Otembo yipi Uviali wo Bretanya lowu wo Amerika wa linga uviali wepanduvali wa tukuiwa vocitumasuku ci sangiwa Vembimbiliya?
Apulilo A Lingiwa La Vakuakutanga
Otembo yipi Uviali wo Bretanya lowu wo Amerika wa linga uviali wepanduvali wa tukuiwa vocitumasuku ci sangiwa Vembimbiliya?
▪ Ociñumañuma cinene cutale Soma Nevukandesa a mola vonjoi, ka ci lomboloka ovoviali osi o kilu lieve. (Dan. 2:31-45) Pole, ci tiamisiwila lika kovosoma atãlo, a vialele oku upisa kotembo ya Daniele okuti, a kuete elomboloko lia velapo kafendeli va Suku.
Daniele poku situlula elomboloko liociñumañuma cutale, wa lekisa okuti, Uviali wo Bretanya lowu wo Amerika, wa laikele oku kuata ekemãlo lia velapo voluali okuti o Roma ci sule. Vocinjonde caco, Daniele wa mola okuti, utale wa kala vovipindi viociñumañuma wa pitĩla toke kolomãhi kuenda kovimuine. (Ovimuine violomãhi viociñumañuma, via pangiwa lutale kuenda otuma.) a Elomboluilo liaco li lekisa okuti, Uviali wo Bretanya lowu wo Amerika, wa fetikila kovipindi viutale. Ovolandu a siata oku pita voluali a lekisa okuti, elomboluilo liaco lia sunguluka. Uviali wo Bretanya una wa piñala Uviali wo Roma, wa fetika oku kuata ekemãlo oku upisa kunyamo wo 1.700. Noke Olofeka vio ko Amerika Yonano, via likongela kuviali waco. Pole, uviali wepanduvali wa tukuiwa vocitumasuku Cembimbiliya, ka wa tumbikiwile kotembo yaco. Momo lie? Momo Uviali wo Bretanya lowu wo Amerika, ka wa kalele oku talavayela kumosi. Ovoviali aco a fetika lika oku talavayela kumosi vokuenda Kuyaki Watete wa pita Voluali Luosi.
Vokuenda kuotembo, ‘omãla vusoma,’ va fetika oku kuata ombili yoku kundila olondaka viwa kolofeka vio Amerika yo Konano, kuna ku kasi ombala yavo ko Nova Yorke. (Mat. 13:36-43) Akristão olombuavekua va kala oku kundila kolofeka viosi via Vialiwile lo Bretanya. Vokuenda Kuyaki Watete wa pita Voluali Luosi, uviali wo Bretanya lowu wo Amerika, wa linga ukamba umue wa velapo oco va yakise ovanyãli vavo. Ovo, va kisika omanu oku sivaya olofeka viavo, omo liocituwa cina ca fetikila vuyaki, kuenje, va fetika oku suvuka vana va panga onepa kombuto ‘yukãi wa Suku.’ Noke olombiali via fetika oku imũla oku pangiwa kualivulu kuenda via kapa vokayike vamanji vana va kala asongui kupange woku kunda.—Esit. 12:17.
Ndomo ca lekisiwa vocitumasuku Cembimbiliya, uviali wepanduvali, ka wa fetikile oku viala oku upisa kunyamo wo 1.700, eci o Bretanya ya fetika oku kuata ekemãlo. Pole, uviali waco, wa talamẽla toke kefetikilo lieteke lia Ñala. b
[Atosi pombuelo yamẽla]
a Otuma ya tengiwa lutale, yi lomboloka ovisoko via kongeliwa kuviali wo Bretanya lowu wo Amerika okuti, u sokisiwa loku pama kutale. Vokuenda kuotembo otuma ovisoko viaco, via kuata ovitangi osimbu uviali waco wa fetika oku kemãla.
b Kelomboluilo li sangiwa kemẽla 57, kocinimbu 24 velivulu Preste Atenção à Profecia de Daniel, kuenda kociluvialuvia ci sangiwa kemẽla 56, leci 139.
[Elitalatu kemẽla19]
Vamanji ecelãla va kala ko Torre de Vigia, va kapiwa vokayike kosãi Yevambi yunyamo wo 1918
