Manji Charlotte White, wa kala ukundi wotembo yosi. Eci a pitĩla vimbo lio Louisville, volupale luo Kentucky ko Estados Unidos locikasia cimue ci kuete alola, omanu va komõha calua.

Kunyamo wo 1908, Manji White wa komõhisa omanu vo volupale locikasia cimue cokaliye, coku ambata elivulu li tukuiwa hati: Aurora do Milênio, cendela kalola. Eye wa popia hati: “Ocikasia caco, ca komõhisa omanu valua.”

Vakuakulilongisa Embimbiliya, ndomo Olombangi Via Yehova via enda oku tukuiwa kotembo yaco, va limbuka okuti, va sukilile oku sapuilako vakuavo ovina va enda oku lilongisa Vovisonehua. Valua va kuatele ukũlĩhĩso Wembimbiliya omo lioku lilongisa elivulu losapi hati: Aurora do Milênio, (okuti noke lieya oku tukuiwa hati, Estudos das Escrituras). Akristão vana va kuatele onjongole yoku enda kalupale a kasi ocipãla, lo kovaimbo atito, va longisa omanu lekuatiso lielivulu, “Aurora do Milênio.”

Kunyamo wo 1908, Manji White, la vakuavo, poku kundila omanu esapulo Liusoma, va enda oku eca elivulu liepandu lio Aurora do Milênio, londando yi soka 1.65 kolondolale. Nda omunu umue o lekisa onjongole, ka vo wĩha elivulu liaco, pole, va linga esokiyo lioku tiuka eteke likuavo​— eci a kuata olombongo​—vioku feta. Ulume umue wa suvukile Olombangi Via Yehova, wa liyeya hati, eci omanu va tambula elivulu ka va eci olombongo vialua!

Manji Malinda Keefer ivaluka okuti, osemana losemana, wa enda oku eca ci soka ovita vivali, ale vitatu vialivulu. Pole, kua kala ocitangi cimue ca tatekele vamanji oku eca komanu elivulu Aurora do Milênio. Elivulu liepandu lia kuata eci ci soka 740 kamẽla!  Ocisoko co Torre de Vigia ca popia hati: “Omo okuti elivulu liatãlo lia kuata eci ci soka 18 kolokilu, lia lemẽle calua” okuti, ka ca lelukile ku vamanji akãi oku ambata elivulu liaco.

Oco ocitangi coku ambata elivulu Aurora do Milênio ci tetuluiwe, Manji James Cole, wa sovola okakãlu kamue ka kuete alola avali okuti citava oku kapako ocikasia calivulu. Omo okuti ka va kuatele vali ocitangi coku ambata ocilemo, manji wa sovola okakãlu kaco wa popia hati: “Kaliye si teka vali apepe locilemo.” Kohongele ya lingiwa la Vakuakulilongisa Embimbiliya volupale luo Cincinnati, Ohio kunyamo wo 1908, manji yaco, wa lekisa ocikasia caco, kuenje, eci olonjeveleli via ci mola, via sanjuka calua. Kolombutãu via kala kocituviko caco, kua sonehiwa onduko yokuti, Ocikasia Coku Ambata Elivulu Aurora do Milênio. Ca lelukile oku kapa ocikasia caco kilu lialola, loku ci sindika lokuokuo kumosi. Ca tavele oku tepulula alola okakãlu kaco, ale oku a vokiya okuti, cecelela omunu oku pita volonjila viosi. Noke yoku kunda, poku tiukila konjo, citava oku kapa alola aco vocikasia.

Vamanji akãi vana va litumbika kupange wakundi votembo yosi, va enda oku tambula ocali ocikasia kumue lalola aco. Pole, vamanji vakuavo va enda oku feta ci soka 2.50 kolondolale. Manji Keefer, velitalatu li kasi kemẽla lilo, wa loñolohele calua koku endisa ocikasia caco calola lokuokuo kumosi okuti, kukuavo ku ambata ocipete calivulu. Nda eye wa sanga omanu valua va lekisa onjongole volupale lumue kocivanja co Pensilvânia ko Estados Unidos, wa enda oku linga ovongende atatu, ale akuãla veteke loku pita keyau.

Kunyamo wo 1987, ulume umue ukuakuendisa olombalãu, wa sovola ocikasia cimue ci kuete alola okuti, cilo oco omanu va siata oku ambata poku linga ovongende lolombalãu, ale poku endela volokololo valupale olomĩlu. Pole, ci soka ocita canyamo a pita, Vakuakulilongisa Embimbiliya va enda oku komõhiwa lomanu omo liocikasia calivulu va enda oku ambatela kalola avali poku kunda esapulo Liembimbiliya.

[Etosi lia velapo kemẽla 32]

Manji Keefer wa enda oku linga ovongende atatu ale akuãla veteke poku pita keyau

[Etosi lia velapo kemẽla 32]

Ocitangi Coku ambata elivulu Aurora do Milênio, ca tetuluiwa