Yehova wa Kũlĩha Ndomo a Popela Omanu Vaye

“Yehova wa kũlĩha oku popela omanu vo sumbila.”​—2 PET. 2:9.

MOMO LIE TU SUKILILA OKU KOLELA OKUTI YEHOVA:

Wa kũlĩha otembo yoku tẽlisa ocipango caye?

O ka lekisa unene waye oco a teyuile omanu vaye?

Wa kũlĩha ndomo ovolandu a pondola oku pita?

Anga hẽ va Isareli va kala kohele yoku kuatiwa lolohoka via Fareo?

1. Ovitangi vipi vi ka pita voluali, eci “ohali yalua” yi ka fetika?

 SUKU o ka nena enyolẽho li keya ocipikipiki koluali lua Satana. (1 Va Tes. 5:2, 3) Eci “eteke linene lia Yehova,” li keya mulo voluali, omanu va ka sakalala calua. (Sof. 1:14-17) Koloneke viaco, ohali luhukũi vi ka livokiya. Ku ka kala ohali yimue okuti, ‘tunde kefetikilo, lalimue eteke ya pitile voluali.’​—Tanga Mateo 24:21, 22.

2, 3. (a) Ovitangi vipi omanu va Suku va ka liyaka lavio vokuenda ‘kuohali ya piãla’? (b) Nye ci pamisa ekolelo lietu kovina vi keya kovaso yoloneke?

² Eci “ohali yalua” yi ka li vokiya, afendeli va Suku va ka lambalaliwa la ‘Goge, ya Magoge.’ Vokuenda kuohali yaco, “olohoka via lua” violuali, vi ka yaka lafendeli va Suku “ndeci elende li sitika ofeka.” (Esek. 38:2, 14-16) Lacimue ocisoko coluali ci ka tẽla oku popela afendeli va Yehova. Pole, epopelo liavo li ka tunda lika ku Suku. Nye afendeli va Yehova va ka linga eci ovanyãli vavo va ka seteka oku va kundula?

³ Nda ove Ukristão, wa kolela hẽ okuti Yehova o ka popela omanu vaye kohali ya piãla? Upostolo Petulu wa soneha ndoco: “Yehova wa kũlĩha oku popela omanu vo sumbila. Pole, olondingaĩvi vi ka nyõliwa keteke liekanga.” (2 Pet. 2:9, NW) Oku sokolola ndomo Yehova a popela omanu vaye kosimbu, ci pamisa ekolelo lietu kovina vi keya kovaso yoloneke. Omo liaco, tu konomuisi ovolandu atatu a tu kuatisa oku kolela kunene wa Yehova woku popela omanu vaye.

OKU PULUKA KETANDE

4. Osimbu Etande ka lieyile, nye ca sukilile oku lingiwa?

⁴ Tete, tu kũlĩhĩsi ulandu Wetande lia pita koloneke via Noha. Oku tẽlisiwa kuocipango ca Yehova  votembo ya sokiyiwa, ca kuata esilivilo liocili. Upange woku tunga ocimbaluku loku iñisamo ovinyama oco vi popeliwe, wa sukilile oku lingiwa lonjanga osimbu etande ka lieyile. Ulandu u sangiwa kelivulu Liefetikilo, ka u lombolola okuti, Yehova wa kevelela toke eci Noha a mala oku tunga ocimbaluku, osimbu ka sokiyile eteke lioku nena Etande. Pole, Yehova wa nõla eteke lioku nena Etande, osimbu handi ka sapuilile Noha oco a fetike oku tunga ocimbaluku. Tua kũlĩha ndati ulandu waco?

5. Nye Yehova a lombolola kuenda otembo yipi kua lingiwa esapulo liaco, ndomo ca lekisiwa kelivulu Liefetikilo 6:3?

⁵ Embimbiliya li tu sapuila okuti, Yehova wa eca ocihandeleko cimue kilu. Elivulu Liefetikilo 6:3, li popia ndoco: “Espiritu liange ka li ka kale ño-o hũ vomunu, momo eye ukuetimba; oloneke viaye . . . vi tẽla ocita canyamo kakũi avali kanyamo.” Ondaka eyi ka yi lomboloka okuti, Yehova wa sokiya etendelo lianyamo omanu va pondola oku kala komuenyo mulo voluali. Pole, ocihandeleko caco, ci lekisa okuti, Yehova wa sokiya otembo a ka malako evĩho liosi voluali. a Omo okuti Etande lia pita kunyamo wo 2370 O.Y., tu kuete elomboloko liokuti, Suku wa eca esapulo liaco kunyamo wo 2490 O.Y. Kotembo yaco, Noha wa kuata 480 kanyamo. (Efet. 7:6) Tunde eci Yehova a eca esapulo lioku iya Kuetande, pa pitile 20 kanyamo. Kuenje, kunyamo wo 2470 O.Y., omãla va Noha, va fetika oku citiwa. (Efet. 5:32) Ndaño kua kambele ocita canyamo oco Etande liye, Yehova ka situluile ku Noha ocikele a laikele oku tambula coku kuatisa koku popela omanu. Suku wa talamẽla anyamo añami osimbu ka ecele esapulo ku Noha?

6. Otembo yipi Suku a tuma Noha oku tunga ocimbaluku?

⁶ Citava okuti Yehova wa kevelela anyamo alua, osimbu ka sapuilile ocipango Caye ku Noha. Momo lie tu popela ondaka yaco? Ulandu Wembimbiliya u lekisa okuti, eci Suku a tuma oku tunga ocimbaluku, omãla va Noha va kala ale akulu, kuenda va kuelele. Yehova wo sapuila hati: “Ñolisila kokuove ocisila cange, oco wiñila vocimbaluku, ove lomãla vove valume, lukãi wove, lakãi vomãla vove.” (Efet. 6:9-18) Citava okuti, eci Noha a tambula ocikele coku tunga ocimbaluku, kua kambele lika 40, ale 50 kanyamo oco Etande liye.

7. (a) Noha lepata liaye va lekisa ndati ekolelo? (b) Otembo yipi Suku a sapuila Noha oku iya Kuetande?

⁷ Osimbu upange woku tunga ocimbaluku wa kala oku amamako, Noha kumue lepata liaye, va kala oku sokolola ndomo Suku a ka tẽlisa ocipango caye kuenda otembo Etande li ka fetika. Pole, ndaño ka va kuatele ukũlĩhĩso waco, ka va liwekelepo oku tunga ocimbaluku. Ovisonehua vi popia ndoco: “Noha wa linga cosi Suku o sapuila.” (Efet. 6:22, NW ) —​Yehova wa sapuila Noha hati, kua kamba lika oloneke epanduvali,​—oco etande li fetike. Kuenje, Noha kumue lepata liaye, va kuata otembo yoku iñisa ovinyama vocimbaluku. “Kunyamo wovita epandu komuenyo wa Noha kosãi yavali keteke liekũi lepanduvali,” eci Noha kumue lepata liaye va mala oku pongiya ovina viosi, apangu o kilu a yuluka.​—Efet. 7:1-5, 11.

8. Ulandu watiamẽla Ketande u lekisa ndati okuti Yehova wa kũlĩha otembo yoku popela omanu vaye?

⁸ Ulandu watiamẽla Ketande u lekisa okuti Suku wa kũlĩha otembo ya sokiyiwa kuenda ndomo a popela omanu vaye. Osimbu tu panda kesulilo lioluali  lulo, tu sukila oku kolela okuti, ocipango ca Yehova ci ka tẽlisiwa keteke kuenda ‘kowola’ a sokiya.​—Mat. 24:36; tanga  Havakuki 2:3.

OKU YOVUIWA VOKALUNGA KAKUSUKA

9, 10. Yehova wa songuila ndati omanu vaye oco va kale ndonjanjo kolohoka via va Egito?

⁹ Ulandu watiamẽla Ketande, wa tu kuatisa oku limbuka okuti, Suku wa kũlĩha otembo yoku tẽlisa ocipango caye. Ulandu wavali tu konomuisa cilo, u lekisa esunga likuavo lieci tu sukilila oku kolela okuti, Yehova o pondola oku popela omanu vaye. Eye, o ka linga ovina viaco lunene wa piãla, loku kũlĩhĩsa okuti, ocipango caye ci kasi oku tẽlisiwa. Ndaño Yehova o tẽla oku popela omanu vaye, pole, olonjanja vimue wa siata oku ecelela okuti, va kala kohele oco ovanyãli vaye va kapiwe vonjanjo. Va Isareli va pita locitangi caco, eci va yovuiwa kupika wo Kegito.

¹⁰ Citava okuti, va Isareli vana va tunda Kegito, va kala olohuluwa vitatu komanu. Yehova wa tuma Mose oco a va songuile lonjila yimue ya vetiya Fareo oku sima okuti, va Isareli va kasi oku liyaka lovitangi. (Tanga Etundilo 14:1-4.) Omo okuti Fareo ka tẽlele oku yuvula onjanjo yaco, wa tuma olohoka viaye oku landula apika vavo, oco va kuatiwile Vokalunga Kakusuka. Va Isareli va simĩle okuti, ka va kuete onjila yoku puluka. (Etu. 14:5-10) Pole, ka va kalele kohele. Momo lie? Momo Yehova wa kala konele yavo oco a va teyuile.

11, 12. (a) Yehova wa kuatisa ndati va Isareli? (b) Nye ceya oku pita eci Yehova a kundula va Egito? Ulandu waco u tu longisa nye catiamẽla ku Yehova?

¹¹ “Ongunji yelende” yina ya songuila va Isareli, ya tiukila konyima yavo, kuenje, ya tateka olohoka via Fareo oku va kuama, momo via kala vowelema. Kutanya, kuenda kuteke, konele ya va Isareli kua kala ocinyi. (Tanga Etundilo 14:19, 20.) Noke, Yehova wa tepa pokati ovava o kalunga, poku sikisa ofela yo kutundilo, kuenje, “okalunga ka linga  osi ya kukuta.” Oco ulandu waco u tẽlisiwe, pa pita otembo yalua, momo Embimbiliya li popia ndoco: “Va Isareli va lokila vokati kokalunga posi ya kukuta.” Omo okuti olohoka via Fareo ka via tẽlele oku enda, va Isareli va kuata ombembua. Omo liaco, va Egito ka va tẽlele oku sanga va Isareli, momo Yehova wa va popela. Eye ‘wa tulukila ovaso kocilombo ca va Egito, kuenda wa va tateka. Kuenda wopa alola kakãlu avo, oco va kuate ovitangi poku enda.’​—Etu. 14:21-25.

¹² Eci va Isareli va yokela kesinya likuavo liokalunga, Yehova wa sapuila Mose hati: “Oluĩla eka liove kilu liokalunga okuti ovava aco a tiukila ku va Egito, kakãlu avo kuenda ku vakuakuendela kotuvalu tuavo.” Eci asualali vo Kegito va seteka oku tila ovava, ‘Yehova wa va kunduila vokalunga.’ Kuenje, vosi yavo va pondiwa, kuenda ‘lomue wa supapo.’ (Etu. 14:26-28) Yehova wa lekisa unene woku popela omanu vaye kovitangi viosi va liyaka lavio.

VAMUE VA PULUKA KENYÕLEHO LIO YERUSALÃI

13. Olonumbi vipi Yesu a eca, kuenda nye ca komõhisa olondonge viaye?

¹³ Yehova wa kũlĩha ndomo ovolandu a pondola oku pita oco a tẽlise ocipango caye. Tu konomuisi ulandu watatu u lekisa ndomo o Yerusalãi ya nyõliwa kocita catete. Yehova wa tuma Omõlaye oco a ece olonumbi vioku popela Akristão va kala vo Yerusalãi lo vo Yudea okuti, alupale aco eya oku nyõliwa kunyamo wa 70 K.K. Yesu wa popia hati: “Eci vu mola ocina ci linga onyanya haico ci koka usumba ca tukuiwa luprofeto Daniele, okuti ci tãi vocitumãlo ci kola, . . . ava va kasi vo Yudea va tilile kolomunda.” (Mat. 24:15, 16, NW) Olondonge via Yesu via limbukile ndati otembo ocitumasuku eci ca fetika oku tẽlisiwa?

14. Ovina vipi via pita vo Yerusalãi via situlula olonumbi via Yesu?

¹⁴ Osimbu otembo ya kala oku pita, olondaka via Yesu via fetika oku tẽlisiwa. Kunyamo wa 66 K.K., olohoka via va Roma vina via songuiwa la Sestu Ngalu vieya ko Yerusalãi oku tateka va Yudea oco ka va ka linge usuanji. Eci ovisuanji vimue via kala pokati ka va Yudea haivo Vakuambili yesanda via tilila vonembele, olohoka via va Roma via fetika oku ñuala ocingonja ovimbaka vionembele. Pole, Akristão vana va kala oku lavulula, va fetika oku kuata elomboloko liokuti: Olohoka via vakualofeka vina via ñualele ocingonja lapandela avo efendelo, ovio ‘ocina ci linga onyanya’ ca kala “vocitumãlo ci kola.” Omo liaco, olondonge via Yesu via kuata epuluvi lioku ‘tilila kolomunda.’ Omo okuti olupale lua ñualiwile lolohoka viovanyãli, olondonge via tẽla ndati oku tilila kolomunda? Olondonge vieya oku pita lovina vikuavo ka via lavokaile.

15, 16. (a) Olonumbi vipi Yesu a ecele, kuenda momo lie olondonge viaye via sukilile oku pokola? (b) Oco tu popeliwe tu sukila oku linga nye?

 ¹⁵ Eci Sestu Ngalu kumue lolohoka viaye, va tunda ocipikipiki vo Yerusalãi, Vakuambili yesanda va fetika oku landula olohoka oco vi kuatiwe. Omo okuti, olohoka viaco via tunda volupale, olondonge via Yesu via kuata epuluvi lioku tila. Yesu wa va sapuilile oco va sie ovina viavo, okuti va tunda lonjanga volupale. (Tanga Mateo 24:17, 18.) Anga hẽ, olondonge via sukilile oku pokola kolonumbi via Yesu? Via sukilile oku pokola. Momo, noke yoloneke vimue, Vakuambili Yesanda va tiuka kuenje, va fetika oku vetiya vali omanu vo Yerusalãi lo vo Yudea oku likongela kusuanji wavo. Ovitangi vieya oku livokiya, eci ovisuanji via fetika oku viala va Yudea va kala volupale. Omo liaco, ka ca lelukile oku tunda vo Yerusalãi. Eci va Roma va tiuka kunyamo wa 70, omanu vana va kala volupale luo Yerusalãi, ka va kuatele epuluvi lioku tila. (Luka 19:43) Vana va seteka oku tunda vo Yerusalãi, va kuatiwa! Pole, Akristão vana va tilila kolomunda omo lioku pokola kolonumbi via Yesu, va popela omuenyo wavo. Ovo va limbuka okuti, Yehova wa kũlĩha ndomo a popela omanu vaye. Ulandu owu u tu longisa nye?

¹⁶ Eci ohali ya piãla yi ka fetika, Akristão va ka sukila oku pokola kolonumbi Viondaka ya Suku, kuenda viocisoko caye. Onumbi ya Yesu yatiamẽla koku ‘tilila kolomunda,’ yi tiamisiwilavo koloneke vilo. Ka tua kũlĩhĩle ndomo tu ka tila eci ohali ya piãla yi ka fetika. b Pole, tu sukila oku kolela okuti, kotembo yaco, Yehova o ka eca elomboloko liolonumbi viaco. Omo okuti epopelo lietu li tunda kepokolo tua siata oku lekisa, omunu lomunu o sukila oku lipula ndoco: ‘Nda siata hẽ oku kapako lonjanga olonumbi Yehova a kasi oku eca komanu vaye koloneke vilo?’ Ale nda siata oku kuata atatahãi?​—Tia. 3:17.

TU KOLISIWA LOVINA VI LAIKA OKU IYA

17. Ocitumasuku ca Havakuki ci situlula nye catiamẽla kuyaki Goge a ka linga lomanu va Suku?

¹⁷ Tu konomuisi eci catiamẽla kuyaki Goge a ka linga, wa tukuiwa kefetikilo liocipama cilo. Vocitumasuku cimue, uprofeto Havakuki wa popia hati: ‘Nda ci yeva kuenje utima wange wa sakalala. Omẽla wange wa lulumĩla ondaka. Oku vola kua wila vakepa ange. Oku enda ndi luluma. Ndi tãilili lutima wa tula eteke liohali liya kuava va tu katukila.’ (Hav. 3:16) Eci uprofeto Havakuki a yeva esapulo liokuti, ovanyãli veya oku yaka lomanu va Suku, utima waye wa kuata esakalalo lialua. Omẽla waye wa fetika oku luluma, kuenda etimba liaye ka lia kuatele vali ongusu. Ulandu wa Havakuki, u lekisa ndomo tu ka kuata usumba eci olohoka via Goge vi ka liyaka letu. Pole, uprofeto wa nõlelepo oku talamẽla eteke linene lia Yehova loku kolela okuti, Eye o popela omanu vaye. Omo liaco, tu sukilavo oku kuata ekolelo ndeli uprofeto Havakuki a lekisa.​—Hav. 3:18, 19.

18. (a) Momo lie ka tu sukilila oku kuata usumba luyaki u keya kovaso yoloneke? (b) Nye tu ka konomuisa vocipama ci kuãimo?

¹⁸ Ovolandu atatu tua konomuisa ndeti, a lekisa okuti, Yehova wa kũlĩha ndomo a popela omanu vaye. Ocipango caye ci ka tẽlisiwa muẽle. Nda tu yongola oku mola eyulo liaco, tu sukila oku lekisa ekolelo toke kesulilo. Yehova o tu kuatisa ndati oco tu amameko loku pandikisa? Ocipama ci kuãimo ci ka lombolola ondaka yaco.

[Atosi pombuelo yamẽla]

[Apulilo Elilongiso]

[Elitalatu kemẽla 24]

Anga hẽ va Isareli va kala kohele yoku kuatiwa lolohoka via Fareo?