Tamalãla Kuenda Yuvula Atutu A Satana!

‘Tamalãla katutu Eliapu.’​—VA EFE. 6:11.

O TAMBULULA NDATI?

Ufendeli wa Yehova o pondola ndati oku yuvula oku yonjiwa locipululu covokuasi?

Nye ci pondola oku kuatisa Akristão olohueli oku yuvula eyonjo liukahokolo?

Momo lie ci kuetele esilivilo oku yuvula ocipululu covokuasi lukahonga?

1, 2. (a) Momo lie Satana ka kuetele ohenda lolombuavekua kumue ‘lolomeme vikuavo’? (b) Ayonjo api Satana a siata oku kapa tu konomuisa vocipama cilo?

 SATANA ELIAPU, ka kuete ohenda lomanu, ca piãla enene afendeli va Yehova. Eye wa siata oku linga uyaki Lakristão olombuavekua va kasi handi palo posi. (Esit. 12:17) Momo va kuete utõi woku kundila omanu esapulo Liusoma, kuenda va kasi oku lekisa okuti Satana Eliapu, eye ombiali yoluali lulo. Eliapu ka li solevo “olomeme vikuavo” vina vi kasi oku kuatisa olombuavekua okuti, vi lavoka oku kuata omuenyo ko pui. Pole, Eliapu ka li kuete elavoko liaco. (Yoa. 10:16) Omo liaco, li kuete onyeño yalua! Ci kale okuti tu kuete elavoko lioku kala palo posi, ale lioku enda kilu, Satana ka tu yonguila ekalo liwa. Ocimãho caye oku nyõla ekalo lietu.​—1 Pet. 5:8.

² Oco Satana a tẽlise ocimãho caye, wa siata oku kapa olonjanjo vialua. Omo okuti wa tekãvisa ovitima viomanu vana ka va fendela Yehova, ovo ka va tava oku va kundila olondaka viwa, kuenda ka va tẽla oku limbuka ayonjo aco. Satana Eliapu wa siatavo oku yapuisa vana va tava kesapulo Liusoma. (2 Va Kor. 4:3, 4) Ocipama ca pita, ca lekisa ndomo tu pondola oku yuvula olonjanjo vitatu via Satana ndeci: (1) Upopi ka wa sungulukile, (2) usumba lelambalalo, kuenda (3) oku livetela evelo. Omo liaco, tu konomuisi ndomo tu pondola oku yuvula olonjanjo vikuavo vivali ndeci:​—Ovokuasi, kuenda eyonjo lioku linga ukahokolo.

OCIPULULO COVOKUASI, ONJANJO YIMUE YI TOTOMISA

3, 4. Oku sakalala calua lovina violuali lulo ku vetiya ndati omunu oku pitisa kovaso ovokuasi?

³ Vocindekaise Yesu a linga, wa tukula ombuto ya kũlĩwa pokati kocambanda. Eye, wa tukulavo omunu o yevelela ondaka, pole, ‘oku sakalala calua lovina violuali  lulo, loku tiamisila utima kovokuasi, ku totomisa ondaka kuenje, omunu waco ka imi apako.’ (Mat. 13:22) Satana unyãli wetu, wa siata oku yonja omanu lovokuasi.

⁴ Kuli ovina vivali vi pondola oku totomisa ondaka. Cimue pokati kovina viaco, ‘oku sakalala calua lovina violuali lulo.’ Koloneke vilo ‘viohali, kuli ovina vialua vi pondola oku ku nenela asakalalo. (2 Tim. 3:1) Omo okuti ovina via tĩla calua, kuenda ka calelukile oku kuata upange woku nganyala olombongo, pamue ka ci leluka oku landa ovina tu yongola. Citava okuti, o sakalalavo lovina vi keya kovaso yoloneke, kuenje o lipula ndoco: ‘Eci ndi liwekapo oku talavaya, ndi ka kuata hẽ olombongo ndi sukila?’ Asakalalo aco, a siata oku vetiya omanu oku sandiliya ovokuasi, loku sima okuti olombongo viaco vi ka va nenela ekalo liwa kovaso yoloneke.

5. ‘Ocipululu covokuasi’ ci pondola ndati oku tu yapuisa?

⁵ Ocitangi cikuavo Yesu a tukula,​—‘oku tiamisila utima kovokuasi.’ Ovina via tukuiwa ndeti, vi pondola oku totomisa ondaka. Embimbiliya li lekisa okuti ‘olombongo, vi pondola oku tu kuatisa oku linga ovina vimue.’ (Uku. 7:12) Pole, tu sukila oku yuvula oku tiamisila utima kovokuasi. Omanu valua va siata oku limbuka okuti, vana va tiamisila lika utima koku sandiliya ovokuasi, va yapuisiwa locipululu. Vamue pokati kavo, va linga apika vukuasi.​—Mat. 6:24.

6, 7. (a) Ocipululu covokuasi ci pondola ndati oku yapuisa omunu kupange waye? (b) Ovina vipi Ukristão a sukila oku konomuisa nda o kisikiwa oku talavaya olowola vialua kupange?

⁶ Pamue omunu ka limbuka ndomo a fetika oku kuata onjongole yoku kala ohuasi. Kũlĩhĩsa ulandu owu: Citava okuti cime cove kupange oku sapuila hati: “Ndi kuete esapulo limue liwa! Kaliye tua tambula elaleko lioku linga upange umue okuti, tu ka tambula olombongo vialua. Omo liaco, vokuenda kuolosãi vi kuãimo, o ka talavaya olowola vialua. Pole, ndi ku likuminya okuti, o ka tambula olombongo vialua omo lialikolisilo ove.” Onjila yipi o sukila oku nõlapo nda va ku sapuila ondaka yaco? Ocili okuti oku eca ovina epata li sukila, ocikele cimue cinene, pole, ocikele caco hacoko lika o kuete. (1 Tim. 5:8) Kuli ovina vialua o sukila oku linga. Olowola viñami o sukila oku pesila kovina viaco? Upange wove woku nganyala olombongo u ku tateka hẽ oku tẽlisa ovikele viatiamẽla kovina viespiritu ndeci, oku endaenda kolohongele, kuenda oku linga Efendelo Liepata?

⁷ Sokolola ovina o tenda okuti ovio via velapo kokuove. Anga hẽ upange wove u ku kuatisa oku nganyala olombongo vialua, ale u pondola oku nyõla ekalo liove kespiritu?  Onjongole yoku kuata olombongo vialua yi ku tateka hẽ oku pitisa kovaso Usoma wa Suku? Wa limbuka hẽ ndomo ocipululu covokuasi a pondola oku nyõla ekalo liove kespiritu leli liepata liove? Nda o kuete ocitangi caco, o pondola oku yuvula ndati oku yapuisiwa lovokuasi?​—Tanga 1 Timoteo 6:9, 10.

8. Ovolandu api Ovisonehua a tu kuatisa oku kũlĩhĩsa ekalo liomuenyo wetu?

⁸ Oco o yuvule oku yapuisiwa lovokuasi, o sukila oku kũlĩhĩsa ekalo liomuenyo wove. Yuvula oku kala nda Esau, una ka velisilepo ovina viespiritu omo liovilinga viaye! (Efet. 25:34; Va Hev. 12:16) O sukilavo oku yuvula ocituwa cumalẽhe una wa lalekiwa oku landisa ovina viaye viosi okuti vi kuatisa olohukũi, oco a kuame Yesu. Pole, eci umalẽhe a yeva ondaka yaco, ‘wa enda lesumuo, momo wa kuatele ovokuasi alua.’ (Mat. 19:21, 22) Omo okuti umalẽhe waco wa yapuisiwa locipululu covokuasi, wa pumba esumũlũho lioku kala ondonge ya Yesu okuti, eye ulume wa velapo wa kala palo posi! Omo liaco, lavulula oco ku ka pumbe esumũlũho lioku kala ondonge ya Yesu Kristu.

9, 10. Nye osima catiamẽla koku kuata ocipululu covokuasi ndomo Embimbiliya li ci popia?

⁹ Pokola kelungulo lia Yesu liatiamẽla koku yuvula oku sakalala calua lovokuasi liokuti: “Ko ka kali lohele, hoti: ‘Tu lia nye?’ pamue ‘tu nyua nye?’ pamue ‘tu wala nye?’ Momo ovina viaco ovio vakualofeka va sakalala ño lavio oku vi sanda. Ene puãi, Isiene o kasi kilu wa kũlĩha ale okuti . . . ovina evi viosi, [ovio vu sukila].”​—Mat. 6:31, 32; Luka 21:34, 35.

¹⁰ Oco ka tu ka wile vonjanjo yoku tiamisila lika utima kovokuasi, tu sukila oku kuata ovisimĩlo via sunguluka ndevi Viusonehi umue Wembimbiliya o tukuiwa hati, Agur. Eye wa popia hati: ‘Si ka kale ohukũi, ale ohuasi. Nyihe lika ovina ndi sukila.’ (Olosap. 30:8) Ndaño Agur wa kũlĩhĩle okuti olombongo vi kuatisa oku linga ovina vimue, pole, vi vetiya oku tiamisila utima kovokuasi. Ivaluka okuti, oku sakalala calua lovina violuali lulo, loku tiamisila utima kovokuasi, ci nyõla ekalo liwa kespiritu. Handi vali, ovokuasi a pondola oku nyana otembo longusu yove, kuenje, ku kuata vali ombili yoku pitisa kovaso Usoma wa Suku. Omo liaco, yuvula oku yapuisiwa leyonjo lia Satana lioku tiamisila lika utima kovokuasi!​—Tanga Va Heveru 13:5.

UKAHOKOLO​—U KASI NDOKUEVE YA SITIKIWA

11, 12. Ukristão o pondola ndati oku wila vukahokolo kupange waye woku nganyala olombongo?

¹¹ Nda anyanga va yongola oku kuata ocinyama cimue ca pama, pamue va fẽla okueve ya longa vonjila yovinyama. Ovo va yala oviti kilu liokueve kuaco, kuenje va yambelako lamẽla ale lowangu, kuenda va sitikako leve. Satana wa siatavo oku kapa onjanjo yimue ndeyi ya tukuiwa ndeti. Onjanjo yaco, ukahonga. (Olosap. 22:14; 23:27) Vamanji vamue, va siata oku kuatiwa lonjanjo yaco omo lioku linga ovina vimue vi va vetiya oku wila vukahonga. Vamanji vamue va kuele, va siata oku linga ukahokolo, omo lioku kuatela ocisola omunu umue locisimĩlo coku namulãla laye.

¹² Citava okuti manji umue o kuatela ocisola omunu umue locisimĩlo coku namulãla laye kupange waye. Esapulo limue lia lekisa okuti, alume valua kuenda akãi va siata oku linga ukahokolo lakamba vavo vo kupange. Anga hẽ upange  wove woku nganyala olombongo u kisika oku talavaya kumue lalume kuenda akãi? Nda oco ocitangi o liyaka laco, ukamba upi o kuete lavo? Kupange wove, wa siata hẽ oku yuvula oku kuatela ocisola omanu vamue locisimĩlo coku namulãla lavo? Citava okuti manji umue ukãi ofetika oku sapela lekamba liaye ulume kupange, catiamẽla kovitangi a siata oku kuata volohuela viaye. Pamue, manji umue ulume poku sapela lekamba liaye ukãi kupange, o lisandela esunga poku popia hati: “Eye wa ndi kapako calua, kuenda wa siata oku ndi yevelela lutate eci ndi sapela laye. Eye o ndi sole calua. Ndi yongola okuti, ukãi wange o ndi kuatela ocisola ndeci cekamba liange!” Wa limbuka hẽ ndomo ovisimĩlo viaco vi pondola oku vetiya manji oku wila veyonjo liukahokolo?

13. Oku kuatela ocisola omunu umue locisimĩlo coku namulãla laye, ci pondola oku li sanduila ndati vekongelo?

¹³ Ocituwa coku kuatela ocisola omunu umue locisimĩlo coku namulãla laye, ci pondolavo oku li sanduila vekongelo. Kũlĩhĩsa ulandu owu: Manji Daniel lukãi waye Sara, a va kala akundi va velapo. Manji Daniel, wa kala ‘ukulu umue wekongelo okuti, wa enda oku tava ovikele viosi a tambula.’ Eye wa longisa Embimbiliya kakuenje vatãlo kuenda pokati kavo vatatu va papatisiwa ale. Vamanji yaco va papatisiwa va sukilile ekuatiso. Osimbu manji Daniel a kala oku tẽlisa ovikele vikuavo vekongelo, ukãi waye Sara wa enda oku kuatisa vamanji yaco. Ovo va sukilile elembeleko, kuenje manji Sara wa va lembeleka. Pole, manji Sara wa sukililevo omunu o lekisa ocisola kokuaye, kuenje, olondonge viulume​—waye Daniel via lekisa ocisola caco kokuaye. Kuenje, ekalo liaco, lia linga onjanjo. Manji Daniel wa popia hati: “Noke yolosãi vimue ukãi wange wa honguele kespiritu, kuenda kovisimĩlo viaye. Eye wa kuata ovisimĩlo viaco omo sia endele oku lekisa ocisola kokuaye, noke ocitangi caco ceya oku livokiya calua. Ukãi wange wa linga ukahokolo la umue pokati kakuenje nda longisa Embimbiliya. Ndaño okuti ukãi wange wa honguele kespiritu, sia ci limbukile, omo lioku sakalala lika lovikele viange vekongelo.” O pondola oku yuvula ndati ocitangi caco?

14, 15. Ovina vipi vi pondola oku kuatisa Akristão va kuele oku yuvula oku linga ukahokolo?

¹⁴ Oco o yuvule ukahokolo, o sukila oku kapako esilivilo liohuminyo yolohuela. Yesu wa popia hati: “Eci ca tokekisa Suku omunu ka ka ci [tepe].” (Mat. 19:6) Ku ka sime okuti ovikele o kuete vekongelo ovio lika via velapo okuti ukãi wove ci sule. Omo liaco, yuvula oku kala ocipãla lohueli yove poku pesila otembo yalua kovina ka vi kuete esilivilo, momo oku ci linga, ci honguisa olohuela viove, kuenda ci koka eyonjo lioku linga ekandu linene.

¹⁵ Nda ove ukulu umue wekongelo wa kapako hẽ ocikele cove coku lava ocunda? Upostolo Petulu wa soneha ndoco: “Lavi ocunda ca Suku co kundikilui, halocikukuiko, puãi momo vu kuete utima waco, hamekondako liocipululu conganyu, te lutima wombili ndeci Suku o yonguili.” (1 Pet. 5:2) Kapako vamanji vosi vekongelo. Ku ka lekise lika okuti, ove wukulu umue uwa vekongelo, pole tẽlisavo ocikele cove coku kala ulume umue uwa. Oku sakalala lika loku kuatisa vamanji vekongelo osimbu ukãi wove konjo “a sumua,” ci nena ovitangi. Omo liaco, manji Daniel wa popia hati: “Ku ka sakalale lika loku tẽlisa ovikele viove vekongelo toke eci ivalako epata liove.”

16, 17. (a) Ovina vipi vamanji olohueli va sukila oku linga eci va kala kupange vi lekisa okuti va yuvula oku kuatela ocisola omunu umue locisimĩlo coku namulãla laye? (b) Tukula ulandu umue wa sandekiwa vutala Wondavululi, u pondola oku kuatisa Ukristão oku yuvula oku linga ukahokolo.

¹⁶ Vutala Wondavululi kuenda vo Despertai!, mu sangiwa olonumbi viwa via siata oku kuatisa vamanji olohueli oku yuvula eyonjo lioku linga ukahokolo. Vutala  Wondavululi 15 Yenyenye linene wo 2006, mu sangiwa elungulo li popia hati: “Kupange woku sanda eteku, kuenda kovitumãlo vikuavo, yuvula ukamba u tuala kukahokolo. Olonjanja vimue, oku talavaya toke kuteke voseketa yimuamue lulume ale lukãi, kua siata oku tuala omanu valua keyonjo liukahonga. Nda ove uhueli, lekisa ku vakuene okuti, ku yongola oku kuata ukamba ũvi lomanu vakuavo. Pole, lekisa uvangi waco kombangulo yove kuenda kovilinga. Omo okuti ove wa litumbika ku Yehova, yuvula ocituwa coku lekisa ocisola locisimĩlo coku namũlala. Yuvulavo oku wala uwalo u vetiya oloñei via vakuene. . . . Voseketa yove kupange, kapamo elitalatu liohueli yove kuenda liomãla vene. Nda wa ci linga, vakuene vaka limbuka okuti, wa velisapo epata liove. Kuka ecelele olombangulo lovituwa vi vetiya ukahokolo.”

¹⁷ Vo Despertai! yosãi ya Kupupu, yunyamo wo 2009, mua sandekiwa ocipama losapi hati: “Fidelidade conjugal​—o que realmente significa?” (Esumbilo pokati kolohueli li lomboloka nye?). Ocipama eci, ci lekisa okuti oku kuata lika ovisimĩlo vioku lipekela lomanu vamãle, ci vetiya oku linga ukahokolo. (Tia. 1:14, 15) Nda ove o kuele, olonjanja vialua sokiya oku tangela kumosi lukãi wove olonumbi vi lombolola ovina viatiamẽla kolohuela. Olohuela esokiyo limue li kola lia lingiwa la Yehova. Sanda otembo yoku sapela lohueli yove, ovina viwa vi lekisa okuti wa velisapo ovina vi kola.​—Efet. 2:21-24.

18, 19. (a) Ovitangi vipi vi tunda koku linga ukahokolo? (b) Nda olohueli vi pamisa olohuela viavo vi kuata onima yipi?

¹⁸ Nda wa siata oku vetiyiwa oku kuatela ocisola omunu umue locisimĩlo coku namulãla, sokolola ovitangi viyilila koku linga ukahonga kuenda ukahokolo. (Olosap. 7:22, 23; Va Gal. 6:7) Vana va linga ukahonga va sumuisa Yehova, kumue lohueli yavo, kuenda ovo muẽle. (Tanga Malakiya 2:13, 14.) Sokolola asumũlũho vamanji vana va lekisa ovituwa viwa va siata oku tambula. Ovo ka va ci lingila lika omo lielavoko va kuete lioku tambula omuenyo ko pui. Pole, va ci lingila ekalo liwa va kuete cilo, oku kongelamo utima wa yela.​—Tanga Olosapo 3:1, 2.

¹⁹ Ukualosamo wa imba ocisungo hati: “Ava va sole ovihandeleko viove va kasi lombembua yalua. Ka kuli eci ci tẽla oku va londuisa.” (Osa. 119:165) Omo liaco, amamako oku sanjukila ukũlĩhĩso Wembimbiliya, kuenda ‘endaenda lutate nda vakualondunge. Ku ka endaende ndava va kamba olondunge’ koloneke vilo via vĩha.’ (Va Efeso 5:15, 16) Satana wa siata oku kapa olonjanjo vialua oco a yapuise afendeli vocili. Pole, tua lipongiya oco tu liteyuile. Yehova wa siata oku tu ĩha ‘ovimalẽho viwa vi tu kuatisa oku ima ovisongo viosi viondalu yukuevĩho’!​—Va Efeso 6:11, 16.

[Atosi pombuelo yamẽla]

[Apulilo Elilongiso]

[Elitalatu kemẽla 26]

Ocipululu covokuasi apondola oku nyõla ekalo liomunu kespiritu. Ku ka ecelele oku yapuisiwa lovina viaco

[Elitalatu kemẽla 29]

Ocitiokoso ci pondola oku vetiya omunu oku linga ukahokolo