Va Kunda Ondaka ya Suku Lutõi!

Tu sukila​—oku kuata utõi​—poku liyaka lelambalalo. Akristão vocili va siata oku lekisa utõi ndomo ulandu waco u sangiwa valivulu ndeci: ‘Dê Testemunho Cabal’ sobre o Reino de Deus, kuenda Testemunhas de Jeová​—Proclamadores do Reino de Deus. Tu sukila oku likutilila ku Yehova, loku pinga espiritu liaye, oco li tu kuatise oku vangula lutõi ndeci Akristão vo kocita catete va linga.​—Ovil. 4:23-31.

Manji umue poku lekisa ndomo va enda oku kundila omanu vokuenda Kuyaki Watete wa pita voluali luosi, wa soneha ndoco: “Afendeli va Yehova, va eca komanu elivulu liepanduvali lioku lilongisa Ovisonehua losapi hati: “O Mistério Consumado” (Elumbu Lia Situluiwa). Okokanda katete Kesapulo Liusoma, ka sandekiwa kunyamo wo 1918. Okokanda kavali Kesapulo Liusoma, ka lombolola esunga lieci olombiali via tatekela oku sandekiwa kuelivulu losapi hati: O Mistério Consumado. Noke, kua sandekiwa okokanda katatu Kesapulo Liusoma. Akristão Olombuavekua, ovo va eca otuikanda tuaco. Ovo, va sukilile oku kuata utõi woku kunda Esapulo Liusoma.”

Koloneke vilo, Akristão va siata oku pindisiwa oco va kunde esapulo Liusoma. Pole, epindiso liaco, ka lia siatele oku eciwa olonjanja viosi. Manji umue wo kofeka yo Polonia, okuti cilo o kasi ko Estados Unidos, poku ivaluka ndomo a fetika oku kunda tunde kunyamo wo 1922, wa soneha ndoco: “Sia kũlĩhĩle ndomo ku eciwa olorevista kuenda, sia tẽlele oku vangula ciwa elimi Liongelesi. Pole, nda endele voseketa ya ndotolo umue, kuenje, nda totola kepito liaye. Noke, ukãi umue ukuakusakula wa yulula epito. Lalimue eteke ndi ivalako ulandu waco, momo eteke liaco nda kala oku luluma calua. Eci nda yulula ocipete, alivulu ange osi a kupukila kolomãhi viukãi waco. Ndaño sia tẽlele ndomo ndi vangula laye, pole, ndo wĩha elivulu limue. Eci nda tunda, nda fetika oku kuata utõi, kuenje, nda limbuka esumũlũho lia Yehova. Eteke liaco, nda eca otuikanda tualua komanu va kala vokololo yaco.”

Manji umue ukãi wa popia hati: “Kunyamo wo 1933, vamanji valua poku kunda esapulo Liusoma, va enda oku talavaya lakãlu a kuete anguena.” Eteke limue, eye lamanji umue kumue lukãi waye, va endele oku kundila kolomunda vio ko Kalifornia, kofeka yo Estados Unidos. Eye wa popia hati: “Eci tua pitĩla, ulume wa manji wa londa kilu liomunda lekãlu lianguena osimbu tua siala volupale. Eci manji a fetika oku yevalisa ocileñi, ondaka yaco ya kala ndu okuti, ya tunda kilu. Omanu vo volupale, va sandiliya manji yaco, pole ka vo sangele. Eci anguena a mala oku vangula, omanu va tu vilikiya kuenje, tua va kundila. Onjanja yikuavo nda talavaya lakãlu avali a kuete anguena oku yevalisa ocileñi, pole, omanu ka va tavele oku yevelela kesapulo liaco. Ndaño okuti omanu vaco ka va  tavele, pole, ocileñi ca tunda vanguena, ca yevala toke volonjo viavo. Olonjanja viosi, tu sukila oku ivaluka okuti, Yehova o tu kuatisa oku kuama olonjila via litepa vioku kundila omanu votembo ya sunguluka. Onjila tua kuama poku kunda, ya tu ĩha utõi woku tẽlisa ocipango ca Yehova loku sivaya onduko yaye.”

Tunde kunyamo wo 1930 toke wo 1940, tua enda oku kundila omanu longalamafone, poku yevalisa olohundo viopiwa Vembimbiliya. Manji umue ukãi wa popia hati: “Eteke limue, manji umue ufeko wa kala oku kundila konjo lanjo longalamafone yaye. Osimbu ya kala oku sikila kepito, muẽlianjo wa tunda lonyeño, kuenje, wa inasi ongalamafone yaco, pole, ka ya nyõlehele. Alume vatatu va kala oku lia onanya va mola ocitangi caco, kuenje, vo pinga oku sika ongalamafone, noke va tambula alivulu. Evi, ovio ovitangi manji a pita lavio.” Eye wa sukilile oku kuata utõi oco a yule ovitangi viaco.

Manji yaco wa amisako hati: “Ndi ivaluka eci tua fetika oku eca olorevista volokololo kunyamo wo 1940. Tete tua enda oku talama volokololo. Konele yimue yokololo, kua kala vamanji va enda oku ambata olopapelo mua sonehiwa hati: “A Religião é Laço e Extorsão” e “Sirva a Deus e a Cristo, o Rei,” (Etavo, Onjanjo yi Yapuisa Omanu, kuenda Vumba Suku la Kristu Osoma.) Poku pita volokololo va enda oku eca olotratadu komanu. Pole, va sukilile oku kuata utõi woku linga upange waco, oco onduko ya Yehova yi kũlĩhĩwe lomanu vosi, omo liovilinga viwa viafendeli vaye.”

Manji umue ukãi wa popia hati: “Ka ca lelukile oku eca olorevista kovaimbo amue atito. Momo kotembo yaco Olombangi Via Yehova via kala oku lambalaliwa. . . . Tua sukilile oku kuata utõi woku kevelela omanu pevindi liolokololo, oco tu va ĩhe olorevista loku va sapuila ondaka yimue yi va vetiya oku yevelela. Tua enda oku ci linga lika olonjanja vimue Vocasapalo. Pamue omanu va enda oku tu yevelela. Olonjanja vimue, eci tu ñualiwa lolongangala, tu tila vuyombeki, oco ka va ka tu tipule.”

Ndaño okuti Olombangi Via Yehova via enda oku lambalaliwa Kuyaki Wavali wa pita voluali luosi, pole, via kunda lutõi. Vokuenda kueci ci soka 43 koloneke, oku upisa keteke 1 kosãi ya Cembanima kunyamo wo 1940 toke 12 ya Susu wo 1941, ci soka 50.000 kakundi kofeka yo Estados Unidos, va eca komanu eci ci panda kecelãla liolohuluwa viotualivulu vepuluvi limue va enda oku tukula hati: Oku Eca Uvangi “Lutõi.”

Vamanji vana va kuka va kasi vocisoko ca Yehova otembo yalua, eci va ivaluka ovitangi va liyaka lavio kosimbu, ci va kuatisa oku amamako lutõi. Vamue pokati kavo, va siata oku kuatisiwa lolondaka viokuti: Yaka toke kesulilo! Omo liaco, ocikundi tua tambula ku Suku coku kunda olondaka viwa, ci ka amamako toke kesulilo lioluali lulo. Lekuatiso lia Yehova Suku, tu amamiko oku kunda olondaka viwa lekolelo kuenda utõi.

[Etosi lia velapo kemẽla 9]

Tu kuati utõi woku kunda esapulo liwa Liusoma