Kuatisa Omanu Oku “Pasuka Kotulo”
Kuatisa Omanu Oku “Pasuka Kotulo”
‘Omanu va kũlĩha otembo, okuti yilo oyo owola yoku pasuka kotulo.’—VA ROM. 13:11.
O TẼLA OKU LOMBOLOLA?
Momo lie Akristão va sukilila oku lavulula?
Momo lie tu sukilila oku kuata utate woku yevelela loku lavulula?
Umbombe loku lekisa esumbilo komanu vi kuete esilivilo lie kupange woku kunda?
1, 2. Konepa yipi omanu valua va sukila oku pasuka kotulo?
UNYAMO lunyamo, omanu valua va siata oku fa omo lioku suñila, ale oku pekela osimbu va kasi oku endisa akãlu. Vakuavo va siata oku tundisiwa kupange omo lioku cilua, ale oku suñila osimbu va kasi oku talavaya voloseketa. Pole, oku pekela kespiritu kua siata oku nenela omanu ovitangi vialua. Omo liaco, tu sukila oku kapako elungulo Liembimbiliya, li popia hati: ‘Omunu una o lavulula kespiritu, wa sumũlũha.’—Esit. 16:14-16.
2 Ndaño okuti eteke linene lia Yehova li kasi ocipepi, pole, omanu valua va kasi oku pekela kespiritu. Asongui vamue vetavo Liesanda, va siata oku popia vati, oloñame viavo vi kasi ‘ndocinyama cinene ca pekela.’ Oku pekela kespiritu ku lomboloka nye? Momo lie Akristão vocili va sukilila oku pasuka kotulo? Tu kuatisa ndati omanu oku pasuka kotulo?
OKU PEKELA KESPIRITU—CI LOMBOLOKA NYE?
3. Omunu una wa pekela kespiritu wa tuwa ndati?
3 Omanu vana va pekela, va siata oku kuata owesi. Cimuamue haico ci pita lomanu vana va pekela kespiritu, momo va sakalala lika lovina vio ketimba. Pamue ovitima viavo via tekela lika kovina vieteke leteke ndeci: Ayele, ekemãlo, kuenda oku kuata omuenyo uwa. Omo lioku sakalala lika lovina viaco, ka va onjongole kovina viespiritu. Pole, omanu vana va lavulula kespiritu, va kũlĩha okuti, tu kasi “koloneke via sulako,” kuenje, va pitisa kovaso oku linga ocipango ca Suku.—2 Pet. 3:3, 4; Luka 21:34-36.
4. Elungulo liokuti, ‘ka tu ka pekeli ndomanu vakuavo’ li kuete esilivilo lie?
4 Tanga 1 Va Tesalonike 5:4-8. Kovinimbu evi Paulu wa lungula Akristão hati: ‘Ka tu ka pekeli ndomanu vakuavo.’ Olondaka evi, vi lomboloka nye? Vi lomboloka okuti, nda tu tomba olonumbi via Yehova viatiamẽla kovituwa viwa, ci lekisa okuti, ‘tua pekela kotulo.’ Ocina cikuavo ci lekisa okuti, tua ‘pekela kotulo,’ oku likala oku tava kelungulo liokuti eteke lia Yehova lioku nyõla oluali lulo lua vĩha, li kasi ocipepi. Omo liaco, tu yuvuli oku yapuisiwa lovituwa viomanu ka va tava ku Suku, kuenda ovilinga viavo vĩvi.
5. Omanu vana va pekela kespiritu va siata oku lekisa ovituwa vipi?
5 Omanu vamue va kuete ovisimĩlo viesanda viokuti, ka kuli Suku, kuenda ka va ka kuata ovitangi omo liovina vĩvi va siata oku linga. (Osa. 53:1) Omanu vakuavo, omo lioku sima okuti Suku ka kuete ocikembe lavo, ka va siatele oku lekisa esumbilo kokuaye. Kuli omanu vakuavo va sima okuti, oku tiamẽla ketavo limue, ci va kuatisa oku kuata ukamba la Suku. Omo okuti omanu vaco va pekela kotulo, va sukila oku pasuka. Tu va kuatisa ndati?
TU SUKILA OKU PASUKA KOTULO
6. Momo lie Akristão va sukilila oku lavulula kespiritu?
6 Oco tu kuatise omanu oku pasuka kotulo tuespiritu, tu sukilavo oku lavulula kespiritu. Ovina vipi via kongela voku pekela kespiritu? Ondaka ya Suku yi sokisa otulo tuespiritu ‘lovilinga—viowelema’ ndeci: Ayele, uholua, upuepue, ema, kuenda esuvu. (Tanga Va Roma 13:11-14.) Ka ca lelukile oku yuvula ovituwa viaco. Pole, oku lavulula kespiritu ku kuete esilivilo. Nda omunu osimbu a kasi oku endisa ekãlu ka likandangiya otulo, o kapa omuenyo waye kohele. Cimuamue haico ci pondola oku pita Lukristão okuti, nda ka lavulula kespiritu, o kapa ekalo liaye kohele!
7. Ovisimĩlo vipi ka via sungulukile omanu vamue va kuete okuti vi pondola oku tu yapuisa?
7 Pamue Ukristão o pondola oku sima okuti omanu va kasi vocikanjo caye, ka va tava oku va kundila olondaka viwa. (Olosap. 6:10, 11) Ukristão waco, pamue o sima ndoco: ‘Omo okuti omanu vaco ka va tava oku va kundila, momo lie ndi setekela oku va kuatisa?’ Ndaño okuti omanu vamue va pekela kespiritu, pole, ovituwa lovisimĩlo viavo, pamue vi pongoloka. Omanu vamue va pasuka kotulo, kuenje, va tava oku va kundila. Nda tu lavulula kespiritu poku kuama olonjila viokaliye vioku va kundila esapulo Liusoma, tu pondola oku va kuatisa. Voku lavulula kespiritu, mua kongela oku limbuka esunga lieci tu sukilila oku kunda olondaka viwa.
MOMO LIE UPANGE WOKU KUNDA U KUETELE ESILIVILO?
8. Momo lie upange woku kunda u kuetele esilivilo lia velapo?
8 Tu sukila oku ivaluka okuti, ndaño omanu vamue ka va tava kesapulo liwa, upange wetu woku kunda, u sivaya Yehova, kuenda u kuete esilivilo koku tẽlisiwa kuocipango caye. Omanu vana ka va pokola kolondaka viwa tu va kundila, ndopo va ka nyõliwa. Ocituwa omanu va lekisa poku va kundila, oco ci ka linga ono yesombiso liavo. (2 Va Tes. 1:8, 9) Omo liaco, ka ca sungulukile Ukristão oku sima okuti, ka sukila oku kuata ombili yoku kunda omo lielavoko ‘liepinduko lia vakuesunga lava havakuesungako.’ (Ovil. 24:15) Ondaka ya Suku yi tu kuatisa oku limbuka okuti, vana va kasi ‘ndolohombo,’ va ka “enda keyambulo ka li pui.” Upange wetu woku kunda, u situlula ohenda ya Suku, kuenda u kuatisa omanu oku linga apongoloko oco va kuate ‘omuenyo ko pui.’ (Mat. 25:32, 41, 46; Va Rom. 10:13-15) Nda ka tu kundi, omanu va kuata ndati epuluvi lioku yevelela esapulo liwa oco va popeliwe?
9. Upange woku kunda u ku kuatisa ndati ove kuenda omanu wa siata oku kundila?
9 Oku kunda olondaka viwa, ku tu kuatisavo. (Tanga 1 Timoteo 4:16.) Ove hẽ ku tava okuti oku vangula ovina viatiamẽla ku Yehova Suku kuenda kelavoko Liusoma, ci pamisa ekolelo liove locisola u kuetele? Ka ci ku kuatisa hẽ oku lekisa ovituwa viwa? Oku kundila omanu olondaka viwa ka ku vokiya hẽ esanju liove loku lekisa esumbilo ku Suku? Vamanji valua okuti va kuete esumũlũho lioku longisa Ondaka ya Suku komanu, va siata oku limbuka ndomo espiritu sandu li kasi oku kuatisa omanu vaco oku lekisa ovituwa viwa.
KALA UKUAKULAVULULA
10, 11. (a) Yesu la Paulu va lekisa ndati okuti, va kala oku lavulula? (b) Lombombola ndomo tu pondola oku lavulula kupange woku kunda.
10 Omanu vana va tava oku va kundila olondaka viwa, pamue va pasuka kespiritu volonjila via litepa. Omo liaco, akundi va sukila oku lavulula lutate. Yesu wa lekisa ongangu yiwa yoku lavulula. Omo okuti Yesu wa kala omunu wa lipua, wa limbukile ovisimĩlo ka via sungulukile via va Fariseo, wa mola ndomo ukãi umue a likekembela akandu aye, kuenda wa limbuka ocituwa ciwa ukãi umue ocimbumba a lekisa. (Luka 7:37-50; 21:1-4) Yesu wa ponduile oku va kuatisa kespiritu, momo wa kũlĩhĩle ovina omunu lomunu a sukila. Pole, koloneke vilo, ufendeli wa Suku ka sukila oku lipua oco a lavulule lutate. Upostolo Paulu wa tukula ondaka yaco. Eye wa tiamisila olondaka viaye komanu valua, vakuavituwa via litepa.—Ovil. 17:22, 23, 34; 1 Va Kor. 9:19-23.
11 Nda tua lavulula lutate, ndeci Yesu la Paulu va linga, tu limbuka ndomo tu vetiya onjongole yomanu tu sanga kupange woku kunda. Eci enda konjo yomunu umue, kũlĩhĩsa nda vocimano conjo yaye muli olondimbukiso vi situlula ovituwa viaye lekalo liepata liaye. Citava okuti, eci o limbuka ndomo omanu va kasi oku linga upange umue, o va pandiya, kuenje, o fetika ombangulo yoku va kundila.
12. Momo lie tu sukilila oku yuvula ovina ka vi kuete esilivilo osimbu tu kasi kupange woku kunda?
12 Omunu o lavulula kespiritu, o yuvula oku taluka lovina ka vi kuete esilivilo. Oku sapela la manji osimbu tu kasi kupange woku kunda, ci pamisa ekolelo lietu. Pole, tu ivaluki okuti, ocimãho cetu, oku kundila omanu. (Uku. 3:1, 7) Omo liaco, tu sukila oku kuata utate okuti, ombangulo yetu ka yi tateka upange woku kunda. Tu sukilavo oku sapela ovina vi pondola oku kuatisa omanu tu sanga kupange woku kunda. Ndaño okuti pamue otelefone yi pondola oku tu kuatisa oku kundila omanu, tu sukila oku kuata utate okuti, eci yi sika, ka yi tateka ombangulo lomunu tua sanga konjo yaye.
SOKOLOLA EKALO LIOMUNU LOMUNU
13, 14. (a) Tu limbuka ndati ovina omunu tu sanga kupange woku kunda a sole? (b) Nye ci kuatisa omanu oku lekisa onjongole kovina viespiritu?
13 Vamanji vana va lavulula, eci va sanga omanu kupange woku kunda, va yevelela lutate ombangulo yavo. Apulilo api wa siata oku linga komanu o sanga vocikanjo oco va situlule ovisimĩlo viavo? O kuete hẽ ocituwa coku va pulisa ovina viatiamẽla ketavo, kungangala wa siata oku lingiwa posongo yene, kuenda ovilinga vĩvi violombiali? O pondola hẽ oku va vetiya oco va kuate onjongole kovina viespiritu poku lekisa kokuavo ovina via lulikiwa, kuenda oku va kuatisa lolonumbi Viembimbiliya? Olohutililo vi kuatisa vakuapata osi, kuenda omanu vana ka va tava ku Suku. Vamue, va siata oku kuata atatahãi okuti, ka kuli umue o yevelela olohutililo viavo. Vakuavo va siata oku pula ndoco: Anga hẽ Suku o yevelela olohutililo viosi? Nda ka yevelela olohutililo viosi, nye tu sukila oku linga oco a vi yeve?
14 Tu pondola oku lilongisa uloño woku fetika ombangulo, poku kũlĩhĩsa ndomo akundi vana va loñoloha va siata oku ci linga. Kũlĩhĩsa ndomo va linga apulilo ana okuti, ka a sumuisa omunu va sanga kupange woku kunda. Ovipala via vamanji vaco lolondaka viavo, vi lekisa hẽ okuti va kapako omunu va sanga konjo?—Olosap. 15:13.
OCIKEMBE KUENDA OKU LOÑOLOHA
15. Momo lie tu sukilila oku lekisa umbombe eci tu enda kupange woku kunda?
15 Nda omunu umue o ku pasula kotulo, ove hẽ o sanjuka? Omanu valua nda umue o va pasula kotulo, va sumua. Vakuavo va sole oku va pasula levando. Cimuamue haico ci pita letu poku likolisilako oku pasula omanu kespiritu. Nda poku pasuisa omunu umue konjo yaye wo sanga okuti wa tema, u tambulula ndati? Lekisa esumbilo loku eca olopandu kokuaye, noke lumbombe walua tunda konjo yaco. (Olosap. 15:1; 17:14; 2 Tim. 2:24) Esumbilo liove li pondola oku vetiya omunu waco okuti, onjanja yikuavo eci a nyuliwa la Manji ukuavo, u tambulula ciwa.
16, 17. Ndamupi tu pondola oku kuata uloño woku limbuka ovisimĩlo viomanu kupange woku kunda?
16 Olonjanja vimue, o pondolavo oku kuatisa omunu una ka ku tambulula ciwa. Omanu vamue va siata oku popia ndoco: “Nda pandula. Ndi kuete ale etavo liange.” Pamue, va popia vati: “Si yongola oku vangula ovina viatiamẽla ketavo.” Olondaka evi ovio omanu vamue va siata oku popia, oco va tu tete kombangulo. Pole, nda wa pandikisa loku linga apulilo awa, o pondola oku vetiya omanu oku lekisa onjongole kovina viespiritu.—Tanga Va Kolosai 4:6.
17 Olonjanja vimue, nda tu sanga omunu umue ka kuete otembo yoku tu yevelela, tu eca olopandu kokuaye, noke tu tunda konjo yaco. Pole, osimbu ka tua tundile, tu sukila oku vangula lonjanga ondaka yimue yi kuete esilivilo. Vamanji vamue, va kuete uloño woku yulula lonjanga Embimbiliya, loku tanga ocinimbu cimue ci pondola oku kuatisa omunu oku sokolola, kuenda va linga epulilo limue kuenje, va tunda konjo yaco. Oku loñoloha kuavo, kua siata oku vetiya omanu oku lekisa onjongole loku limbuka okuti ndaño ka va kuete otembo, pole, va pondola oku yevelela ombangulo vakukutu amue. Momo lie ku setekela oku ci lingavo?
18. Momo lie tu sukilila oku kuata uloño poku eca uvangi ka wa sokiyiwile?
18 Kovopange etu eteke leteke, tua siata oku sanga omanu va lekisa onjongole kesapulo liwa okuti, nda tua lipongiya ciwa, tu va kuatisa poku eca kokuavo uvangi ka wa sokiyiwile. Vamanji valua poku enda kupange, va siata oku kapa vakolombele avo alivulu amue. Ovo va patekela ocinimbu cimue Cembimbiliya okuti, eci va kuata epuluvi va sapela lomanu. Citava okuti o vangula la mitavaso yupange woku kunda, ale lakundi va velapo oco va ku kuatise oku ci linga.
LEKISA UMBOMBE KU VANGANDIOVE
19. Momo lie tu sukilila oku kuata epandi poku kundila vangandietu?
19 Tu sukila oku kuatisa vangandietu oco va tave kolondaka viwa. (Yeh. 2:13; Ovil. 10:24, 48; 16:31, 32) Nda alikolisilo etu ka a kasi oku eca onima yiwa, okuti noke ci tepulula esanju lietu, ka tu ka liwekipo. Pamue tu sima okuti, ka kuli vali eci ci lingiwa oco vangandietu va pongolole ovituwa viavo. Citava okuti, ovitangi vimue vi pongolola ovisimĩlo via vangandietu. Omo liaco, nda wa likolisilako oku mioñolola uloño wove woku kunda, o kuata onima yiwa.
20. Momo lie oku kuata utate poku kundila vangandietu, ci kuetele esilivilo?
20 Tu sukila oku kapako ovisimĩlo via vangandietu. (Va Rom. 2:4) Ka tua siatele hẽ oku lekisa umbombe poku vangula lomanu tu sanga kupange woku kunda? Omo liaco, tu lekisivo esumbilo poku vangula la vangandietu. Ovilinga viove vi lekise ndomo elilongiso Liembimbiliya lia ku kuatisa oku kuata ovituwa viwa. (Va Efe. 4:23, 24) Lekisa kokuavo ndomo Yehova a siata o ku ku sumũlũisa omo ‘lialongiso aye.’ (Isa. 48:17) Epata liove li sukila oku limbuka ovituwa viove viwa omo lioku kala Ukristão.
21, 22. Tukula ulandu umue u lekisa ndomo oku kuata epandi ku kuatisa vangandietu oku kula kespiritu.
21 Manji umue ukãi wa soneha ndoco: “Nda seteka oku kundila va manjange ekũi la vatatu, poku vangula loku lekisa ovituwa viwa kokuavo. Unyamo lunyamo, nda enda oku va sonehela ovikanda. Vokuenda kueci ci soka 30 kanyamo, ame lika nda kala Ombangi ya Yehova vepata lietu.”
22 Manji yaco, wa amisako hati: “Eteke limue, nda vangula votelefone la manjange ukãi wa kala ocipãla lame. Eye wa ndi sapuila hati, wa pinga ku manji umue oco o longise Embimbiliya, pole, manji yaco ka ci lingile. Eci ndo sapuila okuti, ndi yongola oku u kuatisa, eye wa popia hati: ‘Citava oku ndi longisa pole, si yongola oku linga Ombangi ya Yehova.’ Noke yoku u tumisa elivulu losapi hati: Embimbiliya li Longisa Nye?, nda sapela laye olonjanja vimue. Pole, ka tangele elivulu liaco. Onjanja yikuavo, nda pinga kokuaye oco a kuate elivulu peka, osimbu tua kala oku vangula votelefone ci soka 15 kakukutu, kuenda tua tanga ovinimbu vimue Viovisonehua loku lekisa elomboloko liaco. Noke yoku ci linga olonjanja vialua, eye wa yonguile oku lilongisa ci pitahãla 15 kakukutu. Kuenje, wa fetika oku ndi vilikiya votelefone eteke leteke oco a lilongise Embimbiliya. Olonjanja vimue, tua enda oku ci linga koñolosi osimbu ka tua pekelele. Vapuluvi akuavo, nda enda oku u longisa olonjanja vivali veteke. Unyamo wa kuamamo wa papatisiwa kuenje, unyamo ukuavo, wa litumbika kupange wakundi votembo yosi.”
23. Momo lie tu sukilila oku amamako oku kuatisa omanu oco va pasuke kotulo tuespiritu?
23 Tu sukila oku likolisilako oku kuatisa omanu oku pasuka kotulo tuespiritu. Kuli handi omanu valua vakuotima wa sunguluka, va kasi oku tava oku pasuka kotulo tuespiritu. Osãi losãi, ci pitahãla 20.000 komanu, va kasi oku linga Olombangi Via Yehova poku papatisiwa. Omo liaco, tu pokoli kolondaka Paulu a sonehela manjaye Arkipo wo kocita catete poku u sapuila hati: ‘Lavulula ciwa ocikele cupange wa tambula ku Ñala.’ (Va Kol. 4:17) Ocipama ci kuãimo, ci ka lekisa elomboloko lioku kunda lonjanga.
[Apulilo Elilongiso]
[Okakasia kemẽla 13]
NDOMO O PASUKA KOTULO
▪ Yuvula ovilinga viowelema
▪ Likandangiya oku pekela kespiritu
▪ Kuata ovisimĩlo via sunguluka lomanu o sanga vocikanjo cove
▪ Seteka olonjila vikuavo vioku kundila omanu
▪ Limbuka esilivilo liupange woku kunda
