Va Lieca—Oku Kundila ko Ekuadore
Va Lieca—Oku Kundila ko Ekuadore
MANJI umue o tukuiwa hati, Bruno kofeka yo Italia, wa enda oku kisikiwa calua lakamba vaye. Omo wa loñolohele calua, eci a mãla elilongiso lia pita pokati, epata liaye kumue lalongisi, vo vetiya oku iñila kelilongiso lia velapo. Pole, osimbu manji Bruno ka malẽle elilongiso lia pita pokati, wa papatisiwa kuenje, wa likuminyile oku linga upange wa Yehova Suku. Nye a nõlapo oku linga? Eye wa popia hati: “Nda likutilila ku Yehova okuti, ndi yongola oku pitisa kovaso ohuminyo nda linga kokuove. Noke, nda amisako loku likutilila okuti, si yongola oku ambata omuenyo umue ka u kuete esilivilo, momo ndi yongola oku linga ovina vialua kupange wove.”
Eci pa pita anyamo amue, manji Bruno wa enda kofeka yo Ekuadore, ko Amerika yo Kombuelo oku kundila omanu. Eye wa popia hati: “Yehova wa tambulula olohutililo viange, ndeci nda lavokaile.” Eci a pitĩla ko Ekuadore, wa sangako amalẽhe valua kumue lakulu va tunda kolofeka vikuavo oco va vokiye upange wavo woku vumba Yehova.
AMALẼHE VANA VA ‘SETEKA YEHOVA’
Manji Bruno kumue lamalẽhe vakuavo voluali luosi, va tava kelaleko lia Yehova wa popia hati: ‘Ndi seteki, nda siu yuluili apito okilu loku u sukumuĩli esumũlũho lia piãla enene.’ (Mal. 3:10) Omo okuti amalẽhe vaco va kuetele ocisola Yehova Suku, va nõlapo oku u ‘seteka’ poku pesela otembo, ongusu, kuenda ovina va kuete oco va kundile omanu kolofeka vina kuli ekambo liakundi Vusoma.
Eci amalẽhe vaco va pitĩla vocikanjo cokaliye, va limbuka okuti, ‘kuli upange walua woku ungula, pole, olondingupange vitito.’ (Mat. 9:37) Kũlĩhĩsa ulandu wa manji Jaqueline, wa tunda kofeka yo Alemanya. Eye wa tuma ukanda kofiliale yo Ekuadore, kuenje wa popia hati: “Ndi kasi oku kundila ko Ekuadore ci pitahãla anyamo avali, kuenda ndi kasi oku longisa Embimbiliya kueci ci soka 13 komanu okuti pokati kavo, vakuãla va siata oku endaenda kolohongele. Ulandu owu ka u nena esanju?” Manji Chantal, wa tunda ko Kanada, wa popia hati: “Kunyamo wo 2008, nda ilukila kocikanjo cimue ci kasi konele yokalunga, kofeka yo Ekuadore okuti, kua kala lika ekongelo limosi. Kaliye, vocikanjo caco muli akongelo atatu, kuenda eci ci pitahãla 30 kakundi votembo yosi. Oku mola ndomo omanu va linga apongoloko, ci nena esanju lialua!” Manji yaco wa amisako hati: “Cilo tua ilukila kolupale lumue lu kasi kilu Liomunda Andes, okuti yi kuete 2.743 kolometulu. Volupale luaco, muli ci soka 75.000 komanu, pole, mu kuete lika ekongelo limosi, kuenda muli omanu valua va kuete onjongole yoku lilongisa Embimbiliya! Omo liaco, nda sanjukila oku linga upange woku kunda.”
OVITANGI VIA KONGELAMO
Oku ilukila kofeka yikuavo ka ca lelukile. Vamanji vamue amalẽhe va siata oku kuata atatahãi osimbu ka va ilukilile kofeka yikuavo. Manji Kayla, wa tunda kofeka yo Estados Unidos wa liyaka locitangi caco. Eye wa popia hati: “Olondaka via vamanji vamue, via ponduile oku tepulula onjongole yange yoku ilukila kofeka yikuavo. Momo ka va kũlĩhĩle esunga lieci nda yonguilile oku ilukila kofeka yaco, oco ndi linge upange wakundi votembo yosi. Noke, nda lipula ndoco: ‘Ndi kasi hẽ oku nõla onjila ya sunguluka?’” Ndaño lolondaka viaco, pole, manji Kayla wa nõlapo oku ilukila kofeka yaco. Noke wa popia hati: “Olohutililo nda linga ku Yehova, loku sapela lavamanji va pama kespiritu, ca ndi kuatisa oku limbuka asumũlũho a tunda koku lieca olumue kupange wa Yehova.”
Vamanji vamue va siata oku liyaka locitangi coku lilongisa elimi likuavo. Manji Siobhan, wa tunda kofeka yo Irilanda, wa popia hati: “Oku vangula elimi likuavo, ka ca lelukile. Omo liaco, nda fetika oku kuata epandi loku likolisilako oku lilongisa lutate elimi liaco, kuenda oku yola akulueya ange muẽle.” Manji Anna wo kofeka yo Estonia, wa popia hati: “Oku lilongisa elimi lio Espanyole, ca tatama calua okuti, oku kala vofeka yi kuete owuya walua, haiyo ye yuka oneketela, loku kala volonjo ka vi kuete ovava a sanya, ci sule. Olonjanja vimue, nda yonguile oku liwekapo oku lilongisa elimi liaco. Pole, nda nõlapo oku amamako oku lilongisa, kuenda sia kapeleko akulueya ange.”
Olonjanja vimue, ongeva lepata li kasi ocipãla, yi vetiya omunu oku sumua. Manji Jonathan, wo ko Estados Unidos, wa popia hati: “Eci nda pitĩla ko Ekuadore, nda sumuĩle omo lioku litepa lepata liange kuenda akamba. Pole, nda yula esumuo liaco, poku pitisa kovaso oku lilongisa Embimbiliya loku endaenda kupange woku kunda. Noke nda fetika oku kuata akamba vokaliye vekongelo, okuti va ndi kuatisa oku kuata esanju.”
Ocitangi cikuavo, ekalo liofeka yaco, momo pamue ka lia lisokele leli liofeka yina wa tunda. Manji Beau, wa tunda kofeka yo Kanada, wa popia hati: “Kofeka yove, pamue volonjo muli ocinyi, kuenda alove ovava. Pole, kulo, volonjo ka muli ovina viaco.” Kolofeka vimue, kuli uhukũi, ekambo lioviendelo viwa, kuenda omanu vamue ka va tẽla oku tanga. Manji Ines, wo ko Austria, wa yula ocitangi caco, poku kapako ovituwa viwa viomanu vaco. Kuenje, wa popia hati: “Omanu vaco, va kuete ocituwa coku yekisa akombe, va sanjuka, va kuatisa vakuavo, kuenda ambombe. Valua pokati kavo, va kuete onjongole yoku lilongisa ovina viatiamẽla ku Suku.”
‘ASUMŨLŨHO KA A TENDIWA’
Osimbu vamanji yaco va kala oku kundila kofeka yo Ekuadore, va limbuka okuti Yehova wa siata oku ‘va ĩha ovina vialua okuti evi va pinga, levi va sima vi sule.’ (Va Efe. 3:20) Kuenje, va limbuka okuti, va tambula ‘asumũlũho ka a tendiwa.’ (Mal. 3:10) Kũlĩhĩsa esanju va kuata liatiamẽla kupange woku kunda ndeci:
Manji Bruno wa popia hati: “Nda fetika upange wotembo yosi kulo ko Ekuadore vocikanjo co Amazonia. Noke, nda kuatisa kupange woku tunga o Betele yo ko Ekuadore. Cilo ndi talavaya ko Betele yaco. Eci nda kala ko Italia, nda nõlelepo oku pitisa kovaso oku vumba Yehova, kuenje, nda tẽlisa onjongole yange yoku linga upange waye.”
Manji Beau wa popia hati: “Nda vokiya ukamba wange la Yehova omo lioku pesila otembo yange kovina viespiritu kulo ko Ekuadore. Ndi kuetevo asumũlũho alua omo nda siata oku nyula ovitumãlo via posoka, vina nda yonguile oku kũlĩha.”
Manji Anna wa popia hati: “Sia simĩle okuti ndi kuata esanju kupange wumisionaliu, ndaño sia kuelele. Pole, cilo nda limbuka okuti, ndi pondola oku kuata esanju. Ndi pandula Yehova omo a nyĩha esumũlũho lioku longisa omanu valua oco va linge olondonge. Nda kuatavo esumũlũho lioku tunga Olonjango Viusoma, kuenda oku kuata akamba vokaliye.”
Manji Elke wa popia hati: “Eci nda kala kofeka yetu ko Austria, nda enda oku likutilila ku Yehova oco ndi sange omunu umue o tava oku u longisa Embimbiliya. Kulo ndi kasi oku longisa Embimbiliya ci soka 15 komanu! Nda sanjuka calua poku mola ndomo omanu vaco va kasi oku kula kespiritu.”
Manji Joel wa popia hati: “Oku vumba Yehova kofeka yimue kua kũlĩhĩle, ci nena esanju lialua. Ove o lilongisa oku kolela calua ku Yehova, kuenje, o limbuka asumũlũho a tunda kokuaye omo lialikolisilo ove! Eci nda tẽlisa unyamo umosi kulo, tunde eci nda tunda ko Estados Unidos, vocimunga nda kapiwile, mua kala lika akundi epandu, pole, kaliye muli 21 kakundi. Kohongele Yonjivaluko kua kala 110 komanu.”
NYE O SUKILA OKU LINGA?
Ene amalẽhe, ekalo liene li ecelela hẽ oku ilukila kofeka yimue ku sukila akundi Vusoma? Lingi esokiyo oco vu nõle lutate onjila vu yongola oku kuama. Handi vali, ocisola vu kuetele Yehova kuenda omanu, oco ci ko vetiyi oku ilukila kofeka yikuavo. Nda vu kuete ocisola caco, kuenda ekalo liene li ecelela oku ci linga, likutilili ku Yehova oco vu ilukili kofeka yikuavo. Omo liaco, sapuiliko olonjali viene lakulu vekongelo catiamẽla konjongole vu kuete. Nda wa ci lingi, vu ka kuata esumũlũho lioku kuatisa kupange u kola.
[Elitalatu kemẽla 3]
“Oku likutilila olonjanja vialua ku Yehova loku sapela la vamanji va pama kespiritu ca ndi kuatisa oku limbuka asumũlũho a tunda ku Yehova poku lieca kupange waye.”—Manji Kayla wo ko Estados Unidos
[Okakasia/Elitalatu kemẽla 6]
Ndomo tu lipongiyila oku ka kundila kofeka yikuavo
• Kuata ocituwa coku linga elilongiso lio pokolika
• Pitulula olonumbi vi sangiwa Vupange Wetu Wusoma, Wenyenye wo 2011, kamẽla 4-6
• Sapela la vamanji va talavaya ale kolofeka vikuavo
• Kũlĩhĩsa ovituwa lekalo liofeka yaco
• Lilongisa elimi li vanguiwa vofeka yaco
[Okakasia/Elitalatu kemẽla 6]
Vamanji vamue va kasi oku kundila kolofeka vikuavo, va likuatisa lolombongo viavo muẽle poku . . .
• iñila kupange woku nganyala olombongo vokuenda kuolosãi vimue kofeka yavo
• kapisa onjo yavo komunu umue o yi fetela
• linga ovopange amue vo Internet
[Alitalatu kemẽla 4, 5]
1 Jaqueline wo ko Alemanya
2 Bruno wo ko Italia
3 Beau wo ko Kanada
4 Siobhan wo ko Irilanda
5 Joel wo ko Estados Unidos
6 Jonathan wo ko Estados Unidos
7 Anna wo ko Estonia
8 Elke wo ko Austria
9 Chantal wo ko Kanada
10 Ines wo ko Austria
