WA Lomboluiwa la Manji Max Lloyd

Eteke limue kuteke, kunyamo wo 1955, nda kala kumue lekamba liange kupange wumisionaliu kofeka yo Paraguai, Kombuelo yo Amerika. Kuenje, kepuluvi liaco, ovingumba via ñuala onjo tua kala, noke via fetika oku loya ovota, kuenda via kaloloka hati: “Suku yetu, osuku yenyona liosonde, kuenda o yongola oku nyua osonde yovingendeleyi.” Momo lie etu tuvingendeleyi tua kalela kofeka yaco?

ULANDU womuenyo wange, wa fetikila ko Australia, kuna nda citiwila kuenda osimbu nda kala oku kula, Yehova wa ndi longisa oku linga ocipango caye. Kunyamo wo 1938, umue Ombangi ya Yehova, wa ecele ku Isia yange elivulu limue losapi hati, Enemies (Ovanyãli). Eye kumue la Ina yange, ka va solele ovituwa viulongisi wetavo liavo, momo wa enda oku tukula lika olonepa vimue Viembimbiliya ndalusapo. Eci pa pita unyamo umosi, olonjali viange via litumbika ku Yehova kuenje, via papatisiwa. Oku upisa kotembo yaco, vosi yetu vepata tua velisapo ocipango ca Yehova. Mukãi wange Lesley wa papatisiwa eci a tẽlisa anyamo atãlo, noke nda papatisiwavo kunyamo wo 1940, eci nda tẽlisa anyamo ecea.

Eci Uyaki Wavali wa pita Voluali Luosi wa fetika, ombiali yo ko Australia ya tateka oku sandekiwa kualivulu Olombangi Via Yehova vofeka yaco. Ndaño nda kala omõla, nda lilongisa oku teyuila ekolelo liange poku tukula ovinimbu Viembimbiliya. Omo liaco, nda fetika oku ambata Embimbiliya liange kosikola loku lekisa esunga lieci si tavela oku fendela epandela kuenda oku kuatisa kuyaki.​—Etu. 20:4, 5; Mat. 4:10; Yoa. 17:16; 1 Yoa. 5:21.

Kosikola nda tangela, amalẽhe valua ka va tavele oku linga ukamba lame, momo va enda oku ndi tukula hati, “ondavululi yo ko Alemanya.” Noke va fetika oku lekisa olosinema kosikola. Osimbu osinema yaco ka ya fetikile oku lekisiwa, olondonge viosi via kisikiwile oku imba ocisungo cesivayo liofeka. Omo okuti nda enda oku likala oku votoka, amalẽhe vamue vavali ale vatatu, va ndi nãla vesinga oco ndi votoke. Noke, nda tundisiwa kosikola omo lioku pokola kolonumbi Viembimbiliya. Pole, nda fetika oku lilongisa umesele konjo lekuatiso liovikanda.

NDA TẼLISA OCIMÃHO CANGE

Eci nda tẽlisa 14 kanyamo, nda yonguile oku fetika upange wakundi votembo yosi. Pole, nda sumuile calua eci olonjali viange via ndi sapuila hati, ndi sukila oku sandiliya tete upange woku nganyala olombongo, kuenje, oco ndi fetika noke upange wakundi votembo yosi. Olonjali viange via ndi kisikile oku fetela ohondo loku sandiliya okulia, kuenda via ndi likuminyile okuti, eci ndi tẽlisa 18 kanyamo, oco ndi fetika noke upange wakundi votembo yosi. Omo liaco, tua enda oku sapela calua catiamẽla kolombongo nda sukilile oku nganyala. Eci nda va sapuila okuti  ndi yongola oku seleka olombongo oco vi ka ndi kuatise kupange wakundi votembo yosi, va vi tambula.

Pole, eci otembo yoku fetika upange wakundi votembo yosi ya pitĩlapo, olonjali viange via sapela lame, kuenda via ndi sapuila hati, olombongo vina va ndi tambuile, va vi kapa kombango. Kuenje, va vi nyĩha oco ndi lande uwalo lovina vikuavo ndi sukila kupange wakundi votembo yosi. Olonjali viange, via ndi longisa oku sandiliya ovina ndi sukila okuti, si kevelela oku kuatisiwa lomanu. Epindiso liaco, lia ndi kuatisa calua.

Osimbu ame la mukãi wange Lesley tua kala oku kula, konjo yetu kua enda oku sikĩla akundi votembo yosi kuenje, tua solele oku endaenda lavo kupange woku kunda. Oloneke viosi kesulilo liosemana, tua enda oku kundila konjo lanjo, volokololo, kuenda oku longisa omanu Embimbiliya. Kotembo yaco, akundi va sukilile oku eca 60 kolowola vosãi. Mãi yetu wa enda oku tẽlisa ocimãho caco. Omo liaco, wa tu sila ongangu yiwa.

UPANGE WAKUNDI VOTEMBO YOSI KO TASMANIA

Kocitumãlo catete nda tumiwile oku kundila eci nda kala kupange wakundi votembo yosi, ko Tasmania okuti, okacifuka kamue katiamẽla kofeka yo Australia kuna nda lisanga la mukãi wange kumue lulume waye. Pole, sia kalele lavo otembo yalua, momo va lalekiwile oku pindisiwa kocisoko 15 Cosikola yo Geleada. Nda kuata osõi yalua momo sia la kala lomanu sia kũlĩhĩle. Omanu vamue va simĩle okuti, ndi kala lika olosãi vitatu vokacifuka kaco. Pole, kunyamo wo 1950, nda tambula ocikele coku kala omitavaso yekongelo, okuti cilo ci tukuiwa hati, usongui wakulu vekongelo. Noke, ame kumue la manji ukuavo umalẽhe, tua fetika upange wakundi valikasi.

Tua tumiwile oku kundila volupale lumue lu kasi ocipãla mua kala omina yosipi okuti, ka mua kalele Olombangi Via Yehova. Tua pitĩla volupale luaco eteke likuavo kekumbi. Kuteke watete, tua lale vowotele yimue ya kuka. Keteke likuavo, osimbu tua kala oku kundila konjo lanjo, tua fetika oku pulisa omanu nda va kũlĩha umue o kuete onjo yoku fetela. Eteke liaco kekumbi, ulume umue wa tu sapuila hati, ocipepi lonembele yetavo lio Presbiterianu, kuli onjo yimue yusongui wetavo okuti ka muli omunu. Noke wa tu vetiya oku vangula loñuatisi yonembele yaco. Kuenje, va tu yekisa locisola vonjo yaco. Kokuetu, ka ca sungulukile okuti, eteke leteke tu tunda vonjo yusongui wetavo oco tu ende kupange woku kunda.

Vocikanjo caco, mua kala omanu valua va lekisa onjongole yoku lilongisa Embimbiliya. Omo liaco, tua enda oku sapela lomanu vaco ovina viwa loku fetika oku longisa Embimbiliya komanu valua. Pole, eci asongui vetavo kombala yofeka va yeva okuti Olombangi Via Yehova via sikĩla vonjo yusongui wetavo liavo, va tuma lonjanga usongui waco oku tu tundisa vonjo yaco. Kuenje, ka tua kuatele vali onjo yoku kala!

Keteke likuavo, tua kunda toke ekumbi vongunji, kuenje, tua fetika oku sandiliya ocitumãlo coku lala. Omo okuti ka tua sangele onjo yoku kala, tua endele  vohondo yimue ya kala vemẽhi liembumbua liocila combunje, oku seleka ovikuata vietu. Noke tua fetika vali oku kundila omanu toke koñolosi. Ndaño okuti owola yaco kua tekãvele ale, pole, tua ka nyulile omanu vamue okuti olonjo viavo via kala kesulilo liokololo. Kuenje, tua sanga ulume umue wa tava oku tu yekisa vonjo yimue yitito yolohondo vivali ya kala kocitali caye!

POKU NYULA AKONGELO KUENDA KO GILEADA

Noke yolosãi ecelãla kupange wakundi valikasi, nda lalekiwa kofiliale yo ko Australia oco ndi nyule akongelo. Omo okuti nda kuata lika 20 kanyamo, nda yokokele calua. Noke yoku pindisiwa vokuenda kuolosemana vivali, nda fetika oku nyula akongelo loku pamisa ekolelo lia vamanji. Ndaño okuti vamanji vakongelo va kala akulu, ka va ndi lavisile omo lioku kala umalẽhe, pole, va lekisa esumbilo kupange nda kala oku linga.

Nda lingaile ovongende alua poku nyula akongelo! Osemana yimue ngendela vokalela, yikuavo vomboyo, ale vekãlu, pamue komoto okuti nda ambata ocikasia cange cuwalo kuenda ekolombele lioku kunda. Nda kuata esanju lialua poku kundila kumue la Vamanji. Manji umue ukulu wekongelo wa yonguile okuti, ndi sikĩla konjo yaye ndaño ya kala oku tungiwa. Vokuenda kuosemana nda nyula ekongelo liavo, nda enda oku lala vohondo yoku lisukuila, pole, oku kala pamosi la vamanji ca tu pamisa kespiritu!

Kunyamo wo 1953, nda kuata esumũlũho likuavo lioku lalekiwa oku pindisiwa kocisoko 22 Kosikola yo Gileada. Pole, nda yokokele calua. Momo mukãi wange kumue lulume waye, eci va malusula epindiso Kosikola yo Gileada keteke 30 Yevambi Linene kunyamo wo 1950, va tumiwa kofeka yo Pakistãu. Eci pa pita unyamo umosi, mukãi wange Lesley wa kuatiwa loku vela kuenje, wa fila kofeka yaco. Omo liaco, nda lipula ndoco: Nda noke yoku tunda kosikola nda tumiwa kofeka yikuavo, olonjali viange vi ka kala ndati? Pole, via ndi vetiya hati: “Kuende, vumba Yehova kuosi a ku tuma.” Tunde keteke liaco, sia la mola vali isia yange. Momo wa fa noke liotembo yimue kunyamo wo 1950.

Eci pa pita otembo yimue, ame kumue la vamanji vatãlo, tua enda lonaviyu olosemana epandu poku tunda ko Australia toke Kolupale luo Nova Yorke. Osimbu tua kala oku linga ungende waco, tua lilongisa Embimbiliya, kuenda tua kundila omanu vakuavo va linga ungende kumue letu. Kunyamo wo 1953, osimbu ka tua fetikile epindiso kofiliale yo ko South Lansing ko Nova Yorke, tua endele kohongele yolofeka ya lingiwila Vocila Combunje ci tukuiwa hati, Yanke. Kohongele yaco, kua kala eci ci soka 165.829 komanu!

Vocisoko cetu mua kala 120 kolondonge via tunda kolofeka vialua violuali. Osimbu tua kala oku pindisiwa tua enda oku lipula kofeka tua laikele oku tumiwa. Kuenje, tua fetika oku endaenda vohondo yalivulu o ko Gileada oco tu kũlĩhe kolofeka vina tueya oku tumiwa. Nda limbuka okuti, va sokiyile oku ndi tuma kofeka yo Paraguai, kuna kua kala ovitundo vialua vio pulitika via linga uyaki. Eci tua pitĩla kofeka yaco, eteke limue komẽle, nda pulisa manji nda talavaya laye kupange wumisionaliu ocitumãlo  tua sukilile oku lingila ocipito “Conjivaluko.” Eye wa yola loku popia hati: “Kaliye uyaki wove wa fetika. Tala puvelo wonjo.” Kuenje, nda mola okuti pavindi osi olokololo, pa kala asualali!

TUA PITA LOCITANGI CIMUE

Onjanja yimue, nda endele lamanji o nyula akongelo a kasi ocipãla, oco tu lekise osinema losapi hati: A Sociedade do Novo Mundo em Ação, (Olonungi Violuali Luokaliye vi Kasi Oku Angiliyiwa). Eteke liaco, tua linga ungende wolowola ecelãla, ale ecea okuti, tete tua fetika oku enda lomboyo, noke lekãlu linãliwa lokavalu, oku sulako tua endela vokalosa ka nãliwa lolongombe. Tua ambatele omakina yoku lekisa oviluvialuvia. Osimbu ka tua pitĩlile kocitumãlo caco, kutanya tua nyula olongunja vovapia, kuenda tua vi laleka oco koñolosi vi ka tale osinema. Kosinema yaco kua kala eci ci soka 15 komanu.

Vokuenda kuakukutu 20, noke yoku fetika oku lekisa osinema, omanu vamue va tu lungula oco tu iñile lonjanga vonjo. Tua pokola kokuavo, kuenje, tua soleka lonjanga omakina yoku lekisa oviluvialuvia. Noke, tua yeva onjuela yalume vamue ovingumba va kala oku kaloloka loku loya ovota, kuenda oku imba ocisungo cimue hati: “Suku yetu, osuku yenyona liosonde, kuenda o yongola oku nyua osonde yovingendeleyi.” Etu lika kavali ketu tua kala ovingendeleyi vonjo yaco! Pole, omanu vana veyile oku tala osinema, va tateka ovingumba via yonguile oku tuiyila onjo tua salamẽle. Noke, kowola yatatu komẽle, ovingumba viaco via tiuka vali loku loya ovota, kuenda via tu lipañela hati, eci tu tiukila kolupale tua tundile, vi tu landula vonjila.

Vamanji va sapula ocitangi caco kombonge, kuenje, eteke liaco kekumbi, usongui wakuenje velombe weya oku tu upilila lolokavalu vivali oco tu tiukile volupale tua tundile. Poku tiukila tua pita vovisenge vie yuka oviti, osimbu usongui waco a pita kovaso luta waye oku lavulula. Omo liaco, nda limbuka okuti, oku linga ungende lokavalu ci kuete esilivilo, kuenje, nda landa okavalu kamue.

KUA VOKIYA OLOMISIONALIU VIALUA

Ndaño lelambalalo liasongui vetavo, pole, tua amamako lupange woku kunda olondaka viwa. Kunyamo wo 1955, tua tambula olomisionaliu vitãlo kumue la manji umue ufeko wo ko Kanada, o tukuiwa hati, Elsie Swanson okuti, wa pindisiwa kocisoko 25 Kosikola yo Gileada. Tua kala kofiliale la manji yaco ufeko osimbu ka tumiwile kolupale lukuavo. Eye wa litumbikile kupange wa Yehova lekuatiso liolonjali viaye, ndaño ka via tavele oku lilongisa Embimbiliya. Keteke 31 ya Cembanima, kunyamo wo 1957, nda tokekisa olohuela la manji Elsie, noke tua kala konjo yolomisionaliu kombuelo yofeka yo Paraguai.

Omo okuti onjo tua kala, ka ya kuatele alove ovava, tua enda oku tapa pocisimo ca kala kocitali conjo. Onjo yaco ka ya kuatele ohondo yoku lisukuila, ka tua kuatele omakina yoku sukula uwalo, kuenda onjilela. Omo liaco, tua enda oku landa lika okulia kueteke, oco ka ku ka vole. Pole, oku leluisa omuenyo wetu, kuenda ukamba tua kuata la vamanji, ca tu kuatisa oku kuata esanju volohuela vietu.

Kunyamo wo 1963, tua tiukila ko Australia oku ka nyula mãi yange wa kuatiwile luvei wutima. Eci tua lisanga wa kuata esanju lialua, momo pa pitile ale ekũi lianyamo tunde eci tua litepa. Osimbu tua kala oku sokiya oku tiukila ko Paraguai, tua liyaka locitangi coku nõla onjila tua sukilile oku kuama. Ca sungulukile hẽ oku sia mãi yange kosipitali loku lavoka okuti o tatiwa lomunu ukuavo, oco tu tiukile kupange wetu ko Paraguai? Noke yoku likutilila, ame lukãi wange, tua nõlapo oku kuatisa Mãi yange. Pole, tua amamako kupange wakundi votembo yosi toke kunyamo wo 1966, eci a fa.

Nda kuata esumũlũho lioku kala omitavaso yi nyula akongelo vimbo kuenda vofeka, ko Australia, vokuenda kuanyamo alua, kuenda nda kala ulongisi Wosikola Yupange Wusoma yakulu vekongelo. Noke tua linga epongoloko limue komuenyo wetu. Momo nda nõliwa oku tiamẽla Kocisoko catete Cakulu vo Filiale ko Australia. Kuenje, eci tua fetika oku tunga o Betele yokaliye, nda nõliwa oku kala usongui woku tunga. Tua tunga o Betele yimue ya posoka lekuatiso lia vamanji valua va loñoloha, kuenda olonalavayi vikuavo.

Noke nda talavaya Voseketa Yupange, yi sokiya upange woku kunda vofeka yaco. Nda kuatavo esumũlũho lioku nyula olofiliale violofeka vikuavo oco ndi kuatise vamanji, loku pamisa ekolelo liavo. Nda kuata esanju lialua poku nyula olofeka vina okuti vamanji vamue va kala anyamo alua volokayike, lo kovitumãlo viekangiso omo lioku kakatela kolonumbi via Yehova.

UPANGE TU KASI OKU LINGA CILO

Eci nda tiuka koku nyula olofiliale vimue kunyamo wo 2001, nda sanga ukanda welaleko lioku talavaya ko Brooklyn, ko Nova Yorke, kuna kua sokiyiwa Ocisoko cokaliye Cakulu vo Betele ko Estados Unidos. Ame lukãi wange, tua likutilila oco tu konomuise ciwa elaleko liaco kuenje, tua tava ocikele caco. Tunde eci tua pitĩla ko Brooklyn, tua tẽlisa ale ci pitahãla 11 kanyamo.

Ndi pandula Yehova omo ndi kuete ukãi umue wa sanjukila oku linga ovina viosi a tuma. Ndopo tu tẽlisa 80 kanyamo, pole, tu kuete handi uhayele wecelela oku linga upange wa Yehova. Omo liaco, tu lavoka oku longisiwa la Yehova otembo ka yi pui, kuenda oku tambula asumũlũho eye a likuminya ku vana va kasi oku linga ocipango caye.

[Elitalatu kemẽla 19]

Osemana yimue ngendela vokalela, yikuavo vomboyo, ale vekãlu, pamue komoto okuti nda ambata ocikasia cange cuwalo kuenda ekolombele lioku kunda

[Elitalatu kemẽla 21]

Tu lavoka oku longisiwa la Yehova otembo ka yi pui

[Alitalatu kemẽla 18]

Kepĩli: Poku nyula akongelo vimbo ko Australia

Kondio:Ame lolonjali viange

[Elitalatu kemẽla 20]

Uvala wetu keteke 31 ya Cembanima kunyamo wo 1957