Ku ka Vanje ‘Kovina Via Siala Konyima’

“Lomue o pondola oku iñila Vusoma wa Suku, nda eci a kapa eka liaye kosaluwa, o vanja kovina via siala konyima.”​—LUKA 9:62, NW.

O TAMBULULA NDATI?

Momo lie tu sukilila oku ‘ivaluka ukãi wa Lote?’

Kovina vipi vitatu tu sukila oku yuvula oku tiamisila utima?

Tu pondola oku amamako ndati oku endela vocisoko ca Yehova?

1. Elungulo lipi Yesu a eca, kuenda li votola epulilo lipi?

 YESU KRISTU wa lungula olonjeveleli viaye hati: “Ivaluki ukãi wa Lote.” (Luka 17:32) Tunde eci Yesu a eca elungulo eli, pa pit a ale ci pitahãla 2.000 kanyamo. Nye Yesu a yonguile oku popia lelungulo eli? Va Yudea vana Yesu a sapuila olondaka evi, ka va sukilile elomboluilo likuavo. Momo va kũlĩhĩle ovina via pita lukãi wa Lote. Osimbu Lote a kala oku tila volupale luo Sodoma kumue lepata liaye, ukãi waye wa vanja konyima, kuenje wa linga ongunji yomongua.​—Tanga Efetikilo 19:17, 26.

2. Momo lie ukãi wa Lote a vanjela konyima, kuenda esino liaye lio kokela ovitangi vipi?

² Momo lie ukãi wa Lote a vanjela konyima? Anga hẽ wa yonguile oku tala ovina via kala oku pita? Ale wa vanja konyima omo liekambo liekolelo? Wa vanja hẽ konyima omo liovina viwa a sile volupale luo Sodoma? (Luka 17:31) Omo liesino wa vanja konyima, kuenje, wa pesela omuenyo waye. Sokolola ovitangi a pita lavio! Eye wa fila kumosi lolonungi vio vo Sodoma kuenda vio vo Gomora. Eli olio esunga lieci Yesu a popela hati: “Ivaluki ukãi wa Lote”!

3. Yesu wa lekisa ndati okuti, tu sukila oku yuvula oku vanja kovina via siala konyima?

³ Tu kasi kotembo yimue okuti, tu sukila oku yuvula oku vanja kovina via siala konyima. Yesu wa tukula ondaka yaco eci a tambulula ulume umue wo pinga nda citava oku liusika lepata liaye, oco noke a linge ondonge yaye. Kuenje, Yesu wo tambulula hati: “Lomue o pondola oku iñila Vusoma wa Suku, nda eci a kapa eka liaye kosaluwa, o vanja kovina via siala konyima.” (Luka 9:62, NW) Anga hẽ etambululo Yesu a eca kulume waco ka lia sungulukile? Lia sunguluka, momo Yesu wa kũlĩhĩle okuti, ulume waco wa linga epingilo kokuaye oco ka ka tambule ovikele. Yesu wa lekisavo okuti, nda omunu ka tẽlisa ovikele viaye, ci lekisa okuti wa tiamisila utima waye ‘kovina via siala konyima.’ Anga hẽ, nda omunu o talavaya losaluwa kuenje, o vanja konyima ka kuata ovitangi?  Nda ka tiamisila utima waye kovina a kasi oku linga, upange waco u nyõleha.

4. Kovina vipi tu sukila oku tiamisila utima wetu?

⁴ Oco tu tiamisile utima kovina vi keya kovaso yoloneke, tu sukila oku yuvula oku sokolola ovina via pita letu kosimbu. Kelivulu Liolosapo 4:25, ku popia ndoco: “Ovaso ove a vanje kovaso, a suñame muẽle miu!”

5. Momo lie tu sukilila oku yuvula oku vanja kovina via siala konyima?

⁵ Tu sukila oku yuvula oku vanja kovina via siala konyima. Momo lie? Momo tu kasi “koloneke via sulako.” (2 Tim. 3:1) Ndaño okuti, ka tu kasi pokati kalupale avali a nyõliwa kosimbu, pole, tu lavoka enyõleho liovina viosi vĩvi vi sangiwa voluali lulo. Nye ci tu kuatisa oku yuvula ovitangi via pita lukãi wa Lote? Catete, tu sukila oku limbuka ovina via siala konyima okuti, vi pondola oku tu yonja kuenje, tu tiamisila lika utima wetu kovina viaco. (2 Va Kor. 2:11) Tu konomuisi eci ci lomboloka ovina viaco kuenda ndomo tu yuvula oku tiamisila utima kovina viaco.

OKU SOKOLOLA OLONEKE VIWA VIO KOSIMBU

6. Momo lie olonjanja vimue ka ca sungulukilile oku kolela kolondunge vietu?

⁶ Oku sokolola oloneke viwa vio kosimbu, ci koka ovitangi. Omo liaco, tu sukila oku yuvula oku kolela kolondunge vietu. Pamue, ka tu kapiko ovitangi tua pita lavio kosimbu omo lioku sokolola lika esanju tua kuata kuenje, tu sima okuti, esanju liaco lia velapo eli tu kuete cilo. Ovisimĩlo viaco, vi pondola oku tu vetiya oku sima okuti, oloneke vio kosimbu viwa. Pole, Embimbiliya li tu lungula ndoco: “Ku ka pule huti, ‘Ci kasi ndati okuti oloneke viosiahũlu via velapo okuti oloneke vilo vi sule?’ Momo eci ku ci pula lolondunge.” (Uku. 7:10) Momo lie oku kuata ovisimĩlo viaco ci kokela ovitangi?

7-9. (a) Ovina vipi via pita la va Isareli eci va kala Kegito? (b) Nye ca vetiya va Isareli oku kuata esanju? (c) Momo lie va Isareli va fetikila oku ñuñuna loku lisiõsiõla?

⁷ Kũlĩhĩsa ovitangi via pita la va Isareli koloneke via Mose. Ndaño okuti va Isareli va tendiwile ndakombe vofeka Yegito, noke yolofa via Yosefe, va Egito ‘va va kapela asongui va enda oku va yambula lupange.’ (Etu. 1:11) Kuenje, omanu va Suku veya oku liyaka locitangi cinene momo Fareo wa yonguile oku ponda omãla vosi valume oco a tepulule etendelo liavo. (Etu. 1:15, 16, 22) Eli olio esunga lieci Yehova a sapuilila Mose hati: “Nda mola ohali yomanu vange va kasi [Vegito]. Nda yeva ndeci va lilila asongui vavo vupange, nda kũlĩha olohali viavo.”​—Etu. 3:7.

⁸ O pondola hẽ oku sokolola esanju va Isareli va kuata eci va yovuiwa Kegito? Ovo va mola ovikomo vinene Yehova a linga, eci a nena Ekũi Liafengi ku Fareo kumue lomanu vaye. (Tanga Etundilo 6:1, 6, 7.) Ndaño okuti va Egito ka va yonguile oku eca va Isareli oco va ende kofeka yavo, pole, va va kisika oku tunda vo Egito, loku va ĩha ulu lopalata, ndu okuti, afendeli va Suku ‘va punda ovina viaco ku va Egito.’ (Etu. 12:33- 36) Va Isareli va kuata esanju eci va mola oku kunduiwa kua Fareo kumue lolohoka viaye Vokalunga ka Kusuka. (Etu. 14:30, 31) Oku mola ovina viaco, nda ca pamisa ekolelo liavo!

⁹ Noke liotembo yimue, tunde eci omanu va yovuiwa lovikomo, va fetika oku ñuñuna loku lisiõsiõla. Momo lie va lisiõsũila? Va lisiõsũila okulia! Va Isareli ka va sanjukilile ovina Yehova a enda oku va ĩha, kuenje, va liyeya vati: “Tua ivaluka olõsi tua lialia ño ocali [Kegito], lovitende, lolomelãu, layupolu, losapola, lovayu. Puãi cilo ovitima vietu via hongua. Ka tu kuete vali eci tu vanja te [lika o] mana eyi.” (Ate. 11:5, 6) Va Isareli va kuata ovisimĩlo ka via sungulukile, kuenje, va yonguile oku tiukila Kegito, oco va linge vali apika! (Ate. 14:2-4) Omo okuti va Isareli va vanja kovina via siala konyima, ka va taviwile la Yehova.​—Ate. 11:10.

10. Ovolandu a pita la va Isareli a tu longisa nye?

¹⁰ Ovolandu a pita la va Isareli a tu longisa nye koloneke vilo? Nda tu pita lovitangi, tu yuvuli oku sokolola ovina viwa via pita letu kosimbu, eci ka tua fetikile oku lilongisa Embimbiliya. Ndaño okuti ca sunguluka oku sokolola ovolandu a pita letu kosimbu, ale oku ivaluka ovina vimue viwa, pole, tu sukila oku kuata ovisimĩlo via sunguluka viatiamẽla kovina viaco. Momo nda ka tu lavulula, tu sumua omo liovina vi kasi oku pita letu cilo, kuenje, tu yonjiwa loku sokolola ovina tua enda oku linga kosimbu.​—Tanga 2 Petulu 2:20-22.

OVINA VIA SIALA KONYIMA

11. Vamanji vamue va siata oku alikolisilo va linga kosimbu?

¹¹ Vamanji vamue eci va vanja kovina via siala konyima, va fetika oku sima okuti, alikolisilo va linga kosimbu oco va siepo ovina viaco, ka a kuete esilivilo. Citava okuti o kuete elilongiso lia velapo, lina nda lia ku ĩha ekemãlo, kuenda olombongo vialua, pole, wa siapo ovina viaco. Vamanji valua va siapo ovina vi nena ekalo liwa ndeci: Olomĩlu vi eca olombongo vialua, olomapalo, kuenda elilongiso lia velapo. Cilo, otembo ya pita, pole, esulilo lioluali lulo handi ka lieyile. Nda ovina viaco via pitile love, nda wa sokolola hẽ okuti onjila wa nõla ka yi kuete esilivilo?

12. Paulu wa tendele ndati ovina via siala konyima?

¹² Upostolo Paulu wa siapo ovina vialua oco a kuame Kristu. (Va Fil. 3:4-6) Wa tendele ndati ovina via siala konyima? Eye o tu sapuila hati: “Ovina via kala ndonima kokuange, nda vi tenda ndepese eci nda litumbika ku Kristu.” Momo lie? Eye wa amisako hati: “Ndi tenda ovina viosi ndu okuti, ka vi kuete esilivilo omo lioku kũlĩha Kristu Yesu, Ñala yange. Vonduko yaye, nda siapo ovina viosi, kuenje, ndi vi tenda ndovipelekese oco ndi tambule onima yi tunda ku Kristu.” a (Va Fil. 3:7, 8, NW) Nda  omunu inasi ovinene omo ka vi kuete esilivilo, ka liveli. Cimuamue haico ca pita la Paulu okuti, ka livelele omo lioku siapo ekemãlo a kuata voluali. Momo wa tendele ovina viaco ndovipelekese.

13, 14. Tu kuama ndati ongangu ya Paulu?

¹³ Nye ci tu kuatisa, nda tua siata oku sima okuti ovina via siala konyima viwa? Tu sukila oku kuama ongangu ya Paulu. Tu ci linga ndati? Kũlĩhĩsa ovina via velapo, o kuete cilo. Ove o kuete ukamba la Yehova, kuenda eye wa kũlĩha okuti, wo kolela. (Va Hev. 6:10) Anga hẽ voluali muli ukuasi umue wa velapo okuti asumũlũho tu kuete cilo, kuenda ana tu lavoka kovaso yoloneke a sule?​—Tanga Marko 10:28-30.

¹⁴ Paulu wa tukulavo ovina vimue vi pondola oku tu kuatisa oku amamako lekolelo. Eye wa popia hati: “Njivala ovina vio konyima loku yolokela eci ci kasi kovaso.” (Va Fil. 3:13) Ivaluka okuti, Paulu wa tukula ovina vivali vi kuete esilivilo lia velapo. Catete, tu sukila oku ivalako ovina via siala konyima, okuti, ka tu pesila ongusu lotembo yetu koku sokolola ovina viaco. Cavali, tu sukila oku tiamisila utima kovina vi keya kovaso yoloneke, ndeci ukuakulupuka a linga, okuti, o likolisilako oku yoloka toke kesulilo liolupesi.

15. Oku sokolola ongangu yomanu va vumba Suku lekolelo ci tu kuatisa ndati?

¹⁵ Eci tu sokolola ongangu yiwa yomanu vo kosimbu lava vo koloneke vilo va vumba Suku lekolelo, tu vetiyiwa oku amamako oku tiamisila utima kovina viespiritu okuti, ka tu vanji kovina via siala konyima. Ivaluka ongangu ya Avirahama la Sara okuti, nda va sokoluile ovina via siala konyima, nda ‘va tiukila ko Uri.’ (Va Hev. 11:13-15) Pole, ka va tiukilile kolupale luaco. Mose eci a tunda vofeka Yegito onjanja yatete, wa sile ovina vialua okuti, lomue pokati ka va Isareli weya oku vi kuata. Ka kuli uvangi u tukula ovina viaco. Pole, Embimbiliya li tu sapuila ndoco: “[Mose] wa tendele okuti, oku lavisiwila Kristu owo ukuasi wa velapo, okuti ovina viosi vio Kegito vi sule, momo, wa lavoka oku tambula onima.”​—Va Hev. 11:26, NW.

OVOLANDU ÃVI O KOSIMBU

16. Ovolandu a pita letu kosimbu, pamue a tu vetiya oku kuata ovisimĩlo vie?

¹⁶ Kuli ovolandu amue a pita letu kosimbu okuti oku a sokolola, a tu sumuisa. Citava okuti tu kuata ovisimĩlo ka via sungulukile omo liakulueya etu o kosimbu. (Osa. 51:3) Pamue, eci tu tambula elungulo, tu sumua. (Va Hev. 12:11) Olonjanja vimue, tu kuata ovisimĩlo ka via sungulukile omo lioku sima okuti, ocitangi cetu ka ca tetuluiwile ciwa. (Osa. 55:2) Nye ci tu kuatisa oku yuvula oku tiamisila utima wetu kovina via siala konyima? Tu konomuisi ovolandu atatu.

17. (a) Momo lie Paulu a litukuila hati, ‘pokati kolosandu eye o sule?’ (b) Nye ca kuatisa Paulu oku yuvula oku yapuisiwa lovisimĩlo ka via sungulukile?

¹⁷ Akulueya o kosimbu. Upostolo Paulu wa litukula hati, ‘pokati kolosandu viosi, eye o sule.’ (Va Efe. 3:8) Momo lie a popela olondaka evi? Eye wa tambulula hati: “Momo nda kangisa ekongelo lia Suku.” (1 Va Kor. 15:9) O pondola  hẽ oku sokolola esumuo Paulu nda a kuata, eci a lisanga lomanu vana a lambalala kosimbu? Pole, Paulu ka ecelele okuti ovisimĩlo ka via sungulukile viu tateka oku linga upange waye. Pole, wa tiamisila utima kohenda Suku a lekisa kokuaye. (1 Tim. 1:12-16) Kuenje, wa eca olopandu, kuenda wa amamako oku linga upange woku kunda. Vovina via siala konyima Paulu a yuvula oku tiamisila utima, mua kongelele ovituwa vĩvi a kuata kosimbu. Omo liaco, nda tu tiamisila utima kohenda Yehova a lekisa kokuetu, tu yuvula oku sakalala lovina ka via sungulukile tua pita lavio kosimbu okuti, ka tu tẽla oku vi pongolola. Tu sukila oku likolisilako oku vumba Yehova.

18. (a) Nye ci pondola oku pita letu nda noke yoku tambula elungulo limue tu sumua? (b) Tu kapako ndati olondaka via Salomone viatiamẽla koku tava kalungulo?

¹⁸ Elungulo li sumuisa. Nda eci tu tambula elungulo limue tu sumua, kuenda tu kuata ocikumbiti, nye tu sukila oku linga? Ovisimĩlo viaco, vi pondola oku tu nenela ovitangi lehonguo, kuenje, tu vetiyiwa oku ‘sokolola kovina via siala konyima.’ (Va Hev. 12:5) Nda tu ‘lavisa’ elungulo, ale tu tava lika ocikukũi, pole, noke tu ‘liwekapo’ oku pokola, tu kuata ovitangi. Momo elungulo li eciwila oku tu pindisa. Omo liaco, tu pokoli kolondaka via Salomone wa popia hati: ‘Kuata kalungulo, ku ka a ece vali, a patekela momo a ku ĩha omuenyo.’ (Olosap. 4:13) Ndeci ukuakuendisa ekãlu a pokola kolondimbukiso vi kasi vatapalo, oku tava kalungulo loku lekisa epokolo, ci tu kuatisa oku endela vonjila yomuenyo.​—Olosap. 4:26, 27; tanga Va Heveru 12:12, 13.

19. Tu kuama ndati ongangu ya Havakuki la Yeremiya?

¹⁹ Ovisimĩlo viokuti ocitangi cimue ka ca tetuluiwile lesunga. Olonjanja vimue, tu kuata ovisimĩlo ndevi uprofeto Havakuki a kuata, eci a pinga ku Yehova esunga, momo ka kuatele elomboloko lieci Yehova a ecelela ovitangi vimue. (Hav. 1:2, 3) Omo liaco, tu sukila oku kuama ongangu yuprofeto Havakuki, wa lekisa ekolelo poku popia hati: ‘Ndi yolela kuenda ndi sanjukila Yehova, momo eye Suku yeyovo liange.’ (Hav. 3:18) Nda tua kuata ocituwa ‘coku talamẽla’ ndeci, Yeremiya a linga, tu pondola oku kolela okuti Yehova, Suku yesunga, o ka pengulula ovina viosi votembo a sokiya.​—Asiõ. 3:19-24.

20. Tu limbuka ndati okuti, tua kapako elungulo Liembimbiliya liokuti: “Ivaluki ukãi wa Lote”?

²⁰ Tu kasi kotembo yimue yi komõhisa. Ovina viwa vi kasi oku pita cilo, vi eca uvangi weci ci keya kovaso yoloneke. Citava okuti umue pokati ketu, wa linga apongoloko anene vocisoko ca Yehova. Omo liaco, tu pokoli kelungulo Liovisonehua lioku amamako oku vanja kovaso, oco tu yuvule oku sokolola ovina via siala konyima. Nda tua ci linga, tu kuatisiwa lelungulo Liembimbiliya li popia hati: “Ivaluki ukãi wa Lote”!

[Atosi pombuelo yamẽla]

[Apulilo Elilongiso]