Kuati Ovituwa Ndevi Violonungi Viusoma Wa Suku!

“Kuati ovituwa ndevi violonungi viofeka.”​—VA FIL. 1:27, NW.

O TAMBULULA NDATI?

Velie va pondola oku kala olonungi Yusoma wa Suku?

Nye tu sukila oku linga catiamẽla kelimi liolonungi Viusoma wa Suku, kesapulo kuenda kovihandeleko?

Olonungi Viusoma wa Suku vi lekisa ndati okuti vi sole olonumbi viaye?

1, 2. Momo lie elungulo Paulu a ecele kekongelo lio ko Filipu li kuetele esilivilo lia velapo?

 UPOSTOLO Paulu, wa vetiya Akristão vekongelo lio ko Filipu oco va ‘kuate ovituwa vi litava lolondaka viwa.’ (Tanga Va Filipoi 1:27.) Ondaka Paulu a tukula yokuti, “kuati,” kelimi lio Helasi yi lomboloka oku “kuata ovituwa viwa ndevi violonungi viofeka.” Olondaka viaco, via kuatele esilivilo lialua Kakristão va kala vekongelo lio ko Filipu. Momo lie? Citava okuti volupale luo Filipu mua kala omanu vamue va nõliwile oco va linge olonungi viuviali wo ko Roma. Olonungi vio ko Roma via kala volupale luaco, via tendiwile okuti via kuata ekalo liwa, kuenda via enda oku lipanda omo lioku tiamẽla Kuviali wo ko Roma, loku sanjukila ovihandeleko vio ko Roma vina via enda oku va teyuila.

² Vana va kala vekongelo lio ko Filipu, va kuatele esunga lioku litenda okuti va kuete ekalo liavelapo. Paulu wa va sapuila hati, omo lioku kala Akristão olombuavekua, va tendiwile okuti, olonungi vio “kilu.” (Va Fil. 3:20) Ovo ka va tiamẽlele kuviali umue womanu pole, va kala olonungi Viusoma wa Suku. Usoma waco, wa va teyuila, kuenda wa va kuatisa calua.​—Va Efe. 2:19-22.

3. (a) Velie va kuete esumũlũho lioku kala olonungi Viusoma wa Suku? (b) Nye tu konomuisa vocipama cilo?

³ Elungulo Paulu a eca liokuti “kuati ovituwa ndevi violonungi viofeka,” li tiamisiwila calua ku vana va ka viala kumue la Kristu kilu. (Va Fil. 3:20) Elungulo liaco li tiamisiwilavo ku vana va kuete elavoko lioku kala palo posi, oco va kale olonungi Viusoma wa Suku. Momo lie? Momo Akristão vosi va vumba lika Osoma yimuamue okuti, Yehova, kuenda va songuiwa lolonumbi vimuamue. (Va Efe. 4:4-6) Koloneke vilo, omanu va siata oku likolisilako oku pokola kovihandeleko violombiali, oco va tendiwe okuti, olonungi viofeka. Omo liaco, tu sukila oku velisapo esumũlũho lioku tendiwa okuti, tulonungi Viusoma wa Suku! Oco tu sanjukile esumũlũho liaco, tu konomuisi elitokeko li kasi pokati  kovihandeleko vi kuatisa omunu oku tendiwa okuti, onungi yofeka yimue, levi vi lekisa okuti, onungi Yuviali wa Suku. Tu konomuisavo ovina vi tatu tu sukila oku linga oco tu kuate esumũlũho lioku kala olonungi Viusoma wa Suku.

OVINA VI SUKILIWA KOLONUNGI VIOFEKA

4. Elimi lia pua esanda li lomboloka nye, kuenda tu ‘vangula’ ndati elimi liaco?

⁴ Oku lilongisa elimi liofeka. Olombiali vimue, via siata oku kisika olonungi oku vangula ciwa elimi liofeka yavo. Omanu vamue noke yoku taviwa oku kala olonungi viofeka yimue, va likolisilako oku vangula ciwa elimi liaco vokuenda kuanyamo alua. Ndaño va lilongisa lonjanga uloño woku vangula elimi liaco, pole, oco va tumbike ciwa olondaka, va sukila oku pita otembo yalua. Cimuamue haico ci pita lolonungi Viusoma wa Suku okuti, vi sukila oku lilongisa ‘elimi lia pua esanda.’ (Tanga Sofoniya 3:9.) Elimi liaco li lomboloka nye? Li lomboloka ocili catiamẽla ku Suku, kuenda kocipango caye ci sangiwa Vembimbiliya. Tu ‘vangula’ lika elimi lia pua esanda, nda ovituwa vietu vi litava lovihandeleko via Suku, kuenda olonumbi viaye. Citava okuti eci omanu vamue va kũlĩha alongiso a velapo Embimbiliya, va papatisiwa lonjanga kuenje, va linga olonungi Viusoma wa Suku. Noke yoku papatisiwa, va sukila oku likolisilako oku ‘vangula’ ciwa elimi lia pua esanda. Va ci linga ndati? Omunu lomunu pokati ketu, o sukila oku sokisa ovina a kũlĩha viatiamẽla kolonumbi Viembimbiliya, kuenda evi tua siata oku linga.

5. Momo lie tu sukilila oku lilongisa ovina viosi viatiamẽla kesapulo liocisoko ca Yehova palo posi koloneke vilo?

⁵ Oku lilongisa esapulo liofeka. Omunu una o yongola oku kala onungi yofeka, o sukila oku kũlĩha esapulo liofeka kuenda oku lilongisa ovina viatiamẽla kombiali yaco. Cimuamue haico ci pita la vana va yongola oku kala olonungi Viusoma wa Suku okuti, vi sukila oku lilongisa ovina viosi viatiamẽla Kusoma waco. Kũlĩhĩsa ulandu womãla va Kora va vumba Suku ko Isareli. Ovo va sanjukilile o Yerusalãi, locitumãlo cefendelo kuenda esapulo liolupale waco. Ocili okuti ka va komõhele eposo liovawe va tunga lao ocitumãlo caco, pole, va kapeleko elomboloko lia kuata olupale luaco kuenda ocitumãlo cefendelo. O Yerusalãi, ya kala ‘imbo lia Yehova okuti, eye Osoma ya velapo,’ momo ya kala ombala yefendelo liocili. Vo Yerusalãi, omo va enda oku longisila Ovihandeleko via Yehova. Omo liaco, Yehova wa lekisa ocisola komanu vana va vialiwile Losoma yo Yerusalãi. (Tanga Osamo 48:1, 2, 9, 12, 13.) Ove hẽ o yongola oku lilongisa esapulo liomanu va kasi vocisoko ca Yehova palo posi koloneke vilo loku lombolola ulandu wavo? Osimbu o lilongisa ovina vialua viatiamẽla kocisoko ca Yehova Suku kuenda ndomo a kasi oku kuatisa afendeli vaye, o ka kuata elomboloko lia suapo Liusoma waye. Kuenje, onjongole yove yoku kundila omanu olondaka  viwa Viusoma, yi ka li vokiya calua.​—Yer. 9:24; Luka 4:43.

6. Momo lie ca sungulukila Yehova oku lavoka okuti, tu lilongisa oku pokola kovihandeleko viaye, loku kapako olonumbi Viusoma waye?

⁶ Oku kũlĩha ovihandeleko viofeka. Olombiali violuali, via siata oku kisika omanu oku lilongisa ovihandeleko viofeka loku vi pokola. Yehova o yongola okuti tu lilongisa oku pokola kovihandeleko viaye, loku kapako olonumbi viosi Viusoma waye. (Isa. 2:3; Yoa. 15:10; 1 Yoa. 5:3) Olonjanja vimue olombiali via siata oku eca ovihandeleko ka via sungulukile haivio ka via suilepo. Pole, ‘ovihandeleko via Yehova via lipua.’ (Osa. 19:7) Tua sanjukila hẽ ovihandeleko via Suku, kuenda tua siata oku tanga Ondaka yaye eteke leteke? (Osa. 1:1, 2) Tu pondola lika oku lilongisa ovihandeleko via Suku poku tanga ondaka yaye. Lomue o pondola oku tu lingilako elilongiso liaco.

OLONUNGI VIUSOMA VI SOLE OLONUMBI VIA SUKU

7. Olonungi Viusoma wa Suku vi songuiwa lolonumbi vipi?

⁷ Oco tu amameko oku kala olonungi Viusoma wa Suku, tu sukila oku kũlĩha olonumbi viaye kuenda oku vi sola. Olonungi vina vi kasi vemehi liuviali womanu, via siata oku popia hati, via kapako ovihandeleko viofeka yavo. Pole, eci vi limbuka okuti ocihandeleko cimue ka ca sungulukile, kuenda vi sima okuti lomue wa ci kapako, vi liwekapo oku pokola kocihandeleko caco. Olonjanja vimue, vi ci lingila ‘oku pandiyiwa lomanu.’ (Va Kol. 3:22) Pole, olonungi Viusoma wa Suku, via velisapo calua olonumbi viaye. Etu tua sanjukila oku pokola kovihandeleko via Suku, ndaño okuti lomue o tu lete. Momo lie? Momo, tu sole Yehova, Onganji yetu.​—Isa. 33:22; tanga Luka 10:27.

8, 9. Tu pondola ndati oku kũlĩha okuti tu sole lutima wosi ovihandeleko via Suku?

⁸ O pondola oku kũlĩha ndati okuti o sole ovihandeleko via Suku? O ci linga poku kũlĩhĩsa ndomo wa siata oku tambulula eci o tambula elungulo liatiamẽla kovina vimue ndeci: Koku nõla uwalo, loku li posuisa. Osimbu kua lingile onungi Yusoma wa Suku, citava okuti wa enda oku wala uwalo ka wa sungulukile haiwo u kutisa osõi. Osimbu ocisola o kuetele Suku ca amamako oku livokiya, o fetika oku lilongisa oku wala uwalo weca esivayo kokuaye. (1 Tim. 2:9, 10; 1 Pet. 3:3, 4) Pamue o sima okuti, wa siata oku wala uwalo wa sunguluka. Pole, nda ukulu umue wekongelo oku sapuila hati, uwalo wove u kokela ocilondokua vamanji valua, o kala ndati? O sumua ale o sanjuka? O lisandela esunga, loku kuata ocikumbiti, ale o patãla? Etosi limue lia velapo vocihandeleko lieli okuti, olonungi viosi Viusoma wa Suku vi sukila oku kuama ongangu ya Kristu. (1 Pet. 2:21) Paulu wa soneha ndoco: “Etu vosi omunu [lomunu] a sokoluile ukuavo eci ciwa coku u kolisa. Momo Kristu ka lisokoluile eye muẽle.” (Va Rom. 15:2, 3) Oco vekongelo mu kale ombembua, Ukristão una wa pama kespiritu o likolisilako oku yuvula oku kuatela ocikumbiti vamanji.​—Va Rom. 14:19-21.

⁹ Tu konomuisi atosi avali a siata oku nena esakalalo lialua ndeci: Ocituwa olohueli vi lekisa poku lipekela kuenda ndomo vi tenda olohuela. Omanu vana okuti ka va lingile handi olonungi Viusoma wa Suku, pamue va ecelela okuti alume va lipekela lalume, akãi va lipekela lakãi, ale va sole oku tala omanu va kasi epolõla haivo va linga ukahonga, loku sima okuti, omunu eye o nõla nda o linga ukahokolo kuenda o linyãla lohueli yaye. Pole, olonungi viusoma wa Suku, via siapo ale ovituwa viaco vĩvi. Ndaño vamanji vamue osimbu ka va lingile handi Akristão va kuatele ovituwa viaco vĩvi, cilo va tenda okuti ocituwa coku lipekela pokati kolohueli, kuenda olohuela, ombanjaile ya tunda ku Suku. Omo liaco, va velisapo olonumbi via Yehova, kuenda va kolela okuti, vana va litumbika koku linga ukahonga levĩho, ka va kala olonungi Viusoma wa Suku. (1 Va Kor. 6:9-11) Va kũlĩhavo okuti omunu o pondola oku yapuisiwa lovisimĩlo viutima waye. (Yer. 17:9) Ovo, va sanjukila oku tambula alungulo awa, ana a va kuatisa oku amamako oku kuata ovituwa via sunguluka.

OLONUNGI VIUSOMA WA SUKU, VI POKOLA KALUNGULO

10, 11. Alungulo api a siata oku eciwa Lusoma wa Suku, kuenda o tenda ndati alungulo aco?

¹⁰ Olombiali via siata oku eca komanu alungulo atiamẽla koku yuvula okulia kua vola kuenda ovihemba viatuta. Ocili okuti ovikulia vimue kuenda ovihemba ka vi koki ohele. Pole, nda ovihemba vimue kuenda okulia vi kapa kohele omuenyo womanu, ombiali yofeka yi konomuisa ocitangi caco kuenje, yeca elungulo lioku teyuila olonungi viofeka yaco. Nda ombiali ka yi ci lingi, yi kuata eko omo liocekelela. Cimuamue haico ci pita lalungulo a siata oku eciwa Lusoma wa Suku, atiamẽla koku yuvula ovituwa vimue vi kapa kohele ekalo lietu kespiritu. Vimue pokati kovina viaco o Internet okuti, yecelela oku sapela lakamba, yi tu kuatisa oku lilongisa ovina vialua, kuenda oku linga ovitalukilo. Olombangi Via Yehova via siata oku talavaya ciwa lo Internet poku linga ovopange alua. Pole, vo Internet mu sangiwa ovipama vialua via vĩha okuti, vi pondola oku kapa kohele ekalo lietu kespiritu. Ovipama vimue vio Internet, vi lekisa omanu va kasi epolõla haivo va linga ukahonga kuenje, vi pondola oku nyõla ekalo liwa kespiritu liolonungi Viusoma wa Suku. Vokuenda kuanyamo alua, ukuenje wa lunguka wa siata oku eca alungulo atiamẽla koku yuvula ovipama viaco. Omo liaco, tu eca olopandu kalungulo a tu kuatisa oku lavulula kespiritu!

¹¹ Koloneke vilo, vo Internet mu sangiwa ovipama via siata oku taliwa lomanu valua okuti, tu sukila oku lavulula poku vi tala. Pole, ovipama vina omanu va siata oku popia vati vi kuatisa oku linga ukamba lomanu vamue, vi pondola oku nyõla omuenyo wetu. Ovio vi vetiya oku linga ukamba lomanu vãvi. (1 Va Kor. 15:33) Eli olio esunga lieci ocisoko ca Yehova ca siatela oku eca alungulo a tu kuatisa oku lavulula poku talavaya lo Internet. Wa siata hẽ oku tanga ovipama viokaliye via sandekiwa lukuenje wa lunguka viatiamẽla koku yuvula oku linga ukamba lomanu ka tua kũlĩhĩle vo Internet? Nda ka tu tangi ovipama viaco tu linga uveke! a Kuenje, tu sokisiwa lomunu o nyua lika ovihemba okuti ka tangi vali onumbi ya sonehiwa kongalafa yaco.

12. Momo lie tu popela tuti, oku sepula alungulo a Yehova uveke?

¹² Vana ka va kapeleko alungulo a siata oku eciwa lukuenje wa lunguka, va likokela ovitangi vialua, kuenda va sumuisa akamba vavo. Vamue va kuete ocika coku tala omanu va kasi epolõla haivo va linga ukahonga, kuenje, va likemba ovo muẽle lovisimĩlo viokuti, Yehova ka lete ovina va siata oku lingila vuyombeki. Oku sima okuti Yehova ka lete ovina tua siata oku lingila vuyombeki, uveke! (Olosap. 15:3; tanga Va Heveru 4:13.) Eye, o yongola okuti, olonumiwa viaye palo posi, vi kuatisa omanu vaco. (Va Gal. 6:1) Olonjanja vimue, nda omunu wa lueya ocihandeleko cofeka kuenje o likekembela, olombiali vi ecela eko liaye. Cimuamue haico ci pondola oku pita lolonungi Viusoma okuti, nda vi likekembela akandu avo, Yehova o va ecela. b (1 Va Kor. 5:11-13) Yehova ukuahenda. Omo liaco, nda umue o likekembela loku siapo ovilinga viaye vĩvi, o taviwa laye, kuenda amamako oku kala onungi Yusoma waye. (2 Va Kor. 2:5-8) Tu kuete esumũlũho lia velapo lioku vumba Ombiali yetu ukuacisola!

OLONUNGI VIUSOMA WA SUKU VIA VELISAPO ELONGISO

13. Olonungi Viusoma wa Suku vi lekisa ndati okuti via velisapo elongiso?

¹³ Olombiali vio kolofeka vialua, via siata oku kuatisa olonungi viavo oco vi kuate elilongiso. Ovio vi ci linga poku tungisa olosikola vina vi kuatisa omanu oku tanga loku soneha, kuenda oku lilongisa ovoloño amue. Olombangi Via Yehova, via siatavo oku pindisiwila kolosikola viaco, kuna vi lilongisa oku tanga, oku soneha, kuenda vi feta elongiso liavo muẽle. Pole, via velisapo elongiso li eciwa vekongelo oco li va kuatise oku kala olonungi Viusoma wa Suku. Lekuatiso liekongelo, Yehova wa siata oku vetiya afendeli vaye oco va loñolohe koku tanga. Olonjali vi vetiyiwa oku tangela alivulu komãla vavo. c Olosãi viosi ukuenje wa lunguka, wa siata oku sandeka Vutala Wondavululi lo vo Despertai! ovipama vialua vi lombolola ovina vi sangiwa Vembimbiliya. Nda wa tanga amẽla atatu veteke, kesulilo liosãi o kuatisiwa lelongiso li kasi oku eciwa Lusoma wa Suku.

14. (a) Epindiso lipi tua siata oku tambula? (b) Olonumbi vipi viatiamẽla Kefendelo Liepata ove wa siata oku kapako?

¹⁴ Olonungi Viusoma wa Suku, via siata oku pindisiwa kolohongele olosemana viosi. Limue pokati kepindiso liaco, Osikola Yupange Wakristão okuti tunde eci ya fetika, pa pita ale ci pitahãla akũi epandu kanyamo, oco yi kuatise vamanji oku loñoloha koku longisa Ondaka ya Suku. Ove hẽ wa siata oku panga onepa kosikola yaco? Koloneke vilo, ukuenje wa lunguka, wa siata oku vetiya vamanji oku linga Efendelo Liepata. Esokiyo liaco, li pamisa ukamba vepata. Ove hẽ wa siata oku kapako olonumbi vi sangiwa valivulu a sandekiwa lukuenje wa lunguka? d

15. Esumũlũho lipi lia velapo tu kuete?

¹⁵ Olonungi vi kasi vemẽhi liuviali womanu, via siata oku enda konjo lanjo oku vetiya omanu oco va kuatise ovitundo vio pulitika. Cimuamue haico olonungi Viusoma wa Suku via siata oku linga poku kundila omanu olondaka viwa volokololo kuenda konjo lanjo. Ndomo ca lomboluiwa vocipama catete celilongiso, Utala Wondavululi u sapula Usoma wa Yehova, owo u kasi oku eciwa calua kolonepa viosi violuali! Limue pokati kasumũlũho tu kuete, oku kundila omanu Usoma wa Suku. Ove hẽ o kuete ombili yoku linga upange woku kunda?​—Mat. 28:19, 20.

16. O lekisa ndati okuti wunungi yiwa Yusoma wa Suku?

¹⁶ Ndopo Usoma wa Suku owo lika u ka viala ilu lieve. Owo, u ka kuatisa omanu kovina vieteke leteke, ndeci konepa yespiritu, kuenda ketimba. Kotembo yaco ove hẽ o ka kala onungi yiwa Yusoma wa Suku? Nda o yongola, yilo oyo otembo yoku lekisa okuti, o ka kala onungi yiwa. Omo liaco, ovina viosi o linga eteke leteke, vi lingila ulamba wa Yehova, kuenda lekisa okuti, o kuete ovituwa viwa ndevi violonungi Viusoma wa Suku.​—1 Va Kor. 10:31.

[Atosi pombuelo yamẽla]

[Apulilo Elilongiso]

 [Elitalatu kemẽla 14]

Wa siata hẽ oku kapako alungulo Embimbiliya atiamẽla koku lavulula poku talavaya lo Internet?

[Elitalatu kemẽla 12]

Wa sanjukila hẽ efendelo liocili kuenda esapulo liafendeli va Suku ndeci omãla va Kora va linga?

 [Elitalatu kemẽla 15]

Efendelo liene Liepata, li pondola oku ku kuatisa ove kumue la vangandiove oku kala olonungi viwa Viusoma wa Suku