Lunguka Lolonjanjo Vieliapu!

‘Yuvuli olonjanjo Vieliapu.’​—2 TIM. 2:26.

O TAMBULULA NDATI?

Nye o sukila oku kũlĩhĩsa lutate, nda o kuete ocituwa coku popia lãvi vakuene?

Nye o pondola oku lilongisa kongangu ya Pilato la Petulu, catiamẽla koku yuvula usumba, kuenda elambalalo?

O pondola ndati oku yuvula oku livetela evelo?

1, 2. Olonjanjo vipi Vieliapu tu konomuisa vocipama cilo?

 ELIAPU lia siata oku yapuisa afendeli valua va Yehova. Olio li yongola oku nyõla ekalo liavo kespiritu, ndeci enyanga li kuata ocinyama oco a ci ponde. Nda omunu umue wa yapuisiwa, o vetiyiwa oku tẽlisa olonjongole viosi Vieliapu.​—Tanga 2 Timoteo 2:24-26.

² Oco enyanga li kuate ovinyama, li petula ociliva. Olio, li kapa ociliva caco pocitumãlo cina okuti ca leluka oku kuata ocinyama cimue. Pamue enyanga li lembikila ociliva caco posi, oco ocinyama ci kuatiwe ocipikipiki. Eliapu lia siatavo oku kapa olonjanjo oco li kuate afendeli va Yehova. Oco ka tu ka kupukile vonjanjo Yeliapu, tu sukila oku lavulula loku kapako olondimbukiso vielungulo vi tu kuatisa oku limbuka olonjanjo viaye. Vocipama cilo, tu konomuisa ndomo tu pondola oku yuvula olonjanjo vitatu Eliapu lia siata oku kapela afendeli va Yehova oco a va yapuise. Olonjanjo viaco vievi: (1) upopi ka wa sungulukile, (2) usumba lelambalalo, (3) oku livetela evelo. Vocipama ci kuãimo, tu ka konomuisa olonjanjo vikuavo vivali Satana a siata oku tu kapela.

YUVULA UPOPI KA WA SUNGULUKILE U SOKISIWA LONDALU

3, 4. Oku vangula upopi ka wa sungulukile ci nena nye? Tukula ulandu umue.

³ Oco ovinyama via salama vi tunde vusenge, enyanga li timĩha usenge waco kuenje, eci ovinyama vi fetika oku tila, li kuata vimue pokati kavio. Cimuamue haico Eliapu lia siata oku linga okuti, li kapa vekongelo ovitangi vi kasi ndondalu oco litepe ukamba u kasi pokati ka vamanji. Nda lia tẽlisa onjongole yaco, vamanji vana va yapuisiwa va tiamẽla kokuaye. Tu pondola ndati oku linga ovina vi tu kokela oku yonjiwa Leliapu oco tu wile vonjanjo yaye?

 ⁴ Ndonge Tiago wa sokisa elimi londalu. (Tanga Tiago 3:6-8.) Nda ka tua lavele elimi lietu poku vangula, tu kapa ondalu vekongelo. Ocitangi caco ci pondola oku pita ndati letu? Kũlĩhĩsa ulandu u kuãimo: Kohongele yimue vekongelo, kua lingiwa esapulo liokuti, manji umue ukãi wa nõliwa oku kala ukundi wa velapo. Noke liohongele, vamanji vavali, va fetika oku sapela catiamẽla kesapulo lia lingiwa. Umue pokati kavo, wa sanjukila esapulo liaco, kuenda o yongola okuti ukundi waco o kuata onima yiwa kupange waye. Pole, ukuavo ka sanjukilile esapulo lia lingiwa, kuenje, o popia hati, manji yaco o yongola oku kuata ekemãlo vekongelo. Helie pokati ka vamanji vavali ove o yongola okuti o kala ekamba liove? Caleluka oku limbuka manji o kasi oku kapa ondalu vekongelo omo lioku vangula kuaye.

5. Oco tu yuvule upopi u kasi ndondalu, nye tu sukila oku konomuisa catiamẽla kekalo lietu?

⁵ Tu pondola ndati oku yuvula upopi u sokisiwa londalu? Yesu wa popia hati: “Eci ca siata vutima oco omẽla u popia.” (Mat. 12:34) Ocina catete, tu sukila oku kũlĩhĩsa ekalo liutima wetu. Tu pondola hẽ oku yuvula upopi ka wa sungulukile u sokisiwa londalu? Nda manji umue wa tambula ocikele vekongelo, tu tava hẽ okuti, o ci tẽlisa lutima wosi, ale tu sima okuti wa tambula ocikele caco oco a sivayiwe la vamanji? Nda tu kuete ocituwa coku lekisa esino, tu sukila oku ivaluka okuti, Eliapu lia tatãla ekalo lia Yovi ufendeli wa Yehova. (Yovi 1:9-11) Nda tua siata oku popia lãvi vamanji, tu sukila oku kũlĩhĩsa esunga lieci tu ci lingila. Tu kuete hẽ esunga lioku va popia lãvi? Ale utima wetu we yuka esuvu ndowule, okuti oco ocituwa ca siata pokati komanu koloneke vilo via sulako?​—2 Tim. 3:1-4.

6, 7. (a) Ovina vipi vi pondola oku tu vetiya oku popia lãvi vakuetu? (b) Nda omanu va lekisa etombo kokuetu ale va tu popia lãvi, tu tambulula ndati?

⁶ Tu konomuisi ovina vikuavo vi lekisa esunga lieci pamue tu vetiyiwila oku popia lãvi vakuetu. Citava okuti tu ci linga lonjongole yoku komõhisa vakuetu. Pamue tu ci lingila oku sima okuti tua velapo vakuetu. Ale pamue tua siata oku likala akulueya etu kuenje, ka tu likolisilako oku linga ovina viwa. Nda tu kuete epela lukuse, ovina viaco, vi tu kokela ovitangi vialua.

⁷ Pamue tu lisandela esunga lieci tua siatela oku popia lãvi manji umue. Citava okuti tu ci linga omo manji yaco wa tu popia lãvi. Nda tua pita locitangi caco, tu sukila oku yuvula oku fetuluinya. Momo oku fetuluinya ku nena ovitangi, kuenda  Satana eye o vetiya omanu oku linga ovina viaco pole, Suku hayeko. (2 Tim. 2:26) Omo liaco, tu sukila oku kuama ongangu ya Yesu yoku yuvula ovitangi. Eci Yesu a talisiwa ohali, ‘ka va fetuluinyile.’ Eye “wa talamela [una] o tetulula olondaka lesunga.” (1 Pet. 2:21-23) Yesu wa kolelele okuti Yehova o tetulula ovitangi viaco votembo a sokiya. Tu sukilavo oku kolela ku Suku. Nda tu popia olondaka vina vi sakula, tu kuatisa vamanji oku kuata ‘elitokeko lombembua’ vekongelo lietu.​—Tanga Va Efeso 4:1-3.

YUVULA ONJANJO YUSUMBA WOKU YAPUISIWA LELAMBALALO

8, 9. Momo lie Pilato a pisila Yesu?

⁸ Ocinyama cina ca wila vociliva, ka ci pondola oku enda. Cimuamue haico ci pita lomunu una o kuete usumba lelambalalo okuti, ka tẽla oku kuata elianjo. (Tanga Olosapo 29:25.) Tu konomuisi ovolandu omanu vavali va kupukila vonjanjo yusumba kuenda tu kũlĩhĩsi ovina tu pondola oku lilongisa kovolandu aco.

⁹ Nguluvulu Pondiu Pilato, wa kũlĩhĩle okuti Yesu ka kuatele eko, kuenda citava okuti ka yonguile oku u talisa ohali. Omo liaco, Pilato wa sapuila Yesu hati, kua “lingile cimue [okuti o] sesamẽla oku fa.” Pole, Pilato wa tuma oku ponda Yesu. Momo lie? Momo wa vetiyiwa lomanu. (Luka 23:15, 21-25) Ovanyãli vaco va kisika Pilato oco a tẽlise onjongole yavo poku popia vati: ‘Nda wa kutulula omunu u, kukambako lia Kaisare.’ (Yoa. 19:12) Pilato wa kuata ohele yokuti nda wa tundila olunda Kristu, o pumba omangu yaye, ale o pondiwa. Omo liaco, wa nõlapo oku linga ocipango Celiapu.

10. Nye ca vetiya Petulu oku likala Kristu?

¹⁰ Upostolo Petulu, wa kuatele ukamba walua la Yesu. Eye, wa vanguila kovaso yomanu hati, Yesu eye Mesiya. (Mat. 16:16) Omo okuti olondonge vikuavo ka via kuatele elomboloko liovina Yesu a popia, vio yanduluka. Pole, Petulu wa amamako lekolelo. (Yoa. 6:66-69) Eci ovanyãli va kuata Yesu, Petulu wa tikula osipata oco a teyuile Cime caye. (Yoa. 18:10, 11) Petulu ndaño wa kũlĩhĩle Yesu Kristu, wo likala momo wa kuata usumba. Omo wa wila vonjanjo yoku kuatela usumba omanu, ka kuatele vali utõi.​—Mat. 26:74, 75.

11. Tu yuvula ndati oku linga ovina ka via sungulukile?

¹¹ Etu Tuakristão, tu sukila oku yuvula oku linga ovina vi sumuisa Suku. Vacime cetu kupange woku nganyala olombongo, ale omanu vakuavo, pamue va tu vetiya oku linga ovina ka via sungulukile, ale oku wila vukahonga. Olonjanja vimue olondonge poku linga oloseteko kosikola, vi kisikiwa lakamba vavo oku kopiyala ovipama va lilongisa osimbu, oku tala omanu va kasi epolõla haivo va linga ukahonga, oku sipa akaya, eliamba, uholua, ale oku linga ukahonga. Nye ci tu kuatisa oku yuvula usumba woku kisikiwa oku linga ovina vi sumuisa Yehova?

12. Ulandu wa Pilato lowu wa Petulu u tu longisa nye?

¹² Tu konomuisi ovina tu pondola oku lilongisa kulandu wa Pilato, kuenda wa Petulu. Pilato ka kuatele ukũlĩhĩso walua watiamẽla ku Kristu. Eye wa kũlĩhĩle okuti Yesu ka kuatele eko, kuenda ka velelepo vakuavo. Pole, Pilato ka kuatele umbombe, kuenda ka solele Suku yocili. Kuenje, ca lelukile oku yapuisiwa Leliapu. Petulu wa kuatele ukũlĩhĩso wasuapo, kuenda wa solele Suku. Pole, ka lekisile vali esuluviko kuenje, wa fetika oku kuata usumba, kuenda wa konyõha omo lielambalalo. Osimbu Yesu ka kuatiwile handi, Petulu wa popele hati: “Ndaño vosi va ku yanduluka haimo ame siu ku yanduluka.” (Mar. 14:29) Eye wa sukilile oku pandikisa kelambalalo a laikele oku pita lalio, loku kuama ongangu yukualosamo una wa kolelele ku Suku poku imba ocisungo hati: “Eci Yehova a kasi lame si kuata usumba. Omunu hẽ, o ndinga nye?” (Osa. 118:6) Yesu kuteke wa sulako womuenyo  waye palo posi, wa endele la Petulu kumue lovapostolo vakuavo vavali vocumbo co Gesemane. Omo okuti Petulu kumue la vakuavo ka va lavuluile, va pekela. Omo liaco, Yesu wa va pasula, kuenje wa va sapuila hati: “Lavululi, kuenda likutilili okuti eyonjo ka liu sangi.” (Mar. 14:38) Pole, Petulu wa pekela vali, kuenda wa kuata usumba omo lielambalalo.

13. Tu pondola ndati oku tamalãla kovisimĩlo vioku linga ovina ka via sungulukile?

¹³ Ulandu wa Pilato lowu wa Petulu, u pondola oku tu longisa ovina vikuavo vi kuete esilivilo. Voku pandikisa kelambalalo, mua kongela ovina vimue ndeci: Oku kuata ukũlĩhĩso wa suapo, oku lekisa umbombe, esuluviko, oku sola Yehova Suku loku u kuatela usumba okuti omanu havoko. Nda tua pamisa ekolelo lietu lukũlĩhĩso wa suapo, tu kuata utõi woku vangula ovina viatiamẽla kefendelo lietu. Nda tua ci linga, ci tu kuatisa oku pandikisa kelambalalo, kuenda oku yuvula oku kuatela usumba omanu. Omo liaco, tu yuvuli oku kolela kongusu yetu muẽle. Pole, tu lekisi umbombe, loku limbuka okuti tu sukila unene wa Suku, oco tu tamalãle kelambalalo. Tu sukilavo oku pinga espiritu lia Yehova vohutililo, loku ecelela okuti ocisola tu u kuetele, ci tu vetiya oku teyuila onduko yaye, kuenda olonumbi viaye. Tu sukila oku lipongiya osimbu ka tua pitile voseteko yimue. Omo liaco, oku lipongiya ciwa loku likutilila, ci pondola oku kuatisa omãla vetu oku tamalãla eci akamba vavo va va vetiya oku linga ovina ka via sungulukile.​—2 Va Kor. 13:7. a

YUVULA ONJANJO YOKU LIVETELA EVELO

14. Ovisimĩlo vipi Eliapu li yongola okuti ovio tu kuata viatiamẽla kakandu tua linga osimbu?

¹⁴ Olonjanja vimue, anyanga va siata oku petula ulivi vonjila yovinyama. Kulivi waco va kutilako onjanjo yimue yitito okuti yi kapiwa vonjila yaco. Eci ocinyama ci lamba kuti u kuete onjanjo yaco, ulivi u kupuka kuenje, ocilemo caco ci ponda ocinyama. Cimuamue haico ci pondola oku pita letu okuti, nda tu likapa ocilemo coku livetela calua evelo, tu kala ndocinyama ca fa vulivi. Momo nda tua sokolola calua akandu tua linga kosimbu, tu ‘sumua.’ (Tanga Osamo 38:3-5, 8.) Satana o tu vetiya oku sima okuti, ka tu pondola oku tambula ongecelo ya Yehova, kuenda ka tu tẽla oku pokola kolonumbi Viaye.

15, 16. O pondola ndati oku yuvula oku wila vonjanjo yoku livetela evelo?

¹⁵ O pondola oku yuvula ndati oku wila vonjanjo yaco? Nda wa linga ekandu limue linene, likekembela, oco o tumbulule ukamba wove la Yehova. Sandiliya akulu vekongelo, kuenda pinga ekuatiso kokuavo. (Tia. 5:14-16) Likolisilako oku pengulula ovina vĩvi wa linga. (2 Va Kor. 7:11) Nda wa tambula epindiso, ku ka sumue. Momo epindiso ondimbukiso yokuti, Yehova o ku sole. (Va Hev. 12:6) Yuvula oku pitulula ekandu wa lingile, kuenda ovisimĩlo vi ku vetiya oku lueya. Noke yoku likekembela, lekisa ekolelo kocisembi ca Yesu Kristu cina ci pondola oku tuvika akandu wa linga.​—1 Yoa. 4:9, 14.

¹⁶ Vamanji vamue, va siata oku amamako oku livetela evelo omo liakandu ana Yehova a ecela ale. Nda o liyaka locitangi caco, ivaluka okuti Yehova wa ecela Petulu lovapostolo vakuavo, omo lioku yanduluka Omõla waye Yesu, una a sole calua, vepuluvi a sukilile ekuatiso. Yehova wa ecela ulume una wa tundisiwile  vekongelo lio ko Korindo, omo lioku linga ekandu limue linene liukahonga okuti, noke wa likekembela. (1 Va Kor. 5:1-5; 2 Va Kor. 2:6-8) Embimbiliya li tukula omanu vamue va lingile akandu anene okuti, va likekembela, kuenda Suku wa va ecela.​—2 Asa. 33:2, 10-13; 1 Va Kor. 6:9-11.

17. Ocisembi ci kuete esilivilo lie kokuetu?

¹⁷ Yehova o pondola lika oku ecela loku ivalako akandu wa linga kosimbu nda wa likekembela lutima wosi, loku tava kohenda yaye. Ku ka sime okuti ocisembi ca Yesu, ka ci pondola oku tuvika akandu ove. Nda wa kuata ovisimĩlo viaco, o ka kupukila vonjanjo ya Satana. Ndaño Eliapu li yongola okuti o kuata ovisimĩlo viaco pole, ocisembi ca Yesu ci pondola oku tuvika akandu omanu vosi va lueya, nda va likekembela. (Olosap. 24:16) Oku kolela kocisembi, ci tepulula ocilemo coku livetela evelo kuenda ci ku ĩha ongusu yoku amamako oku vumba Suku lutima wove wosi, lolondunge viove, kuenda omuenyo wove wosi.​—Mat. 22:37.

KA TU KASI VONUMBI YATUTU A SATANA

18. Tu yuvula ndati olonjanjo Vieliapu?

¹⁸ Satana wa siata oku tu kapela olonjanjo vialua oco tu kuatiwe laye. Omo okuti ka tu kasi vonumbi yatutu a Satana Eliapu, tu pondola oku yuvula oku yapuisiwa laye. (2 Va Kor. 2:10, 11) Nda poku liyaka lovitangi tua likutilila loku pinga olondunge, ka tu wila volonjanjo viaye. Ndonge Tiago wa popia hati: “Nda umue pokati kene wa kamba olondunge a pinge ku Suku, u ecaeca komanu vosi ocali, halocikundoko, kuenje vi eciwa kokuaye.” (Tia. 1:5) Tu sukila oku kapako ovina tua pinga vohutililo, poku linga elilongiso lio pokolika, kuenda oku pokola Kondaka ya Suku. Elilongiso Liembimbiliya lia sokiyiwa lukuenje wa kolelua haeye wa lunguka, li ecelela oku limbuka olonjanjo via siata oku kapiwa Leliapu, kuenda li tu kuatisa oku vi yuvula.

19, 20. Momo lie tu sukilila oku suvuka evĩho?

¹⁹ Oku likutilila loku lilongisa Embimbiliya, ci tu vetiya oku sola ovina viwa. Handi vali, ocisola caco ci tu kuatisa oku yuvula ovina vĩvi. (Osa. 97:10) Oku sokolola ovitangi vi tunda koku kuata olonjongole vĩvi, ci tu kuatisa oku vi yuvula. (Tia. 1:14, 15) Nda tua lilongisa oku suvuka eci cĩvi, loku sola eci ciwa, ka tu yapuisiwa lolonjanjo Satana a siata oku tu kapela.

²⁰ Tu eca olopandu ku Suku, omo a siata oku tu kuatisa oco ka tu ka wile volonjanjo via Satana! Yehova o tu popela ‘kevĩho’ lia Satana lekuatiso liespiritu liaye, Ondaka yaye, kuenda ocisoko caye. (Mat. 6:13) Vocipama ci kuãimo, tu ka lilongisa ndomo tu pondola oku yuvula olonjanjo vikuavo vivali Eliapu lia siata oku kuama, oco a yapuise afendeli va Yehova.

[Atosi pombuelo yamẽla]

[Apulilo Elilongiso]

[Elitalatu kemẽla 21]

Upopi ka wa sungulukile u pondola oku nena ovitangi vekongelo

[Elitalatu kemẽla 24]

O pondola oku yuvula oku livetela evelo