Apulilo a Lingiwa la Vakuakutanga

Citava hẽ okuti Ukristão o tundisiwa vekongelo omo liocituwa coku tala oviluvialuvia viomanu va kasi epolõla lava va linga ukahonga?

▪ Citava okuti Ukristão waco o tundisiwa. Eli olio esunga lieci sukilila oku yuvula oku tala ovina viosi viatiamẽla kupuepue, ci kale alivulu, pamue alitalatu, ale olofilme lolovideo, kuenda ovina vi sangiwa vo Internet.

Ocituwa coku tala oviluvialuvia viomanu va kasi epolõla lava va linga ukahonga, ca lisanduila kolonepa viosi violuali. O Internet ya siata oku leluisa oku tala ovina via vĩha, kuenje, omanu vana va kupikila vefengi liaco, va livokiya calua. Citava okuti amalẽhe valua kuenda akulu vamue, poku tala vo Internet, vocipikipiki va mõla ovina viaco ndaño ka va yongola oku vi tala. Vakuavo, va sandiliya oku tala ovina viaco locipango, kuenda ka va kuete ohele yoku vi tala, momo va siata oku ci lingila vu yombeki volonjo viavo kuenda voloseketa. Momo lie Akristão va kuetele ohele yoku tala ovina viaco?

Esunga liaco tu li sanga kelungulo lia Yesu wa popia hati: “U wa vanja ukãi ho liveli, vutima waye wo pekelisa ale.” (Mat. 5:28) Oku lipekela kukãi lulume okuti, va tokekisa olohuela, ku nena esanju pokati kavo. (Olosap. 5:15-19; 1 Va Kor. 7:2-5) Pole, eci hacoko ci pita locituwa coku tala oviluvialuvia viomanu va kasi epolõla lava va linga ukahonga. Momo oviluvialuvia viaco vi lekisa ovilinga viumbondo vi vetiya ovisimĩlo viukahonga, vina Yesu a lungula okuti, tu sukila oku vi yuvula. Oku tanga alivulu a lombolola ovituwa viukahonga, loku tala oviluvialuvia viomanu  va kasi epolõla lava va linga ukahonga, ka ci likuata lelungulo lia Suku li popia hati: “Ipayi ovituwa vĩvi vi tiama koluali, viokuti ukahonga, levĩho, lokanyaima, kuenda oñeyi yĩvi, locipululu ca lomboloka efendelo lioviteka.”​—Va Kol. 3:5.

Nda Ukristão wa tala lika onjanja yimosi ale vivali, omanu va kasi epolõla lava va linga ukahonga, nye ci lingiwa? Ukristão waco, o sokisiwa locitangi Ukualosamo Asafe a pitile laco onjanja yimue eci a popia hati: “Ame puãi olomãhi viange via si oku sielũha. Oku enda kuange kua linga ndoku lipalanana.” Anga hẽ Ukristão o pondola oku kuata utima wa yela lombembua la Suku nda o kuete ocituwa coku tala alitalatu a lekisa akãi va kasi epolõla ale omanu va linga ukahonga? Ka kuata utima wa yela. Momo Asafe ka kuatele ombembua. Eye wa popia hati: “Eteke liosi nda yambuiwa. Nda longisua omẽle lomẽle.”​—Osa. 73:2, 14.

Ukristão wosi wa wila vekandu liaco, o sukila oku pasuka kuenda oku sandiliya ekuatiso vekongelo, oco a pame konepa yespiritu. Embimbiliya li popia hati: “Nda umue wa kuatiwa loku lueya kumue, ene [wa pami kespiritu] u tiuli lutima womboka loku lunguka sanga lovevo o yonjiwa.” (Va Gal. 6:1) Ukulu wekongelo umosi ale vavali va pondola oku eca kokuaye ekuatiso a sukila, oku kongelamo ‘ohutililo yekolelo yina yi popela omunu o vela, kuenje, nda wa linga akandu ecelua.’ (Tia. 5:13-15) Vana va sandiliya ekuatiso oco va yuvule ocituwa coku tala oviluvialuvia viomanu va kasi epolõla lava va linga ukahonga, va siata oku limbuka okuti oku pamisa ukamba wavo la Suku ca va kuatisa ndeci Asafe a kuatisiwa.​—Osa. 73:28.

Upostolo Paulu wa popia hati, vamue va lueya, “ka va likekembelele evĩho lukahonga lupuepue va lingainga.” a (2 Va Kor. 12:21) Ulongisi umue o tukuiwa hati, Marvin R. Vincent, poku tukula ondaka ya pongoluiwa kelimi lio Helasi hati, “evĩho,” wa soneha hati, ondaka yaco yi lomboloka “ocina ca vĩhisiwa lumbondo.” Alitalatu amue upuepue a vĩha calua okuti, oviluvialuvia viomanu va kasi epolõla lava va linga ukahonga ci sule. Kuli oviluvialuvia vimue viupuepue vi lekisa oku lipekela kualume lalume, ale akãi lakãi, oku lipekela kuomanu valua, oku lipekela lovinyama, oku lipekela lomãla, oku putula akãi, oku pekela lakãi loku va tipula, kuenda oku va kangisa. Koloneke via Paulu omanu vamue okuti “olondunge viavo [via kala] vowelema,” veya oku ‘lieca kupuepue loku livela oku linga evĩho liosi.’​—Va Efe. 4:18, 19.

Paulu kelivulu lia Va Galatia 5:19, wa tukula ondaka “evĩho.” Ulongisi umue wo kofeka yo Inglaterra, wa popia hati, ondaka yaco “yi lomboloka ovilinga viosi vi kutisa osõi.” Momo lie Akristão va sukilila oku yuvula oku tala oviluvialuvia viomanu va kasi epolõla lava va linga ukahonga, kuenda ‘ovina viosi vi kutisa osõi?’ Kelivulu lia Va Galatia 5:19-21, Paulu wa malusula loku popia hati: “Ava va lingainga ovina” viaco via vĩha, ‘ka va ka piñala usoma wa Suku.’ Nda Ukristão umue wa siata oku tala alitalatu omanu va kasi epolõla lava va linga ukahonga vokuenda kuotembo yalua, kuenje, ka likekembela kuenda ka sipo ocituwa caco, ka ci tava okuti o kala vekongelo. Eye o tundisiwa oco tu teyuile ekalo liekongelo kuenda oku li yelisa.​—1 Va Kor. 5:5, 11.

Tu sukila oku ivaluka okuti, vamanji vamue va yapuisiwa locituwa coku tala oviluvialuvia viomanu va kasi epolõla lava va linga ukahonga, va siata oku pinga ekuatiso kakulu vekongelo, kuenje, va linga apongoloko awa. Yesu wa vetiya Akristão vo ko Sardesi hati: “Kolisa eci ca siala haico ci yongolavo oku fa. . . . Ivaluka eci wa tambula leci wa yeva. Ci lava, kuenje ove muẽle likekembela akandu ove. Nda ku tava oku pasuka, . . . lowola yaco njiya kokuove ku yi.” (Esit. 3:2, 3) Omunu o kuete ocituwa caco, o sukila oku likekembela loku siapo ocituwa coku tala oviluvialuvia viomanu va kasi epolõla lava va linga ukahonga.​—Yuda 22, 23.

Omo liaco, vosi yetu tu lavululi oco ka tu ka yapuisiwe leyonjo lioku tala oviluvialuvia viomanu va kasi epolõla lava va linga ukahonga. Tu sukila oku yuvula oku tala ovina viosi viatiamẽla koviluvialuvia viukahonga!

[Atosi pombuelo yamẽla]

[Etosi lia velapo kemẽla 30]

Nda Ukristão wa wila veyonjo lioku tala ovilinga viomanu va kasi epolõla lava va linga ukahonga, o sukila oku pasuka loku sanda ekuatiso konepa yespiritu