Yehova o tu Lava Oco tu Popeliwe
Yehova o tu Lava Oco tu Popeliwe
“Omo [okuti] vu kasi lekolelo, . . . unene wa Suku u vu lava toke vu piñala epopelo li tãilili . . . oku situluiwa koloneke via sulako.”—1 PET. 1:4, 5.
O TAMBULULA NDATI?
Yehova wa siata oku tu kokela ndati kefendelo liocili?
Tu ecelela ndati oku songuiwa lalungulo a Yehova?
Yehova wa siata oku tu vetiya ndati?
1, 2. (a) Tua kũlĩha ndati okuti, Suku o tu kuatisa oco tu amameko lekolelo? (b) Yehova wa kũlĩha ndati omunu lomunu pokati ketu?
YESU wa popia hati: ‘U o pandikisa toke kesulilo, eye o popeliwa.’ (Mat. 24:13) Olondaka Yesu a tukula ndeti, vi lekisa okuti, oco tu popeliwe eci Suku a ka kundula oluali lulo lu kasi peka lia Satana, tu sukila oku pandikisa toke kesulilo. Pole, Yehova ka kevelela okuti, tu pandikisa longusu yetu muẽle. Embimbiliya li tu sapuila hati: “Suku wa kolelua, kuenje ka tava okuti [vu setekiwa leyonjo lina ka vu] tẽla, puãi kumuamue leyonjo u muisavo evelo lioku puluka okuti vu soka lalio.” (1 Va Kor. 10:13) Olondaka evi vi lomboloka nye?
2 Yehova wa kũlĩha okuti, ka tu setekiwa leyonjo lina ka tu tẽla oku liyaka lalio. Pole, wa kũlĩha ovina viosi viatiamẽla kokuetu oku kongelamo ovitangi tua siata oku liyaka lavio, ekalo lietu, kuenda ndomo tu yula ovitangi viaco. Anga hẽ Suku wa tu kũlĩha ciwa? Wa tu kũlĩha. Momo Ovisonehua vi lekisa okuti, Yehova wa kũlĩha ekalo liomunu lomunu pokati ketu. Eye wa kũlĩhavo ovina tua siata oku linga eteke leteke, kuenda ovisimĩlo vietu. Yehova o pondola oku kũlĩhĩsa ovisimĩlo viutima wetu.—Tanga Osamo 139:1-6.
3, 4. (a) Ulandu wa Daviti u lekisa ndati okuti Yehova wa kapako omunu lomunu pokati ketu? (b) Upange upi u komõhisa Yehova a kasi oku tẽlisa koloneke vilo?
3 Anga hẽ Suku wa kapako omanu vana vomboka? Ukualosamo Daviti wa sokolola lutate epulilo eli poku sapuila Yehova hati: “Eci mbanja ilu liove, hailio upange [wovimuine viove, leci ndi vanja] osãi lolombungululu wa lulika, [ndi] sokolola siti, Omunu . . . nye okuti o wivaluka?” (Osa. 8:3, 4) Citava okuti Daviti wa linga epulilo eli, omo lioku taviwa la Yehova. Eci a kala ungombo, Yehova wo ‘solele calua, kuenje, wo nõla oco a linge o soma’ ya va Isareli. (1 Sam. 13:14; 2 Sam. 7:8) Sokolola esanju Daviti a kuata poku limbuka okuti, Ululiki wovina viosi wa kapeleko ovisimĩlo viaye ndaño wa kala ungombo umue umalẽhe!
4 Koloneke vilo, Yehova wa siata oku tu lekisa ovina vi komõhisa. Eye, o kasi oku ongoluila vefendelo liocili, “ovina via velapo vi tunda kolofeka viosi,” kuenda wa siata oku kuatisa afendeli vaye, oco va pandikise lekolelo. (Hag. 2:7) Oco tu kuate elomboloko ndomo Yehova a siata oku tu kuatisa oku amamako lekolelo, tu konomuisi ndomo a kasi oku kokela omanu kefendelo liocili.
SUKU O TU KOKELA KOKUAYE
5. Yehova wa siata oku kokela ndati omanu Komõlaye? Lombolola ulandu umue.
5 Yesu wa popia hati: “Lomue o tẽla oku iya kokuange, te Isia wa numa u koka.” (Yoa. 6:44) Olondaka evi vi lekisa okuti, oco tu linge olondonge via Kristu, tu sukila oku kokiwa la Yehova Suku. Eye wa siata oku kokela ndati Komõlaye omanu vana va kasi ndolomeme? Wa siata oku ci linga lekuatiso liespiritu sandu, poku vetiya afendeli vaye oku kunda olondaka viwa Viusoma. Eci Paulu kumue lakamba vaye va kala ko Filipu kupange wumisionaliu, va sanga ukãi umue o tukuiwa hati Ludia, kuenje, va fetika oku u kundila olondaka viwa. Embimbiliya li popia hati: ‘Yehova wa yulula utima wa Ludia, oco a tave kolondaka Paulu a kala oku popia.’ Yehova wa kuatisa Ludia lespiritu liaye, oco a kuate elomboloko liesapulo vo kundila, kuenje, eye kumue lepata liaye, va papatisiwa.—Ovil. 16:13-15.
6. Tua kokiwa ndati la Yehova oco tu iñile vefendelo liocili?
6 Anga hẽ Embimbiliya li lombolola lika ulandu wa Ludia? Ka li lombolola lika ulandu wa Ludia. Nda ove Ukristão okuti wa litumbika ku Suku, wa kokiwila vefendelo liocili lekuatiso liaye. Ndeci Yehova a muĩle ovituwa viwa via Ludia, eye wa siata oku molavo ovina viwa vi kasi kutima wove. Eci wa yeva olondaka viwa, Yehova wa ku kuatisa lespiritu sandu liaye, oco o kakatele kesapulo liaco. (1 Va Kor. 2:11, 12) Eci wa fetika oku kapako ovina wa lilongisa, Yehova wa sumũlũisa alikolisilo ove oku linga ocipango caye. Kuenje, wa sanjukila omo wa litumbika kokuaye. Eci wa fetika oku endela vonjila yi tuala komuenyo ko pui, Yehova wa ku kuatisa.
7. Tua kũlĩha ndati okuti Suku o tu kuatisa oku amamako lekolelo?
7 Omo okuti Yehova wa tu kuatisa oco tu u vumbe, ka tu yanduluka, pole, o pamisa ekolelo lietu. Eye wa kũlĩha okuti, ka tueyile vocisoko caye longusu yetu muẽle, kuenda ka tu tẽla oku amamako longusu yetu. Upostolo Petulu poku sonehela Akristão olombuavekua, wa popia hati: “Omo vu kasi lekolelo, oco unene wa Suku u vu lava toke vu piñala epopelo li tãilili . . . oku situluiwa koloneke via sulako.” (1 Pet. 1:4, 5) Olondaka evi, vi tiamisiwila Kakristão vosi, kuenda vi kuete esilivilo kokuetu. Momo lie? Momo tu sukila ekuatiso lia Suku oco tu amameko oku kolela kokuaye.
SUKU O TU KUATISA OKU LIKANDANGIYA KEKANDU
8. Momo lie tu sukilila oku lavulula oco ka tu ka wile vekandu limue linene?
8 Asakalalo omuenyo, kuenda ekambo lietu lioku lipua, vi pondola oku tepulula ombili yetu kovina viespiritu, kuenje, nda ka tua lavuluile, tu wila vekandu limue linene. (Tanga Va Galatia 6:1.) Daviti wa pita locitangi caco.
9, 10. Yehova wa tateka ndati Daviti oco ka ka linge ekandu, kuenda nye a siata oku linga koloneke vilo?
9 Daviti wa likandangiya calua, kuenda ka fetuluinyile Soma Saulu eci a kala oku u sandiliya oco o ponde. Pole, eye wa kuatele epuluvi lioku ci linga. (1 Sam. 24:2-7) Omo okuti Daviti wa kala omunu umue ka lipuile, ka tẽlele vali oku likandangiya. Eci Daviti kumue lakuenje vaye va kuata onjala, wa pinga ku Nabala oco a va ĩhe okulia lovava. Nabala wa tambulula londaka ka ya sungulukile, kuenje, Daviti wa kuata onyeño kuenda wa yonguile oku ponda epata liosi lia Nabala. Daviti ka sokoluile okuti, nda wa ponda omanu ka va kuete eko, o linga ekandu ku Suku. Pole, Avigaile ukãi wa Nabala, wa kuatisa Daviti oco ka ka linge ekandu liaco. Omo lioku limbuka okuti Yehova wa tuma Avigaile oco o kuatise, Daviti wa popia hati: “Olondunge viove vi pandiyiwe. Love muẽle, pandiyiwa omo wa niula kongole yoku pesela osonde loku fetuluinya ame muẽle leka liange.”—1 Sam. 25:9-13, 21, 22, 32, 33.
10 Ulandu owu u tu longisa nye? Yehova wa tumĩle Avigaile oku kuatisa Daviti oco ka ka linge ekandu liaco. Koloneke vilo, Yehova wa siatavo oku tu kuatisa. Pole, ka tu kevelela okuti, Yehova o tuma omunu umue oco a tu tateke oku linga ekandu. Ka tua kũlĩhĩle ndomo Suku a ka tetulula ovitangi vimue oco a tẽlise ocipango caye. (Uku. 11:5) Pole, tua kolela okuti, Yehova wa kũlĩha ekalo lietu, kuenda o ka tu kuatisa oco tu amameko oku kolela kokuaye. Eye wa tu likuminya hati: “Hu longisa, hu imbaimba onumbi yonjila [endela]. Hu lungula, hu imba ovaso.” (Osa. 32:8) Yehova wa siata oku tu ĩha ndati a lungulo? Tu kuatisiwa ndati lalungulo aco? Momo lie tu tavela okuti Yehova o kasi oku songuila omanu vaye koloneke vilo? Kũlĩhĩsa ndomo apulilo ava a tambuluiwa kelivulu Liesituluilo.
A LUNGULO A TU TEYUILA
11. Yehova wa kũlĩha ndati ovina vi kasi oku pita lafendeli vaye vakongelo?
11 Kelivulu Liesituluilo kocipama 2, leci ca 3, ku tukula ocinjonde cimue ci lekisa okuti, Yesu Kristu wa kũlĩhĩsa ekalo liakongelo epanduvali a kala ko Asia Menor. Vocinjonde caco, Kristu ka konomuisile lika ekalo liakongelo o ko Asia Menor, pole, wa kũlĩhĩsavo ovitangi via kala vekongelo lekongelo. Kuenje, wa va pandiya, kuenda wa eca elungulo va sukilile. Ocinjonde caco ci lomboloka nye? Poku tẽlisiwa kuocinjonde caco, akongelo epanduvali a lomboloka Akristão olombuavekua veya oku molẽha kunyamo wo 1914. Elungulo lia eciwa kakongelo epanduvali, li kuetevo esilivilo kafendeli va Suku koloneke vilo. Tua kũlĩha okuti, Yehova o kasi oku songuila afendeli vaye lekuatiso Liomõlaye. Tu kuatisiwa ndati lalungulo aco?
12. Tu ecelela ndati oku songuiwa la Yehova?
12 Elilongiso lio pokolika, li tu kuatisa oku songuiwa la Yehova. Eye, wa siata oku tu ĩha alungulo alua valivulu a sandekiwa lukuenje wa kolelua haeye wa lunguka. (Mat. 24:45) Oco tu kuatisiwe lalungulo ukuenje wa lunguka, tu sukila oku sokiya otembo yoku tanga alivulu aco, loku kapako ovina tua lilongisa. Yehova wa siata oku tu kuatisa lelilongiso lio pokolika, oco ka tu ka ‘yapuisiwe.’ (Yuda 24) Anga hẽ, wa tangele ale elungulo limue valivulu etu, kuenje, wa limbuka okuti lia loña kokuove? Tava kelungulo liaco, momo li tunda ku Yehova. Ndeci ekamba limue li ku kuata kepepe poku ku sapuila ondaka yimue, cimuamue haico Yehova a siata oku linga, poku ku kuatisa lespiritu liaye, oco o siepo ocituwa cimue cĩvi. Nda tua tava oku songuiwa lespiritu sandu, tu kuatisiwa la Yehova. (Tanga Osamo 139:23, 24.) Omo liaco, tu sukila oku kũlĩhĩsa nda tu kuete ocituwa coku linga elilongiso lio pokolika, ale ka tu kuete.
13. Momo lie tu sukilila oku kũlĩhĩsa ocituwa cetu coku lilongisa?
13 Oku pesila otembo yalua kovitalukilo, ci nyana otembo yelilongiso lio pokolika. Manji umue wa popia hati: “Ca leluka oku liwekapo oku linga elilongiso lio pokolika. Momo, koloneke vilo, ovitalukilo via li vokiya calua okuti kosimbu ci sule, kuenda ca leluka oku pesila otembo yetu kovina viaco. Kuli ovitalukilo vialua vi sangiwa vo Televisãu, vokombutandor, kuenda vo telefone. Vosi yetu tua ñualiwa lovina viaco.” Nda ka tua lavuluile, otembo yoku lilongisa ovina via longa, tu fetika oku yi pesila kovitalukilo toke eci tu liwekapo elilongiso lietu. (Va Efe. 5:15-17) Omunu lomunu pokati ketu o sukila oku lipula ndoco: ‘Nda siata hẽ oku sokiya otembo yoku lilongisa lutate Ondaka ya Suku? Ndi lipongiya lika eci ndi tambula ohundo, ale onepa yimue vekongelo?’ Tu pondola oku sokiya otembo yoku linga efendelo liepata, lelilongiso lio pokolika, oco tu kuate ukũlĩhĩso wa Yehova. Nda tua ci linga, tu pamisa ekolelo lietu oco tu popeliwe.—Olosap. 2:1-5.
EVETIYO LI TU KUATISA OKU PANDIKISA
14. Ovisonehua vi lekisa ndati okuti Yehova wa kapako ovisimĩlo vietu?
14 Daviti wa liyaka lovitangi vialua komuenyo waye. (1 Sam. 30:3-6) Olondaka viaye vi lekisa okuti, Yehova wa kũlĩhĩle ovisimĩlo viaye. (Tanga Osamo 34:18; 56:8.) Eye wa kũlĩha ciwa ovisimĩlo vietu. Nda tu kuete ‘utima wa teka,’ ale “wa samba,” eye o pondola oku tu kokela kokuaye. Kuenje, tu lembelekiwa ndeci Daviti a linga poku imba ocisungo hati: “Njolela, [kuenda ndi] sanjukila ocisola cove ka ci pui. Momo wa mola ohali yange kuenje wa limbuka otokua yange.” (Osa. 31:7) Yehova wa kũlĩha ovina vialua viatiamẽla kokuetu okuti, ovitangi vietu ci sule. Eye wa siata oku tu kolisa lovina vi tu lembeleka kolohongele.
15. Ulandu wa pita la Asafe u tu longisa nye?
15 Ulandu wa pita la Asafe, u lekisa esilivilo lioku endaenda kolohongele. Eci a limbuka okuti vakuesunga va kala oku tala ohali, osimbu olondingaĩvi via kuata omuenyo uwa, co vetiya oku sima okuti, oku vumba Suku ka ci kuete esilivilo. Eye wa puile utõi, kuenda wa lekisa esumuo poku popia hati: “Eci vutima mua tangeleka, . . . vokati mua suvala.” Omo liaco, wa yonguile oku liwekapo oku vumba Yehova. Nye ca kuatisa Asafe oku kuata ovisimĩlo via sunguluka? Noke, Asafe wa popia hati: “Nda iñila vonembele ya Suku.” Oku kala pokati kafendeli va Yehova, ca vetiya Asafe oku kuata ovisimĩlo via sunguluka. Momo wa limbuka okuti, omuenyo uwa olondingaĩvi via kuata, ka u kala otembo yalua, kuenda Yehova o pondola oku tetulula ovitangi lesunga. (Osa. 73:2, 13-22) Etu tua siatavo oku liyaka lovitangi viaco. Ovitangi via siata voluali lulo lua vialiwa la Satana, vi pondola oku tu nenela esumuo. Pole, oku kala kumue la vamanji kolohongele, ci vokiya esanju lietu koku vumba Yehova.
16. Ongangu ya Hana yi tu kuatisa ndati?
16 Nda o kuete ocitangi cimue vekongelo okuti ci ku tateka oku endaenda kolohonge, nye o sukila oku linga? Citava okuti, wopiwa ovikele viove vekongelo, kuenje, wa sumua, ale o kuete ocitangi la manji umue. Pole, ongangu ya Hana, yi pondola oku ku kuatisa. (Tanga 1 Samuele 1:4-8.) Ivaluka okuti, Penina, una wa kala sepakãi ya Hana, wa enda oku u popia lãvi. Hana wa enda oku sumua calua unyamo lunyamo, poku enda kumue lepata ko Silo, oku ka tuala ovilumba ku Yehova. Kuenje, Hana ‘wa enda oku lila calua, kuenda ka tavele oku lia.’ Pole, ka ecelele okuti, ocitangi caco cu tateka oku enda vonembele oku fendela Yehova. Noke, weya oku tambula asumũlũho alua ku Yehova omo liekolelo a lekisa kokuaye.—1 Sam. 1:11, 20.
17, 18. (a) Tua siata oku tambula ndati elembeleko kolohongele? (b) O tenda ndati ohenda Yehova a siata oku lekisa oco tu ka popeliwe?
17 Akristão koloneke vilo, va kuete esunga lioku kuama ongangu yekolelo lia Hana, yoku endaenda kolohongele. Omanu valua, va limbuka okuti, olohongele vi pamisa ekolelo. (Va Hev. 10:24, 25) Ocisola ci kasi pokati ka vamanji, ci pamisa ekolelo lietu. Etosi limue tu yeva vohundo, ale etambululo li eciwa la manji umue, li pondola oku pamisa utima wetu. Osimbu handi ovipama viohongele yofeka ka via fetikile, kuenda vepuluvi liepuyuko, tu pondola oku sapela la manji umue o tu yevelela, ale o tu sapuila olondaka vimue vi pamisa utima wetu. (Olosap. 15:23; 17:17) Tu pondolavo oku kuata esanju lialua eci tu votola ondaka yetu poku imbila Yehova ovisungo. Nda tu ‘kasi oku liyaka lovitangi,’ tu sukila evetiyo li tunda kolohongele. Momo, ‘elembeleko’ lia Yehova, li tu kuatisa oku pandikisa kovitangi, kuenda li pamisa ekolelo lietu.—Osa. 94:18, 19.
18 Tua sanjuka calua poku limbuka okuti, Yehova wa siata oku tu lava oco tu popeliwe. Omo liaco, tu kuete ovisimĩlo ndevi via Asafe wa imbila ocisungo Yehova hati: “Wa ñuata peka liondio. O songuila loku njimbaimba onumbi. Noke o nambula vulamba.”—Osa. 73:23, 24.
[Apulilo Elilongiso]
[Elitalatu kemẽla 28]
Ove wa kokiwavo la Yehova
[Alitalatu kemẽla 30]
Tu popeliwa lika nda tua pokola kalungulo a Suku
[Elitalatu kemẽla 31]
Tu kuatisiwa levetiyo tu tambula
