‘Kolisako Kuenda Kuata Utõi’
‘Kolisako Kuenda Kuata Utõi’
“Kolisako, kuata utõi . . . Yehova Suku yove o kasi kumue love.”—YEH. 1:9.
O TAMBULULA NDATI?
Kovina vipi Enoke la Noha va lekisa utõi?
Akãi vamue kosimbu va lekisa ndati ekolelo lutõi?
Ongangu yipi yutõi amalẽhe va siata oku lekisa okuti yi ku komõhisa?
1, 2. (a) Nye tu sukila oku linga poku liyaka lovitangi vieteke leteke? (b) Nye tu konomuisa vocipama cilo?
UTÕI, wa litepa lusumba, loku yokoka, kuenda oku luluma. Pamue tu sima tuti, omunu ukuotõi, yuna wa pama, haeye ka kuete ohele. Pole, tu sukila oku kuata utõi poku liyaka lovitangi vieteke leteke.
2 Omanu vamue va tukuiwa Vembimbiliya, va kuata utõi poku liyaka lovitangi. Vakuavo va kuatavo utõi, poku liyaka lovitangi ndevi afendeli va Yehova va siata oku liyaka lavio koloneke vilo. Ovolandu a tukuiwa Vembimbiliya atiamẽla komanu va kuata utõi, a tu longisa nye? Tu lekisa ndati utõi?
AFENDELI VAMUE VA KUATA UTÕI VOLUALI LUA VĨHA
3. Nye Enoke a popele catiamẽla koluali luna ka lua kũlĩhĩle Suku?
3 Osimbu Etande ka lieyile, Noha wa sukilile oku kuata utõi poku imbila uvangi Yehova kovaso yolondingaĩvi. Omunu ukuavo wa kuata utõi, Enoke, “ukuacitumbulukila cepanduvali tunde ku Adama,” momo wa imba owanji poku popia hati: “Yehova weya lolohũlũkãi vialua violosandu viaye, oco a tetuluile vosi vo tomba loku pisa vosi, kuenda ovina viosi vĩvi, lovilinga via vakuakandu kuenda olondaka via vĩha va popela vonduko yaye.” (Yuda 14, 15, NW) Enoke wa vangula ndu okuti olondaka viaco via pita ale, momo wa kũlĩhĩle okuti, vi ka tẽlisiwa. Kuenje, olondingaĩvi viosi, vieya oku kunduiwa letande!
4. Vekalo lipi Noha ‘a endaenda la Suku’?
4 Etande lia pita kunyamo wo 2370 O.Y.K., okuti, pa pitile ale ci pitahãla 650 kanyamo, tunde eci Enoke a imba owanji wuprofeto. Kotembo yaco, oco Noha a citiwa, kuenje, wa kula, noke, wa kuata epata liaye, kuenda wa tunga ocimbaluku kumue lomãla vaye. Koloneke via Noha, kua kala ovangelo vãvi va lipongolola vatimba omanu, kuenje, va kuela akãi va posoka calua, noke, va cita lavo omãla veya oku tukuiwa hati, Ovindululu. Omo okuti, evĩho lia li vokiyile calua, voluali mue yukile ungangala. (Efet. 6:1-5, 9, 11) Ndaño lekalo liaco lĩvi, pole, “Noha wa endaenda la Suku,” kuenda wa kundila omanu lutõi loku “sapula esunga.” (Tanga 2 Petulu 2:4, 5.) Koloneke vilo via sulako, tu sukilavo oku kuata utõi.
VA LEKISA EKOLELO LUTÕI
5. Mose wa lekisa ndati ekolelo lutõi?
5 Mose wa lekisa ongangu yiwa yekolelo, kuenda wa kuata utõi. (Va Hev. 11:24-27) Tunde kunyamo wo 1513-1473 O.Y.K., Suku wa nõlele Mose oco a songuile va Isareli oku tunda Kegito toke vekalasoko. Ndaño Mose wa simĩle okuti ka pondola oku tẽlisa upange waco, pole, wa tava oku u linga. (Etu. 6:12) Eye kumue la huvaye Arone, va vangula olonjanja vialua la Fareo, Soma yo Kegito, kuenda vo sapuila Afengi Ekũi Yehova eya oku yambula lao olosuku vio Kegito, oco a yovole afendeli Vaye. (Etu. kovip. 7-12) Mose wa lekisa ekolelo lutõi, momo Suku wo kuatisa oku tẽlisa upange waye, ndeci tua siata oku linga koloneke vilo.—Esin. 33:27.
6. Nda tua tualiwa kombonge oco tu sombisiwe lolombiali, nye ci tu kuatisa oku eca uvangi lutõi?
6 Tu sukilavo oku kuata utõi ndeci Mose a linga, momo Yesu wa popia hati: ‘Vu nanañainyailua kovaso olombiali lolosoma oku njimbila uvangi kokuavo kuenda ku vakualofeka. Eci vo tuali kekanga, ko ka kuati ohele, hoti: Tu popia ndati, pamue tu popia nye? Momo owola yaco eci vu popia cu wĩhiwi. Momo heneko vu ci popia, puãi espiritu lia Isiene, olio liu kuatisi oku ci popia.’ (Mat. 10:18-20) Nda tua tualiwa kombonge oco tu sombisiwe lolombiali, espiritu lia Yehova, li tu kuatisa oku lekisa esumbilo osimbu tu eca uvangi lekolelo kuenda utõi.—Tanga Luka 12:11, 12.
7. Nye ca kuatisa Yehosua oku lekisa utõi loku tẽlisa ciwa upange waye?
7 Oku lilongisa Ovihandeleko via Suku eteke leteke, ca kuatisa Yehosua, kapiñala ka Mose, oku pamisa ekolelo liaye kuenda oku lekisa utõi. Kunyamo wo 1473, O.Y.K., va Isareli va tambula Ofeka Yohuminyo. Suku wa vetiya Yehosua hati: “Kolisako, kuata utõi.” Yehosua wa sukilile oku kuata olondunge oco a tẽlise ciwa Ocihandeleko caco. Omo liaco, wa handelekiwa ndoco: “Ku ka pambukile kondio pamue kepĩli,. . . momo Yehova Suku yove o kasi kumue love kuosi wenda.” (Yeh. 1:7-9) Olondaka evi, via pamisa calua Yehosua! Eye, wa tambula Ofeka Yohuminyo kunyamo wo 1467 O.Y.K., okuti, wa ci linga lika vokuenda kuanyamo epandu, momo Suku wa kala laye.
AKÃI VAKUOTÕI
8. Ekolelo lutõi Rahava a lekisa, vi tu longisa nye?
8 Tunde kosimbu, akãi valua okuti afendeli va Yehova, va siata oku kuata utõi. Umue pokati kavo Rahava wo ko Yeriko, una wa kala ocipuepue okuti, weya oku lekisa ekolelo ku Suku, kuenda lutõi walua, wa salamisa olondavululi vivali via tumiwile la Yehosua, kuenje, wa kemba akuenje velombe lia soma. Eci va Isareli va kundula o Yeriko, eye kumue lepata liaye, va puluka. Rahava wa siapo ocituwa caye cĩvi, noke, wa fetika oku fendela Yehova, kuenje, omo liekolelo liaye, wa linga kukululu ya Mesiya. (Yeh. 2:1-6; 6:22, 23; Mat. 1:1, 5) Ekolelo lutõi a kuata, vio nenela asumũlũho alua!
9. Devora, la Baraka, kumue la Yaele va lekisa ndati utõi?
9 Noke yolofa via Yehosua kunyamo wo 1450 O.Y.K., olonganji, ovio via kala oku songuila va Isareli. Kotembo yaco, Yavini Soma ya va Kanana, wa liyaka la va Isareli vokuenda kueci ci soka 20 kanyamo, kuenje, Suku wa tumĩle uprofeto Devora, oku vetiya Onganji Baraka oco a linge uyaki. Noke Baraka wongoluila Komunda Tavore ci soka 10.000 kalume, oco va liyake lolohoka via Yavini, vina via songuiwa la Sisera, okuti, via kala vondamba yolui Kisone kumue leci ci soka 900 kakãlu uyaki. Eci va Isareli va pitĩla vetapi, vocipikipiki, Suku wa kokela olohoka via va Kanana ovitangi okuti, akãlu avo a tatekiwa oku enda. Baraka wa yula kuenje, “olohoka viosi via Sisera via kupuka lomẽla wosipata.” Eci Sisera a tila, wa iñila vombalaka ya Yaele, pole, osimbu a kala oku pekela, Yaele wo ponda. Olondaka Devora a sapuila Baraka, viokuti, ‘u o muisa ekemãlo’ leyulo, ukãi o tukuiwa hati Yaele, via tẽlisiwa. Omo okuti, Devora, la Baraka kumue la Yaele va lekisa utõi, ofeka yo Isareli ‘ya kuata ombembua vokuenda kuakũi akuãla kanyamo.’ (Olong. 4:1-9, 14-22; 5:20, 21, 31) Koloneke vilo, kulivo alume lakãi valua va siata oku lekisa ekolelo lutõi.
OLONDAKA VIETU VI VETIYA VAKUETU OKU KUATA UTÕI
10. Momo lie tu popela tuti olondaka vietu vi pondola oku vetiya vakuetu oku kuata utõi?
10 Olondaka vietu, vi pondola oku vetiya afendeli va Yehova oku kuata utõi. Kunyamo wo 1100, O.Y.K., Soma Daviti wa sapuila omõlaye Salomone hati: “Kolisako, kuata utõi, linga upange [owu]. Ku ka kale lusumba, ku ka yokoke, momo Yehova Suku, haeye Suku yange, o kasi love. Eye ka ku tokoka, ndaño oku ku yanduluka, toke upange wosi wonjo ya Yehova u pua.” (1 Asa. 28:20) Salomone wa kuata utõi woku tungila Yehova onembele yimue ya posoka vo Yerusalãi.
11. Olondaka viutõi kafeko u Isareli a popia via kuatisa ndati ulume umue?
11 Kunyamo wohulukãi O.Y.K., omo okuti kafeko umue u Isareli wa vangula lutõi, ca nenela asumũlũho kulume umue ukuavilundu. Kafeko kaco, wa ambatiwile lasualali kumandekua, kuenje, wa linga upika wa Namana kesongo kolohoka vio ko Suria. Omo okuti wa kũlĩhĩle ovikomo Yehova a enda oku linga vonduko ya Elisia, wa sapuila ukãi wa Namana okuti, nda ulume waye wa enda ko Isareli, o ka sakuiwa luprofeto wa Suku. Omo liaco, Namana wa endele ko Isareli, kuenje, wa sakuiwa locikomo, kuenda wa linga ufendeli wa Yehova. (2 Olos. 5:1-3, 10-17) Nda ove wumalẽhe, kuenda o sole Suku, ndeci kafeko u Isareli a linga, o pondolavo oku kuata utõi woku kundila alongisi kosikola, vana u tangela kumosi, kuenda omanu vakuavo.
12. Olondaka via Soma Hesekiya via kuatisa ndati omanu?
12 Oku popia olondaka via sunguluka kotembo yovitangi, ci kuatisa omunu oku kuata utõi. Kocita cecelãla O.Y.K., eci va Asuria va yonguile oku tambula o Yerusalãi, Soma Hesekiya wa popia lomanu hati: “Kolisiko, kuati utõi. Ko ka yokoki, ko ka salukili Soma [yo ko] Asuria, ndaño owiñi wosi u kasi kumue laye, momo konele yetu kuli u wa velapo. Konele yaye kuli okuokuo [kuositu], puãi konele yetu kuli Yehova Suku yetu, o tu kuatisa loku tu yakela ovilunga vietu.” Anga hẽ olondaka evi via kuatisa omanu oku lekisa utõi? Ocili okuti, via va kuatisa, momo, va fetika oku kolela ‘kolondaka via Hesekiya, Soma yo ko Yuda, kuenje, va tula utima.’ (2 Asa. 32:7, 8) Cimuamue haico ci pondola oku pita letu okuti, nda tu vangula lutõi, olondaka vietu vi vetiya vamanji oku kuata utõi, eci va lambalaliwa lovanyãli.
13. Utõi upi tu sukila oku kuata, ndeci Ovadiya, kalei ka Soma Ahava a linga?
13 Olonjanja vimue, tu lekisila utõi vovilinga vietu okuti, ka tu sukila oku vangula ondaka yimue. Kocita cekũi O.Y.K., Ovadiya, una wa kala kalei ka Soma Ahava, wa lekisa utõi poku soleka “veleva” ci soka ocita covaprofeto va Yehova, oco ka va ka pondiwe la Nasoma Isevele. (1 Olos. 18:4) Koloneke vilo, kuli afendeli valua va Yehova va siata oku kuama ongangu ya Ovadiya wa kuata utõi okuti, ka va sapuila olondingaĩvi ovolandu atiamẽla ku vamanji.
NASOMA—ESTER WA KALA UKUOTÕI
14, 15. Nasoma Ester wa lekisa ndati ekolelo lutõi, kuenda onima yipi a tambula?
14 Kocita ca kuãla O.Y.K., eci Hamana ulume umue ondingaĩvi, a yonguile oku ponda va Yudea, Nasoma Ester wa lekisa ekolelo lutõi. Omo okuti, va Yudea va sumuĩle calua, va likandangiya oku lia, kuenda va likutilila ku Yehova lutima wosi! (Est 4:1-3) Nasoma Ester wa sumuĩle calua. Noke, epalume liaye Mordekai wa tuma kokuaye ukanda wocihandeleko coku ponda omanu vosi. Kuenje, wo sapuila oco a ende ku soma oku pingilako vamanjaye va Yudea. Pole, kotembo yaco, omunu wosi enda ku soma okuti, ko vilikiyile, o pondiwa.—Est 4:4-11.
15 Mordekai wa sapuila Ester hati: ‘Nda ove ku vangula, epopelo lietu li tunda kumue kuiñi. Pole, helie wa kũlĩha nda yilo oyo otembo ove wa nõliwila oku kala Onasoma yofeka?’ Ester wa tuma Mordekai oku ongoluila lonjanga va Yudea ko Siusana, oco va likandangiye oku lia. Kuenje, Ester wa va sapuila hati: ‘Ame lafeko vange, tu likandangiya oku lia ndene. Noke ngenda ku Soma, ndaño ocihandeleko ci lekisa okuti, ka citava oku enda. Nda ndi fa, ndi fa muẽle.’ (Est 4:12-17) Omo liutõi waco, elivulu lia Ester li lekisa okuti, Suku wa yovola omanu vaye. Koloneke vilo, Akristão olombuavekua, kumue lafendeli vakuavo, va siata oku kuata utõi poku liyaka lovitangi, kuenda olonjanja viosi, va pinga ekuatiso ‘ku Yehova, ukuakuyeva olohutililo.’—Tanga Osamo 65:2; 118:6.
‘TU KUATI UTÕI’
16. Amalẽhe va sangiwa vakongelo va siata oku kuama ndati ongangu ya Yesu?
16 Kocita catete, eci Yesu a kuata ci soka 12 kanyamo, vo sangele vonembele “wa tumãla pokati kalongisi oku va yevelela loku va pula pula.” Kuenje, ‘vosi vo yeva, va komõha olondunge viaye latambululo aye.’ (Luka 2:41-50) Ndaño okuti Yesu wa kala umalẽhe, wa lekisa ekolelo lutõi poku pulisa akulu lalongisi va kala vonembele. Oku ivaluka ongangu ya Yesu, ci kuatisa amalẽhe va sangiwa vakongelo oku ‘lipongiya oco va tambulule omanu vana va pulisa eci catiamẽla kelavoko liavo.’—1 Pet. 3:15.
17. Momo lie Yesu a vetiyila olondonge viaye oco vi ‘kuate utõi,’ kuenda momo lie tu sukilila oku kuata utõi?
17 Yesu wa vetiya omanu oco va ‘kuate utõi.’ (Mat. 9:2, 22) Eye wa sapuila olondonge viaye hati: ‘Kuiya owola, ocili yeya ale, okuti vu sanduiwa, omunu koliaye, omunu koliaye, kuenje, vu sia lika liange. Haimo lumue, si kasi likaliange, momo Isia o kasi kumue lame. Nda vangula lene ovina evi, oco vokuange vu kale lombembua. Voluali vu sakalaisua, pole, kuati utõi, momo ame nda yula oluali.’ (Yoa. 16:32, 33) Ndaño okuti Akristão vatete va suvukiwile loluali, pole, va kuama ongangu ya Yesu yoku yuvula oku lisokisa loluali. Oku ivaluka ongangu Yomõla wa Suku ci pondola oku tu kuatisa oku kuata utõi voluali lulo lua vĩha. Omo okuti, Yesu wa yula oluali, tu pondolavo oku yula.—Yoa. 17:16; Tia. 1:27.
“KOLISAKO”
18, 19. Nye ca kuatisa Paulu oku lekisa ekolelo?
18 Upostolo Paulu wa pandikisa koloseteko vialua. Onjanja yimue, eci a kala vo Yerusalãi, va Yudea va yonguile oku u ponda, pole, asualali vo ko Roma vo teyuila. Uteke waco, “Ñala wa talama kumue la Paulu, kuenje wa popia laye hati: ‘[Kuata utõi]. Momo ndeci wa njimbila uvangi ko Yerusalãi, haico o njimbila uvangi ko Roma.’” (Ovil. 23:11) Paulu wa kuata utõi.
19 Paulu wa pisa vana va enda oku litukula vati, ‘ovapostolo va kemãla,’ momo va yonguile oku nyõla ekongelo lio ko Korindo. (2 Va Kor. 11:5; 12:11) Eye wa kuata ovituwa via litepa levi viavo. Eye wa lekisa okuti upostolo, eci a kapiwa vokayike, poku tipuiwa, oku linga ovongende a koka ohele, leci a liyaka lovitangi vialua, poku kala onjala, oku yeva enyona, loku pumba otulo, kuenda poku sakalala la vamanji. (Tanga 2 Va Korindo 11:23-28.) Ovitangi Paulu a liyaka lavio, vi lekisa okuti, Suku o pondola oku pamisa ekolelo lietu eci tu liyaka lovitangi!
20, 21. (a) Tukula ulandu umue u lekisa esunga lieci tu sukilila oku kuata utõi. (b) Kapuluvi api tu sukila oku kuata utõi, kuenda ci tu ĩha ekolelo lipi?
20 Akristão havosiko va ka pita velambalalo. Pole, tu sukila oku kuata utõi poku liyaka lovitangi vieteke leteke. Kũlĩhĩsa ulandu owu: Umalẽhe umue wo kofeka yo Brasil, wa kala vocimunga covingumba. Noke yoku lilongisa Embimbiliya, wa limbuka okuti, o sukila oku linga apongoloko. Pole, nda umue pokati kavo wa silepo ocimunga caco, nda wa pondiwa. Kuenje, wa likutilila loku tukula ovisonehua, kuenda wa lekisa kusongui waye esunga lieci ka yonguila vali oku kala vocimunga caco. Eci a siapo ocimunga caco, ka kuatele ovitangi, kuenje, wa fetika oku kunda olondaka viwa Viusoma.
21 Tu sukila oku kuata utõi poku kunda olondaka viwa. Akristão amalẽhe, va sukila oku kuata utõi oco ka va ka yapuisiwe. Tu sukila oku kuata utõi poku pinga selo ku cime cetu kupange, oco tu ende kohongele yofeka. Kuli ovina vialua okuti poku vi linga, tu sukila oku kuata utõi. Ndaño tua siata oku liyaka lovitangi vialua, tua kolela okuti, Yehova o ‘yeva olohutililo vietu.’ (Tia. 5:15) Omo liaco, Yehova o pondola oku tu ĩha espiritu sandu liaye, oco tu amameko oku ‘kuata utõi!’
[Apulilo Elilongiso]
[Elitalatu kemẽla 11]
Kosimbu Enoke wa kunda lekolelo voluali lua vĩha
[Elitalatu kemẽla 12]
Yaele wa kuata utõi walua
