UPOSTOLO Paulu wa popia hati: “Ondaka ya Suku yi kasi lomuenyo.” (Va Hev. 4:12) Paulu poku tukula olondaka evi wa lekisa okuti, ondaka ya Suku yi kuete unene woku kuatisa omanu, kuenda oku pongolola omuenyo wavo.

Noke yoku fa kuovapostolo, eci olonanguluke vina via siapo efendelo liocili via tukuluka, omanu vamue va fetika oku kuata atatahãi atiamẽla kunene wesapulu Liembimbiliya. (2 Pet. 2:1-3) Kuenje, asongui vatavo esanda va fetika oku tenga Ondaka ya Suku lumbanda. Ulongisi umue o tukuiwa hati, Harry Y. Gamble wa popia hati: Omanu vamue poku tanga “ovinimbu Viembimbiliya, va vi tiamisila kumbanda.” Eye wa lekisa okuti, ocitunda cimue cetavo o tukuiwa hati Orígenes, wa kala kocita catatu, wa lombolola hati: “Omunu o kuatisiwa lika londaka ya Suku nda poku yi tanga o kongelamo umbanda.” Ulongisi ukuavo wa kala kocita cakuãla o tukuiwa hati John Chrysostom wa lombolola hati: “Eliapu ka li yongola okuti, omanu va enda vonjo mua sonehiwila Evanjeliu.” Eye wa popiavo hati, Omanu vamue, va siata oku sima okuti, oku soneha ovinimbu vimue Viembimbiliya vomota loku yi kapa posingo, ci va teyuila kovina vĩvi. Ulongisi ukuavo o tukuiwa hati Gamble, okuti wa lilongisa ovilongua vietavo Liokatolika, wa popia hati: “Augustine wa simĩle okuti, oku kapa kosi yopetu Evanjeliu lia Yoano poku pekela, ci tepulula evalo liutue!” Omanu vamue poku tanga ovinimbu Viembimbiliya, va enda oku vi tiamisila kumbanda. Ove hẽ o tava okuti Embimbiliya li kuete ovina vimue viatiamẽla kumbanda, ale o sima okuti poku li tanga li ku ĩha osoloti yi ku teyuila kovina vĩvi?

Kuli omanu vamue va siata oku sima okuti, Embimbiliya li pondola oku va kuatisa koku tãha. Va ci linga ndati? Va ci linga poku yulula Embimbiliya, kuenje va tanga ovinimbu va mola tete loku sima okuti, olondaka viaco vi pondola oku va songuila. Ulongisi Gamble wa popiavo hati, onjanja yimue, eci Augustine a yeva ondaka yomõla wa popia hati: “Yulula Embimbiliya kuenda tanga, yulula Embimbiliya kuenda tanga,” wa sima okuti, Suku eye wa tuma oku yulula Embimbiliya loku tanga ovinimbu a mola tete.

Ove hẽ wa yevele ale omanu vamue okuti nda va kuete ocitangi cimue va likutilila ku Suku Lembimbiliya lia yuluka loku sima okuti, ocinimbu va mola tete ci va kuatisa oku tetulula ocitangi caco? Citava ovina viaco va vi linga lovisimĩlo via sunguluka, pole, Akristão vocili, ka va sukila oku kuama onjila yaco oco va kuatisiwe Lovisonehua.

Yesu wa sapuila olondonge viaye hati, o ka tuma ‘espiritu sandu, oco li va kuatise.’ Kuenje, wa amisako hati: “Espiritu sandu liu longisi ovina viosi, kuenda liu wivaluisi ovina viosi nda popia lene.” (Yoa. 14:26, NW) Pole, omanu vakuakutãha, ka va sukila oku kuata ukũlĩhĩso Wovisonehua.

Koloneke vilo, omanu vamue va siata oku sima okuti, Embimbiliya li pondola oku va kuatisa koku tãha. Pole, Ondaka ya Suku yi pisa vana va kuete ocituwa coku tãha. (Ovis. 19:26; Esin. 18:9-12; Ovil. 19:19) Ndaño okuti ‘Ondaka ya Suku yi kasi lomuenyo kuenda yi kuete unene,’ pole, tu sukila oku yuvula ovisimĩlo ka via sungulukile poku yi tanga. Omanu vana va yongola oku kuata ukũlĩhĩso Wembimbiliya, ka va sukila oku tanga velivulu limue liokutãha. Momo ukũlĩhĩso Wembimbiliya, u va kuatisa oku kuata ekalo liwa. Ukũlĩhĩso waco wa siata oku kuatisa omanu valua oku siapo ovituwa ka via sungulukile, loku kuata ovituwa viwa okuti, va pamisa epata liavo, oco va kuate ukamba la Yehova, Usovoli Wembimbiliya.