Vumba Yehova Lutima Wove Wosi

‘Amolange, kũlĩha Suku ya so yove, u vumba lutima wove wosi.’​—1 ASA. 28:9.

TAMBULULA APULILO A KUÃIMO:

Utima wocindekaise u lomboloka nye?

Nye ci pondola oku tu kuatisa oku pendusula utima wetu?

Tu vumba ndati Yehova lutima wosi?

1, 2. (a) Onepa yipi yetimba lietu ya siata oku tukuiwa calua Vondaka ya Suku vupopi wocindekaise okuti, vikuavo ci sule? (b) Momo lie tu sukilila oku kuata elomboloko liondaka utima wocindekaise?

 ONDAKA YA SUKU, olonjanja vimue yi lombolola vupopi wocindekaise ndomo ovimatamata vietimba liomunu via tuwa. Yovi wa soneha ndoco: “Ovaka  ange ka a lingile cimue cĩvi.” Soma Salomone wa popia hati: “Asapulo awa a pamisa akepa.” Yehova wa pamisa Esekiele poku u sapuila hati: “Hu sokisa ndutale koku [pama], ewe li sule.” Upostolo Paulu vo sapuilavo hati: ‘O kasi oku kapa ovina vimue viokaliye vatũi etu.’​—Yovi 16:17; Olosap. 15:30; Esek. 3:9; Ovil. 17:20.

² Kuli ocimatamata cimue cetimba liomunu ca siata oku tukuiwa calua Vembimbiliya vupopi umue wocindekaise okuti, vikuavo ci sule. Hana wa tukula ocimatamata caco vohutililo hati: “Utima wange u sanjukila Yehova.” (1 Sam. 2:1) Asonehi Vembimbiliya va tukula utima ci soka ohulukãi kolonjanja vupopi wocindekaise. Oku kuata elomboloko liondaka “utima” ci kuete esilivilo, momo Embimbiliya li tu vetiya oco tu teyuile utima wetu.​—Tanga Olosapo 4:23.

UTIMA WOCINDEKAISE U LOMBOLOKA NYE?

3. Tu kuata ndati elomboloko liondaka “utima” ndomo ya siata oku tukuiwa Vembimbiliya? Tukula ocindekaise cimue.

³ Ndaño ondaka ya Suku ka yi tukula onduko yikuavo ‘yutima,’ pole, yi tu kuatisa oku limbuka elomboloko liondaka yaco. Tu kuata ndati elomboloko liaco? Sokolola ndeci okuti, ocimano cimue ca kapiwa otuvawe tua posoka. Poku tala vocimano, tu limbuka okuti, otuvawe tuaco, tua kapiwa lutate oco tu posuise ocimano caco. Cimuamue haico  ci pita letu okuti, nda tu kũlĩhĩsa lutate ondaka “utima” ndomo ya siata oku tukuiwa vovinimbu vialua Viembimbiliya, tu pondola oku kuata elomboloko liovindekaise viatiamẽla kondaka yaco. Ocindekaise caco ci lomboloka nye?

4. (a) Ondaka utima yi lomboloka nye? (b) Olondaka Yesu a popia vi lomboloka nye, ndomo via tukuiwa kelivulu lia Mateo 22:37?

⁴ Asonehi Vembimbiliya, va tukula ondaka “utima” oco va lekise ndomo omunu a tuwa. Vovituwa viomunu mua kongela ovina vimue ndeci: Olonjongole a kuete, ovisimĩlo viaye, ovituwa, olondunge, ukũlĩhĩso, kuenda ovimãho viaye. (Tanga Esinumuĩlo 15:7; Olosapo 16:9; Ovilinga 2:26.) Elivulu limue li lombolola okuti, ondaka yaco, yi lomboloka ovina “vi kasi kutima womunu.” Olonjanja vimue, ondaka “utima,” yi kuete elomboloko likuavo. Yesu wa popia hati: “Sola [Yehova] Suku yove lutima wove wosi lomuenyo wove wosi lolondunge viove viosi.” (Mat. 22:37) Ondaka “utima” yi lombolokavo olondunge vietu, olonjongole, kuenda ovisimĩlo vietu. Yesu poku tukula ondaka utima, omuenyo, kuenda olondunge, wa lekisa okuti, ocisola tu kuetele Suku, ci limbukiwila kekalo liomuenyo wetu kuenda kolondunge vietu. (Yoa. 17:3; Va Efe. 6:6) Pole, ondaka “utima,” yi lombolokavo ekalo liosi liomunu.

MOMO LIE TU SUKILILA OKU LAVA UTIMA WETU?

5. Momo lie tu sukilila oku vumba Yehova lutima wetu wosi?

⁵ Soma Daviti, wa sapuila Salomone hati: ‘A molãnge, kũlĩha Suku ya so yove, u vumba loku pua evelo kuenda lutima wove wosi. Momo Yehova o pendosola ovitima viosi, kuenda o limbuka ovisimĩlo viosi viomunu.’ (1 Asa. 28:9) Yehova eye Ukuakupendosola ovitima viomanu vosi, oku kongelamo utima wetu. (Olosap. 17:3; 21:2) Eye, o tẽla oku limbuka nda utima wetu u yongola oku kuata ukamba laye cilo, kuenda kovaso yoloneke. Omo liaco, tu sukila oku kapako elungulo lia Daviti, lioku vumba Yehova lutima wetu wosi.

6. Nye tu sukila oku limbuka oco tu amameko oku vumba Yehova?

⁶ Omo okuti Tuakristão, ombili tua siata oku lekisa kupange wa Yehova, yi situlula onjongole tu kuete yoku u vumba lutima wetu wosi. Pole, tua kũlĩha okuti, ayonjo oluali lulo lua vialiwa la Satana, kuenda ovisimĩlo vietu ka via sungulukile, vi pondola oku tu tateka oku vumba Suku lutima wosi. (Yer. 17:9; Va Efe. 2:2) Oco ka tu ka tepulule onjongole yoku vumba Suku, tu sukila oku kũlĩhĩsa ekalo liutima wetu. Tu ci linga ndati?

7. Nye ci situlula ekalo liutima wetu?

⁷ Ndeci ka tu tẽla oku mola ovina vi kasi vokati kuti, cimuamue haico ci pita lomanu okuti, ka va tẽla oku mola ovina vi kasi vovitima via vakuavo. Pole, Vohundo Yesu a lingila Komunda, wa popia hati, ndeci ekalo liuti li limbukiwila kapako awo, ekalo liutima womunu li limbukiwila kovilinga viaye. (Mat. 7:17-20) Tu konomuisi ovilinga viaco.

NDOMO TU KONOMUISA UTIMA WETU

8. Olondaka Yesu a popia vi sangiwa kelivulu lia Mateo 6:33, vi kuete elitokeko lie lutima wetu?

⁸ Yesu vohundo yaye, wa sapuila olonjeveleli ovina va sukilile oku linga okuti, via ponduile oku va kuatisa oku vumba Yehova lutima wosi. Eye wa popia hati: “Tete [sandiliyi] usoma waye kuenda esunga liaye, kuenje ovina evi viosi viu vokiyiwi.” (Mat. 6:33) Ovina tua  pitisa kovaso, ovio vi situlula olonjongole, kuenda ovisimĩlo vietu. Oku kũlĩhĩsa ovina tua pitisa kovaso, ci tu kuatisa oku limbuka nda tu kasi oku vumba Suku lutima wosi, ale sio.

9. Elaleko lipi Yesu a eca kalume vamue, kuenda ovilinga viavo via situlula nye?

⁹ Yesu noke yoku vetiya olondonge viaye oco vi ‘sandiliye tete Usoma,’ kua pita ulandu umue u lekisa ndomo utima womunu u situlula ovina a pitisa kovaso. Evanjeliu lia Luka li tukula ulandu u lekisa okuti, eci Yesu, a popia hati, ‘o yongola oku enda ko Yerusalãi,’ wa kũlĩhĩle okuti, wa laikele oku talisiwa ohali. Osimbu Yesu kumue lolondonge viaye va kala ‘oku linga ungende,’ va ñualehẽla lalume vamue, kuenje, wa va laleka oco va linge ‘olondonge viaye.’ Ndaño alume vaco va tava kelaleko lia Yesu,​—pole, tete va yonguile oku linga ovina vikuavo. Umue pokati kavo wa popia hati: “Tava okuti tete ngenda si ka kenda tate.” Ukuavo wa tambulula hati: “A Ñala, hu kuama, [pole,] tava okuti tete ngenda hosika vakuanjo yange.” (Luka 9:51, 57-61) Pole, Yesu wa kuata ovisimĩlo via litepa levi vialume vaco, momo wa nõlelepo oku vumba Yehova Lutima wosi! Omo okuti alume vaco ka va sandiliyile tete Usoma, ovilinga viavo via lekisa okuti, va velisilepo lika olonjongole viavo, kuenje, ca va tateka oku vumba Suku lutima wosi.

10. (a) Alume vana Yesu Kristu a lalekele oco va linge olondonge viaye va lekisa ovituwa vipi? (b) Ocindekaise cipi Yesu a tukula?

¹⁰ Etu tua litepa lalume vana Yesu a lalekele oco va linge olondonge viaye, momo tua tava kelaleko liaye, kuenje, tu kasi oku vumba Yehova oloneke viosi. Omo liaco, utima wetu owo u situlula onjongole tu kuete yoku vumba Yehova. Ndaño okuti tua siata oku lekisa ombili kovopange o vekongelo, pole, tu sukila oku lavulula ovina vi kapa kohele ekalo liutima wetu. Ovina viaco vie? Vombangulo Yesu a kuata lalume vana a lalekele oco va linge olondonge viaye, wa situlula ovina vi kapa kohele ekalo liutima wetu poku popia hati: “Lomue o pondola oku iñila Vusoma wa Suku, nda eci a kapa eka liaye kosaluwa, o vanja kovina via siala konyima.” (Luka 9:62, NW) Ocindekaise eci ci tu longisa nye?

TU ‘KAKATELA NDATI KOVINA VIWA’?

11. Nye ca pita lonalavayi ya tukuiwa vocindekaise ca Yesu, kuenda momo lie?

¹¹ Oco tu kuate elomboloko liocindekaise ca Yesu, tu konomuisi ovina vikuavo via kongela volondaka viaye. Onalavayi yimue ya sakalala loku lima epia. Osimbu yi kasi oku lima, ka yi talama loku sokolola ovina via siala konjo ndeci: Epata liaye, akamba, okulia, ovisikilo layele, kuenda oku puyuka pulembo. Omo okuti o sole ovina viaco, noke yoku talavaya ocilua cimue, onjongole yaye yi li vokiya, kuenje, o vanja ‘kovina via siala konyima.’ Ndaño wa kuatele upange walua toke eci a malusula epia liaye, pole, wa taluka lovina vikuavo, kuenje, ka tẽlisile upange waco. Omo okuti ka pandikisile kupange, cime caye o sumua.

12. Tu sokisa ndati ocindekaise ca Yesu catiamẽla konalavayi, Lukristão umue koloneke vilo?

¹² Sokisa ocindekaise eci lovina via siata oku pita koloneke vilo. Onalavayi ya tukuiwa ndeti, yi sokisiwa Lukristão umue o molẽha ndu okuti, o kasi oku tẽlisa ciwa ovikele viaye vekongelo, pole, ekalo liaye kespiritu li kasi kohele. Sokolola ndeci okuti, manji umue wa siata oku talavaya calua kupange woku kunda. Ndaño endaenda kolohongele,  kuenda kupange woku kunda, pole, ka liwekapo oku sokolola ovina vimue violuali a sole calua okuti, vi pondola oku honguisa utima waye. Noke lianyamo alua kupange woku kunda, onjongole yaye kovina violuali yi li vokiya, kuenje, o fetika oku vanja ‘kovina via siala konyima.’ Ndaño okuti kuli upange walua woku kunda, eye ka ‘kakatela kondaka yomuenyo,’ kuenje, ekolelo liaye li nyõleha. (Va Fil. 2:16) Yehova, ‘Cime cupange woku ungula’ o sumua lomanu vana ka va pandikisa kupange waye.​—Luka 10:2.

13. Nye ca kongela voku vumba Yehova lutima wosi?

¹³ Ca leluka oku kuata elomboloko liocindekaise ca tukuiwa ndeti. Oku linga ovopange amue a nena esanju, loku endaenda kolohongele, kuenda kupange woku kunda, ci kuete esilivilo. Pole, voku vumba Yehova lutima wosi, mua kongela ovina vialua. (2 Asa. 25:1, 2, 27) Nda Ukristão wa tiamisila calua utima ‘kovina via siala konyima,’ vi sangiwa voluali lulo, o kapa kohele ukamba waye la Suku. (Luka 17:32) Nda tua ‘yuvula ovina vĩvi, okuti tu kakatela lika kovina viwa,’ tu kuata esumũlũho lioku “iñila Vusoma wa Suku.” (Va Rom. 12:9; Luka 9:62) Vosi yetu, tu sukila oku lavulula oco ka tu ka yapuisiwe lovina violuali lulo lua vialiwa la Satana. Momo nda tua tiamisila utima kovina viaco, tu tepulula onjongole yetu yoku kunda Usoma wa Suku.​—2 Va Kor. 11:14; Tanga Va Filipoi 3:13, 14.

AMAMAKO LOKU LAVULULA!

14, 15. (a) Satana wa siata oku seteka ndati ekalo liutima wetu? (b) Tukula ocindekaise cimue ci lekisa ndomo atutu a Satana a koka ovitangi.

¹⁴ Ocisola tu kuetele Yehova ci tu vetiya oku litumbika kokuaye. Valua pokati ketu, va kasi oku vumba Yehova lutima wosi vokuenda kuanyamo alua. Pole, Satana ka liwekelepo oku tu seteka. Ocimãho caye oku yapuisa utima wetu. (Va Efe. 6:12) Eye wa kũlĩha okuti, ka tu liwekapo oku vumba Yehova vocipikipiki. Satana wa siata oku yapuisa omanu levando poku kuama ‘ovina vi sangiwa voluali’ oco a honguise  onjongole yetu yoku vumba Suku lutima wosi. (Tanga Marko 4:18, 19.) Momo lie atutu a Satana a kuetele unene?

¹⁵ Sokolola ndeci okuti o kasi oku tanga elivulu limue londiyelo yimue yi taima ciwa, pole, noke yima. Omo okuti o kasi vowelema, o limbuka lonjanga ocitangi caco, kuenje o miha ondiyelo yikuavo. Noke, o kuata vali ocinyi vohondo. Eteke likuavo koñolosi, o yongola oku tanga londiyelo yaco. Pole, omunu umue wopa vohondo ondiyelo yokaliye yi kuete ocinyi calua, kuenda wa kapamo ondiyelo yikuavo yi kuete ocinyi ca pita pokati. O tẽla hẽ oku limbuka etepiso liocinyi condiyelo yatete leyi yavali? Citava okuti, ku ci limbuka. Nye ci pondola oku pita, nda keteke likuavo, omunu waco o kapamo vali ondiyelo yimue yi kuete ocinyi citito? Pamue ku ci limbuka. Momo lie? Momo omunu waco o kasi oku tepulula ocinyi levando okuti, ku limbuka etepuluko liaco. Cimuamue haico ci pita lovina violuali lulo lua vialiwa la Satana okuti, vi pondola oku tepulula levando ombili yetu. Nda tu pita locitangi caco, ci lekisa okuti, Satana o kasi oku tepulula levando ombili yetu kupange wa Yehova. Nda Ukristão ka lavulula, ka pondola oku limbuka okuti, ombili yaye yi kasi oku tepuluka levando.​—Mat. 24:42; 1 Pet. 5:8.

OLOHUTILILO VI KUETE ESILIVILO

16. Tu liteyuila ndati katutu a Satana?

¹⁶ Tu liteyuila ndati katutu a Satana loku amamako oku vumba Yehova lutima wosi? (2 Va Kor. 2:11) Olohutililo vi kuete esilivilo. Paulu wa vetiya vamanjaye Akristão oco va ‘tamalãle latutu Eliapu.’ Noke, wa amisako hati: ‘Likutilili loku livondelela ku Suku olonjanja viosi.’​—Va Efe. 6:11, 18; 1 Pet. 4:7.

17. Olohutililo via Yesu vi tu longisa nye?

¹⁷ Oco tu tamalãle latutu a Satana, tu sukila oku kuama ongangu ya Yesu yoku likutilila, oco tu vumbe Yehova lutima wosi. Luka wa lombolola ndomo Yesu a likutilila osimbu ka pondiwile. Eye wa soneha ndoco: “Wa likutilila lolupili.” (Luka 22:44) Yesu wa enda oku likutilila, pole, eci a pita loseteko ya velapo, wa likutilila “lolupili,” kuenje, ohutililo yaye ya tambuluiwa. Ongangu ya Yesu, yi lekisa okuti, olonjanja vimue tu sukila oku vokiya olohutililo vietu. Nda tu liyaka lovitangi kuenda oku setekiwa latutu a Satana, tu sukila oku likutilila “lolupili,” oco Yehova a tu teyuile.

18. (a) Nye tu sukila oku kũlĩha catiamẽla kolohutililo, kuenda momo lie? (b) Ovina vipi vi vetiya utima wetu, kuenda nye ci tu kuatisa? (Tangapokakasia kemẽla 16.)

¹⁸ Olohutililo vi tu kuatisa ndati? Paulu wa popia hati: “Kovina viosi apingilo ene a sapuiwe ku Suku lolopandu volohutililo viene lalombelo ene. Kuenje ombembua ya Suku, yina ya piãla olondunge viosi, yi lava ovitima viene.” (Va Fil. 4:6, 7) Oku likutilila lolupili, ku kuete esilivilo koku vumba Yehova lutima wosi. (Luka 6:12) Omo liaco, lipula ndoco: ‘Nda siata hẽ oku likutilila lolupili?’ (Mat. 7:7; Va Rom. 12:12) Etambululo liove, li situlula onjongole o kuete yoku vumba Suku lutima wosi.

19. Nye o sukila oku linga oco amameko oku vumba Yehova lutima wosi?

¹⁹ Ndomo tua konomuisa ocipama cilo, ovina tua pitisa kovaso, ovio vi situlula ekalo liutima wetu. Tu sukila oku yuvula oku vanja kovina via siala konyima, oco Satana, ka ka nyõle onjongole yetu yoku vumba Yehova lutima wosi. (Tanga Luka 21:19, 34-36.) Omo liaco, tu kuami ongangu ya Daviti wa likutilila ku Yehova hati: “Pandeka utima wange.”​—Osa. 86:11.

[Apulilo Elilongiso]

[Okakasia kemẽla 16]

ATOSI ATATU A VETIYA UTIMA WETU

Ndeci tua siata oku teyuila utima wetu oco ka u ka kuatiwe loku vela, cimuamue haico ci pita lutima wocindekaise okuti, tu sukila oku u teyuila kovina vĩvi. Omo liaco, tu konomuisi atosi atatu a velapo a tu kuatisa oku ci linga:

1 Eteku: Utima wetu, u sukila oku tekuiwa lovina viwa oco tu kuate uhayele. Cimuamue haico tu sukila oku linga lutima wetu wocindekaise poku u tekula lovina viespiritu, ndeci: Elilongiso lio pokolika, oku sokolola ovina tua tanga, kuenda oku endaenda kolohongele.​—Osa. 1:1, 2; Olosap. 15:28; Va Hev. 10:24, 25.

2 Oku Pindisa Etimba: Tu sukila oku pindisa etimba lietu, oco utima wetu u kuate uhayele. Cimuamue haico ci pita lutima wetu wocindekaise okuti, tu sukila oku kuata ombili yoku endaenda kupange woku kunda.​—Luka 13:24; Va Fil. 3:12.

3 Ocitumãlo: Oku kala pocitumãlo cimue ca vĩha, ci tu nenela asakalalo vutima. Pole, tu pondola oku tepulula asakalalo aco, poku kuata ukamba la vamanji vana va siata oku lekisa ocisola kokuetu, haivo va vumba Suku lutima wosi.​—Osa. 119:63; Olosap. 13:20.