‘Omõla o Yongola Oku Situlula Isia’

‘Lomue wa kũlĩha Isia, te Omõla, kuenda u Omõla a panga oku u situluila.’ ​—LUKA 10:22.

O TAMBULULA NDATI?

Momo lie Yesu a kuatela uloño woku situlula Isiaye?

Yesu wa situlula ndati Isiaye komanu?

Volonepa vipi o pondola oku setukula Yesu koku situlula Isia?

1, 2. Epulilo lipi lia siata oku sakalaisa omanu valua, kuenda momo lie?

 ‘SUKU helie?’ Epulilo eli lia siata oku sakalaisa omanu valua. Ndaño okuti Akristão valua vesanda va tava kelongiso lia Suku Umosi Muvatatu, vakuavo va popia vati, ka ca lelukile oku kuata elomboloko lielongiso liaco. Usonehi umue okuti usongui wetavo, wa popia hati: “Omanu ka va tẽla oku kuata elomboloko lielongiso liaco. Momo, lia siata oku yapuisa ovisimĩlo viomanu, ale olondunge viavo.” Vana va kolela kelongiso liokuti ovina viosi via tukuluka ño, ka va tava okuti, kuli Suku. Kuenda va sima okuti, ovina viosi vi kasi voluali, via tukuluka ovio muẽle. Ndaño Charles Darwin, ka likalele okuti kuli Suku, pole, wa popia hati: “Omanu ka va pondola oku kuata elomboloko lia suapo liatiamẽla ku Suku.”

² Ndaño okuti omanu valua vatiamẽla ketavo limue, pole, va siata oku lipula nda kuli Suku ale sio. Valua eci va limbuka okuti ka va kuete elomboloko lia suapo, va liwekapo oku sandiliya Suku. Satana eye wa siata oku “tekavisa ovitima viavo.” (2 Va Kor. 4:4) Omo liaco, omanu valua va kasi vonumbi, kuenda va kuete atatahãi a tiamẽla ku Isia, Ululiki woluali!​—Isa. 45:18.

3. (a) Helie wa tu situluila Ululiki? (b) Apulilo api tu konomuisa vocipama cilo?

³ Omanu va sukila oku lilongisa ocili catiamẽla ku Suku. Momo lie? Momo vana ‘va vilikiya loku tukula onduko ya Yehova,’ ovo lika va ka popeliwa. (Va Rom. 10:13) Voku tukula onduko yaco, mua kongela oku kũlĩha ciwa Yehova okuti, Omunu. Yesu Kristu wa longisa ovina viaco kolondonge viaye,  kuenda wa vi situluila Isiaye. (Tanga Luka 10:22.) Momo lie Yesu a kuatela epondolo lioku situlula Isiaye okuti omanu vakuavo ci sule? Wa ci linga ndati? Kuenda tu kuama ndati ongangu ya Yesu yoku situluila Isiaye komanu? Tu konomuisi apulilo ava.

YESU KRISTU EYE LIKA WA VELAPO KOKU LOÑOLOHA

4, 5. Momo lie Yesu a kuatela uloño woku situlula Isiaye?

⁴ Yesu eye lika wa situlula ciwa Isiaye. Momo lie? Momo ‘Omõla wa Suku wongunga,’ wa kala ale kilu, osimbu ovina viosi ka via lulikiwile. (Yoa. 1:14; 3:18) Eye wa kuata esumũlũho lia velapo! Omo okuti wa kala kumue la Isiaye, wa lilongisa ovina vialua viatiamẽla Kokuaye kuenda kovituwa Viaye. Vokuenda kuanyamo alua, Isia wa enda oku sapela Lomõlaye ovina vialua, kuenje, va pamisa ocisola cavo. (Yoa. 5:20; 14:31) Yesu wa lilongisa ovina vialua viatiamẽla kovituwa via Isiaye!​—Tanga Va Kolosai 1:15-17.

⁵ Isia wa nõla Omõla oco a linge kapitiya kaye okuti, eye “Ndaka ya Suku.” (Esit. 19:13) Omo liaco, Yesu eye lika o tẽla oku situluila ciwa Isiaye komanu. Evanjeliu lia Yoano, li lombolola okuti, Yesu haeye “Ndaka,” o kasi ‘kumue la Isiaye.’ (Yoa. 1:1, 18) Yoano wa tukula olondaka evi oco a lekise ocituwa omanu va kuatele poku lia onanya. Nda omunu umue wa tambula ukombe, u tumãlisa kovaso yaye. Oku tumãla pamosi ca enda oku va kuatisa oku sapela. Omo okuti Omõla wa kala ‘kumue’ la Isiaye, wa kuata elianjo lioku sapela laye ovina vialua.

6, 7. Ukamba u kasi pokati ka Isia Lomõla, wa pamisiwa ndati?

⁶ Ukamba wa kala pokati ka Isia Lomõla wa pamisiwa calua. Yesu eye ‘Suku a sanjukila oloneke viosi.’ (Tanga Olosapo 8:22, 23, 30, 31.) Ukamba u kasi pokati ka Isia Lomõla, wa pamisiwa calua osimbu va kala oku talavaya kumosi. Kuenje, Omõla wa lilongisa oku setukula ovituwa via Isiaye. Eci oviluvo vikuavo via lulikiwa, Omõla wa limbuka ndomo Yehova a vi tata, kuenje, ocisola lesumbilo a kuetele Isiaye via li vokiya.

⁷ Eci Satana a sepula unene wa Yehova woku viala, Omõla wa lilongisa ndomo Yehova a lekisa ocisola, esunga, olondunge, kuenda unene woku liyaka locitangi caco. Ovina viaco, via kuatisa Yesu oku lipongiya oco a yule ovitangi via laikele oku iya osimbu a linga upange woku kunda olondaka viwa palo posi.​—Yoa. 5:19.

8. Avanjeliu a tu kuatisa ndati oku kũlĩha ovituwa via Isia?

⁸ Omo liukamba Yesu a kuete la Yehova, wa lombolola ovina vialua viatiamẽla ku Isiaye okuti, omanu vakuavo ci sule. Ocina cipi ca velapo ci tu kuatisa oku kũlĩha ciwa Isia, ndeci Omõlaye wongunga a linga? Kũlĩhĩsa ocindekaise eci: Nda tua sangele lika Vondisionaliu yimue, ondaka “ocisola,” nda ka tua kuatele elomboloko liondaka yaco. Tu pondola lika oku kũlĩha eci ci lomboloka ondaka yokuti “Suku eye ocisola,” poku tanga ovolandu a sangiwa Vavanjeliu a tiamẽla kupange woku kunda Yesu a linga, kuenda ndomo a tata omanu. (1 Yoa. 4:8, 16) Cimuamue haico catiamẽla kovituwa vikuavo via Suku vina Yesu a situlula kolondonge viaye eci a kala palo posi.

 NDOMO YESU A SITULULA ISIAYE

9. (a) Volonepa vipi vivali Yesu a situlula Isiaye? (b) Tukula ocindekaise cimue ci lekisa ndomo Yesu a situlula Isiaye kovina a longisa.

⁹ Yesu wa situluila ndati Isia kolondonge viaye, kuenda komanu vakuavo veya oku likongela kolondonge viaye? Wa ci linga volonepa vivali ndeci: Koku longisa kuenda kovituwa viaye. Tete tu konomuisi ovina Yesu a longisa. Ovina Yesu a longisa kolondonge viaye, via situlula ukũlĩhĩso wa suapo watiamẽla kovisimĩlo via Isiaye, kuenda kolonjila viaye. Yesu wa sokisa Isiaye lomunu o kuete ocunda colomeme okuti, nda yimue ya nyelela, o yi sandiliya. Kuenje, wa amisako hati, eci a yi sanga, “o yi sanjukila calua, [okuti] akũi ecea lecea ka via nyelile ci sule.” Olusapo olu lu lomboloka nye? Yesu wa amisako hati: ‘Isiene o kasi kilu, ka yongola okuti kamue kamosi kava vatito ka taka.’ (Mat. 18:12-14) Ocindekaise eci ci tu longisa nye catiamẽla kovisimĩlo via Yehova? Nda o sima okuti ku kuete esilivilo kuenda lomue wa ku kapako, ivaluka okuti, Isietu wokilu, wa ku kapako kuenda o ku tata. Eye o ku tenda ndava “vatito.”

10. Yesu wa situlula ndati Isia lovilinga viaye?

¹⁰ Onjila yavali Yesu a situluila Isia kolondonge viaye, kovilinga. Eci upostolo Filipu a pinga ku Yesu hati, “tu lekise Isia,” eye wo tambulula hati: ‘U wa mola ame, wa molavo Isia.’ (Yoano 14:8, 9) Konomuisa ovolandu amue a lekisa ndomo Yesu a lekisa ovituwa via Isiaye. Eci ‘ulume wa kuatele ovilundu’ a pinga ku Yesu oco o kayise, Yesu wo lamba, kuenje, wo sapuila hati: “Nda panga, kaya.” Ulume waco noke yoku sakuiwa, wa limbuka ndomo Yehova o kuatisa vonduko ya Yesu. (Luka 5:12, 13) Eci Lasaru a fa, olondonge via limbukavo ocisola ca Isia, momo Yesu ‘wa kuata ocikembe, kuenda wa tokotelua vutima,’ kuenje, wa fetika oku “lila.” Ndaño Yesu wa kũlĩhĩle okuti wa laikele oku pindula Lasaru, pole, wa limbuka esumuo lia kala pokati kepata lia Lasaru kuenda akamba vaye. (Yoano 11:32-35, 40-43) Citava okuti o kuete ovolandu amue Embimbiliya o sole calua, a ku kuatisa oku limbuka ohenda ya Isia ndomo ya lekisiwila kovilinga via Yesu.

11. (a) Eci Yesu a yelisa onembele, wa situlula nye catiamẽla ku Isiaye? (b) Momo lie ulandu wa Yesu woku yelisa onembele u tu lembelekela?

¹¹ Ocituwa Yesu a lekisa poku yelisa onembele, ci ku longisa nye? Kũlĩhĩsa ulandu owu: Yesu wa iña ukolo wocipa, kuenje, wa tundisa vonembele omanu va kala oku landisa olongombe lolomeme. Wa pesela olombongo via vana va kala oku tolokala, kuenda wa leñula olomesa viavo. (Yoa. 2:13-17) Elinga liaco, lia ivaluisa olondonge ocitumasuku ca Soma Daviti wa popia hati: ‘Ombili  yonjo yove yi ndia.’ (Osa. 69:9) Elinga lia Yesu lia lekisa onjongole a kuata yoku teyuila efendelo liocili. Ove hẽ wa limbuka ovituwa via Isia Yesu a situlula vulandu owu? Ulandu waco u lekisa okuti, Suku ka kuete lika unene woku mãlako evĩho voluali, pole, o yongola oku ci linga. Elinga lia Yesu lioku suvuka evĩho, li lekisavo okuti, Isiaye wa suvuka evĩho li kasi voluali koloneke vilo. Nda tu liyaka lovitangi, oku sokolola ulandu waco, ci tu lembeleka!

12, 13. Ocituwa Yesu a lekisa poku tata olondonge viaye, ci ku longisa ovina vipi viatiamẽla ku Yehova?

¹² Tu konomuisi ulandu ukuavo u lekisa ndomo Yesu a tata olondonge viaye. Olondonge via kala oku lihoyisa oco vi kũlĩhe u wa velapo pokati kavo. (Mar. 9:33-35; 10:43; Luka 9:46) Omo liotembo yalua Yesu a kala kumue la Isiaye kilu, wa kũlĩhĩle ndomo Yehova a tenda epela. (2 Sam. 22:28; Osa. 138:6) Yesu wa mola ndomo Satana Eliapu a lekisa epela. Satana eye lika o kuete ocituwa coku livelisapo. Omo liaco, Yesu wa sumuĩle calua eci a limbuka okuti, olondonge vina a longisa, via fetika oku lekisa epela! Vamue pokati ka vana a nõlele oco va linge ovapostolo vaye, va lekisavo ocituwa caco! Ovo va lekisa epela toke keteke lia sulako liomuenyo wa Yesu palo posi. (Luka 22:24-27) Pole, Yesu wa amamako oku vangula lavo locisola loku kolela okuti, va ponduile oku lilongisa ongangu yaye yoku lekisa umbombe.​—Va Fil. 2:5-8.

¹³ Ndomo Yesu a lungula lepandi olondonge viaye, omo liovisimĩlo vĩvi via kuata, cu ku kuatisa hẽ oku limbuka ovituwa via Yehova? O tẽla hẽ oku limbuka ovilinga via Yesu lolondaka via Isiaye okuti, ka ivalako omanu vaye ndaño va siata oku lueya olonjanja vialua? Noke yoku kũlĩha ovituwa via Suku, ka tu vetiyiwa hẽ oku amẽla kokuaye loku likekembela akandu etu?

OMÕLA WA KUATA ONJONGOLE YOKU SITULULA ISIAYE

14. Yesu wa lekisa ndati okuti wa kuata onjongole yoku situlula Isiaye?

¹⁴ Olongangala via siata oku tateka omanu okuti, ka va longisiwa ovina va sukila oku kũlĩha. Pole, Yesu wa yonguile oku sapuila omanu ovina vialua a kũlĩha viatiamẽla ku Isiaye. (Tanga Mateo 11:27.) Yesu wa ecavo kolondonge viaye ‘olondunge vioku kũlĩha Yehova, okuti eye Suku yocili.’ (1 Yoa. 5:20) Olondaka evi vi lomboloka nye? Yesu wa kuatisa olondonge viaye oku kuata elomboloko liovina a va longisa viatiamẽla ku Isiaye. Eye ka longisile ovina ka vi kuete elomboloko haivio vi lekisa okuti, Isiaye o panga onepa ku Suku Umosi Muvatatu.

15. Momo lie Yesu ka sapuilile olondonge viaye ovina viosi viatiamẽla ku Isiaye?

¹⁵ Anga hẽ, Yesu wa situlula ovina viosi a kũlĩhĩle viatiamẽla ku Isiaye? Sio, eye wa lekisa olondunge poku yuvula oku situluila olondonge viaye ovina viosi a kũlĩhĩle. (Tanga Yoano 16:12.) Momo lie? Momo kotembo yaco, olondonge viaye ‘ka via tẽlele’ oku kuata ukũlĩhĩso wovina viosi. Ndomo Yesu a ci lombolola, ukũlĩhĩso wa velapo wa laikele oku situluiwa kokuavo eci “ñuatisi” okuti espiritu sandu lia va songuila “kocili cosi.” (Yoa. 16:7, 13) Olonjali vi kuete olondunge, ka vi sapuila omãla vavo ovina viosi osimbu ka va kulile, momo ka va pondola oku kuata elomboloko liovina viaco. Cimuamue haico Yesu a linga okuti, wa talamẽla toke eci olondonge viaye via kula kespiritu  okuti, vi pondola oku kuata elomboloko liovina vikuavo viatiamẽla ku Isiaye. Yesu wa lekisa ohenda kokuavo kuenda wa kapeleko oku hongua kuavo.

SETUKULA YESU POKU KUATISA OMANU OKU KŨLĨHA YEHOVA

16, 17. Momo lie o ponduila oku situlula Isia komanu?

¹⁶ Noke yoku kũlĩha ciwa omunu umue, loku sola ovituwa viaye, ku vetiyiwa hẽ oku sapuilako omanu ekalo liaye? Eci Yesu a kala palo posi, wa vangula ovina viatiamẽla ku Isiaye. (Yoa. 17:25, 26) Anga hẽ tu pondola oku kuama ongangu yaye yoku situlula Yehova komanu?

¹⁷ Ndomo tua konomuisa vocipama cilo, Yesu o kuete ukũlĩhĩso walua watiamẽla ku Isiaye okuti omanu vakuavo ci sule. Pole, wa sapuila omanu ovina vimue a kũlĩha kuenda wa eca kolondonge viaye olondunge vioku kũlĩha ciwa ovituwa via Suku. Anga hẽ omo lioku kuatisiwa la Yesu ka tua kũlĩhĩle ciwa Isietu okuti omanu vakuavo koloneke vilo ci sule? Tua sanjuka calua omo okuti alongiso a Yesu lovituwa viaye via tu situluila Isiaye! Tu kuete esumũlũho lialua omo tua kũlĩha Isia. (Yer. 9:24; 1 Va Kor. 1:31) Osimbu tu amamako oku pamisa ukamba wetu la Yehova, eye amẽlavo kokuetu. (Tia. 4:8) Koloneke vilo, tu pondola oku sapuila komanu ovina tua kũlĩha. Tu ci linga ndati?

18, 19. Volonepa vipi o pondola oku situluila Isia komanu? Ci lombolola.

¹⁸ Tu sukila oku setukula Yesu poku situlula Isia kombangulo kuenda kovilinga vietu. Ivaluka okuti, omanu valua tua siata oku sanga kupange woku kunda, ka va kũlĩhĩle Suku. Ovisimĩlo viavo viatiamẽla ku Suku, via pengisiwa lalongiso esanda. Tu pondola oku sapuilako omanu ovina tua kũlĩha viatiamẽla konduko ya Suku, kocipango a kuetele omanu, kuenda kovituwa viaye ndomo via situluiwa Vembimbiliya. Tu pondolavo oku sapela la vamanji ovolandu amue Embimbiliya a situlula ovituwa via Suku okuti, kosimbu ka tua solele oku sapela ovina viaco. Oku ci linga, ci pondola oku kuatisa omanu valua.

¹⁹ O setukula ndati Yesu poku situlula Isia lovilinga viove? Eci omanu va limbuka ocisola ca Kristu kovilinga vietu, va vetiyiwa oku kuata ukamba la Isia kuenda la Yesu. (Va Efe. 5:1, 2) Upostolo Paulu o tu vetiya oco tu u ‘setukule ndeci a setukula Kristu.’ (1 Va Kor. 11:1) Omo liaco, tu amamiko oku setukula Yesu poku situluila Isia komanu.

[Apulilo Elilongiso]