lioku enda kilu, oco lika a kuata elomboloko liovina Yesu a longisa.
8. Ukũlĩhĩso upi Akristão olombuavekua kumue ‘lolomeme vikuavo’ va kuete?
8 Osimbu olondonge ka via wavekiwile lespiritu sandu, ka via kuatele elomboloko liovina Yesu a longisa. Asonehi Vovisonehua vio Helasi, va vetiyiwa lespiritu sandu oku vangula ovina vi komõhisa viatiamẽla kocipango ca Yehova. (Va Efe. 3:8-11, 18) Koloneke vilo, Akristão olombuavekua kumue ‘lolomeme vikuavo,’ va siata oku tambuila kumosi okulia kuespiritu, loku kuata elomboloko lialongiso Embimbiliya. (Yoa. 10:16) Ove hẽ wa sanjukila oku kuata elomboloko liukũlĩhĩso Wondaka ya Suku, una u kasi oku situluiwa lekuatiso liespiritu sandu?
Paulu wa ‘Yukisua Lespiritu Sandu’
9. Upange upi Paulu a linga lekuatiso liespiritu sandu?
9 Eci pa pita unyamo umosi noke yo Pendekoste yunyamo wa 33 N.Y.Y., kua kala omunu ukuavo weya oku tambula espiritu lia Suku. Omunu waco, Saulu una weya oku tukuiwa hati, Paulu. Espiritu liaco, lia eca kokuaye uloño woku linga ovina vialua okuti, vi kasi oku tu kuatisa koloneke vilo. Upostolo Paulu wa kuatisiwa lespiritu sandu oku soneha ci soka 14 kalivulu a sangiwa Vembimbiliya. Espiritu lia Suku lio kuatisa oku kuata elomboloko lia suapo ndeli upostolo Petulu a kuata, kuenje, wa soneha ovina viatiamẽla kelavoko lioku kuata omuenyo ko pui kilu, loku tambula atimba ka a nyolẽha. Espiritu sandu lia kuatisa Paulu oku sakula olombeyi, oku tundisa olondele, kuenda oku pindula ava va fa! Ndaño okuti afendeli va Suku koloneke vilo va siata oku kuatisiwa lespiritu sandu oku linga ovina vialua, pole, ka va kuete unene woku linga ovikomo ndeci Paulu a linga.
10. Espiritu sandu lia kuatisa ndati Paulu oku kuata uloño woku vangula?
10 Omo okuti Paulu ‘weyukile espiritu sandu,’ wa lekisa utõi poku vangula locimbanda. Nguluvulu wa velapo wo ko Kupro wa yeva ombangulo yaco yosi! Kuenje, “wa tava momo wa komoha ovilongua via [Yehova].” (Ovil. 13:8-12) Paulu wa limbuka ndomo espiritu lia Suku li kuatisa omanu oco va vangule ocili catiamẽla Kembimbiliya. (Mat. 10:20) Noke, wa pinga ku vamanji vekongelo lio ko Efeso, oku u likutililako oco a kuate ‘uloño woku vangula’ lutõi.—Va Efe. 6:18-20.
11. Paulu wa songuiwa ndati lespiritu sandu?
11 Olonjanja vimue, espiritu sandu lia kuatisa Paulu oku vangula, pole, olonjanja vikuavo lio tutuiya oku vanguila povitumãlo vimue. Eci Paulu a enda oku linga ovongende kupange wumisionaliu, wa kuatisiwa lespiritu sandu. (Ovil. 13:2; tanga Ovilinga 16:6-10.) Yehova wa siata oku endisa upange woku kunda lekuatiso liespiritu sandu liaye. Afendeli vosi va Yehova vana va lekisa epokolo, va siata oku likolisilako oku kunda lutõi loku lekisa ombili, ndeci Paulu a linga. Ndaño okuti olonumbi tua siata oku tambula ka via lisokele levi vio koloneke via Paulu, tu sukila oku kolela okuti, Yehova eca espiritu liaye oco omanu vakuavitima via sunguluka va yeve ocili Condaka yaye.—Yoa. 6:44.
‘Kuli Ovopange Alua’
12-14. Espiritu sandu li kuatisa ndati afendeli va Suku lonjila yimuamue? Ci lombolola.
12 Anga hẽ ovolandu a pita Lakristão olombuavekua vo kocita catete, atiamẽla kasumũlũho a Yehova, a pondola oku pamisa Akristão vo koloneke vilo? Ocili okuti, a pamisa! Tu sokololi olondaka Paulu a sapuila Akristão va Korindo viatiamẽla kolongavelo viespiritu. Eye wa popia hati: “Kaliye kuli olongavelo viñi viñi puãi espiritu limuamue. Kuli oku talavaya kuiñi kuiñi, puãi cime umuamue. Kuli oku talavaya kuiñi kuiñi, puãi Suku umuamue o talavayisa [ovina] viosi vomanu.” (1 Va Kor. 12:4-6, 11) Espiritu sandu lia siata oku eca olongavelo via litepa kafendeli va Suku oco va tẽlise ocipango caye. Li kuatisavo ‘vakuakacunda katito’ ka Kristu kuenda ‘olomeme vikuavo.’ (Luka 12:32; Yoa. 10:16) Espiritu sandu ka lia siatele oku kuatisa omunu lomunu Vekongelo lonjila yimuamue.
13 Akulu vekongelo va siata oku nõliwa lekuatiso liespiritu sandu. (Ovil. 20:28) Pole, pokati Kakristão olombuavekua havosiko okuti, olomitavaso viekongelo. Momo lie tu popela ndoco? Momo espiritu lia Suku li kuatisa omunu lomunu vekongelo lolonjila via litepa.
14 Espiritu li vetiya Akristão olombuavekua oku kũlĩha okuti, ‘omãla vokatumba,’ kuenda li va kuatisa oku limbuka okuti, Yehova wa va ĩha espiritu ndeli Liomõlaye, lioku kuata omuenyo kilu okuti lalimue eteke va ka fa vali. (Tanga Va Roma 8:11, 15.) Espiritu lia Yehova lia kuatisa koku lulika ovina viosi vi sangiwa voluali. (Efet. 1:1-3) Lia kuatisavo Becalele oku linga upange wa velapo woku tunga otavernakulu, lia eca ku Samisone ongusu yoku linga ovina vi komõhisa, kuenda lia kuatisa Petulu oku endela kilu liovava o kalunga. Omo liaco, ka tu ka simi okuti, oku wavekiwa lespiritu lia Suku, ceca komunu ocikele cimue ca velapo. Momo, Suku eye o nõla olombuavekua.
15. Oku papatisiwa lespiritu sandu ku ka amamako otembo ka yi pui? Ci lombolola.
15 Eci handi Suku ka fetikile oku waveka omanu lespiritu liaye, ongusu yaye ya pama ya siata oku talavaya lolonjila via litepa, poku kuatisa afendeli vaye, oco va amameko oku u vumba lekolelo. Oku wavekiwa lespiritu sandu kua fetika lika ko Pendekoste yunyamo wa 33 N.Y.Y.. Oku wavekiwa kuaco ka kua pitile otembo yalua. Ocili okuti, oku papatisiwa lespiritu sandu kua imũha. Pole, espiritu sandu li kasi oku amamako oku kuatisa afendeli va Suku, oco va tẽlise ocipango caye otembo ka yi pui.
16. Nye afendeli va Suku va kasi oku linga lekuatiso liespiritu sandu?
16 Upange upi u kasi oku lingiwa kilu lieve lekuatiso liespiritu lia Yehova? Elivulu Liesituluilo 22:17, li popia hati: “Espiritu la Ndombua va linga vati, ‘Enju.’ U o yeva a linge hati, ‘Enju.’ U o kuete enyona eye, lu [o] yongola ovava omuenyo a a tambule ocali.” Koloneke vilo, Akristão va siata oku vetiyiwa lespiritu sandu, oku laleka omanu va ‘kuete enyona’ oco va nyue kovava omuenyo a eciwa ocali la Yehova. Akristão olombuavekua, ovo va kasi oku songuila upange waco. Olomeme vikuavo, vi kasi oku kuatisa kupange waco. Akristão olombuavekua kumue lolomeme vikuavo, vosi yavo va siata oku tambula espiritu sandu lonjongo yimuamue. Vosi yavo, va litumbika ku Yehova kuenje, va papatisiwila ‘vonduko ya Tate la Mõla, kuenda yespiritu sandu.’ (Mat. 28:19) Omo liaco, va sukila oku lekisa epako liespiritu lia Suku komuenyo wavo. (Va Gal. 5:22, 23) Olomeme vikuavo via siatavo oku kuatisiwa lespiritu lia Suku, ndeci ci pita lolombuavekua. Lekuatiso liaco, va likolisilako oku li yelisa kovituwa, oco va sanjuise Suku.—2 Va Kor. 7:1; Esit. 7:9, 14.
Amamako Oku Pinga Espiritu Sandu
17. Tu lekisa ndati okuti tua tambula espiritu lia Suku?
17 Ci kale okuti elavoko liove lioku enda kilu, ale lioku tambula omuenyo ko pui palo posi, Yehova oku ĩha “unene wa piãla” oco amameko lepandi loku tambula asumũlũho aye. (2 Va Kor. 4:7) Tu amamiko oku kunda olondaka viwa Viusoma ndaño loku sepuiwa lomanu. Pole, tu ivaluki okuti, ‘nda va tu yola epembe omo lionduko ya Kristu tua sumũlũha, momo espiritu liulamba, okuti espiritu lia Suku, li kasi letu.’—1 Pet. 4:14.
18, 19. Yehova oku kuatisa ndati lespiritu sandu liaye, kuenda nye wa likuminya oku linga catiamẽla kondaka yaco?
18 Suku eca ocali espiritu sandu liaye ku vana va li sandiliya lutima wosi. Espiritu liaco, li tu ĩha uloño loku vokiya onjongole yetu yoku linga eci ca velapo kupange waye. “Momo Suku o kasi loku linga upange waye vokati [ketu], kuenje . . . o tu ĩha ongusu kuenda utima woku linga ocipango caye.” Espiritu sandu li talavayela kumue lonjongole yetu yoku ‘kuata ondaka yomuenyo povaka etu, loku linga ovina vi tu nenela epopelo.’—Va Fil. 2:12, 13, 16.
19 Nda wa likolisilako lutima wove wosi, poku tẽlisa ocikele wa tambula, loku pinga espiritu sandu ku Yehova, eye o ku kuatisa. (Tia. 1:5) Nda wa ci linga, o kuata elomboloko Liondaka ya Suku, kuenda o ku kuatisa oku liyaka lovitangi, poku kunda olondaka viwa. Yesu o tu vetiya hati: “Pingi kuenje cu wihiwi, [sandiliyi] kuenda vu sanga, totoli, kuenje vo yikuluili.” Volondaka evi, mua kongela oku pinga espiritu sandu. (Luka 11:9, 13) Omo liaco, amamako oku likutilila ku Yehova ndeci afendeli vakuekolelo vo kosimbu lava vo koloneke vilo, vana va songuiwa lespiritu sandu, va linga.
O Tẽla Oku Lombolola?
• Ocituwa cipi tu sukila oku lekisa, okuti ci pondola oku tu nenela asumũlũho, ndeci Maria a linga?
• Paulu wa songuiwa ndati lespiritu lia Suku?
• Afendeli va Suku koloneke vilo va siata oku songuiwa ndati lespiritu lia Suku?
[Apulilo Elilongiso]
[Elitalatu kemẽla 24]
Espiritu sandu lia kuatisa Paulu oku yula ovituwa violuali lulo lua vĩha
[Elitalatu kemẽla 26]
Akristão olombuavekua kumue lolomeme vikuavo, va siata oku tambula espiritu sandu lonjongo yimuamue
