Natana​—wa Teyuila Efendelo Liocili

Ka ca lelukile oku vetiya omunu umue wa kemãla oco a limbuke okuti, o sukila oku linga apongoloko omo liovilinga viaye ka via sungulukile. Nda wa kũlĩha okuti, omunu umue wa kemãla wa ponda ukuavo oco a teyuile ekalo liaye, o kuata hẽ utõi woku vangula laye?

Kosimbu Soma Daviti wo ko Isareli, wa lingile ukahokolo la Batisieva, kuenje wo minisa. Daviti poku limbika ekandu liaye, wa ponda Uriya, kuenje, wa kuela ukãi waye Batisieva. Daviti wa limbika ekandu liaye vokuenda kuolosãi vialua, kuenda wa amamako oku linga ovopange aye. Pole, Yehova wa situlula ekandu liaco, poku tuma uprofeto Natana oco a vangule la Daviti ondaka yaco.

Ka ca lelukile oku tẽlisa ocikundi caco. Sokolola ndu okuti, ove uprofeto Natana. Oku kolela ku Yehova loku kakatela kolonumbi viaye, ca vetiya Natana oku ivaluisa Daviti akandu aye. Nye uprofeto a sukilile oku linga oco a kuatise Soma Daviti oku likekembela akandu aye?

WA LONGISA LUTATE

Momo lie ku sandiliyila akukutu amue oku tanga elivulu lia 2 Samuele 12:1-25? Sokolola ndeci okuti, ove Natana, kuenje o kasi oku sapuila Daviti ndoco: “Vimbo limue mua kala alume vamue vavali, ukuavo ohuasi, ukuavo osuke. Ohuasi ya kala loviunda violomeme levi violongombe. Osuke puãi ka yi kuete cimue te okamange kamue komeme a landa. Wa ka tekola, ka kala kala laye lomãla vaye. Ka lialia [okulia kuaye]. Ka nyuanyua kokopo yaye. Wa kambayata ponete. Kokuaye ka linga ndomõlaye. Konjo  yohuasi kueya ukombe. Eye puãi ka yonguile oku upa kolomeme viaye muẽle pamue kolongombe viaye muẽle ha telekela ukombe weya kokuaye. Wa nyañula puãi okameme kosuke, wa ka telekela ukombe waye.”​—2 Sam. 12:1-4.

Omo okuti Daviti​—wa kala ungombo, wa simĩle okuti,—​ulandu waco wocili. Ulume umue ukuasapulo wa popia hati: “Natana wa kuatele ocituwa coku enda ku soma oku sapula ocitangi comunu umue, oco o teyuile. Kuenje, Daviti wa sima okuti, o kuete omoko yoku tetulula ocitangi caco.” Ndaño okuti eci oco ca kala ocisimĩlo ca Daviti, Natana wa sukilile oku kolela ku Suku loku kuata utõi woku sapela la soma. Ulandu wuprofeto Natana, wa temisa Daviti. Kuenje, wa popia hati: “Ndeci Suku o kasi lomuenyo, u wa linga ndomo o sesamẽla oku fa.” Noke Natana wo sapuila ondaka yimue yi sumuisa hati: “Ove muẽle ulume waco.”​—2 Sam. 12:5-7.

Kũlĩhĩsa esunga lieci Natana a lomboluila ulandu waco, kuenda ndomo a ci linga. Nda ekamba lietu li kuete ocitangi cimue, ka ca lelukile oku sapela laye ondaka yaco. Nda va tu sapuila okuti tu kuete ovituwa vimue vĩvi, pamue tu lisandela esunga. Olondaka via Natana, via vetiya Daviti oku pisa omunu waco. Natana noke yoku limbuka okuti Daviti ka solele elinga liaco, wa tiamisila ulandu waco kokuaye. Noke, Daviti wa limbuka ekandu liaye. Kuenje, wa kuatisiwa oku pongolola ovisimĩlo viaye loku tava kelungulo. Eye wa limbuka okuti wa ‘tomba’ Yehova poku linga ukahokolo la Batisieva, kuenje, wa tava kelungulo a tambula.​—2 Sam. 12:9-14; Osa. 51.

Ulandu waco u tu longisa nye? Alongisi Vembimbiliya, va sukila oku kuatisa omanu oco va limbuke onjila ya sunguluka. Natana wa lekisa esumbilo ku Daviti, kuenje, wa vangula laye lutate. Eye wa kũlĩhĩle okuti Daviti wa kala omunu wa sunguluka, haeye wa solele esunga. Poku u lomboluila ulandu waye, wo situluila ovituwa via Suku. Tu pondolavo oku kuatisa vakuavitima via sunguluka, oco va kuate elomboloko liovisimĩlo via Yehova. Tu ci linga ndati? Tu ci linga poku va vetiya oku tiamisila ovisimĩlo viavo kovina via sunguluka, loku yuvula oku velisapo ovituwa vietu, kuenda ekalo lietu kespiritu. Embimbiliya, olio lika li tu sapuila ovina via sunguluka levi ka via sungulukile, okuti ka tu kolela kovisimĩlo vietu.

Omo liesunguluko Natana a lekisa ku Suku, wa kuata utõi woku pisa ovilinga vĩvi via soma. (2 Sam. 12:1) Cimuamue haico catiamẽla kokuetu okuti, nda tu lekisa esunguluko, tu kuata utõi woku teyuila olonumbi viesunga Yehova a siata oku tu ĩha.

WA KUATISA KEFENDELO LIOCILI

Natana la Daviti, va kala akamba vocili. Onduko ya Natana ya moleha onjanja yatete Vembimbiliya, eci a kala kumue la Daviti. (1 Asa. 3:1, 5) Vosi yavo va solele Yehova. Soma Daviti citava okuti wa kolelele calua kolondunge via Natana, momo wo sapuila onjongole yaye yoku tunga onembele ya Yehova. Daviti wa popia laye hati: “‘Ame ñasi vonjo yocili yolo-cedro, ocikasia ca Suku puãi ci kasi ño vombalaka.’ Natana wa kumbulula Soma hati, ‘Kuende, ka linge cosi ci kasi vutima​—wove momo Yehova o kasi love.’”​—2 Sam. 7:2, 3.

Omo okuti Natana wa kala ufendeli wocili wa Yehova, eci Daviti a lekisa kokuaye onjongole yoku tunga ocitumãlo catete cefendelo liocili palo posi, eye wo vetiya oku ci linga. Kepuluvi liaco, Natana wa lombolola lika ovisimĩlo viaye, pole, ka vanguile vonduko ya Yehova. Kuteke waco, Suku wa tuma uprofeto oco a sapuile soma Daviti hati: Hayeko o tunga onembele ya Yehova. Onembele yaco ya laikele oku tungiwa la umue pokati komãla va Daviti. Pole, Natana wa popia hati, Suku wa linga ocisila cimue la Daviti oco uviali waye ‘u kale otembo ka yi pui.’​—2 Sam. 7:4-16.

Ocipango ca Suku ka ca likuatele lovisimĩlo via Natana viatiamẽla koku tunga onembele. Pole, uprofeto ka lisiõsũile, kuenje, wa lekisa umbombe poku tava kocipango ca Yehova kuenda wa eca ekuatiso. Omo liaco, eci tu lunguiwa la Suku, tu sukila oku kuama ongangu ya Natana! Ovituwa viuprofeto Natana via lekisa okuti,  ka pumbile ohenda ya Yehova Suku. Momo, Yehova wa tuma Natana kumue la Gadi ukuavitumasuku oco va sapuile Daviti oku sokiya ci soka 4.000 kolonjimbi via enda oku tumbangiya Yehova vonembele.​—1 Asa. 23:1-5; 2 Asa. 29:25.

WA TEYUILA UVIALI

Natana wa kũlĩhĩle okuti Salomone, eye o piñala usoma wa Daviti. Omo liaco, eci Daviti a kuka, Adoniya wa seteka oku tambula uviali, pole, Natana wo tateka oku ci linga. Natana wa kuata utate kuenda wa lekisa esunguluko. Catete, wa vetiya Batisieva oku ivaluisa Daviti onjongole a kuatele yoku vialeka omõlavo Salomone komangu yusoma. Noke Natana wa enda ku Daviti oku u pulisa nda eye wa nõla Adoniya, oco a linge kapiñala kusoma waye. Eci Soma Daviti a limbuka ocitangi caco, wa handeleka Natana lakuenje vaye vakuekolelo oco va waveke Salomone loku u vialeka komangu yusoma. Onjongole ya Adoniya yoku likapa komangu yusoma ka ya tẽlisiwile.​—1 Olos. 1:5-53.

ULUME UMUE UKUASAPULO HAEYE WA LIKETISA

Natana la Gadi, va kũlĩhĩwa okuti ovo va soneha elivulu lia 1 Samuele oku upisa kocipama 25 toke 31, kuenda elivulu lia 2 Samuele. Catiamẽla kovolandu a sangiwa valivulu aco, tu tanga ndoco: “Ovilinga via Soma Daviti, evi via tete levi via sulako, . . . via sonehiwa velivulu lia Samuele ukuavitumasuku lo velivulu liuprofeto Natana kuenda velivulu lia Gadi ukuavitumasuku.” (1 Asa. 29:29) Embimbiliya, li lekisa okuti Natana wa sonehavo ovina viatiamẽla ‘kovilinga via Salomone.’ (2 Asa. 9:29) Ulandu owu, u lekisa okuti, Natana wa amamako oku talavaya kelombe noke yoku fa kua Daviti.

Ovina viosi tua konomuisa viatiamẽla kuprofeto Natana, Daviti eye wa vi soneha. Pole, kuli ovina ka sonehele viatiamẽla kokuaye okuti, vi tu longisa ovina vialua. Natana wa kala ulume umue ukuasapulo. Eye, wa liketisile, kuenda ka kuatele ocituwa coku sanda ekemãlo. Ondisionariu yimue Yembimbiliya, yi lombolola okuti, “ka situluile ekalo liaye ale liepata liaye, Vembimbiliya.” Lacimue tua kũlĩha catiamẽla kocikoti caye, kuenda komuenyo waye.

WA VETIYIWA LEKOLELO A KUATELA YEHOVA

Ovolandu a sangiwa Vovisonehua atiamẽla ku Natana, a lekisa okuti, wa kala embombe, kuenda wa kuata ombili yoku teyuila ocipango ca Yehova Suku, una wa ecele ocikele caco kokuaye. Sokolola ovituwa via Natana, ndeci: Ekolelo liaye ku Suku, kuenda oku pokola kovihandeleko viaye. Likolisilako oku setukula ovituwa viaco.

Citava okuti, lalimue eteke o ka pisa olosoma via linga ukahokolo, ndaño oku tateka omunu umue o yongola oku viala. Pole, lekuatiso lia Suku, o pondola oku lekisa ekolelo kokuaye loku pokola kovihandeleko viaye viesunga. O pondolavo oku kala ulongisi ukuotõi, ukuotate, kuenda oku teyuila efendelo liocili.

[Elitalatu kemẽla 25]

Natana wa teyuila uviali, poku vangula lutate la Batisieva