Wa Lomboluiwa La Manji Olivier Randriamora

“Oku suka ndi ci, oku kala lelau ndi ci. Kovina viosi kuenda kapuluvi osi, nda lilongisa elumbu lioku kuta, loku kala onjala, lioku kuata ovina vialua kuenda oku kala osuke. Ndi tẽla oku linga ovina viosi, omo lia una o nyĩha ongusu.”​—Va Fil. 4:12, 13,NW.

AME lukãi wange Oly, tua kuatisiwa calua lolondaka Paulu a tukula ndeti. Tua lilongisa “elumbu” lioku kolela Yehova poku u vumba lutima wosi kofeka yo Madagaskare, ndeci Paulu a linga.

Eci Olombangi Via Yehova via fetika oku longisa Embimbiliya mãi ya Oly kunyamo wo 1982, nda kala oku namulãla la Oly. Noke nda tavavo oku lilongisa Embimbiliya, kuenje, Oly wa likongela kelilongiso liange. Tua tokekisa olohuela vietu kunyamo wo 1983, kuenda tua papatisiwa kunyamo wo 1985. Kuenje, tua litumbika kupange wakundi va sokamo. Kosãi Yevambi Linene, kunyamo wo 1986, tua litumbika kupange wakundi va velapo.

Kosãi Yenyenye Linene kunyamo wo 1987, tua fetika upange wakundi valikasi. Kuenje, tua nõliwa oku kundila volupale lumue lutito lua kala konano yo Madagaskare okuti, ka mua kalele ekongelo. Vofeka yo Madagaskare, muli eci ci soka 18 kapata lovimunga viomanu va kuete ovituwa via litepa. Ndaño okuti onepa yalua yomanu va vangula elimi lio Malagasi, pole, vofeka yaco mu sangiwavo omanu va vangula alimi akuavo. Omo liaco, tua lilongisa elimi liaco, kuenje, ca kuatisa omanu oku tava lonjanga kesapulo tua va kundila.

Olosemana viosi vo Calumingu, eci ukãi wange Oly a mala oku linga upange wo vonjo, ndi seteka oku lingila kovaso yaye ohundo yowiñi. Tua enda oku ci lingila konjo likalietu. Tua endavo oku pongiya olonepa viosi Viosikola Yupange Wakristão, kuenje, ame lukãi wange, tu sokolola ndomo tu vangula lomunu tu ka sanga konjo. Noke, eci mitavaso o nyula akongelo a tu ĩha olonumbi vi lekisa ndomo olohongele vi lingiwa, tua kuata esanju lialua!

Omo okuti omanu va enda oku ambata ovikanda ka va koleliwile, ka tua tambowaile olombongo olosãi viosi oco tu lande ovina tu sukila. Omo liaco, tua lilongisa oku tetelẽla okulia tua kuata. Onjanja yimue, ka tua kuatele olombongo vioku fetela okalela, oco tu ende kohongele yimbo ya lingiwila ocinãla ci soka 180 kolokilometulu. Tu ivaluka onumbi Manji umue ulume a tu ĩha poku popia hati: “Pingi ku Yehova vohutililo loku u sapuila ocitangi vu kuete. Noke likolisiliko oku linga ovina wa pingi kokuaye.” Omo liaco, tua likutilila, kuenje, tua nõlapo oku endela posi. Pole, osimbu ka tua fetikile ungende waco, manji umue weyile oku tu nyula, wa tu ĩha olombongo viopasasi!

KUPANGE WOKU NYULA AKONGELO

Kosãi ya Kayovo, kunyamo wo 1991, nda nõliwa oku kala omitavaso yi nyula akongelo. Kotembo yaco, okacimunga ketu ka li vokiyile okuti, ka kuata  9 kakundi. Vatatu pokati kavo va papatisiwile ale, pole, kolohongele kua enda oku kala ci soka 50 komanu. Noke yoku pindisiwa kupange woku nyula akongelo, tua tumiwa oku nyula akongelo a kala ko Antananarivu okuti, oyo ombala yofeka. Kunyamo wo 1993, tua nõliwa oku nyula akongelo a kala kutundilo wofeka. Ekalo lio kocitumãlo caco, lia litepele calua leli lio volupale tua tundile.

Oco tu nyule akongelo lovimunga via kala ocipãla, tua enda oku endela posi. Olonjanja vimue, tua lingaile ungende u soka 145 kolokilometulu vovisenge via sitika, loku pita volomunda. Tua enda oku ambata lika ovina tu sukila. Volohundo viowiñi tua enda oku linga kupange woku nyula akongelo mua kongelele oku lekisa olovideo. Pole, olovideo viaco vi lema calua oku vi ambata, kuenda tua enda oku vi lekisa olonjanja vialua veteke. Ukãi wange Oly wa enda oku ambata omakina yoku lekisa ovideo yaco, osimbu ame nda ambata o bateriya yimue yekãlu.

Olonjanja vimue, oco tu pitĩle kekongelo likuavo tua enda oku linga ungende u soka 40 kolokilometulu veteke. Tua tala ohali yalua, poku lamana volomunda, loku pita vovinjavata, kuenda oku yoka olondui. Pamue tu lala kohulo yetapalo, pole, tua enda oku likolisilako oco tu pitĩle vimbo okuti, tu sanga onjo yimue yoku lala. Omo okuti tua kala akombe, tua enda oku lipula nda omanu va ka tava oku tu yekisa kolonjo viavo. Noke yoku sanga onjo yimue, tu pongiya okulia. Ukãi wange undila ombia kuenda enda oku tapa ovava kolui. Ame ndi pinga ondiaviti yoku tiaña olohũi. Ovina viaco via enda oku tu nyana otembo yalua. Olonjanja vimue, tu landa olosanji vi kasi lomuenyo okuti, noke tu vi ponda oco vi linge ombelela.

Noke yoku lia, tu ka tapa ovava oku lisukula. Olonjanja vimue, nda ka tu kuete onjo yoku sikĩla, tu lala vociwo. Omo okuti olusoka luociwo ka wa yambeliwile ciwa, eci ombela yi loka, tu talama loku kunamẽla vocimano oco ka tu ka yule.

Tua enda oku kundila omanu va tu yekisa vonjo yavo. Eci tu pitĩla vekongelo limue, loku limbuka ndomo Vamanji va tu yekisa locisola, ci tu nenela esanju lialua. Esanju liavo eci tu va nyula lia velelepo okuti, ovitangi tua pita lavio vi sule.

Olonjanja vimue, poku sikĩla konjo ya vamanji, tua va kuatasaile kupange wo vonjo. Oku lianja lavo, kua va vetiya oku endaenda kumue letu kupange woku kunda. Omo liaco, ka tua yonguile okuti vamanji va tu yekisa va tu ĩha ovina via posoka, kuenda okulia kuna okuti, ka va pondola oku ku landa!

OKU NYULA OVIMUNGA VIA KALA OCIPÃLA

Poku nyula ovimunga via vamanji va kala kovaimbo ocipãla, tua kuata esanju lialua omo liesokiyo liupange woku kunda va linga. Omo liaco, ka tua kuatele otembo yoku “puyuka.” (Mar. 6:31) Kimbo liaco, manji umue lukãi waye, va laleka konjo yavo ci soka 40 komanu va enda oku lilongisa Embimbiliya, oco tu kuame elilongiso liavo. Ukãi wange kumue lukãi wa manji yaco va longisa 20 komanu. Ame lulume wa manji yaco, tua longisavo 20 komanu. Eci tu mala oku longisa omunu umue, ukuavo iñila. Tua liwekapo lika omo liohongele tua kuata keteke liaco. Noke yohongele, tua linga elilongiso lionimbu lomanu va kambeleko okuti, tua lembuka lika kelivala liecelãla kuteke!

Eci tua endele oku nyula ocimunga cimue la vamanji vo vovaimbo a kala ocipepi, tua votoka kelivala liecelãla komẽle. Tua pitĩla kocitumãlo caco eci ekumbi lia kala vongunji. Vosi yetu tua walele uwalo  wa kuka. Noke yoku pita vesisi limue, tua pitĩla kocikanjo caco kekumbi. Tua wala lonjanga uwalo wa yela, kuenje, tua fetika oku kundila konjo lanjo. Vimbo liaco, ka mua kalele olonjo vialua, pole, etendelo liakundi lia luile. Tua kundila lika vimbo liaco vokuenda kueci ci soka 30 kakukutu. Kuenje, tua endele vimbo likuavo. Noke lioku kundila vimbo liaco, tua linga ungende walua woku tiukila konjo. Omo okuti, tua malusula lonjanga oku kundila vocikanjo caco, ombili yetu ya tepuluka. Momo tua linga ungende walua, pole, tua kundila lika konjo lanjo vowola yimosi. Vamanji tua sanga kovaimbo aco, ka va lisiõsuĩle, kuenda va amamako lesanju.

Vocivanja co Taviranambo, mua kala ocimunga ca vamanji va kala ocipepi lomunda yimue. Komunda yaco, tua sangako epata limue Liolombangi Via Yehova okuti, lia kala vonjo yi kuete lika ohondo yimosi. Ocipepi lonjo yaco, kua kala okanjo kamue va enda oku lingila olohongele. Eci manji umue a tu mola, wa fetika oku vilikiya lolukandi hati: “A vamanji!” Noke, komunda yikuavo kua tunda ondaka ya tambulula hati: “Ndati!” Manji yaco wa popia vali hati: “Mitavaso o nyula akongelo weya!” Ovo va tambulula vati: “Ewa!” Ondaka yaco ya lisanduila ku vamanji vakuavo va kala ocipãla. Kuenje, omanu va liongolola, noke tua fetika ohongele leci ci soka 100 komanu.

EKAMBO LIOVIENDELO

Kunyamo wo 1996, tua nõliwa oku nyula akongelo volupale luo Antananarivo, okuti lu sangiwa ocipepi lolomunda vio vocakati cofeka. Tua kuata ocitangi cimue cinene kupange woku nyula akongelo. Volupale luaco, ka ca lelukile oku sanga akãlu voku ambata omanu kovitumãlo vi kasi ocipãla. Tua sokiyile oku nyula ocimunga cimue ca vamanji va kala volupale luo Beankàna, (Besakay), lu sangiwa ocinãla ci soka 240 kolokilometulu lolupale luo Antananarivu. Noke yoku sapela lulume umue o kuete ekãlu litito, wa tava okuti, tu endela vokalosa kekãlo liaye, toke kocitumãlo caco. Tua endela vekãlu liaco ci soka 30 komanu okuti, vamue va tumãla kuenda vakuavo va talama.

Noke liocinãla cimue, ekãlu liaco lia nyõleha, kuenje tua endela vali posi. Eci pa pita olowola vimue, kueya ekãlu likuavo linene. Kuenje, vosi yetu tua londa lovikuata vietu, pole, noke lia talama. Tua tava oku talama, momo tua kuata ocitangi cimue. Eci tua pitĩla kolui lumue, tua sanga okuti, va kala oku semulũla eyau lia teka. Omo liaco, tua endela vali posi toke vimbo limue mua kala akundi valikasi. Ndaño okuti ka tua sokiyile oku va pasuisa, pole, tua talavaya lavo kupange woku kunda otembo yimue, osimbu eyau lia kala oku pangiwa, tua kevelela toke eci kueya ekãlu likuavo lia tu ambata.

 Vimbo liaco, tua kalamo osemana yimosi, kuenje, kueya ekãlu limue lia tu ambata. Vetapalo tua pita, mua kala ovikulungu vinene vie yuka ovava. Omo okuti vetapalo mua yukile ovava toke volongolo, tua sukilile oku sindika ekãlu. Olonjanja vikuavo ekãlu liaco lia enda oku talama volonata okuti, ka li tava oku li vatisa. Tua enda oku pasuka lomẽle oco tu pitĩle vimbo tu yongola oku lala. Tua sukilile oku tunda vetapalo loku pita vovapia oluoso mue yuka ovinjavata, toke eci tu pitĩla.

Omo okuti ya kala onjanja yatete tua endele kocitumãlo caco, tua kundila omanu tua sanga vovapia oluoso loku va pulisa oku ku sangiwa Olombangi Via Yehova. Tua kuata esanju lialua, eci tua limbuka okuti omanu vaco vamanjetu!

TUA VETIYA VAMANJI OKU IÑILA KUPANGE WAKUNDI VOTEMBO YOSI

Vokuenda kuanyamo, tua kuata esanju omo lioku kuatisa vamanji oku iñila kupange wakundi votembo yosi. Osimbu tua nyula ekongelo limue mua kala ci soka 9 kakundi va velapo, tua va vetiya okuti, omunu lomunu pokati kavo, o sukila oku kuatisa manji umosi oku fetika upange wakundi va velapo. Eci pa pita olosãi epandu noke yoku va nyula, vekongelo liaco tua sangamo 22 kakundi va velapo. Vamanji vamue vavali akãi okuti akundi va velapo, va vetiya va isiavo okuti, akulu vekongelo oco va fetike upange wakundi va velapo. Kuenje, akulu vaco vekongelo, va vetiyavo akulu vakuavo vatatu vekongelo oco va fetike upange wakundi va velapo. Noke liotembo yimue, vamanji vatatu okuti, akulu vekongelo, va fetika upange wakundi valikasi. Kuenje, manji umue pokati kavo lukãi waye, wa fetika oku nyula akongelo. Nye ceya oku pita noke lakulu vavali vekongelo? Umue pokati kavo o kasi oku nyula akongelo, ukuavo wa iñila kupange woku tunga Olonjango Viusoma.

Tu eca olopandu ku Yehova, omo a siata oku tu kuatisa, kuenje, tua limbuka okuti, ka tu tẽla oku linga cimue longusu yetu muẽle. Ndaño okuti olonjanja vimue tu yeva ekavo, kuenda tu kuatiwa loku vela, pole, tua sanjuka calua eci tu sokolola onima tua siata oku tambula kupange woku kunda. Upange wa Yehova u kasi oku amamako. Tua sanjuka calua omo liekuatiso litito tua eca, pole, cilo tu kasi kupange wakundi valikasi. Omo liaco, tua lilongisa “elumbu” lioku kolela ku Yehova, ‘una o tu ĩha ongusu.’

[Elitalatu kemẽla 6]

Tua lilongisa “elumbu” lioku kolela ku Yehova

[Omapa/​Alitalatu kemẽla 4]

O Madagaskare, yi tukuiwa hati, Ocifuka Cikusuka. Oco ocifuka cakuãla cinene voluali, pokati kovifuka vi sangiwa vokalunga. Osi yaco yongongo, kuenda muli ovinyama vialua

[Elitalatu kemẽla 5]

Ka ca lelukile oku linga ovongende

[Alitalatu kemẽla 5]

Tua sanjukila oku longisa Embimbiliya komanu