“Yehova” Wa Kongela Epata Liaye

‘Likolisilako oku likuata omunga yespiritu.’​—VA EFE. 4:1, 3.

O LOMBOLOLA NDATI?

Nye ci lomboloka eliangiliyo liatiamẽla kocipango ca Suku?

Tu ‘likuata ndati omunga yespiritu’?

Nye ci tu kuatisa oku “liombokela pokati” la vamanji?

1, 2. Cipi ocipango ca Yehova catiamẽla kilu lieve kuenda komanu?

 EPATA. Nye o sima eci o yeva ondaka yaco? Yu ku vetiya hẽ oku kuata ocisola lesanju? Wa siata hẽ oku likolisilako oku tẽlisa ocimãho caco? O sima hẽ okuti epata ocitumãlo cimue ca koka haico ci kuatisa omunu oku kula, loku lilongisa oku sapela lavakuavo? Nda o kasi oku tata epata, citava okuti wa siata oku linga apulilo ava. Yehova, eye Usovoli wepata. (Va Efe. 3:14, 15) Eye o yongola okuti, ovangelo kilu, lomanu palo posi, va kuata esanju, va kolapo, va likolela pokati, kuenda va likuata omunga.

² Ndaño okuti noke yekandu omanu va tinduka ku Yehova Suku, pole, ocipango caye, ka ca tatekiwile. Eye o yongola okuti, oluali Luokaliye palo posi, lu yukisiwa locitumbulukila ca Adama la Heva. (Efet. 1:28; Isa. 45:18) Kuenje, wa linga esokiyo oco a tẽlise ocipango caye. Ovina vialua viatiamẽla kesokiyo liaco, via lomboluiwa kelivulu lia Va Efeso, kuna ku lekisa oku likuata omunga okuti, olio etosi lia velapo lia tukuiwa. Omo liaco, tu konomuisi ovinimbu vimue vielivulu liaco, oco tu limbuke ndomo tu pokola kocipango ca Yehova coku tokekisa oviluvo viaye.

OVOPANGE A KONGELA VELIANGILIYO LIUSOMA

3. Eliangiliyo lia Suku lia tukuiwa kelivulu lia Va Efeso 1:10, li lomboloka nye, kuenda otembo yipi onepa yatete ya fetika oku kongeliwa?

³ Mose wa sapuila va Isareli hati: ‘Yehova Suku yetu, eye Suku lika waye.’ (Esin. 6:4) Ovilinga viosi via Yehova locipango caye, vi kuete elitokeko. Omo liaco, Yehova ‘wa linga eliangiliyo liokuti, eci otembo a sokiya yi pitĩlapo, ovina viosi’ vi ka lingiwila kumuamue,  ‘veliangiliyo’ liaye oco oviluvo viaye viosi vi likuate omunga. (Tanga Va Efeso 1:8-10.) Eliangiliyo liaco, li kuete olonepa vivali. Onepa yatete, esokiyo liekongelo liolombuavekua vina vi ka viala kilu kumue la Yesu Kristu okuti eye Utue wavo. Esokiyo liaco, lia fetika ko Pendekoste kunyamo wa 33 K.K., eci Yehova a fetika oku kongela vana va ka viala la Kristu kilu. (Ovil. 2:1-4) Omo liaco, olombuavekua vi tendiwa ndavakuesunga omo liocisembi ca Kristu, kuenda vi tukuiwa hati, “omãla va Suku.”​—Va Rom. 3:23, 24; 5:1; 8:15-17.

4, 5. Otembo yipi onepa yavali yeliangiliyo lia Suku ya fetika oku sokiyiwa?

⁴ Omanu vana va ka kala Voluali Luokaliye palo posi vemehi Liusoma wa Mesiya, ovo onepa yavali ya kongela veliangiliyo liaco okuti, va fetika ale oku pongiyiwa. “Owiñi wakahandangala,” owo onepa yatete yomanu vaco. (Esit. 7:9, 13-17; 21:1-5.) Vokuenda Kuohulukãi Yanyamo, omanu valua va ka pinduiwa, va ka kongeliwa kowiñi wakahandangala. (Esit. 20:12, 13) Sokolola ndomo epinduko liomanu vaco li ka nena elitokeko pokati ketu! Kesulilo liohulukãi yanyamo, ‘ovina vio posi,’ vi ka pita voseteko ya sulako. Vana va ka lekisa ekolelo, va ka tendiwa okuti, “omãla va Suku” palo posi.​—Va Rom. 8:21; Esit. 20:7, 8.

⁵ Koloneke vilo, Suku wa sokiya ale omanu va ka kala kilu, kuenda vana va ka kala palo posi. Pole, omunu lomunu pokati ketu, o kuatisa ndati keliangiliyo liaco?

‘LIKUATI OMUNGA YESPIRITU’

6. Ovisonehua vipi vi lekisa okuti Akristão va sukila oku kuata ukamba la vakuavo?

⁶ Ovisonehua vi lekisa okuti, Akristão vosi va sukila oku likuata omunga. (1 Va Kor. 14:23; Va Hev. 10:24, 25) Pole, oco tu likuate omunga, ka tu liongoluila lika pocitumãlo cimuamue ndeci omanu va siata oku kala pocitanda, kuenda pocila combunje. Voku likuata omunga yocili, mua kongela oku linga ovina vialua. Tu likuata omunga poku kapako olonumbi via Yehova, loku ecelela oku songuiwa lespiritu sandu lia Suku.

7. Ondaka “oku likuata omunga yespiritu” yi lomboloka nye?

⁷ Yehova o tenda olombuavekua ndavakuesunga, loku vi tukula hati, omãla vaye, kuenda olomeme vikuavo ndakamba vaye vonduko yocisembi ca Kristu, ndaño okuti omunu lomunu o kuete ovituwa via litepa, kuenda tu kasi voluali lulo lua vĩha. (Va Rom. 5:9; Tia. 2:23) Eli olio esunga lieci tu sukilila oku kapako elungulo lioku ‘pandikisa la vakuetu.’ Omo liaco, nye ci tu kuatisa oku likuata omunga la vamanji? Tu sukila oku lekisa ‘ocisola lumbombe.’ Paulu, o tu vetiyavo oku likolisilako ‘oku likuata omunga loku pandikisa la vakuetu kuenda oku kala lavo lombembua.’ (Tanga Va Efeso 4:1-3.) Oco tu kapeko elungulo liaco, tu sukila oku ecelela okuti, espiritu lia Suku li tu kuatisa oku ima epako liwa. Epako liaco, lia litepa lovilinga vietimba vina vi koka olonepele, kuenda li kasi ndelimendo li sitika epangu liuwalo. Momo, li kuatisa vamanji oku yuvula olonepele.

8. Momo lie ovilinga vietimba vi kokela olonepele?

⁸ Kũlĩhĩsa ndomo “ovilinga vietimba” vi nena olonepele. (Tanga Va Galatia 5:19-21.) Ukahonga, wa siata oku tepa ukamba omunu a kuetele Yehova, kuenda vamanji. Ukahokolo u pondola oku sumuisa omunu va lueyela okuti, cu vetiya oku litepa lohueli yaye, kuenje, ci nena esumuo lialua komãla. Evĩho, li nyõla ukamba omunu a kuete la Suku, kuenda la vamanji. Vana va siata oku sitika lokola apangu ovikuata vimue, va kũlĩha okuti, oco elimendo li lamelẽle kocikuata caco, va sukila oku li puenya lutate loku li yelisiwa ciwa, oco li lamelẽle kocikuata caco. Oku kuata ovituwa  via vĩha, ci lekisa etombo kovihandeleko via Suku viesunga. Momo ovilinga vietimba, vi tepa ukamba lomanu kuenda la Suku. Ovilinga viaco, ka vi litava lekalo lia Yehova.

9. Tu pondola ndati oku kũlĩhĩsa ovisimĩlo vietu, oco tu limbuke nda tu kasi oku ‘likolisilako oku kala vomunga yespiritu’?

⁹ Omunu lomunu pokati ketu, o sukila oku lipula ndoco: Nda siata hẽ oku likolisilako ‘oku likuata omunga la vamanji loku pandikisa lavo oco pokati ketu pa kale ombembua’? Eci ndi kuata ovitangi la vamanji ndi vi tetulula ndati? Nda siata hẽ oku lekisa esumuo komanu oco ndi kuatisiwe lakamba valua? Ndi yongola hẽ okuti akulu vekongelo va ndi tundila olunda kuenje, si sandiliya ombembua la vamanji? Nda manji umue o kuete ocitangi lame, ndi yuvula hẽ oku linga laye ukamba okuti, si tetulula lonjanga ocitangi ci kasi pokati ketu?’ Nda tua siata oku lekisa ovilinga via tukuiwa ndeti, tu kasi hẽ oku kuatisa oku tẽlisiwa kuocipango ca Yehova coku kongela ovina viosi vu Kristu?

10, 11. (a) Momo lie oku kuata ombembua la vamanji ci kuetele esilivilo? (b) Ovilinga vipi vi nena ombembua lekalo liwa kespiritu?

¹⁰ Yesu wa popia hati: ‘Osimbu o kasi loku lumbila ocilumba cove kutala, nda wivaluka okuti ukuene o kasi love londaka, oco, siapo ocilumba cove putala, kuende lonjanga, ka lisunguluise handi lukuene, oco noke wiye, o lumbe ocilumba cove. Lisunguluisa lonjanga lu o ku kuetele ondaka.’ (Mat. 5:23-25) Tiago wa soneha ndoco: “Epako liesunga li kũlĩwa vombembua la vakuakulinga ombembua.” (Tia. 3:17, 18) Nda ka tua siatele oku linga ovina via sunguluka, ka tu pondola oku kuata ombembua la vamanji.

¹¹ Kũlĩhĩsa ulandu owu: Kolofeka vina kua pita uyaki, ovisenge vialua violofeka viaco, ka citava oku vi lima ovapia, momo via kapiwa atenda o posi. Eci etenda li totãla pocitumãlo cimue, olongunja vi tilila valupale, kuenje, omanu va fetika oku nyana ovikuata vovaimbo aco, kuenda valupale mu kala onjala. Cimuamue haico, ci pondola oku pita letu okuti, nda ka tu tati ciwa ekalo lietu kespiritu, tu nyõla ombembua yi kasi pokati ketu la vamanji. Pole, nda tu ecela lonjanga vamanjetu, kuenda tu likolisilako oku linga ovina viwa, tu kuata esanju liocili.

12. Akulu vekongelo va siata oku tu kuatisa ndati oku likuata omunga?

¹² “Olongavelo viomanu,” vi pondola oku kuatisa vamanji oku likuata omunga. Kuenda via siata oku tu kuatisa, oco ‘tu pitĩle kongongela yekolelo.’ (Va Efe. 4:8,  13) Eci akulu vekongelo va lingila kumue letu upange u kola, kuenje, va tu ĩha alungulo atiamẽla Vondaka ya Suku, va kasi oku tu kuatisa oku kula kespiritu, oco tu wale omunu wokaliye. (Va Efe. 4:22-24) O tava hẽ okuti, alungulo avo a tunda ku Yehova oco a ku kuatise oku tambula omuenyo ko pui voluali luokaliye vemehi liuviali Womõlaye? Ene akulu vekongelo, wa siati hẽ oku kuatisa vamanji oco va kuate omuenyo ko pui?​—Va Gal. 6:1.

‘LIOMBOKELI POKATI’

13. Nda ka tu kapiko alungulo a sangiwa kelivulu lia Va Efeso 4:25-32, ovitangi vipi tu kuata?

¹³ Kelivulu lia Va Efeso 4:25-29, ku lekisa ovituwa tu sukila oku yuvula. Vovituwa viaco, mua kongela oku popia uhembi, oku kuata onyeño, kuenda oku vangula lukãlu. Pole, upopi waco ka wa sungulukile, kuenda ka u pamisa ekolelo lia vamanji. Nda umue ka kapiko alungulo Embimbiliya a tukuiwa ndeti, o sumuisa espiritu lia Suku, lina lia siata oku tu kuatisa oku kala vomunga la vamanji. (Va Efe. 4:30) Pole, oku kapako olondaka via Paulu, ci tu kuatisa oku kuata ombembua lelitokeko la vamanji. Eye wa popia hati: “Ocikumbiti lonyeño lekaka kuenda onjuela lusokui locipombo, viosi vimbipo. Liombokeli pokati loku lilinga ohenda loku liecela pokati, ndomo Suku a weceli vu Kristu.”​—Va Efe. 4:31, 32.

14. (a) Ondaka yokuti, “liombokeli pokati,” yi lomboloka nye? (b) Nye ci tu kuatisa oku omboka?

¹⁴ Ondaka “liombokeli pokati,” yi lekisa okuti, nda ka tu kuete ocituwa coku omboka, tu sukila oku linga apongoloko. Omo liaco, tu sukila oku pindisa olondunge vietu oco tu velisepo ovisimĩlo via vakuetu, okuti vietu vi sule! (Va Fil. 2:4) Pamue tu yongola oku vangula ondaka yimue oco omanu va yole, loku sima okuti tua lunguka. Oku ci linga ci lekisa hẽ okuti, tuomboka? Omo liaco, osimbu ka tua popele ondaka yimue, tu sukila oku sokolola oco ci tu kuatise oku kuata ocituwa coku “omboka.”

LILONGISA OKU KUATA OCISOLA KUENDA ESUMBILO VEPATA

15. Ovina vipi Paulu a tukula kelivulu lia Va Efeso 5:28, vi lekisa ndomo Kristu a tata ekongelo?

¹⁵ Embimbiliya li sokisa ukamba Kristu a kuetele ekongelo ndowu u kasi pokati kulume lukãi waye. Ovituwa viaco, vi pondola oku kuatisa alume oku songuila akãi vavo locisola, oku va tata ciwa, kuenje, oku ci linga, ci kuatisa akãi oku lekisa—​epokolo volohuela. (Va Efe. 5:22-33) Paulu poku popia hati: “Haico ca sesamẽla alume oku sola akãi vavo ndatimba avo muẽle,” nye a yonguile oku lekisa? (Va Efe. 5:28) Olondaka Paulu a tukula vovinimbu vio konyima, vi lekisa okuti, ‘Kristu wa sola ekongelo, kuenje wa li liecela. Eye o li kolisa poku li yelisa loku li sukula lovava kuenda londaka.’ Omo liaco, oco ulume a kuatise koku tẽlisiwa kuocipango ca Yehova coku kongela vali ovina viosi vu Kristu, o sukila oku tekula epata liaye lovina viespiritu.

16. Olonjali vina vi kapako olonumbi Viovisonehua poku tẽlisa ovikele viavo vepata, vi tambula onima ye?

¹⁶ Olonjali vi sukila oku sokolola ndomo vi kasi oku tẽlisa ovikele va tambula ku Yehova. Pole, koloneke vilo, omanu valua voluali ka va kuete ‘ocikembe lepata liavo.’ (2 Tim. 3:1, 3) Momo olonjali vimue, ka via siatele oku tẽlisa ocikele​—coku tata ciwa omãla vavo. Pole, Paulu wa lungula olonjali Akristão hati: “Ko ka wenguli onyeño yomãla vene, puãi va longisi loku va pindisa lovilongua via [Yehova].” (Va Efe. 6:4) Anga hẽ omãla va kasi oku vetiyiwa oku lekisa ocisola loku pokola kolonjali viavo? Olonjali vina via siata oku longisa ciwa omãla vavo, vi kasi oku pokola kuviali wa Yehova. Oco vepata mu kale ocisola, olonjali  vi sukila oku yuvula onyeño, kuenda oku vangula lukãlu. Omo liaco, vi sukila oku longisa omãla ndomo va pondola oku lekisa ocisola loku sumbila olonjali viavo. Nda via ci linga, vi kuatisa omãla oku kuata elavoko lioku kala voluali luokaliye palo posi.

17. Nye tu sukila oku linga oco tu tamalãle katutu Eliapu?

¹⁷ Tu ivaluki okuti, Eliapu olio omunu watete wa nyõla ombembua kilu kuenda palo posi, kuenje, li kasi oku amamako oku lingila usuanji ocipango ca Suku. Satana o yongola okuti, olohueli vi linyãla, ulume lukãi va kala pamosi pole, ka va tokekisa olohuela viavo. Wa siatavo oku vetiya omanu oku ecelela okuti, alume va tokekisa olohuela lalume, kuenda akãi oku likuela lakãi. Ka tu ka eceleli okuti, ovituwa vĩvi via siata voluali koloneke vilo, vi nyõla ekalo lietu. Omo liaco, tu kuami ongangu ya Kristu. (Va Efe. 4:17-21) Tu pokoli kelungulo lioku ‘malẽha ovimalẽho viosi via Suku’ oco tu tẽle oku tamãlala katutu Eliapu kumue lolondele viaye, okuti ka tu yapuisiwa.​—Tanga Va Efeso 6:10-13.

“ENDAELI VOCISOLA”

18. Nye ci tu kuatisa oku likuata omunga la Vamanji?

¹⁸ Ocisola cocili, oco ci kuatisa Akristão oku likuata omunga. Lutima we yuka ocisola ca “Ñala” yetu Yesu Kristu, la “Suku” yetu Yehova, kumue la vamanji, tu amamiko “oku likuata omunga yespiritu poku pandikisa oku kala lombembua.” (Va Efe. 4:3-6) Yesu wa pinga ocisola caco vohutililo hati: “Si va likutilila ovo lika, puãi ndi likutililavo vana va laika oku ndi kolela omo liondaka yavo, kuenje, vosi va kala vamuamue, ndeci ove, a Tate, o kasi vomunga kumue lame kuenje, ame ndi kasi vomunga kumue love, okuti va kala vomunga kumue letu. . . . Nda va lomboluila onduko yove, kuenje, lopo ndi va yi lomboluila, oco ocisola wa ndi sola laco, ci kale lavo, kuenje, ame ndi kala vomunga kumue lavo.”​—Yoa. 17:20, 21, 26, NW.

19. Nye wa likuminya oku linga?

¹⁹ Nda tu kuete atatahãi vutima omo liekambo lioku lipua, ocisola ci pondola oku tu vetiya oku likutilila ndeci ukualosamo a linga poku popia hati: “Pandeka utima wange kesumbilo lionduko yove.” (Osa. 86:11) Tu tamalãli katutu Eliapu, momo li yongola oku tu amisa ocipãla la Isietu ukuacisola, kuenda la vamanji. Omo liaco, tu ‘setukuli Suku ndomãla va soliwa, loku endela vocisola’ vepata, kupange woku kunda, kuenda vekongelo.​—Va Efe. 5:1, 2.

[Apulilo Elilongiso]

[Elitalatu kemẽla 29]

Siapo ocilumba cove kutala, kuende ka lisunguluise lamanjove

[Elitalatu kemẽla 31]

Ene alonjali, longisi omãla vene oku lekisa esumbilo